នៅដើមរដូវច្រូតកាត់ប្រមូលផលស្រូវឆ្នាំនេះប្រជាកសិករជាច្រើនគ្រួសារ នៅស្រុកភ្នំស្រុក ខេត្តបន្ទាយមានជ័យ កំពុងប្រឈមមុខនិងតម្លៃស្រូវចុះថោក ដោយពីមួយថ្ងៃទៅមួយថ្ងៃឈ្មួញអ្នកទិញស្រូវចេះតែទម្លាក់ថ្លៃជាបន្តបន្ទាប់ ធ្វើឲ្យពួកគាត់លក់កសិផលមិនទទួលបានផលចំណេញទេ។
ក្រុមប្រជាកសិករត្អូញត្អែរពីតម្លៃស្រូវបែបនេះ បន្ទាប់ពីពួកគាត់ចាប់ផ្ដើមប្រមូលផលស្រូវប្រភេទលេខមួយបណ្ដើរៗ ប្រមាណជាងមួយសប្ដាហ៍ទៅហើយ។ ដោយនៅពេលប្រមូលផលនោះ តម្លៃស្រូវដែលក្រុមឈ្មួញផ្ដើមប្រមូលទិញដំបូងពីប្រជាកសិករ គឺប្រភេទស្រូវផ្កា រំដួលល្អលេខមួយក្នុងតម្លៃប្រមាណ ៩រយ៥០រៀល(៩៥០រៀល)ក្នុងមួយគីឡូក្រាម។
ប្រជាកសិករម្នាក់ឈ្មោះលោក ត្រាង មនោសេដ្ឋា រស់នៅភូមិត្រពាំងថ្មខាងត្បូង ឃុំប៉ោយចារ ស្រុកភ្នំស្រុក ថ្លែងថាតម្លៃស្រូវដែលឈ្មួញទិញពីប្រជាកសិករជាង៩រយរៀលក្នុងមួយគីឡូក្រាមនេះ ជាតម្លៃមួយស្ទើរមិនទទួលបានផលចំណេញទៅហើយ។ ប៉ុន្តែរឹតតែពិបាកជាងនោះទៀត គឺនៅពេលដែលប្រជាពលរដ្ឋសម្រុកច្រូតកាត់ស្រូវកាន់តែច្រើន ក្រុមឈ្មួញអ្នកប្រមូលទិញស្រូវក៏ចេះតែបង្អាប់ទម្លាក់តម្លៃជាបន្តបន្ទាប់ ដោយពីតម្លៃជាង៩រយរៀល(៩០០រៀល) មកនៅក្រោម៩រយរៀល(៩០០)ក្នុងមួយគីឡូក្រាម។ លោកបន្តថាតម្លៃស្រូវក្រោម៩០០រៀលនេះ ប្រជាកសិករលក់ស្រូវទាំងបង្ខំចិត្ត ហើយមិនទទួលបានផលកម្រៃ ដើម្បីយកសងថ្លៃជំពាក់បំណុលគេនោះឡើយ៖ «ជំពាក់គេវ័ណ្ឌក បងសម្រាប់អ្នកមានត្រាក់ទ័រទៅ ជឿជីជឿម៉ាស៊ុតគេ អ្នកអត់ក៏អញ្ចឹងដែរ។ នៅពេលដែលចុះធ្វើស្រែធ្វើចម្ការម្នាក់ៗទៅយកជីពីអឺ ! ថៅកែ គេអ្នកលក់ជីហ្នឹង ហើយដល់ពេលប្រមូលផលហើយបានយើងលក់ទូទាត់ឲ្យ។ ដូច្នេះអាការទិញជីមកនេះគឺគេគិតការដោយសារយើងអត់មានលុយណាបង ! គេគិតការគ្រប់គ្នាទាំងអស់ បើយើងមានលុយដល់ដៃអត់អីទេ។ ហើយកសិករយើងសង្ឃឹមថាឲ្យថ្លៃម៉ាស៊ុត ឲ្យថ្លៃជីគេនៅពេលដែលប្រមូលផលហ្នឹងឯង»។
ប្រជាកសិករនៅស្រុកភ្នំស្រុកជាច្រើនគ្រួសារ ប្រកបរបរធ្វើស្រែសុទ្ធតែត្អូញត្អែរពីតម្លៃស្រូវចុះថោកហើយមិនទទួលបានផលចំណេញនេះដូចៗគ្នា។ ដោយម្នាក់ៗចេះតែបារម្ភក្នុងចិត្តខ្លាចបន្ទាប់ពីប្រមូលផលស្រូវហើយរកប្រាក់ទៅសងបំណុលជំពាក់គេ ពីការធ្វើស្រែនេះមិនបាន។
