មេដឹកនាំ​វៀតណាម​គាំទ្រ លោក ហ៊ុន ម៉ាណែត ជា​បេក្ខភាព​នាយក​រដ្ឋមន្ត្រី

ដោយ សុជីវី
2022.08.10
Share on WhatsApp
Share on WhatsApp
មេដឹកនាំ​វៀតណាម​គាំទ្រ លោក ហ៊ុន ម៉ាណែត ជា​បេក្ខភាព​នាយក​រដ្ឋមន្ត្រី លោក ហ៊ុន ម៉ាណែត ជា​អគ្គ​មេបញ្ជាការ​រង​នៃ​កងយោធពលខេមរភូមិន្ទ មេបញ្ជាការ​កងទ័ព​ជើង​គោក និង​លោក ង្វៀន ស៊ុន ហ្វុក (Nguyen Xuan Phuc) ប្រធាន​រដ្ឋ​នៃ​សាធារណរដ្ឋ​សង្គម​និយម​វៀតណាម ក្នុង​ជំនួប នៅ​ថ្ងៃ​ទី៩ ខែ​សីហា ឆ្នាំ២០២២។
រូប៖ ហ្វេសប៊ុកលោក ហ៊ុន ម៉ាណែត

អ្នក​តាមដាន​ស្ថាន​ការណ៍​នយោបាយ​នៅ​កម្ពុជា វាយ​តម្លៃ​ថា ការ​ផ្ទេរ​អំណាច​ត​វង្ស​ត្រកូល​ពី​លោក ហ៊ុន សែន ទៅ​កូន​ប្រុស គឺ​លោក ហ៊ុន ម៉ាណែត អាច​ដំណើរ​ការ​ទៅ​បាន​កាន់​តែ​រលូន និង​ឆាប់​រហ័ស នៅ​ពេល​បាន​ការ​គាំទ្រ​ពី​មេ​ដឹកនាំ​វៀតណាម។

សារព័ត៌មាន EAC និង​សារព័ត៌មាន​កម្ពុជា​ថ្មី រាយការណ៍​កាល​ពី​ថ្ងៃ​ទី១០ ខែសីហា ថា មេ​ដឹកនាំ​វៀតណាម​គាំទ្រ លោក ហ៊ុន ម៉ាណែត ជា​បេក្ខភាព​នាយក​រដ្ឋមន្ត្រី។ ការ​គាំទ្រ​នេះ​ធ្វើ​ឡើង​នៅ​ក្នុង​ពេល លោក ហ៊ុន ម៉ាណែត ទៅ​បំពេញ​ទស្សនកិច្ច នៅ​វៀតណាម ដើម្បី​ពង្រឹងទំនាក់ទំនងរវាងប្រទេសទាំង២ ពិសេស​វិស័យ​កងទ័ព ដោយ​បាន​ជួប​ជាមួយ​ប្រធានាធិបតី​វៀតណាម លោក ង្វៀន សួនហ៊្វុក រដ្ឋមន្ត្រី​ក្រសួង​ការពារ​ជាតិ​វៀតណាម និង​មន្ត្រី​ជាន់​ខ្ពស់​បក្ស​កុម្មុយនិស្តនិយម​វៀតណាម។

ក្នុង​ដំណើរ​ទស្សនកិច្ច ទៅ​ប្រទេស​វៀតណាម ដែល​ចាប់​ផ្ដើម​តាំង​ពី​ថ្ងៃ​ទី៧ ខែសីហា លោក ហ៊ុន ម៉ាណែត ជា​អគ្គ​មេបញ្ជាការ​រង​នៃ​កងយោធពលខេមរភូមិន្ទ មេបញ្ជាការ​កងទ័ព​ជើង​គោក ដែល​បាន​ការ​សាទរ និង​គាំទ្រ បេក្ខភាព​នាយក​រដ្ឋមន្រ្តី​សម្រាប់​ថ្ងៃ​អនាគត​បាន​ថ្លែង​អំណរគុណ​វៀតណាម ដែល​បាន​ជួយ​កម្ពុជា និង​អះអាង​ថា លោក ហ៊ុន សែន ឪពុក​របស់​លោក​បាន​រួម​ចំណែក​ជួយ​អប់រំ​មនុស្សជំនាន់ក្រោយនៃប្រទេសទាំង២ និង​បាន​លុបបំបាត់ ឬ​កម្ទេច​រាល់​ការ​បំភ័ន្ត​បំភ្លៃ​ចំណង​ទាក់ទង​នៃ​ប្រទេស​ទាំង​ពីរ។

