បាតុករ​ចម្រុះ​ជាតិសាសន៍​ ធ្វើ​បាតុកម្ម​ទាមទារ​លទ្ធិប្រជាធិបតេយ្យ​ក្នុង​តំបន់​អាស៊ាន​

ដោយ យ៉ង ចាន់តារា
2022.05.13
Share on WhatsApp
Share on WhatsApp
បាតុករ​ចម្រុះ​ជាតិសាសន៍​ ធ្វើ​បាតុកម្ម​ទាមទារ​លទ្ធិប្រជាធិបតេយ្យ​ក្នុង​តំបន់​អាស៊ាន​ បាតុករ​ចម្រុះ​ជាតិសាសន៍​បាន​ប្រមូល​ផ្តុំ​គ្នា​ធ្វើ​បាតុកម្ម​នៅ​រដ្ឋធានី​វ៉ាស៊ីនតុន (Washington D.C.)
រូប៖ ពលរដ្ឋ

បាតុករ​ចម្រុះ​ជាតិសាសន៍​បាន​ប្រមូល​ផ្តុំ​គ្នា​ធ្វើ​បាតុកម្ម​នៅ​រដ្ឋធានី​វ៉ាស៊ីនតុន (Washington D.C.) កាល​ពី​ថ្ងៃទី ១២ ខែឧសភា ដើម្បី​ទាមទារ​លទ្ធិប្រជាធិបតេយ្យ​នៅ​ក្នុង​តំបន់​អាស៊ាន។ បាតុកម្ម​នេះ​ធ្វើ​ឡើង​ក្នុង​ឱកាស​ដែល​មេដឹកនាំ​អាស៊ាន​មួយចំនួន​ដែល​ត្រូវ​បាន​គេ​ចាត់​ទុក​ថា មេដឹក​នាំ​ផ្ដាច់​ការ និង​ក្រាញ​អំណាច​ កំពុង​ចូលរួម​កិច្ចប្រជុំ​កំពូល​អាស៊ាន-អាមេរិក​នៅ​រដ្ឋធានី​វ៉ាស៊ីនតោន​ សហរដ្ឋ​អាមេរិក។

ក្រុម​បាតុករ​ជាង ៤រយ​នាក់ (៤០០បាន​ជួបជុំ​គ្នា​នៅ​វិមាន​វ៉ាស៊ីនតោន (Washington Monument) នៅ​ម៉ោង ១០ ព្រឹក ហើយ​តំណាង​របស់​ក្រុម​បាតុករ​នីមួយៗ​បាន​ឡើង​ថ្លែង​សារ​ជា​ភាសា​អង់គ្លេស​ដែល​មាន​ខ្លឹមសារ​ប្រហាក់​ប្រហែល​គ្នា គឺ​ទាមទារ​សិទ្ធិ​សេរីភាព និង​លទ្ធិប្រជាធិបតេយ្យ៖ «ក្រុម​បាតុករ​សុទ្ធ​តែ​ជា​ជាតិ​សាសន៍​ដែល​មាន​ដើមកំណើត​នៅ​តំបន់​អាស៊ី​អាគ្នេយ៍ ដូចជា ខ្មែរ ឡាវ ភូមា វៀតណាម និង​ម៉ុងតាញ៉ា ជាដើម ប៉ុន្តែ​បាតុករ​ខ្មែរ​មាន​ចំនួន​ច្រើន​ជាងគេ គឺ​ជាង​ពាក់កណ្ដាល​នៃ​ចំនួន​បាតុករ​សរុប»

ជន​ភៀសខ្លួន​នយោបាយ​ដែល​ទទួល​បាន​សិទ្ធិជ្រកកោន​នៅ​សហរដ្ឋអាមេរិក​ លោក រិន រដ្ឋ ​ថ្លែង​ថា លោក និង​ពលរដ្ឋ​ខ្មែរ​ដទៃ​ទៀត​មក​ចូលរួម​បាតុកម្ម​នេះ ដោយ​ឆន្ទៈ​ពិត​ប្រាកដ​ ដើម្បី​ទាមទារ​ឱ្យ​មាន​ដំណោះស្រាយ​វិបត្តិ​នយោបាយ​ និង​បញ្ហា​សិទ្ធិមនុស្ស​នៅ​កម្ពុជា៖ «បងប្អូន​ប្រជាពលរដ្ឋ​ខ្មែរ​យើង​ដែល​មក​បាតុកម្ម​នេះ មក​ដោយ​ឆន្ទៈ មនសិការ​គាត់ ដើម្បី​ចង់​ឱ្យ​ប្រទេស​ជាតិ​មាន​ការ​ផ្លាស់ប្ដូរ មាន​លទ្ធិ​ប្រជាធិបតេយ្យ​ពេញលេញ។ មិន​ដូច​ពួក ហ៊ុន សែន ដែល​មក​ទទួល​ហ្នឹង​ទេ គឺ​មាន​ការ​រៀបចំ។ ពួក​ខ្ញុំ​អត់​ទេ អត់​មាន​ការ​រៀបចំ​ពី​អ្នកណា​ទេ។ ខ្ញុំ​រួម​កម្លាំង​គ្នា មាន​ឆន្ទៈ​តែ​មួយ គឺ​សហការ​គ្នា​ដើម្បី​មក​ធ្វើ​បាតុកម្ម​ប្រឆាំង​នឹង​លោក ហ៊ុន សែន នេះ​តែម្ដង»