ប្រជាកសិករនៅស្រុកភ្នំស្រុកម្នាក់ទៀត ឈ្មោះលោក សាន ជឿន មានមតិថាតម្លៃស្រូវអាចនឹងចុះថោកជាងពេលបច្ចុប្បន្នទៀត ពីព្រោះគ្រាន់តែនៅដើមរដូវច្រូតកាត់របស់ប្រជាកសិករ សកម្មភាពឈ្មួញទម្លាក់តម្លៃស្រូវបែបនេះទៅហើយ ទម្រាំដល់រដូវច្រូតកាត់ពេញទំហឹងប្រមាណជា២សប្ដាហ៍ខាងមុខនោះ មិនដឹងតម្លៃស្រូវទៅជាយ៉ាងណានោះទេ៖ «ខ្ញុំតែឲ្យគេឃើញថាសកម្មភាពរបស់កសិករនោះលំបាកណាស់ ដល់ពេលធ្វើបានស្រូវឡើងច្រើនអញ្ចេះ ទម្លាក់តម្លៃម៉ាថ្ងៃ៤ ៥ លេខ ចុះដល់ទៅពេលស្រូវច្រើនទម្លាក់តម្លៃទៅរកតែលក់នឹងមិនរួច ដកតែថ្លៃជីឈ្មួញមិនរួច។ ដូចខ្ញុំដូចអីវាអូ ! វាពិបាកណាស់ចង់ឈប់ធ្វើស្រែអស់ហើយ ស្រូវល្អដែរ ក៏ប៉ុន្តែតម្លៃតែ៨០មួយថ្ងៃមុន ៨៥ធ្លាក់មកដល់៨០»។
លោកបន្តទៀតថាប្រជាកសិករមួយចំនួននៅតំបន់ភ្នំស្រុក ដោយសារតែជំពាក់បំណុលគេពីការធ្វើស្រែហើយគ្មានប្រាក់សងបំណុលគេនោះ មានប្រជាកសិករខ្លះលក់អស់ដីស្រែកេរ្តិ៍ពីដូនតាហើយធ្វើចំណាកស្រុកទៅស្វែងរកការងារធ្វើនៅប្រទេសថៃកើតមានជាហូរហែ៖ «កាលពីមុនស្រុកខាងណេះអត់មានអ្នកណាទៅថៃទេ ដល់សព្វថ្ងៃសឹងចង់គ្រប់ផ្ទះហើយទៅថៃ។ មូលហេតុមកអំពីនៅក្នុងស្រុកទៅយូរៗ ជំពាក់គេអង្គការណេះណោះទៅអស់ស្រែលក់ ឲ្យសងគេអស់ទៅ ស្រែមិនកើតផងស្រូវក៏ថោក ម្ល៉ោះហើយនៅរកស៊ីក្នុងស្រុកវាអត់មានបានអាអ៊ីចឹង គ្រួសារឲ្យបានឋិតថេរទេ ដូច្នោះប្រជាជនគ្នាអត់របស់របរគ្នាចេះតែរត់ទៅ សល់ស្រែ១ហិកតារ ២ហិកតារ លក់អស់រលីងរត់ទៅតែម្ដង»។
ទាក់ទងនិងបញ្ហានេះឈ្មួញអ្នកទិញស្រូវនៅស្រុកមង្គលបូរីខេត្តបន្ទាយមានជ័យ លោក តុង អ៊ីម ទទួលស្គាល់ថាតម្លៃស្រូវ ដែលប្រមូលទិញពីប្រជាកសិករនៅតំបន់ភ្នំស្រុក រយៈពេលប៉ុន្មានថ្ងៃចុងក្រោយនេះចុះថោកខ្លះមែន។ លោកសន្និដ្ឋានថាហេតុដែលតម្លៃស្រូវធ្លាក់ថ្លៃនោះ មួយផ្នែកធំបណ្ដាលមកពីឈ្មួញរាយរងប្រមូលទិញពីប្រជាពលរដ្ឋទម្លាក់ថ្លៃ។ ម្យ៉ាងទៀតដោយសារអំឡុងពេលនេះប្រជាពលរដ្ឋនាំគ្នាសម្រុកប្រមូលផលស្រូវច្រើនលើសពីចំនួនអ្នកទិញ កត្តាទាំងនេះហើយទើបធ្វើឲ្យតម្លៃស្រូវធ្លាក់ចុះ។ ទោះជាយ៉ាងនេះក្ដីលោកថាគុណភាពស្រូវរបស់ប្រជាកសិករក៏ជាបច្ច័យមួយសំខាន់ដែរ ដែលធ្វើឲ្យតម្លៃស្រូវចុះថោកនោះ៖ «ពួកគាត់ជួនកាលដែលទេទៅៗហ្នឹងអត់ទទួលស្គាល់ស្រូវរឿងគុណភាពស្រូវខ្លួនឯងទេ។ និយាយរឿងម៉ាលីសចង់តែទារថ្លៃដូចគេ តែម៉ាលីស ដូចចាប់ឆាយអ៊ីចឹង។ ពន្យល់គាត់រាល់ថ្ងៃថាអង្ករចេញក្រៅប្រទេសដល់កាលណាយកស្រូវប្រភេទចាប់ឆាយលាយស្ទើរខ្លី គាត់អត់ព្រមទទួលស្គាល់ទេអ៊ីចឹងណាស់។ វាពិបាកអ៊ីចឹងបញ្ហាដល់ទិញចង់ឲ្យបានដូចគេ ដល់ពេលគេទិញតម្លៃទាប ព្រោះអីគេទិញយកទៅលក់ប្រភេទស្រូវផ្សេង ដូចជាគេទិញ ទៅគេលក់ទៅប្រភេទផ្កាខ្ញីអ៊ីចឹង ព្រោះវាស្ទើរគ្រាប់ដល់ពេលអ៊ីចឹងគាត់ខឹងគាត់ឃើញគេលក់បានថ្លៃជាងគាត់ទេទៅនេះទៅនោះទៅអ៊ីចឹង»។
ទាក់ទងនិងបញ្ហានេះដែរ អ្នកជំនាញខាងសេដ្ឋកិច្ច លោក ស្រី ចន្ធី មានប្រសាសន៍បញ្ជាក់ថាតម្លៃស្រូវចុះថោកនៅពេលនេះដោយសារប្រជាកសិករសម្រុកប្រមូលផលស្រូវ មានចំនួនច្រើនជាងតម្រូវការរបស់អ្នកទិញ។ ម្យ៉ាងវិញទៀតគឺបណ្ដាលមកពីពុំមានឈ្មួញពីប្រទេសថៃចូលមកទិញស្រូវរបស់ប្រជាកសិករដូចពេលមុនៗ។ យ៉ាងណាលោកថាជម្រើសដែលល្អ នៅក្នុងស្ថានភាពបែបនេះប្រជាកសិករត្រូវស្តុកស្រូវទុកមួយរយៈសិន ឬអាចប្រមូលផ្ដុំគ្នាបង្កើតជាសហគមន៍លក់ស្រូវជាក្រុម៖ «អ៊ីចឹងគាត់មានតែប្រមូលផ្ដុំគ្នាលក់ឲ្យអ្នកប្រមូលទិញហ្នឹង។មួយទៀតជួនកាលគាត់លក់ដោយឡែកៗពីគ្នា អ៊ីចឹងអ្នកប្រមូលទិញគាត់ត្រូវការចំណាយដើរទៅប្រមូលទិញ អ៊ីចឹងគាត់ឲ្យតម្លៃក៏ថោកដែរ។ ហើយបញ្ហាផ្សេងទៀតអាចទាក់ទងការដឹកជញ្ជូនផង ដោយសារអាតម្លៃដឹកជញ្ជូនវាថ្លៃ អ៊ីចឹងអ្នកប្រមូលទិញគាត់ឲ្យតម្លៃថោក កសិករទាបដើម្បីគ្រប់គ្រងអាការទូទាត់អាចំណាយរបស់គាត់អីផ្សេង ហើយវាឆ្លើយតបតម្រូវការទីផ្សារផង»។
ប្រជាកសិករឲ្យដឹងថាស្រូវប្រភេទផ្កា រំដួលនៅក្នុងស្រុកភ្នំស្រុក ដែលប្រជាពលរដ្ឋកំពុងប្រមូលផលនោះមានរាប់ពាន់ហិកតារដី ហើយស្រូវទាំងនោះប្រឈមមុខនិងខ្វះទីផ្សារលក់ចេញ។ ប្រជាពលរដ្ឋអំពាវនាវឲ្យមន្ត្រីពាក់ព័ន្ធធ្វើយ៉ាងណាជួយស្វែងរកទីផ្សារលក់ស្រូវក្នុងតម្លៃមួយសមរម្យ គឺសុំឲ្យតម្លៃស្រូវប្រភេទផ្ការំដួលប្រមាណចាប់ពី១ពាន់រៀលឡើងទៅ ក្នុងមួយគីឡូក្រាម ដែលតម្លៃនេះធ្វើប្រជាកសិករទទួលផលចំណេញខ្លះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។