មន្ត្រីសង្ឃនៃព្រះពុទ្ធសាសនាមើលឃើញថា បច្ចុប្បន្ន យុវជនខ្មែរកំពុងទទួលយកឥទ្ធិពលនៃការរីកចម្រើនផ្នែកបច្ចេកវិទ្យា និងវប្បធម៌ពីបរទេស ធ្វើឱ្យពួកគេខ្លះហាក់បាត់បង់សីលធម៌នៃការរស់នៅក្នុងសង្គមខ្មែរ ព្រមទាំងមិនយល់ដឹងអំពីប្រពៃណី និងវប្បធម៌ដ៏ផូរផង់របស់សង្គមខ្លួនឯងទៀតផង។
ដោយសារបញ្ហានេះ ព្រះសង្ឃខ្លះយល់ថា មានតែការទាក់ទាញយុវជនខ្មែរឱ្យទទួលយកការអប់រំតាមផ្លូវព្រះពុទ្ធសាសនាទេ ទើបអាចហាត់ពត់លត់ដំផ្លូវចិត្តរបស់យុវវ័យខ្មែរឱ្យកាត់បន្ថយភាពភ្លើតភ្លើនឱ្យប្រែក្លាយទៅជាមានចរិតសុភាពរាបសារ និងក្លាយជាពលរដ្ឋល្អនៅក្នុងសង្គមខ្មែរនៅពេលអនាគតបាន។
មន្ត្រីសង្ឃក្នុងក្រុងសៀមរាប កំពុងរៀបចំពិធីបំបួសកុលបុត្រ កុលធីតាខ្មែរប្រមាណ ៧០០រូប ឱ្យប្រែក្លាយទៅជាសាមណេរ និងសីលវត្តីនៃព្រះពុទ្ធសាសនាខ្មែរ ចាប់ពីថ្ងៃពុធ ទី២៩ ខែមេសា រហូតទៅដល់ថ្ងៃប្រារព្ធពិធីបុណ្យពិសាខបូជា ដែលនឹងមកដល់នៅថ្ងៃសៅរ៍ ទី២ ខែឧសភា ខាងមុខនេះ។
ពិធីបំបួសកុលបុត្រ និងកុលធីតា កំពុងធ្វើឡើងនៅវត្តអង្គរខាងត្បូង ជាប់បរិវេណនៃប្រាសាទអង្គរវត្ត ក្រោមបរិយាកាសដ៏អធឹកអធម្ម ដោយមានការជួយជ្រោមជ្រែងពីពុទ្ធបរិស័ទមកពីច្រើនមជ្ឈដ្ឋាន។
ព្រះអនុគណក្រុងសៀមរាបដែលជាអ្នករៀបចំព្រឹត្តិការណ៍បំបួសយុវជនច្រើនរយនាក់នោះ គឺព្រះភិក្ខុ ឡាច លាង។ ព្រះអង្គមានថេរដីកាកាលពីព្រឹកថ្ងៃពុធ ទី២៩ ខែមេសា ថា គោលបំណងដែលបំបួសយុវជនខ្មែរឱ្យក្លាយទៅជាសាមណេរ និងសីលវត្តី គឺមានច្រើនយ៉ាង។ ទី១ ដើម្បីប្រារព្ធពិធីបុណ្យពិសាខបូជា ដែលប្រទេសអ្នកកាន់ព្រះពុទ្ធសាសនាជាច្រើនតែងធ្វើជារៀងរាល់ឆ្នាំ ទី២ គឺចង់ឱ្យកូនខ្មែរប្រុសស្រីជំនាន់ក្រោយមានឱកាសតបស្នងសងគុណឪពុកម្ដាយ ព្រះមហាវីរក្សត្រ ព្រះមហាក្សត្រ និងថ្នាក់ដឹកនាំប្រទេសជាតិ ព្រមទាំងជួយទ្រទ្រង់ដល់ព្រះពុទ្ធសាសនាក្នុងសង្គមខ្មែរជាដើម។
