ចៅក្រមសាលាដំបូងរាជធានីភ្នំពេញ សម្រេចដាក់មេដឹកនាំសម្ព័ន្ធសហជីពចលនាកម្មករ លោក ប៉ាវ ស៊ីណា អោយឋិតនៅក្រោមការត្រួតពិនិត្យ បន្ទាប់ពីលោកបានចូលទៅបំភ្លឺនៅចំពោះមុខចៅក្រមនៃស្ថាប័ននេះ កាលពីព្រឹកថ្ងៃទី១២ កញ្ញា។ ការចូលខ្លួនរបស់ លោក ប៉ាវ ស៊ីណា គឺតាមដីកាកោះហៅកាលថ្ងៃទី២ កញ្ញា។
ចំណុចចម្បងជាងគេនៃការត្រួតពិនិត្យរបស់តុលាការនោះ គឺសំដៅដល់ការបង្គាប់ប្រធានសម្ព័ន្ធសហជីពចលនាកម្មករ លោក ប៉ាវ ស៊ីណា មិនឱ្យចូលរួម ឬដឹកនាំការតវ៉ាណាមួយតទៀត។
ការបង្គាប់បែបនេះ គឺនៅបន្ទាប់ការចោទសួររបស់ចៅក្រមស៊ើបអង្កេតដែលថា លោក និងមេដឹកនាំសម្ព័ន្ធសហជីព ៥រូបផ្សេង បានដឹកនាំបញ្ជាបាតុកម្មហិង្សាផ្ទាល់នៅផ្លូវវ៉េងស្រេង រាជធានីភ្នំពេញ កាលពីចុងឆ្នាំ២០១៣ និងខែមករា ឆ្នាំ២០១៤។ លោកបដិសេធ និងសុំឱ្យលើកលែងការចោទទាំងនេះ៖ «ប៉ុន្តែយើងឃើញថាអត់ទេ យើងត្រូវបានគេដាក់នៅក្រោមការត្រួតពិនិត្យ អត់ឱ្យធ្វើសកម្មភាពជួបជុំ អត់ឱ្យធ្វើសកម្មភាពតវ៉ា អត់ឱ្យប្រមូលផ្ដុំ។ មានន័យថា សកម្មភាពទាំងឡាយណាដែលគេយល់ថា ប៉ះពាល់សន្តិសុខសណ្ដាប់ធ្នាប់ គឺយើងត្រូវបានផ្អាកទាំងអស់ ហើយរួមទាំងមិនអនុញ្ញាតឱ្យយើងចេញទៅណាមកណីទាំងអស់។ មានន័យថា ទៅក្រៅប្រទេសអីអត់ទាំងអស់។ ដូច្នេះ យើងត្រូវតែនៅក្នុងស្រុក នៅតែក្នុងផ្ទះ ធ្វើអីក្រោមការត្រួតពិនិត្យ ហើយត្រូវទៅបង្ហាញខ្លួនតាមការកំណត់តាមដីកាគេ។ មានន័យថា គ្រប់ម៉ោងគ្រប់ពេល នៅពេលគេតម្រូវជួបយើង គឺយើងត្រូវតែមកជួបគេ»។
លោកហៅការកោះហៅរបស់តុលាការ ឱ្យលោកចូលខ្លួនទៅបំភ្លឺនេះ គឺគ្រាន់តែជាហេតុផលមួយបិទបាំងយុទ្ធនាការទាមទារប្រាក់ឈ្នួលកម្មករ ១៧៧ដុល្លារ ដែលក្រុមសហជីពកម្មករ គ្រោងធ្វើនៅថ្ងៃទី១៧ ខែកញ្ញា នេះ។ លោកបញ្ជាក់ទៀតថា ចំពោះរូបលោក យុទ្ធនាការថ្ងៃទី១៧ ខែកញ្ញា នឹងនៅតែបន្ត ដែលសហជីពនៅតាមមូលដ្ឋានដឹកនាំធ្វើនៅពេលសម្រាក៖ «គាត់នៅធ្វើដដែល គ្រាន់តែថាសកម្មភាពនៃការធ្វើនេះ មិនមែនទ្រង់ទ្រាយផ្ទុះបាតុកម្មអីទេ។ គ្រាន់តែបង្ហាញនូវសារមួយចំនួនទៅអ្នកបញ្ជាទិញទាំងអស់ ឱ្យគាត់ដឹងពីការរស់នៅរបស់កម្មករ តើខ្វះខាតយ៉ាងម៉េច ហើយពួកគាត់ជាអ្នកទទួលផលចំណេញពីវិស័យកាត់ដេរ និងស្បែកជើងនៅប្រទេសខ្មែរ»។