សារព័ត៌មាន​អនឡាញ EAC បាន​រាយការណ៍​ថា ប្រធានាធិបតី​វៀតណាម លោក ង្វៀន ស៊ួនហ្វុក (Nguyen Xuan Phuc) បាន​សាទរ និង​គាំទ្រ លោក ហ៊ុន ម៉ាណែត ដែល​ត្រូវ​បាន​អង្គ​សន្និបាត​គណៈកម្មាធិការ​កណ្ដាល​គណបក្ស​ប្រជាជន​កម្ពុជា​បោះ​ឆ្នោត​ជា​បេក្ខភាព​នាយក​រដ្ឋមន្ត្រី​នា​ពេល​អនាគត។ ចំណែក​សារព័ត៌មាន​ក្នុង​ស្រុក​វៀតណាម (Vietnam News Agency) បាន​ចុះ​ផ្សាយ​ថា លោក ង្វៀន ស៊ួនហ្វុក សង្ឃឹម​ថា ដំណើរ​ទស្សនកិច្ច​របស់​លោក ហ៊ុន ម៉ាណែត នឹង​ជួយ​ជ្រោមជ្រែង​ឱ្យ​ទំនាក់ទំនង​កម្ពុជា និង​វៀតណាម​មាន​ជ័យជម្នះ​បន្ថែម​ទៀត។ លោក ង្វៀន ស៊ួនហ្វុក ក៏​បាន​ប្រកាស​គាំទ្រ​ដល់​កម្ពុជា​បន្ត​ទៀត​ក្នុង​នាម​ជា​អ្នក​ជិត​ខាង​ល្អ។

ជាមួយ​គ្នា​នេះ សារព័ត៌មាន​កម្ពុជា​ថ្មី​បាន​ចុះ​ផ្សាយ​ដែរ​ថា អនុប្រធាន​អគ្គសេនាធិការ នៃ​កងទ័ព​ប្រជាជន​វៀតណាម លោក ង្វៀន វ៉ាន់ងៀ ក៏​បាន​សាទរ និង​គាំទ្រ លោក ហ៊ុន ម៉ាណែត ដែល​ត្រូវ​បាន​ជ្រើសតាំង​ជា​បេក្ខភាព​នាយក​រដ្ឋមន្ត្រី នា​ពេល​អនាគត​ដែរ។ ក្នុង​ដំណើរ​ទស្សនកិច្ច​នោះ​លោក ហ៊ុន ម៉ាណែត ក៏​បាន​ជួប​ជាមួយ​រដ្ឋមន្ត្រី​ការពារ​ប្រទេស​វៀតណាម លោក ផ្វាន វ៉ាន់ហ្សាង (Phan Van Giang)។ ក្នុង​នោះ​លោក ហ៊ុន ម៉ាណែត បាន​ស្នើសុំ​ឱ្យ​រដ្ឋមន្ត្រី​ក្រសួង​ការពារ​ប្រទេស​វៀតណាម​ផ្តល់​ការ​គាំទ្រ​លើ​ទិសដៅ​សំខាន់ៗ នៃ​កិច្ច​សហប្រតិបត្តិការ​ក្នុង​កម្រិត​កងទ័ព​ជើង​គោក សំដៅ​ធ្វើ​យ៉ាង​ណា​បន្ត​ថែរក្សា​ចំណង​សាមគ្គីភាព មិត្តភាព ការ​ទុក​ចិត្ត​គ្នា និង​សហការ​គ្នា​ឱ្យ​បាន​ស្អិត​រមួត​បន្ថែម​ទៀត ដើម្បី​កសាង និង​ការពារ​ប្រទេស​ទាំង​ពីរ តាម​រយៈ​ការ​ធានា​បាន​នូវ​ព្រំដែន​សន្តិភាព និង​ការ​អភិវឌ្ឍ​រួម។

