អតីតនាយករងវិទ្យាល័យភ្ញីមាស ស្រុកព្រៃកប្បាស ខេត្តតាកែវ លោក ព្រំ ស៊ុម មានប្រសាសន៍ថា តាំងពីគាត់ចូលនិវត្តន៍ពីថ្ងៃទី១ ខែមករា ឆ្នាំ២០១០ មកដល់បច្ចុប្បន្នគាត់បានទទួលបានតែប្រាក់គោលនយោបាយពីក្រសួងអប់រំ១ដងគត់។ ចំណែកប្រាក់ចូលនិវត្តន៍ប្រចាំខែ មន្ត្រីសង្គមកិច្ច ក៏ដូចមន្ទីរអបរំ និងការិយាល័យអប់រំស្រុក ពុំបានប្រាប់ថា ប្រាក់នោះបើកឲ្យនៅពេលណាពិតប្រាកដនោះទេ។
លោក ព្រំ ស៊ុម បន្តថា ពួកគាត់ចូលនិវត្តន៍ក្នុងឆ្នាំ២០១០ ទាំងគ្រូបឋមសិក្សា អនុវិទ្យាល័យ និងវិទ្យាល័យ សរុបជាង ២០នាក់ កំពុងរង់ចាំប្រាក់ខែចូលនិវត្តន៍នោះ ដើម្បីចូលរួមបុណ្យចូលឆ្នាំថ្មី ៖ «អាហ្នឹងវាដូចជាគេទាត់ចោលអ៊ីចឹងដែរ ព្រោះអីពេលយើងធ្វើការគេឲ្យលុយ ទោះបីជាយឺតយ៉ាវបន្តិចបន្តួច រអាក់រអួលអីក៏គេឲ្យគ្រាន់តែយើងឈប់ធ្វើការ គេដូចជាបង្អត់ហ្មង ដូចសឹងថា ឲ្យងាប់អ៊ីចឹងតែម្ដង»។
គ្រូចូលនិវត្តន៍ម្នាក់ទៀតដែលជាអតីតគ្រូបង្រៀននៅវិទ្យាល័យ ប៊ុន រ៉ានី ហ៊ុន សែន ភ្នំជីសូរ ស្រុកសំរោង អ្នកគ្រូ មេ បូរី មានប្រសាសន៍ថា គាត់ជាមន្ត្រីរាជការចូលនិវត្តន៍គ្មានដីស្រែចម្ការធ្វើនឹងគេទេ។ គាត់មានវ័យជាង ៦០ឆ្នាំ កាន់តែចាស់ មិនអាចមានរបររកស៊ីក្រៅពីរំពឹងប្រាក់ចូលនិវត្តន៍ ដែលមាន១ខែជិត ១៩ម៉ឺនរៀលនោះទេ។
អ្នកគ្រូ មេ បូរី បន្តថា ៖ «ហើយរស់នៅម្នាក់ឯង គ្មានកូនគ្មានចៅឯណាទេ។ ឥឡូវនេះជិតដល់បុណ្យប្រពៃណីជាតិចូលឆ្នាំខ្មែរនេះ បើប្រាក់ខែថ្ងៃនេះហើយមិនទាន់បើក តើខ្ញុំបានលុយកាក់ឯណាទៅទិញរណ្ដាប់សម្រាប់ថ្វាយទេវតា?»។
អតីតគ្រូបង្រៀនសាលាបឋមសិក្សាភ្នំជីសូរ លោក កឹម ថា បានឲ្យដឹងថា គាត់រង់ចាំប្រាក់ខែចូលនិវត្តន៍យូរពេក គាត់ក៏បានខ្ចីលុយគេចាយរហូតគាត់ដាច់ចិត្តលក់ឈ្មោះគាត់ចូលនិវត្តន៍នោះឲ្យគេ១ឆ្នាំ។
លោកបន្តថា ប្រាក់ចូលនិវត្តន៍ ១ឆ្នាំមានចំនួន ១លាន៦០ម៉ឺន តែអ្នកទិញឈ្មោះគាត់នោះគេឲ្យតែ ៨០ម៉ឺនរៀលទេ ៖ «ចង់សំណូមពរឲ្យគេបើកប្រាក់ខែទៀងទាត់ ដូចគេកំពុងបង្រៀនអ៊ីចឹង»។