លោក ប៉ាវ ស៊ីណា ឱ្យដឹងថា តាមគម្រោង នៅថ្ងៃទី១២ កញ្ញា សាលាដំបូងរាជធានីភ្នំពេញ ក៏បង្គាប់ឱ្យ អ្នកស្រី ម៉ម ញឹម ប្រធានសហព័ន្ធសហជីពជាតិនៃវាយនភ័ណ្ឌកាត់ដេរកម្ពុជា ចូលខ្លួនបំភ្លឺដែរ។ ក៏ប៉ុន្តែ អ្នកស្រីអវត្តមានដោយសារមានបេសកកម្មនៅក្រៅប្រទេស។ លោកឱ្យដឹងដែរថា ក្រៅពីរូបលោក មេដឹកនាំសហព័ន្ធសហជីព ៥រូបផ្សេងទៀត គឺលោក រ៉ុង ឈុន លោក ជា មុនី អ្នកស្រី ម៉ម ញឹម អ្នកស្រី យ៉ាង សុភ័ណ្ឌ និងលោក អាត់ ធន់ ក៏នឹងត្រូវសាលាដំបូងរាជធានីភ្នំពេញ កោះហៅឱ្យបំភ្លឺដូចគ្នាដែរ។
ប្រធានសហភាពការងារកម្ពុជា (CLC) លោក អាត់ ធន់ ថ្លែងថា រហូតមកដល់ពេលនេះ លោកទទួលបានដីកាចំនួន៥ ហើយដែលបង្គាប់ឱ្យចូលខ្លួនបំភ្លឺ ចាប់ពីថ្ងៃទី១៥ ដល់ថ្ងៃទី១៨ កញ្ញា សប្ដាហ៍ក្រោយ។ ក៏ប៉ុន្តែ លោកបានសុំលើកពេលរហូតដល់ថ្ងៃទី១៨ កញ្ញា៖ «ថ្ងៃទី១៥ ដោយសារយើងមានធុរៈធ្វើសន្និសីទកាសែត ថ្ងៃទី១៦ គឺដោយសារតែខ្ញុំជាប់ប្រជុំនៅក្រសួង ហើយថ្ងៃទី១៧ ដោយសារតែខ្ញុំជាប់ធ្វើយុទ្ធនាការ ហើយនិងការប្រជុំហ្នឹង គឺយើងលើកពេលដល់ថ្ងៃទី១៨ ពេលព្រឹកម៉ោង ៨កន្លះ ខ្ញុំនឹងចូលទៅតាមដីកាកោះដោយបណ្ដឹងរបស់ ជីម៉ាក (GMAC) ហើយពេលល្ងាច ខ្ញុំនឹងចូលទៅតាមបណ្ដឹងក្រុមហ៊ុន អែស.អិល (SL)។ អ៊ីចឹង សរុបទាំងអស់រឿងផ្សេងទៀត ទាំងអស់វា ១២ករណី ដែលបានប្ដឹងខ្ញុំក្នុងអំឡុងពេលយើងធ្វើយុទ្ធនាការប្រាក់ឈ្នួលកន្លងមកហ្នឹង»។
ស្របពេលដែល លោក ប៉ាវ ស៊ីណា កំពុងចូលបំភ្លឺក្នុងតុលាការនៅព្រឹកថ្ងៃទី១២ កញ្ញា នៅឯខាងក្រៅវិញ មានតំណាងសហជីពមូលដ្ឋានប្រមាណ ៥០នាក់ ដែលមកពីតាមខេត្តនានានាំគ្នាលើកបដា និងស្រែកតវ៉ា ទាមទារឱ្យតុលាការទម្លាក់ការចោទប្រកាន់ទាំងអស់លើមេដឹកនាំសហជីព។ ពួកព្រមានថា នឹងធ្វើមហាកូដកម្មទូទាំងប្រទេស ប្រសិនបើតុលាការមិនធ្វើតាមការទាមទារ។
មេដឹកនាំសហព័ន្ធសហជីពទាំង ៦រូប កំពុងជាប់ចោទពីបទល្មើស៤ដូចគ្នា គឺទី១ ការបង្កហិង្សាដោយចេតនា ទី២ ការគំរាមកំហែង ទី៣ បំផ្លិចបំផ្លាញទ្រព្យសម្បត្តិ និងទី៤ ការធ្វើឱ្យរាំងស្ទះចរាចរណ៍កាលពីក្នុងអំឡុងពេលមានបាតុកម្ម កាលពីថ្ងៃទី២៥ ខែធ្នូ ឆ្នាំ២០១៣ ដល់ថ្ងៃទី៣ ខែមករា ឆ្នាំ២០១៤។ លោក ប៉ាវ ស៊ីណា ជាមេដឹកនាំសហជីពដែលតុលាការឱ្យចូលបំភ្លឺមុនគេក្នុងបទចោទទាំងនេះ រីឯសេចក្ដីសម្រេចចៅក្រមនឹងចេញដីកាពេលខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។