សមាគមកាត់ដេរកម្ពុជាអំពាវនាវឱ្យរួមដៃគ្នា ប្រយុទ្ធប្រឆាំងជំងឺកូវិដ-១៩
2020.03.25
មន្ត្រីសហភាពការងារកម្ពុជាលើកឡើងថា ការអំពាវនាវដល់កម្មករឱ្យចូលរួមចំណែកកាត់បន្ថយការឆ្លងជំងឺកូវីដ១៩ (Covid-19) គឺមិនអាចមានប្រសិទ្ធភាពបានទេ ពីព្រោះរាល់ថ្ងៃនេះ ក្រុមកម្មកររស់នៅប្រមូលផ្តុំគ្នាច្រើន ដូចជា ការធ្វើដំណើររួមគ្នាទៅធ្វើការ ការហូបបាយជុំគ្នាជាដើម។ ប្រធានសហភាពការងារកម្ពុជា លោក អាត់ ធន់ មានប្រសាសន៍បន្តថា ប្រសិនបើមានមេរោគសាកូវី២ (SARS-CoV2) នៃជំងឺកូវិដ-១៩ (Covid-19) ឆ្លងក្នុងចំណោមក្រុមកម្មករវិញ គឺពិបាកនឹងទប់ស្កាត់ណាស់៖ «ចំពោះកម្មករ បច្ចុប្បន្ននេះ ឡានឈ្នួល រ៉ឺម៉ក ឬជិះម៉ូតូ ពីផ្ទះមកកន្លែងធ្វើការ គាត់ជិះជាក្រុមហើយ។ គាត់ហូបអាហារថ្ងៃត្រង់ គឺនៅជុំគ្នា បន្ទប់ទឹកប្រើជុំគ្នា។ ខ្ញុំគិតថា ប្រសិនបើមាននរណាម្នាក់ដែលមានរោគនេះ គឺវាឆ្លងហើយ។ ចំពោះស៊ីម៉ាក់ (CMAC) ថា កុំឱ្យជួបជុំគ្នានោះ គឺដូចតែគ្នាទេ គ្រាន់តែថា ឥឡូវនេះ នៅក្នុងសហគមន៍ និងនៅកន្លែងកម្មកររស់នៅនិងធ្វើការ នៅមិនទាន់មានមេរោគឆ្លងនេះនៅឡើយ»។
ការលើកឡើង របស់ប្រធានសហភាពការងារកម្ពុជានេះ ធ្វើឡើងក្រោយពីសមាគមកាត់ដេរកម្ពុជា (GMAC ) ចេញសេចក្តីថ្លែងការណ៍ កាលពីថ្ងៃទី២៤ ខែមីនា អំពាវនាវឱ្យក្រុមហ៊ុនបញ្ជាទិញ ម្ចាស់រោងចក្រ កម្មករនិងសហជីព រួមគ្នា ដើម្បីប្រយុទ្ធប្រឆាំងជំងឺកូវីដ១៩ (Covid-19)។ សមាគម GMAC បញ្ជាក់ថា ការរីករាលដាលសកលនៃជំងឺកូវីដ១៩ (Covid-19) បណ្ដាលឱ្យមានភាព ចលាចលដល់ការរស់នៅរបស់ពលរដ្ឋ និងអាជីវកម្មផ្នែកវិស័យកាត់ដេរ។ សមាគម សូមស្នើដល់ក្រុមហ៊ុនបញ្ជាទិញ សូមកុំបោះបង់កម្ពុជា ត្រូវអនុវត្តកិច្ចសន្យារបស់ខ្លួន អំពាវនាវឱ្យរួមដៃគ្នា ប្រយុទ្ធប្រឆាំងជំងឺកូវីដ-១៩ ដោយនៅតែបន្តទទួលយកទំនិញដែលបានផលិតរួចហើយនិងទំនិញកំពុងផលិត។ ទង្វើនេះ គឺអាចជួយដល់រោងចក្រ ដើម្បីបើកប្រាក់ឈ្នួលសម្រាប់កម្មករ និងអាចបន្តការងារសម្រាប់ពួកគេ។
សេចក្ដីថ្លែងការណ៍បន្តថា ចំពោះម្ចាស់រោងចក្រវិញ ត្រូវយកចិត្តទុកដាក់បន្ថែម លើបញ្ហាសុវត្ថិភាព បង្កើនអនាម័យខ្ពស់ នៅកន្លែងការងារ ដើម្បីជួយបង្ការការឆ្លងរាលដាលនៃជំងឺនេះ។ ចំណែកកម្មករវិញ ក៏ត្រូវចូលរួម ក្នុងការជួយទប់ស្កាត់ការឆ្លងជំងឺ កូវីដ១៩ (Covid-19) ដោយត្រូវលាងដៃឱ្យបានញឹកញាប់ និងកាត់បន្ថយការជួបជុំ ក្នុងពិធីផ្សេងៗ។
អាស៊ីសេរី មិនទាន់អាចទាក់ទងអគ្គលេខាធិការសមាគមកាត់ដេរកម្ពុជា លោក ខេន លូ ដើម្បីសុំការបញ្ជាក់បន្ថែមជុំវិញបញ្ហានេះបានទេ ដោយសារទូរស័ព្ទហៅចូលជាច្រើនដង ពុំមានអ្នកទទួល។
គិតត្រឹមថ្ងៃទី២៤ ខែមីនា ចំនួនអ្នកស្លាប់ដោយសារជំងឺកូវីដ-១៩ (Covid-19) ដែលកំពុងរាតត្បាតសកល គឺមានចំនួនជាង ១ម៉ឺន ៧ពាន់នាក់ (១៧.៣៦៥) ក្នុងចំណោមអ្នកឆ្លងសរុបជិត ៤០ម៉ឺននាក់ (៣៩៩.០៩៣) នៅទូទាំងពិភពលោក៕