ក្រុម​បាតុករ​បាន​ជួបជុំ​គ្នា និង​ថ្លែង​សារ​ប្រមាណ ២ម៉ោង ទើប​នាំគ្នា​ដើរ​ក្បួន​យាត្រា​សំដៅ​ទៅ​ក្រសួង​ការបរទេស​អាមេរិក។ នៅ​ទីនោះ ក្រុម​បាតុករ​បាន​បន្ត​ស្រែក​ជ័យឃោស និង​ថ្លែង​សារ​នយោបាយ​រៀងៗខ្លួន​ មុន​នឹង​ដាក់​ញត្តិ​មួយ​ច្បាប់​ជូន​ក្រសួង​ការបរទេស​សហរដ្ឋអាមេរិក។

ប្រធាន​គណបក្ស​សង្គ្រោះ​ជាតិ​ប្រចាំ​សហរដ្ឋ​អាមេរិក​ លោក អ៊ុង រិទ្ធី​ ឱ្យ​ដឹង​ថា ខ្លឹមសារ​នៃ​ញត្តិ​នេះ គឺ​ស្នើ​ដល់​ប្រធានាធិបតី​អាមេរិក​លោក ចូ បៃឌិន​ (Joe Biden) ឱ្យ​លើក​បញ្ហា​សិទ្ធិមនុស្ស​ និង​លទ្ធិប្រជាធិបតេយ្យ​ទៅ​ជជែក​ជាមួយ​ក្រុម​មេដឹកនាំ​អាស៊ាន។ លោក​បញ្ជាក់​ថា ករណី​សំខាន់​ជាងគេ​ដែល​ក្រុម​បាតុករ​ចង់​ឱ្យ​រដ្ឋាភិបាល​អាមេរិក​ជួយ​អន្តរាគមន៍​នោះ គឺ​វិបត្តិ​នយោបាយ​នៅ​កម្ពុជា និង​ការ​រំលោភ​សិទ្ធិមនុស្ស​ធ្ងន់ធ្ងរ​នៅ​ប្រទេស​ភូមា៖ «យើង​ស្នើ ឱ្យ​អាមេរិក​ហ្នឹង​ត្រូវតែ​ដាក់​សម្ពាធ ឬក៏​ដាក់​ទណ្ឌកម្ម​ទៅដល់​ប្រទេស​កម្ពុជា និង​ប្រទេស​ភូមា ជាពិសេស​ថ្នាក់ដឹកនាំ​ណា​ដែល​រំលោភ​សិទ្ធិមនុស្ស ហើយ​និង​សម្លាប់​លទ្ធិប្រជាធិបតេយ្យ។ ឱ្យ​គេ​ហ្នឹង​បង្កក​ទ្រព្យ​សម្បត្តិ និង​ ឈប់​បញ្ជូន​អាវុធ​ទៅ​ឱ្យ​ប្រទេស​ផ្ដាច់ការ​ទាំងនោះ»

បាតុកម្ម​ចម្រុះ​ជាតិសាសន៍​នេះ​បាន​បញ្ចប់​ទៅ​នៅ​ម៉ោង​ជាង ២រសៀល ម៉ោង​នៅ​រដ្ឋធានី​វ៉ាស៊ីនតោន។ លោក​ អ៊ុង រិទ្ធី​ វាយ​តម្លៃ​ថា បាតុកម្ម​នេះ​ទទួល​បាន​ជោគជ័យ​ ព្រោះ​អ្នកចូលរួម​ម្នាក់ៗ​បាន​បង្ហាញ​ទឹកចិត្ត​ពុះ​កញ្ជ្រោល​ និង​ពោរពេញ​ដោយ​ក្ដី​សង្ឃឹម។ លោក​បន្ថែម​ថា បាតុកម្ម​ចម្រុះ​ជាតិសាសន៍​បែបនេះ នឹង​ត្រូវ​បាន​រៀបចំ​ឡើងជា​បន្តបន្ទាប់​ទៀត ដើម្បី​បុព្វហេតុ​សិទ្ធិមនុស្ស និង​លទ្ធិប្រជាធិបតេយ្យ​នៅ​តំបន់​អាស៊ី​អាគ្នេយ៍៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

រឿង​ដែល​គេ​អាន​​ច្រើន​បំផុត
RFA
ពលរដ្ឋ​ខ្មែរ​អាមេរិក​កាំង​ម្នាក់​​យក​ស្បែក​ជើង​គប់​លោក ​ហ៊ុន សែន​ ក្នុង​ពេល​ជួប​អ្នក​គាំទ្រ​នៅ​សហរដ្ឋអាមេរិក
រឿង​ដែល​គេ​អាន​​ច្រើន​បំផុត
នយោបាយ
ពលរដ្ឋ​ខ្មែរ​អាមេរិក​កាំង​ម្នាក់​​យក​ស្បែក​ជើង​គប់​លោក ​ហ៊ុន សែន​ ក្នុង​ពេល​ជួប​អ្នក​គាំទ្រ​នៅ​សហរដ្ឋអាមេរិក
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល