ប្រមុខរដ្ឋាភិបាលកម្ពុជា បានប្រកាសដាក់ឲ្យប្រើប្រាស់ជាផ្លូវការនូវក្រដាសប្រាក់ថ្មីប្រភេទ ៥០០ និង១០០រៀលដែលទើបបោះពុម្ពរួចនៅលើទីផ្សារ។
ថ្លែងក្នុងពិធីសម្ពោធការតភ្ជាប់ស្ពានអ្នកលឿង លោកនាយករដ្ឋមន្ត្រី ហ៊ុន សែន ឲ្យដឹងកាលពីព្រឹកថ្ងៃទី១៤ មករា ថា ក្រដាសប្រាក់ ៥០០រៀលដែលទើបចេញថ្មីនេះ គឺម្ខាងមានរូបព្រះឆាយាល័ក្ខណ៍ព្រះមហាក្សត្រ ព្រះបាទសម្ដេចព្រះ នរោត្តម សីហមុនី ហើយនៅជ្រុងម្ខាងទៀត គឺរដ្ឋាភិបាលបានសម្រេចដាក់រូបស្ពានចំនួនពីរ ដែលជាជំនួយឥតសំណងរបស់ជប៉ុន គឺស្ពានគីហ្សូណា និងស្ពានអ្នកលឿង។ លោកបន្តថា «ថ្ងៃនេះដើម្បីបង្ហាញចំណងមិត្តភាព និងសហប្រតិបត្តិការរវាងកម្ពុជា និងប្រទេសជប៉ុន រាជរដ្ឋាភិបាលកម្ពុជា បានដាក់ឲ្យចរាចរនូវក្រដាសប្រាក់ ៥០០រៀល»។
លោក ហ៊ុន សែន បញ្ជាក់ថា មូលហេតុដែលរដ្ឋាភិបាលសម្រេចដាក់ក្រដាសប្រាក់៥០០រៀល មានរូបស្ពានទាំងពីរ ដែលជាជំនួយឥតសំណងរបស់រដ្ឋាភិបាលជប៉ុន នេះ គឺដើម្បីពង្រឹងកិច្ចសហប្រតិបត្តិការ និងរឹតចំណងមិត្តភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។