សាលាដំបូងខេត្តបានចេញដីកាសម្រេចបញ្ជូនអ្នកទោសចំនួន ៥០នាក់ ទៅដាក់ឲ្យស្នាក់នៅមណ្ឌលកែប្រែថ្នាំញៀនភ្នំបាក់ ដើម្បីជួយសម្រួល និងលើកស្ទួយដល់បរិយាកាសនៃស្ថានភាពស្នាក់នៅរបស់អ្នកទោស ដែលកំពុងញាំញីទៅដោយភាពចង្អៀតណែននៅក្នុងពន្ធនាគារខេត្តបន្ទាយមានជ័យ ក្រោយពីចំនួនមនុស្សដែលគេចាប់បញ្ជូនទៅឃុំខ្លួននោះមានចំនួនកើនឡើងរហូតទៅដល់ ១.០៩០នាក់។
លោក អាំង មាលតី ប្រធានតុលាការខេត្តបន្ទាយមានជ័យ បានមានប្រសាសន៍ថា តុលាការបានសម្រេចខាងពន្ធនាគារបញ្ជូនអ្នកទោសសេពគ្រឿងញៀនចំនួន ១២នាក់ទៀត នៅថ្ងៃព្រហស្បតិ៍ ទី១៩ ខែឧសភា ឆ្នាំ២០១១នេះ ទៅដាក់នៅក្នុងមណ្ឌលកែប្រែថ្នាំញៀនភ្នំបាក់ ដើម្បីធ្វើការអប់រំ និងព្យាបាលជំងឺជាបណ្ដោះអាសន្ន ដើម្បីរង់ចាំតុលាការចេញសាលក្រមស្ថាពរតាមក្រោយ។
លោកមានប្រសាសន៍ទៀតថា ៖ «អ៊ីចឹង ក្រុមដែលលេងថ្នាំហ្នឹងយើងបានបញ្ជូនទៅនៅមណ្ឌលដើម្បីរង់ចាំការសម្រេចសេចក្ដីចុងក្រោយរបស់តុលាការ យើងផ្អែកទៅលើក្រមនីតិវិធីព្រហ្មទណ្ឌផង ផ្អែកទៅលើក្រមព្រហ្មទណ្ឌផង ដើម្បីឲ្យមនុស្សដែលត្រូវអប់រំកែប្រែទៅតាមនីតិវិធី។ ក្រមរបស់យើងបានចែងមិនឲ្យមនុស្សជាប់ពន្ធនាគារច្រើន អ៊ីចឹងការដែលយើងបង្ក្រាបបទល្មើសវាតែងមានការឃាត់ខ្លួន ឃុំខ្លួន»។
ការសម្រេចបញ្ជូនអ្នកទោសសេពគ្រឿងញៀនចំនួន ១២នាក់នេះ គឺបានធ្វើឡើងបន្ថែមទៀត បន្ទាប់ពីអ្នកទោសចំនួន ៣៨នាក់ ត្រូវបានតុលាការខេត្តបានសម្រេចបញ្ជូនទៅដាក់នៅមណ្ឌលកែប្រែថ្នាំញៀនភ្នំបាក់ កាលពីសប្ដាហ៍កន្លងទៅនេះ ដែលចំនួននេះមានការកើនឡើងរហូតទៅដល់ ៥០នាក់។
លោក ភាន ឆវ័ន្ត ប្រធានពន្ធនាគារខេត្តបន្ទាយមានជ័យ បានមានប្រសាសន៍ថា គិតមកត្រឹមថ្ងៃព្រហស្បតិ៍ ទី១៩ ខែឧសភា ឆ្នាំ២០១១នេះ ចំនួនអ្នកទោសដែលកំពុងឃុំនៅពន្ធនាគារខេត្តកើនឡើងរហូត ១.០៩០នាក់។
