មេបញ្ជាការ​កងរាជអាវុធហត្ថ​ចំនួន​៣​ខេត្ត​ជាប់​ពាក់ព័ន្ធ​នឹង​អំពើ​ពុករលួយ

ដោយ សុ ជីវី
2018-10-24
អ៊ីម៉ែល
មតិ
Share
បោះពុម្ព
អគ្គ​មេ​បញ្ជាការ​កង​រាជ​អាវុធហត្ថ​លើ​ផ្ទៃ​ប្រទេស លោក សៅ សុខា ចុះ​ត្រួត​ពិនិត្យ​គំនរ​ឈើ​ក្នុង​បរិវេណ​ក្រុមហ៊ុន​ដី​សម្បទាន​សេដ្ឋកិច្ច​ចិន ក្នុង​ឃុំ​រលួស ស្រុក​សំបូរ ខេត្ត​ក្រចេះ កាល​ពី​ថ្ងៃ​ទី​១៩ ខែ​មករា ឆ្នាំ​២០១៦។
អគ្គ​មេ​បញ្ជាការ​កង​រាជ​អាវុធហត្ថ​លើ​ផ្ទៃ​ប្រទេស លោក សៅ សុខា ចុះ​ត្រួត​ពិនិត្យ​គំនរ​ឈើ​ក្នុង​បរិវេណ​ក្រុមហ៊ុន​ដី​សម្បទាន​សេដ្ឋកិច្ច​ចិន ក្នុង​ឃុំ​រលួស ស្រុក​សំបូរ ខេត្ត​ក្រចេះ កាល​ពី​ថ្ងៃ​ទី​១៩ ខែ​មករា ឆ្នាំ​២០១៦។
RFA

សង្គម​ស៊ីវិល​ស្វាគមន៍​ការស៊ើបអង្កេត​អំពើពុករលួយ​ពាក់ព័ន្ធ​នឹង​មេបញ្ជាការ​អាវុធហត្ថ​ប្រចាំ​ខេត្ត​បី​រូប ដែល​នឹង​អាច​នាំ​ឲ្យ អគ្គ​មេបញ្ជាការ​រាជ​អាវុធហត្ថ​លើ​ផ្ទៃ​ប្រទេស លោក សៅ សុខា ចាត់​វិធានការ​ទៅ​អ្នក​ប្រព្រឹត្ត​អំពើពុករលួយ​ទាំងនោះ។

អ្នកនាំពាក្យ​កងរាជអាវុធហត្ថ​លើ​ផ្ទៃ​ប្រទេស លោក អេង ហ៊ី ឲ្យ​អាស៊ីសេរី​ដឹង​នៅ​ថ្ងៃ​ទី​២៤ ខែ តុលា​ថា មេបញ្ជាការ​កងរាជអាវុធហត្ថ​ទាំង​បី​ខេត្ត គឺ​ខេត្ត​កំពង់ឆ្នាំង កំពង់ស្ពឺ និង​ខេត្ត​​​​​​​​​​​​​​​​​​​ព្រះវិហារ អាច​នឹង​ត្រូវ​វិន័យ​ប្រសិនបើ​រក​ឃើញ ពាក់ព័ន្ធ​និង​ករណី​អំពើ​ពុក រលួយ និង​ការ​ស៊ីដាច់​លុយ​ជំនួយ​របស់​កូនប្រុស​លោក ហ៊ុន សែន ព្រមទាំង​ប្រធាន​កង​អង្គរក្ស លោក ហ៊ុន សែន។ លោក​បន្ត​ថា ក្រុម​អធិការកិច្ច​នៅតែ​រង់ចាំ​ក្រុមប្រឹក្សាវិន័យ​សម្រេច​លើ​ជោគវាសនា​មន្ត្រី​កង​រាជ​អាវុធ​ទាំង​បី​ខេត្ត​នោះ។ លោក​បន្ត​ថា ក្រុមប្រឹក្សាវិន័យ​នេះ​គឺ​ដឹកនាំ​ដោយ​អគ្គមេបញ្ជាការ​កងរាជអាវុធហត្ថ​លើ​ផ្ទៃ​ប្រទេស លោក សៅ សុខា និង​មានការ​ចូលរួម​ពី​អ្នក​ពាក់ព័ន្ធ​មួយ​ចំនួន​ទៀត។ «»