ក្រុមគ្រូកំពុងបង្រៀននៅស្រុកគិរីវង់ ក៍បានឲ្យដឹងដែរថា ប្រាក់ឧបត្ថម្ភ ២ម៉ឺនរៀលពីនាយករដ្ឋមន្ត្រី ហ៊ុន សែន ឧបត្ថម្ភគ្រូ និងប្រាក់បង្រៀនថ្ងៃព្រហស្បតិ៍ ពួកគាត់មិនបានទទួលទេតាំងពីខែ១០ ឆ្នាំ២០១០។
មន្ត្រីមន្ទីរអប់រំខេត្តតាកែវ មិនអាចទាក់ទងជម្រាបសួរព័ត៌មានបានទេនៅថ្ងៃនេះ ប៉ុន្តែមន្ត្រីការិយាល័យអប់រំស្រុកព្រៃកប្បាស លោក រដ្ឋ ស្រៀន មានប្រសាសន៍ថា ប្រាក់ខែគ្រូបង្រៀននៅក្នុងស្រុកនេះ កំពុងបើក និងបន្តបើកនៅសប្ដាហ៍ក្រោយ។ ចំណែកប្រាក់ចូលនិវត្តន៍របស់លោកគ្រូ អ្នកគ្រូក្នុងស្រុកនេះ លោកបានបញ្ជូនឯកសារទៅក្រសួងអប់រំហើយ។ ចំណែកប្រាក់ធ្លាក់មកវិញ គឺតាមរយៈមន្ទីរសង្គមកិច្ចខេត្ត ដូចនេះហួសសមត្ថភាពរបស់ការិយាល័យអប់រំស្រុកហើយ ៖ «ចេះតែជួយជំរុញ ចេះតែសួរៗ គេអ៊ីចឹងដែរ គេថា ជិតហើយៗ តែវាក្រសួងផ្សេង យើងមិនអាចនេះ»។
ប្រធានសមាគមគ្រូបង្រៀនកម្ពុជាឯករាជ្យ លោក រ៉ុង ឈុន បានថ្លែងថា ប្រាក់ចូលនិវត្តន៍ ប្រសិនបើមន្ទីរ ឬក្រសួងអប់រំបញ្ជូនឯកសារគ្រូៗចូលនិវត្តន៍ទៅមន្ទីរ ឬក្រសួងសង្គមកិច្ច ប្រាក់ខែចូលនិវត្តន៍អាចយឺតតែក្នុងរយៈពេល ៣ខែទេ ឬយូរបំផុត ៦ខែ មិនអាចពន្យារដល់១ឆ្នាំ ឬលើសពីនោះទេ។ លោកថា កន្លងមកគេឃើញប្រាក់មន្ត្រីចូលនិវត្តន៍ ត្រូវបានគេយកទៅប្រើប្រាស់លើទីផ្សារកេងចំណេញឯកជន ធ្វើឲ្យមន្ត្រីរាជការចូលនិវត្តន៍ទន្ទឹងរង់ចាំបើកប្រាក់ច្រើនឆ្នាំ។
កាលពីថ្ងៃសុក្រ ទី៨ ខែមេសា កិច្ចប្រជុំពេញអង្គគណៈរដ្ឋមន្ត្រី បានឆ្លងសេចក្ដីព្រាងអនុក្រឹត្យស្ដីពី ការកំណត់អត្រាភាគទានសម្រាប់ទ្រទ្រង់បេឡាជាតិសន្តិសុខសង្គម (ប.ជ.ស) សម្រាប់មន្ត្រីរាជការស៊ីវិល មានអត្រាសរុប ២៤% សម្រាប់ទ្រទ្រង់មូលនិធិ ប.ជ.ស ដើម្បីធានាលើការបើកផ្ដល់របបសន្តិសុខសង្គមជូនមុខសញ្ញារបស់ ប.ជ.ស ដែលរួមមានការចូលនិវត្តន៍ ការបាត់បង់សម្បទានវិជ្ជាជីវៈ មាតុភាព គ្រោះថ្នាក់ការងារ មរណភាព និងអ្នកនៅក្នុងបន្ទុក តាមអត្រារបបគោលនយោបាយដែលកំពុងជាធរមាន៕