ក្នុង​ដំណើរ​ទស្សនកិច្ច​នោះ​ដែរ លោក ហ៊ុន ម៉ាណែត ក៏​បាន​ជួប​ជាមួយ​មន្ត្រី​ជាន់​ខ្ពស់​បក្ស​កុម្មុយនិស្ត​វៀតណាម លោក វ៉ូ វ៉ាន់ធឿង (Vo Van Thuong)។ បើ​តាម​សារព័ត៌មាន​វៀតណាម (VNA) នៅ​ចំពោះ​មុខ​លោក ហ៊ុន ម៉ាណែត លោក វ៉ូ វ៉ាន់ធឿង រម្លឹក​ថា បក្ស​កុម្មុយនិស្ត​វៀតណាម និង​បក្ស​ប្រជាជន​កម្ពុជា​មាន​ឫស​គល់​តែ​មួយ​ចេញ​ពី​បក្ស​កុម្មុយនិស្ត​ឥណ្ឌូចិន។ លោក​រំពឹង​ថា គណបក្ស​ទាំង២ នឹង​បន្ត​រួម​គ្នា និង​គាំទ្រ​គ្នា​ទៅ​វិញ​ទៅ​មក ដើម្បី​ការ​រីក​លូតលាស់​ទៅ​ថ្ងៃ​មុខ​ទៀត។

ទាក់ទង​នឹង​ដំណើរ​ទស្សនកិច្ច​របស់​លោក ហ៊ុន ម៉ាណែត ទៅ​ប្រទេស​វៀតណាម​នេះ អ្នក​វិភាគ​នយោបាយ លោក គឹម សុខ ដែល​កំពុង​រស់​នៅ​ប្រទេស​ហ្វាំងឡង់ (Finland) មាន​ទស្សនៈ​ថា ដំណើរ​ការ​ផ្ទេរ​អំណាច​ពី​លោក ហ៊ុន សែន ទៅ​លោក ហ៊ុន ម៉ាណែត ទំនង​កំពុង​ជួប​បញ្ហា​ផ្ទៃក្នុង ដែល​ចាំបាច់​លោក​ត្រូវ​ប្រឹងប្រែង​រក​ការ​គាំទ្រ​ពី​វៀតណាម ដើម្បី​ឱ្យ​ដំណើរ​ការ​ផ្ទេរ​អំណាច​អាច​ធ្វើ​ទៅ​បាន​ងាយ​ស្រួល និង​ឆាប់​រហ័ស៖ «ខ្ញុំ​គិត​ថា លោក ហ៊ុន ម៉ាណែត ទៅ​សន្យា​ជាមួយ​មេ​ដឹកនាំ​វៀតណាម​ថា ត្រូវ​ទៅ​គោរព​តាម​វៀតណាម​លើ​ចំណុច​ណា​ខ្លះ ដែល​វៀតណាម​ចង់​បាន ដើម្បី​ស្វែងរក​ការ​ធានា​ឱ្យ​វៀតណាម​ហ្នឹង គាំទ្រ​ផែនការ​ផ្ទេរ​អំណាច ពី​លោក ហ៊ុន សែន ទៅ​លោក ហ៊ុន ម៉ាណែត ហើយ​ទំនង​ជា​ផែនការ​ហ្នឹង ជិត​អនុវត្ត​ហើយ នៅ​ពេល ដែល​លោក ហ៊ុន ម៉ាណែត ទៅ​ជួប​សន្យា​មេ​ដឹកនាំ​វៀតណាម​ផ្ទាល់ នូវ​ចំណុច​ទាំង​ឡាយ ដែល​គាត់​ត្រូវ​គោរព​តាម​មហិច្ឆតា​របស់​វៀតណាម ដែល​ចង់​លេប​យក​កម្ពុជា​ហ្នឹង»