លោក អេង ហ៊ី បញ្ជាក់​ថា លោក​មិនទាន់​អាច​ដឹង​ពី​កម្រិត​នៃ ការ​ដាក់​ទោស​ទណ្ឌ​លើ​មេបញ្ជាការ​កងរាជអាវុធហត្ថ​ទាំង​បី​ខេត្ត​នេះ​នៅឡើយ​ទេ ប៉ុន្តែ​លោក​ថា លោក សៅ សុខា នឹង​អនុវត្ត​ទៅតាម​បទបញ្ជា​នៃ​កងយោធពលជាតិ​ខេមរភូមិន្ទ។

ព័ត៌មាន​ទាក់ទង​អំពើពុករលួយ​និង​រឿង​កិបកេង​លុយ​កូនប្រុស​លោក ហ៊ុន សែន ត្រូវ​បាន​សារព័ត៌មាន​ក្នុងស្រុក​កាលពីដើម​ខែ​តុលា ចុះផ្សាយ​ថា មេបញ្ជាការ​កងរាជអាវុធហត្ថ​ខេត្ត​ព្រះវិហារ លោក កង សៅគុណ បាន​ស៊ីដាច់​លុយ​របស់​លោក ហ៊ីង ប៊ុនហៀង មេបញ្ជាការ​កង​អង្គរក្ស​លោក ហ៊ុន សែន ប្រមាណ​៨០​លាន​រៀល​កាលពី​អំឡុង​យុទ្ធនាការ​បោះឆ្នោត​ជាតិ ខែ​កក្កដា​កន្លងទៅ និង​បាន​ប្រព្រឹត្ត​អំពើពុករលួយ​ផ្សេងទៀត។

ចំណែក​មេបញ្ជាការ​កង​រាជ​អាវុធហត្ថ​ខេត្ត​កំពង់ស្ពឺ លោក ជូ សារុន បាន​យក​អង្ករ​ឧបត្ថម្ភ​របស់​លោក ហ៊ុន ម៉ានី តែ​ម្នាក់​ឯង ដែល​អង្ករ​នេះ ត្រូវ​ទុក​ឲ្យ​កង​រាជ​អាវុធ ហត្ថ​ទូទាំង​ខេត្តកំពង់ស្ពឺ​។ រីឯ​មេបញ្ជាការ​កងរាជអាវុធហត្ថ​ខេត្ត​កំពង់ឆ្នាំង​លោក សាក់ សារ៉ាង ពាក់ព័ន្ធ​ការ​ប្រព្រឹត្ត​អំពើពុករលួយ​និង​យក​លុយ​ពី​ឈ្មួញ​រកស៊ី​ឈើ។

អាស៊ីសេរី​នៅ​មិនទាន់​អាច​រក​ប្រភព​ទាក់ទង​សុំ​ការ​ឆ្លើយតប​ពី​មន្ត្រី​ប៉េអិម​ដែល​រង​ការ​ការ​ចោទប្រកាន់​នេះ​បាន​នៅឡើយ​ទេ។

ប្រធាន​ក្រុម​អ្នកវិភាគ​វ័យក្មេង កញ្ញា លី ស្រីស្រស់ យល់ថា បើ​ការ​ធ្វើ​អធិការកិច្ច​គឺជា​ការអនុវត្ត​ច្បាប់​នឹង​ទទួល​ប្រសិទ្ធភាព។ ប៉ុន្តែ​កញ្ញា​យល់ថា បើ​សិន​ការស្រាវជ្រាវ​ករណី​ពុករលួយ​នោះ​កើតឡើង​ព្រោះ​ទំនាស់​ផលប្រយោជន៍​ក្នុង​ជួរ​មន្ត្រី​កងរាជអាវុធហត្ថ​នឹង​មិន​បាន​ផ្តល់​ប្រយោជន៍​ដល់​សង្គមជាតិ​នោះ​ឡើយ។ «»

នាយក​ប្រតិបត្តិ​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ និយាយ​ថា បើ​មានការ​រក​ឃើញ​កំហុស​របស់​មន្ត្រី​កង​រាជ​អាវុធ​ទាំង​បី​រូប​នោះ​មែន ការអនុវត្ត​វិធានការ ឬ​ទណ្ឌកម្ម​គឺ​មិន​ខុស​ពី​លើក​មុនៗ​ដែល​របប​លោក ហ៊ុន សែន ធ្លាប់​បាន​អនុវត្ត​កន្លងទៅ​ឡើយ គឺ​គ្រាន់​ការ​បញ្ឈរជើង​ឬ​ផ្ទេរ​ការងារ​ពី​កន្លែង​មួយ​ទៅ​កន្លែង​ប៉ុណ្ណោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល