ប្រជាពលរដ្ឋម្នាក់ឈ្មោះ ថង អឿន អាយុ៥០ឆ្នាំ រស់នៅភូមិកាទៀង ឃុំល្បាំង២ ស្រុកលំផាត់ ខេត្តរតនគិរី ឲ្យដឹងនៅថ្ងៃច័ន្ទ ទី១៣ ខែមិថុនា ឆ្នាំ២០១១ ថាគាត់ និងកូនប្រុសអាយុ១០ឆ្នាំ បានរងនូវអំពើវាយដំលើរាងកាយ និងគំរាមសម្លាប់ពីមន្ត្រីប៉ូលិសប៉ុស្តិ៍ និងបក្ខពួក។
នៅព្រឹកថ្ងៃច័ន្ទដើមសប្ដាហ៍នេះ គាត់បានធ្វើដំណើរមកការិយាល័យសមាគមការពារសិទ្ធិមនុស្សអាដហុក (ADHOC) ខេត្តរតនគិរី បំណងស្វែងរកកិច្ចគាំពារផ្នែកសិទ្ធិមនុស្ស និងប្ដឹងសុំឲ្យមានការស៊ើបអង្កេតផ្ដល់យុត្តិធម៌ចំពោះគ្រួសារគាត់។
លោក ថង អឿន មានប្រសាសន៍បញ្ជាក់ថា នាយនគរបាលប៉ុស្តិ៍ល្បាំងពីរ និងបក្ខពួក កាលពីថ្ងៃទី១១ និងទី១២ ខែមិថុនា ឆ្នាំ២០១១ បានព្រួតវាយគាត់មួយលើក និងស្ទាក់វាយគាត់មួយលើកទៀត ជាមួយកូនប្រុសជាអនីតិជន ដោយសារតែគាត់មានជម្លោះពាក្យសំដីជាមួយនឹងអ្នកលក់ដូរក្នុងភូមិជាមួយគ្នា ហើយអ្នកលក់ដូរជាមិត្តភ័ក្ដិជាមួយមន្ត្រីប៉ូលិសនោះ ៖ "វាតេហៅប៉ូលិសក្លើវាហ្នឹងមក មកអត់សួររកខុសត្រូវ ទាញខ្ញុំពីលើម៉ូតូវ៉ៃតែម្ដង។ ប៉ូលិសពីរ ម្ចាស់ផ្ទះមួយ។ ដល់ម្សិលមិញ ខ្ញុំទៅប្ដឹងឃុំ គេឲ្យយកក្រដាសមកអូសហ្នឹង គេថែមកម្លាំងប៉ូលិសពីរនាក់ទៀតមកស្ទាក់វ៉ៃខ្ញុំតាមផ្លូវ។ ខ្ញុំកំពុងជិះម៉ូតូវាជិះម៉ូតូឌុបគ្នា វាធាក់ម៉ូតូខ្ញុំប្រដួលធាក់ត្រូវខ្ញុំម៉ាជើង ធាក់ត្រូវកូនខ្ញុំម៉ាជើង អាខ្លះដកអង្កោលរបងអាខ្លះអី"។
នៅក្នុងពាក្យបណ្ដឹងរបស់លោក ថង អឿន បានប្ដឹងចោទនាយនគរបាលប៉ុស្តិ៍ល្បាំង២ គឺលោក ឈូក សំអឿន។ មន្ត្រីប៉ូលិសប៉ុស្តិ៍ លោក ខន ថា និងប្រជាពលរដ្ឋអ្នកលក់ដូរឈ្មោះ ដា រួមទាំងភ្នាក់ងារប៉ូលិសប៉ុស្តិ៍ល្បាំង២ ចំនួនពីរនាក់ផ្សេងទៀតមិនស្គាល់ឈ្មោះ។
នាយនគរបាលប៉ុស្តិ៍ល្បាំងពីរ លោក ឈូក សំអឿន បានបដិសេធការប្រកាន់នោះ ហើយអះអាងថា លោកជាអ្នកបានជួយលោក ថង អឿន ដែលឋិតក្នុងសភាពស្រវឹងស្រា ហើយជេរប្រមាថលោកជាមន្ត្រីប៉ូលិសទៅវិញទេ ៖ "អាអ្នកទៅប្ដឹងទៅជេរគេ ហើយគាត់ផឹកស្រវឹងខ្ញុំទៅឃាត់។ ខ្ញុំថាបងអើយបងឯងស្រវឹងហើយ ទៅដេកទៅ។ អ៊ីចឹងខ្ញុំកំពុងឈរនិយាយទូរស័ព្ទជាមួយមេរបស់ខ្ញុំ ហើយមានកម្លាំងខ្ញុំម្នាក់ហ្នឹង គាត់ស្រវឹងខ្ញុំក៏ឲ្យកូនចៅខ្ញុំហ្នឹងយកម៉ូតូខ្ញុំជូនគាត់ទៅដេក។ ចុងក្រោយមានជូនឯណា ទៅចាប់សក់ប៉ូលិសខ្ញុំហ្នឹង ខ្ញុំក៏ឃាត់ទៅ មានវ៉ៃមានតប់អី សុទ្ធតែរឿងមិនពិត"។
មេឃុំល្បាំងពីរ លោក ប៊ុន ហ៊ាង មានប្រសាសន៍បញ្ជាក់ថា អ្នកភូមិដែលបានឃើញហេតុការណ៍ អះអាងថាពិតជាមានការប្រើអំណាចជាប៉ូលិសវាយដំលោក ថង អឿន មែន។
លោកបន្តថា បានអញ្ជើញនាយប៉ុស្តិ៍ប៉ូលិសមកសាកសួរក្នុងរឿងហេតុនេះ តែមន្ត្រីប៉ុស្តិ៍មិនបានមកបំភ្លឺជាមួយមន្ត្រីឃុំនៅឡើយ។ ហើយករណីនេះលោកបានធ្វើចំណារទៅលើពាក្យបណ្ដឹង លោកថង អឿន និងធ្វើកំណត់ហេតុបំភ្លឺរបស់ជនរងគ្រោះ និងសាក្សីចំនួន ៥នាក់ ដើម្បីឲ្យជនរងគ្រោះស្វែងរកយុត្តិធម៌ក្នុងរឿងនេះ ៖ "គ្មានស្ដាប់ឃុំស្ដាប់ក្រុមប្រឹក្សាឃុំទេ មានប្រជាពលរដ្ឋគេមកប្តឹងហ្នឹង ហើយមានអ្នកជិតខាងគាត់មកបញ្ជាក់ហេតុផលវាច្បាស់ហើយ"។
បុគ្គលិកផ្នែកអង្កេតសមាគមអាដហុកខេត្តរតនគិរី លោក ឆាយ ធី មានប្រសាសន៍បញ្ជាក់ថា យោងពាក្យបណ្ដឹងរបស់លោក ថង អឿន ករណីនេះមានជាប់ទាក់ទិននឹងការចោទប្រកាន់ទៅលើអាជ្ញាធរមូលដ្ឋានប្រើអំណាចរំលោភច្បាប់ និងសិទ្ធិមនុស្ស ហេតុនេះសមាគមលោកបានធ្វើអន្តរាគមន៍បញ្ជូនពាក្យបណ្ដឹងនេះទៅស្ថាប័នអយ្យកាដើម្បីចាត់ការតាមនីតិវិធី ៖ "ដំណាក់ការរបស់យើងឲ្យខាងតុលាការ។ ពាក្យបណ្ដឹងគាត់មានការវាយដុំ ឪពុកហើយរហូតដល់កូនទៀត។ រឿងនេះជារឿងមួយដែលមន្ត្រីជាសមត្ថកិច្ចដែលមានតួនាទី"។
របាយការណ៍អង្កេតរបស់សមាគមអាដហុកខេត្តរតនគិរីឲ្យដឹងថា កាលពីឆ្នាំ២០១០ សមាគមនេះរកឃើញករណីមន្ត្រីអាជ្ញាធរមូលដ្ឋានប្រើអំណាច និងអាវុធវាយគំរាមកំហែងប្រជាពលរដ្ឋនៅខេត្តរតនគិរី មានចំនួន ១០ករណី។ ហើយក្នុងឆមាសដើមឆ្នាំ២០១១ នេះ ករណីដូចគ្នានេះកើតមាន ៥ករណីហើយ៕