ចំណែក​តំណាង​រាស្ត្រ​ជាប់​ឆ្នោត​នៃ​គណបក្ស​សង្គ្រោះ​ជាតិ លោក អ៊ុំ សំអាន ប្រាប់​វិទ្យុ​អាស៊ី​សេរី នៅ​ថ្ងៃ​ទី១០ សីហា ថា វៀតណាម ជា​បង​ធំ​អាច​សម្រប​សម្រួល​ផ្ទៃក្នុង​គណបក្ស​ប្រជាជន​កម្ពុជា​មិន​ឱ្យ​ប្រឆាំង​ទាស់​បេក្ខជន​នាយក​រដ្ឋមន្ត្រី​លោក ហ៊ុន ម៉ាណែត នៅពេលអនាគត ។ លោក អ៊ុំ សំអាន យល់​ឃើញ​ថា នៅ​ពេល​រដ្ឋាភិបាល​ខ្មែរ ដឹង​គុណ​វៀតណាម មិន​ចេះ​ចប់ ត​កូន​ត​ចៅ​បែប​នេះ នឹង​ធ្វើ​ឱ្យ​កម្ពុជា​បាត់បង់​ម្ដង​បន្តិចៗ និង​មាន​អន្តោប្រវេសន៍​វៀតណាម​ខុស​ច្បាប់​កាន់​តែ​ច្រើន ។ លោក​ព្រួយ​បារម្ភ​ថា កម្ពុជា​អាច​នឹង​មាន​វាសនា​ត្រូវ​បាត់បង់​ដូច​កម្ពុជា​ក្រោម បើ​មិន​យក​ចិត្ត​ទុក​ដាក់ ចំពោះ​បញ្ហា​វៀតណាម។ ដូច​លោក គឹម សុខ ដែរ​លោក អ៊ុំ សំអាន អះអាង​ថា លោក ហ៊ុន សែន មិន​ទុក​ចិត្ត​ផ្ទៃក្នុង​របស់​គណបក្ស​ប្រជាជន​ឡើយ ព្រោះ​មាន​ការ​រង្គោះរង្គើ​ខ្លាំង៖ «លោក ហ៊ុន សែន គាត់​មិន​ទុក​ចិត្ត​ផ្ទៃក្នុង​គណបក្ស​ប្រជាជន​ទេ បើ​សិន​គាត់​ទុក​ចិត្ត គាត់​ប្រាកដ​ជា​ប្រគល់​តំណែង​នាយក​រដ្ឋមន្ត្រី​ទៅ​ឱ្យ​លោក ស ខេង ឬ​អ្នក​ដទៃ​ទៀត ក្នុង​គណបក្ស​ប្រជាជន​ហើយ នៅ​ពេល​ដែល​គាត់​ឈប់​ធ្វើ​ជា​នាយក​រដ្ឋមន្ត្រី ក៏​ប៉ុន្តែ​គាត់​អត់​ទុកចិត្ត​ផ្ទៃក្នុង​គណបក្ស​ប្រជាជន​ហ្នឹង បើ​សិន​គាត់​ប្រគល់​តួនាទី​ទៅ​ឱ្យ​អ្នក​ផ្សេង​ទៀត នៅ​ពេល​គាត់​ឈប់​ធ្វើ​នាយក​រដ្ឋមន្ត្រី​អាច​គាត់​ទោស​គាត់​ពី​បទ​ឧក្រិដ្ឋ​ណា​មួយ​អីចឹង ពីព្រោះ​គាត់​បាតដៃ​ប្រឡាក់​ឈាម ។ ដូច្នេះ គាត់​ទុក​ចិត្ត​តែ​កូន​គាត់​ទេ គាត់​យល់​ថា មាន​តែ​កូន​គាត់​ទេ ដែល​អាច​ការពារ​គាត់​ឱ្យ​រួច​ផុត​ពី​ការ​កាត់​ទោស​នៅ​ពេល​អនាគត ដែល​គាត់​ឈប់​ធ្វើ​នាយក​រដ្ឋមន្ត្រី។ អ្នក​ដទៃ​ទៀត ក៏​គេ​ចង់​ក្លាយ​ជា​នាយក​រដ្ឋមន្ត្រី​ដែរ ដូច​លោក ស ខេង ឬ​មន្ត្រី​ដទៃ​ទៀត នៅ​ពេល​ដែល​លោក ហ៊ុន សែន ឈប់​ធ្វើ​នាយក​រដ្ឋមន្ត្រី។ ប៉ុន្តែ​លោក ហ៊ុន សែន គាត់​អត់​ចង់​ប្រគល់​តួនាទី​ហ្នឹង​ទៅ​ឱ្យ​អ្នក​ដទៃ អ៊ីចឹង​ផ្ទៃក្នុង​គណបក្ស​ប្រជាជន គេ​មិន​សប្បាយ​ចិត្ត​ដែរ។ ដូច្នេះ​ហើយ បាន​ជា​លោក ហ៊ុន ម៉ាណែត ត្រូវ​ពឹង​វៀតណាម ដើម្បី​ធ្វើ​ម៉េច​ឱ្យ​គាំទ្រ​ខ្លួន​ជា​នាយក​រដ្ឋមន្ត្រី​នា​ពេល​អនាគត ដោយ​សម្រប​សម្រួល​ផ្ទៃក្នុង​គណបក្ស​ប្រជាជន»