ព្រះភិក្ខុ ឡាច លាង មានព្រះថេរដីកាទៀតថា បច្ចុប្បន្នដោយសារតែបច្ចេកវិទ្យាសម័យទំនើបមានការជឿនលឿនធ្វើឱ្យយុវជនខ្មែរជំនាន់ក្រោយទទួលយកឥទ្ធិនៃវប្បធម៌បរទេស និងខ្លះទៀតភ្លើតភ្លើនធ្លាក់ខ្លួនក្នុងអំពើមិនល្អ បាត់បង់សីលធម៌សង្គមជាដើម ដូច្នេះដើម្បីសាបព្រោះសីលធម៌នៅក្នុងសង្គមខ្មែរឡើងវិញក្នុងពិធីបំបួសពេលនេះ គឺព្រះសង្ឃមានកម្មវិធីជាច្រើនសម្រាប់អប់រំផ្លូវចិត្តដល់យុវជនទាំងនោះ៖ «យើងមានមេរៀនដូចជាប្រវត្តិពង្សាវតារខ្មែរ បទលើកទង់ដាក់ទង់ព្រះពុទ្ធសាសនា នមស្សការសុំសីល រៀនធម៌សម្រាប់សូត្រក្នុងពិធីបុណ្យផ្សេងៗ មាគ៌ាជីវិត និងប្រវត្តិពិសាខបូជាជាដើម»។
មានប្រជាពលរដ្ឋខ្មែរជាច្រើនដែលជាម្ដាយនិងភរិយា បានសុខចិត្តលះបង់កូន និងប្តីរបស់ខ្លួនឱ្យចូលសាងផ្នួសក្នុងព្រះពុទ្ធសាសនាពេលនេះ។
ស្ត្រីឈ្មោះ សោម ទីតូ រស់នៅភូមិត្រពាំងសេះ សង្កាត់គោកចក ក្រុងសៀមរាប ជាភរិយាម្នាក់ដែលសុខចិត្តលះបង់ប្ដី និងកូនប្រុស ២នាក់ទៀត ឱ្យចូលសាងផ្នួស មានប្រសាសន៍ថា គាត់ចង់ជួយលើកស្ទួយព្រះពុទ្ធសាសនានៅក្នុងសង្គមខ្មែរ និងចង់ឱ្យកូនៗរបស់គាត់ស្គាល់បុណ្យស្គាល់បាប និងសងគុណដល់ម៉ែឪតាមរយៈការបួសនេះ។
ស្ត្រីដដែលជឿថា ការលះបង់ឱ្យសាច់ញាតិសាងផ្នួសគឺនឹងទទួលបានអានិសង្សច្រើន ទាំងពេលបច្ចុប្បន្ននិងជាតិខាងមុខ៖ «ខ្ញុំជឿថា កូនបួសសងគុណម្ដាយ ហើយដូចប្ដីខ្ញុំបួសដើម្បីបំពេញកាតព្វកិច្ច គឺកូនប្រុសត្រូវតែបួសអ៊ីចឹង»។
ព្រះភិក្ខុ ឈន់ ឈឿន ព្រះគ្រូសូត្រស្ដាំវត្តដំណាក់ មានព្រះថេរដីកាថា គ្រួសារខ្មែរណាដែលផ្ដល់ឱកាសឱ្យសាច់ញាតិបានបួសនៅក្នុងព្រះពុទ្ធសាសនា ហើយប្រព្រឹត្តិអំពើល្អថែមទៀត គឺនឹងទទួលបានអានិសង្ស ដូចជាមានសន្តិភាព និងសេចក្ដីសុខខាងផ្លូវចិត្ត ព្រមទាំងទទួលបានបុណ្យកុសលពីអំពើល្អទាំងនេះ។
នេះជាលើកទី៥ហើយ ដែលព្រះសង្ឃខេត្តសៀមរាប បានធ្វើពិធីបំបួសកុលបុត្រកុលធីតាខ្មែរច្រើនរយនាក់នៅក្នុងពេលប្រារព្ធពិធីបុណ្យពិសាខបូជាម្ដងៗ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។