គ្រោះថ្នាក់ចរាចរណ៍នៅពោធិ៍សាត់កើនឡើងនៅត្រីមាសចុងក្រោយនៃឆ្នាំ២០០៩
2009.12.26
ប្រធានផ្នែករដ្ឋបាលនិងសរុបនៃការិយាល័យនគរបាលចរាចរណ៍ជើងគោកនៃស្នងការនគរបាលខេត្តពោធិ៍សាត់ គឺលោក ជី ហុង បានមានប្រសាសន៍ប្រាប់វិទ្យុអាស៊ីសេរី នៅព្រឹកថ្ងៃ២៤ ធ្នូ ថា សម្រាប់ត្រីមាសទី៤ ដែលជាត្រីមាសចុងក្រោយនៃឆ្នាំ២០០៩ ករណីគ្រោះថ្នាក់ចរាចរណ៍ក្នុងខេត្តមានការកើនឡើង។
លោក ជី ហុង មានប្រសាសន៍ដូច្នេះថា ៖ «ក្នុងរយៈពេល៣ខែចុងឆ្នាំ២០០៩នេះ ករណីគ្រោះថ្នាក់ចរាចរណ៍កើនឡើង។ កើតឡើងចំនួន៧០លើក បណ្ដាល់ឲ្យរងគ្រោះថ្នាក់ដល់មនុស្សនោះចំនួន៤៧នាក់ របួសធ្ងន់៦០ ស្លាប់២១ ហើយការខូចខាតមធ្យោបាយ(ធ្វើដំណើរ)ចំនួន៥៩គ្រឿង រថយន្តតូច១៤គ្រឿង រថយន្តធំ៩គ្រឿង»។
របាយការណ៍របស់ការិយាល័យនគរបាលចរាចរណ៍ជើងគោកនៃស្នងការនគរបាលខេត្តពោធិ៍សាត់ បានបង្ហាញថា កាលពីឆ្នាំ២០០៨ ករណីគ្រោះថ្នាក់ចរាចរណ៍បានកើតមានចំនួន១៨៣លើក ដែលបណ្តាលឲ្យគ្រោះថ្នាក់ដល់ជីវិតមនុស្ស៦៤នាក់ របួសធ្ងន់២០៣និងស្រាល១១៣នាក់។
នាយការិយាល័យនគរបាលចរាចរណ៍ជើងគោកនៃស្នងការនគរបាលខេត្តពោធិ៍សាត់ គឺលោក រស់ ចំរើន មានប្រសាសន៍នៅព្រឹកថ្ងៃ២៥ ធ្នូ នេះថា បណ្តាករណីនៃគ្រោះថ្នាក់ចរាចរណ៍ច្រើនកើតឡើងបណ្តាលមកពីការបើកបរមិនគោរពច្បាប់។ លោកក៏បានអំពាវនាវផងដែរឲ្យប្រជាពលរដ្ឋគោរពឲ្យបានម៉ឺងម៉ាត់នូវច្បាប់ចរាចរណ៍ផ្លូវគោកទើបអាចចៀសផុតពីគ្រោះថ្នាក់បាន។
លោក រស់ ចំរើន មានប្រសាសន៍ថា ៖ «ករណីគ្រោះថ្នាក់ចរាចរណ៍ដែលកើតឡើងកន្លងមកហ្នឹង គឺបណ្ដាលមកពីការប្រើប្រាស់ល្បឿនបញ្ហាទី១ ហើយបញ្ហាបន្ទាប់ពីល្បឿនមកគឺស្រវឹង មានតែពីរកត្តាហ្នឹងទេដែលវាជាបញ្ហាសំខាន់។ ខាងចរាចរណ៍ខ្ញុំបាទហ្នឹង គឺចង់ឲ្យប្រជាជនទាំងអស់ហ្នឹងឲ្យគោរពច្បាប់ទាំងអស់គ្នាដើម្បីកាត់បន្ថយគ្រោះថ្នាក់ សំណូមពរតែប៉ុណ្ណឹងទេថា ឲ្យប្រជាជនគោរពច្បាប់ទាំងអស់គ្នាទៅ ការគ្រោះថ្នាក់ចរាចរណ៍ហ្នឹងគឺវាថយហើយ»។
របាយការណ៍ចុងឆ្នាំរបស់ការិយាល័យនគរបាលចរាចរណ៍ជើងគោកនៃស្នងការនគរបាលខេត្តពោធិ៍សាត់ បានបង្ហាញថា គិតចាប់ពីថ្ងៃ១៥ ខែធ្នូ ឆ្នាំ២០០៨ ដល់ថ្ងៃទី១៦ ខែធ្នូ ឆ្នាំ២០០៩ គ្រោះថ្នាក់ចរាចរណ៍ក្នុងទូទាំងខេត្តកើតមានចំនួន២៣៨លើក ដែលបណ្តាលឲ្យស្លាប់មនុស្សចំនួន៧៣នាក់និងរបួសធ្ងន់២០៦នាក់។ បើប្រៀបធៀបនឹងរយៈពេលដូចគ្នាកាលពីឆ្នាំ២០០៨កន្លងទៅ ករណីគ្រោះថ្នាក់ចរាចរណ៍ក្នុងទូទាំងខេត្តបានកើនឡើង៥៥ករណី ខូចខាតរថយន្តធុនធំ៣៩គ្រឿង រថយន្តធុនតូច៦៨គ្រឿង ម៉ូតូ២០៤គ្រឿងនិងស្លាប់សត្វពាហនៈចំនួន៨ក្បាល៕
អត្ថបទពេញនិយម
RFA
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
អត្ថបទពេញនិយម
ព័ត៌មានថ្មីៗ
- អ្នកសារព័ត៌មានក្នុងស្រុក និងក្រៅប្រទេសអំពាវនាវឱ្យតុលាការទម្លាក់បទចោទប្រកាន់ និងដោះលែងលោក ម៉ិច ដារ៉ា ឱ្យមានសេរីភាព
- ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័នសំខាន់ៗនៅកម្ពុជា
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន
- អ្នកឃ្លាំមើលថា ការចាប់ខ្លួនលោក ម៉ិច ដារ៉ា នឹងកាន់តែធ្វើឱ្យរដ្ឋាភិបាលមានកេរ្តិ៍ឈ្មោះមិនល្អ និងប្រឈមទណ្ឌកម្ម
- ក្រសួងមហាផ្ទៃចាត់ទុកព័ត៌មានដែលថា កម្ពុជាលាក់រឿងផ្ដល់សញ្ជាតិឲ្យជនបរទេស ជាការមួលបង្កាច់