លោកបន្តថា ខាងពន្ធនាគារបានអនុវត្តតាមសេចក្ដីសម្រេចបញ្ជូនអ្នកទោសសេពគ្រឿងញៀនចំនួន ១២នាក់ ទៅដាក់ឲ្យខាងមន្ទីរសង្គមកិច្ចខេត្តគ្រប់គ្រង ៖ «យើងអនុវត្តតាមដីការបស់តុលាការ បើពាក់ព័ន្ធនឹងអ្នកញៀនថ្នាំ ខ្លឹមសារគេដាក់បញ្ជូនទៅមណ្ឌល។ ព្រឹកមិញ (១៩ ឧសភា) យើងបញ្ជូនទៅ ១២នាក់តាមដីកាដោះលែង»។
ព្រះរាជអាជ្ញារងតុលាការខេត្តបន្ទាយមានជ័យ លោក តន់ សីហៈតេជៈ បានមានប្រសាសន៍ថា ថ្មីៗនេះតុលាការបានដាក់សំណើស្នើទៅអគ្គនាយកដ្ឋានពន្ធនាគារក្រសួងមហាផ្ទៃ ដើម្បីកាត់បន្ថយចំនួនអ្នកទោសនៅក្នុងពន្ធនាគារខេត្តបន្ទាយមានជ័យ ចំនួន ៥០នាក់ យកទៅដាក់នៅពន្ធនាគារខេត្តពោធិ៍សាត់ ប៉ុន្តែត្រូវបានខកខាន ដោយសារតែចំនួនអ្នកទោសនៅក្នុងពន្ធនាគារខេត្តពោធិ៍សាត់ មានចំនួនច្រើនដូចគ្នាមិនអាចទទួលយកបាន។
លោកមានប្រសាសន៍បន្ថែមដូច្នេះ ៖ «នៅខាងនោះពេញហើយ គេបញ្ជូនពីព្រៃស យើងនេះវានៅតែរង់ចាំ យឺតដដែល ហើយគម្រោងរបស់យើងមុនគេ យើងស្នើសុំ យើងមានប្រជុំអី គិតគូរមុនគេ តែដល់គេខាងនុះ ជិតជាងគេបញ្ជូនទៅ ដល់អ៊ីចឹងទៅយើងនេះវានៅអ៊ីចឹងដដែល»។
ពន្ធនាគារខេត្តបន្ទាយមានជ័យ នាពេលបច្ចុប្បន្ននេះ មានអគារឃុំឃាំងចំនួន ៣អគារ ក្នុងនោះអគារនីមួយៗចែកចេញជាអគារអា មាន ២០បន្ទប់ អគារបេ មាន ២០បន្ទប់ និងអគារសេ មាន ១២បន្ទប់ សរុបទាំងអស់មានចំនួន ៥២បន្ទប់។ ក្នុងបន្ទប់នីមួយៗមានទំហំ ៤ម៉ែត្រ៤ជ្រុង ដែលអាចដាក់អ្នកទោសបានតែចំនួន ១០នាក់ប៉ុណ្ណោះ។
សមាគមការពារសិទ្ធិមនុស្សអាដហុក ធ្លាប់បានសម្ដែងការព្រួយបារម្ភយ៉ាងខ្លាំងដល់បញ្ហាសុខភាពអ្នកនៅពន្ធនាគារខេត្តបន្ទាយមានជ័យ ដោយសាតែចំនួនអ្នកទោស ដែលចាប់បញ្ជូនទៅឃុំខ្លួននៅទីនោះចេះតែកើនឡើង ហើយទីធ្លាអគារនៅតូចដដែល។ បញ្ហានេះជាកង្វល់យ៉ាងខ្លាំងនារដូវប្រាំងខាងមុខ ព្រោះថា នៅពន្ធនាគារខ្វះខាតទឹកប្រើប្រាស់ និងពុំមានអនាម័យល្អ ដែលអាចធ្វើឲ្យប៉ះពាល់លើបញ្ហាសុខភាព ពិរុទ្ធជន និងទណ្ឌិតក្នុងពន្ធនាគារ៕