ពលរដ្ឋក្នុងខេត្តចំនួន៥នឹងទទួលបានសេវាអនាម័យទឹកស្អាត
2011.03.23
ប្រធានអង្គការភ្លែន អន្តរជាតិ (Plan International) លោក ស៊ូព្រីយ៉ាន់តូ (Supriyanto) បានថ្លែងនៅក្នុងពិធីប្រកាសបើកដំណើរការកម្មវិធីស្ដីពីការលើកកម្ពស់អនាម័យជនបទនៅកម្ពុជា គាំទ្រដោយមូលនិធិអនាម័យសាកលក្នុងទីក្រុងភ្នំពេញ កាលពីថ្ងៃទី២២ ខែមីនា ឆ្នាំ២០១១ ថា កម្មវិធីនេះបានអនុវត្តនៅក្នុងខេត្តចំនួន៥ ក្នុងរយៈពេល ៥ឆ្នាំ គឺខេត្តកំពង់ចាម កំពង់ស្ពឺ តាកែវ កណ្តាល និងខេត្តស្វាយរៀង។ កម្មវិធីនេះមានគោលបំណងលើកកម្ពស់ការផ្ដល់សេវា និងទម្លាប់ថែទាំអនាម័យសុខភាពនៅសហគមន៍ជនបទ។
សេចក្ដីប្រកាសព័ត៌មានរបស់អង្គការភ្លែន អន្តរជាតិ បានបង្ហាញតួលេខសំខាន់ៗស្ដីពីស្ថានភាពអនាម័យ និងសុខភាពនៅប្រទេសកម្ពុជា ថា ការទទួលបានសេវាថែទាំសុខភាព និងអនាម័យមានស្ថានភាពខុសគ្នារវាងតំបន់ជនបទ និងទីក្រុង និងក្រុមមនុស្សដែលមានស្ថានភាពសេដ្ឋកិច្ចខុសគ្នា ប្រជាជនរស់នៅតាមតំបន់ជនបទ ២៣,២% ប៉ុណ្ណោះ ទទួលបានសេវាថែទាំអនាម័យបើធៀបទៅនឹងប្រជាជននៅទីក្រុងមានចំនួន ៨១,៥%។
រដ្ឋលេខាធិការក្រសួងអភិវឌ្ឍន៍ជនបទ លោក ទ្រី មេង មានប្រសាសន៍ថា ក្រសួងស្វាគមន៍ចំពោះបណ្ដាអង្គការដៃគូអភិវឌ្ឍន៍ដែលធ្វើការងារអនាម័យនៅតាមសហគមន៍ជនបទ ដើម្បីជំរុញការផ្លាស់ប្ដូរឥរិយាបថប្រជាជនក្នុងការសាងសង់ និងប្រើប្រាស់បង្គន់អនាម័យ។ លោកបន្តថា ការងារលើកកម្ពស់អនាម័យតំបន់ជនបទនេះ គឺទាមទារឲ្យប្រជាជនចូលរួម និងប្រើប្រាស់ធនធានមួយចំនួនដែលគេមានដោយមិនពឹងផ្អែកទាំងស្រុងទៅលើស្ថាប័នរដ្ឋ ឬអង្គការដៃគូអភិវឌ្ឍន៍ជួយនោះទេ ដោយឡែកស្ថាប័នក្រសួង និងអង្គការដៃគូពាក់ព័ន្ធជាអ្នកជួយសម្របសម្រួលផ្ដល់បច្ចេកទេស ការអប់រំអនាម័យ និងរកសេវាផ្គត់ផ្គង់ ដើម្បីឆ្លើយតបទៅនឹងតម្រូវការរបស់ប្រជាពលរដ្ឋ។
លោក ទ្រី មេង មានប្រសាសន៍បន្ថែម ៖ «ថ្វីត្បិតតែជីវភាពប្រជាជនយើងបានរីកចម្រើនគួរជាទីមោទនៈ ដោយអត្រានៃភាពក្រីក្របានធ្លាក់ចុះពី ៣៥% នៅឆ្នាំ២០០៤ មកនៅត្រឹម ២៧,២% នៅត្រឹម២០១០ តែកំណើនគ្រួសារដែលចំណាយធនធានផ្ទាល់ខ្លួនដើម្បីសង់បង្គន់មានកម្រិតមួយទាបនៅឡើយ»។
ប្រធានកម្មវិធីមូលនិធិអនាម័យសាកល ក្រុមប្រឹក្សាសហប្រតិបត្តិការលើកកម្ពស់អនាម័យ និងផ្គត់ផ្គង់ទឹកស្អាត លោក ប៊ែរី ជេកសាន់ បានថ្លែងថា មូលនិធិអនាម័យសាកលបានអនុវត្តទឹកប្រាក់ជំនួយលើកដំបូងចំនួន ៥លានដុល្លារសហរដ្ឋអាមេរិក សម្រាប់រយៈពេល ៥ឆ្នាំ។ លោកថា មូលនិធិនេះគឺមានផែនការត្រួតពិនិត្យមើលការងារពាក់កណ្ដាលអាណត្តិ ហើយបើបង្ហាញថា វិធីសាស្ត្រដែលប្រើមានជោគជ័យនោះ មូលនិធិនេះនឹងស្វែងរកមូលនិធិដើម្បីធ្វើកិច្ចការនេះបន្តទៀត។
ជំរឿនទូទៅក្នុងប្រទេសកម្ពុជាក្នុងឆ្នាំ២០០៨ ប្រជាជនរស់នៅតាមតំបន់ជនបទប្រមាណ ២៣,២% ប៉ុណ្ណោះ ដែលទទួលបានបរិក្ខារអនាម័យត្រឹមត្រូវ។ ប្រព័ន្ធព័ត៌មានគ្រប់គ្រងការអប់រំក្នុងឆ្នាំ២០០៨ ២០០៩ របស់ក្រសួងអប់រំយុវជន និងកីឡា សាលាបឋមសិក្សាតែ ២២,៤% ប៉ុណ្ណោះ ដែលមានបង្គន់អនាម័យ៕
អត្ថបទពេញនិយម
RFA
- មន្ត្រីជាន់ខ្ពស់ និងឧកញ៉ា សុំលោក ហ៊ុន សែន ឱ្យជួយរកយុត្តិធម៌ដោយមិនពឹងតុលាការ
- ពិធីមង្គលការរបស់ពលករខ្មែរនៅប្រទេសថៃ
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- អ្នកឃ្លាំមើល ថា លោក ហ៊ុន សែន ទំនងលែងទុកចិត្តអ្នកណាក្រៅពីកូនរបស់ខ្លួនហើយ
- លោក ស ខេង ចង់ឱ្យមានការធ្វើតេស្ដរកគ្រឿងញៀនលើពលរដ្ឋចាប់ពីអាយុ១៣ឆ្នាំដល់ក្រោម៤៥ឆ្នាំ
អត្ថបទពេញនិយម
ព័ត៌មានថ្មីៗ
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- លោក ហ៊ុន សែន មិនគាំទ្រដីកាតុលាការ ICC ដើម្បីចាប់ខ្លួនមេដឹកនាំរុស្ស៊ី
- អ្នកជំនាញថា ចិនមិនអាចជំនួសទីផ្សារសហភាពអឺរ៉ុប និងអាមេរិកក្នុងការទទួលទិញទំនិញកម្ពុជា
- មន្ត្រីសិទ្ធិមនុស្សថា ការចាប់ខ្លួនអ្នកគាំទ្រលោក កឹម សុខា ពីរនាក់ជាការបំបិទសិទ្ធិបញ្ចេញមតិ