លោក អ៊ុំ សំអាន ថា កត្តា​មិន​ទុក​ចិត្ត​ផ្ទៃ​ក្នុង​គណបក្ស​ប្រជាជន ធ្វើ​ឱ្យ​លោក ហ៊ុន សែន សម្រេច​ចិត្ត​វិសោធនកម្ម​រដ្ឋធម្មនុញ្ញ​លោក​ទី១០ ដែល​ធានា​ថា លោក ហ៊ុន ម៉ាណែត អាច​ធ្វើ​ជា​នាយក​រដ្ឋមន្ត្រី​បាន​ទោះ​ស្ថិត​ក្នុង​កាលៈទេសៈ​ណា​ក៏​ដោយ ។

ពាក់ព័ន្ធ​នឹង​រឿង​នេះ​វិទ្យុ​អាស៊ី​សេរី​មិន​អាច​ទាក់ទង​អ្នក​នាំ​ពាក្យ​គណបក្ស​ប្រជាជន លោក សុខ ឥសាន និង​អ្នក​នាំ​ពាក្យ​រដ្ឋាភិបាល លោក ផៃ ស៊ីផាន បាន​ទេ កាល​ពី​ថ្ងៃ​ទី១០ ខែសីហា។

លោក​នាយក​រដ្ឋមន្ត្រី ហ៊ុន សែន ជា​ញឹកញយ​បាន​ប្រកាស​បន្ត​ពង្រឹង​អំណាច និង​គាំទ្រ​កូន​ប្រុស​ច្បង​របស់​លោក​ពេញ​ទំហឹង​ឲ្យ​ស្នង​តំណែង​ជា​នាយក​រដ្ឋមន្ត្រី​បន្ត​ពី​លោក ។ ថ្មីៗនេះ លោក ក៏​បាន​ប្រកាស​ជំហរ​ឱ្យ​កូន ឱ្យ​ចៅ​លោក​បន្ត​តំណែង​នាយក​រដ្ឋមន្ត្រី​ត​ជំនាន់។

ក្នុង​ផែនការ​ផ្ទេរ​អំណាច​ត​ទៅ​ឱ្យ​កូន​នេះ សមាជិក​របស់​គណបក្ស​ប្រជាជន​កម្ពុជា​របស់​លោក ហ៊ុន សែន បាន​សម្រេច​ជា​ឯកច្ឆន្ទ​ឱ្យ​លោក ហ៊ុន ម៉ាណែត ធ្វើ​ជា​បេក្ខភាព​អនាគត​នាយក​រដ្ឋមន្ត្រី កាល​ពី​ចុង​ខែធ្នូ ឆ្នាំ២០២១៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
អ្នក​ឃ្លាំមើល​​ថា ​ដំណើរ​​ទស្សនកិច្ច​របស់​​លោក ហ៊ុន សែន​ ទៅ​​គុយបា​ជា​ការ​​ពង្រឹង​​អំណាច​​ផ្តាច់ការ​​ច្រើន​​ជាង​​ផល​ប្រយោជន៍​​ជាតិ​
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។