តំណាងសហភាព និងសហព័ន្ធសហជីពសំខាន់ៗចំនួន១០ នៅកម្ពុជា បានជួបប្រជុំគ្នានៅថ្ងៃទី៣១ កក្កដា អនុម័តថា នឹងទាមទារប្រាក់ខែអប្បបរមាសម្រាប់កម្មករចំនួន ១៧៧ដុល្លារក្នុងមួយខែ ពីថៅកែរោងចក្រកាត់ដេរសម្លៀកបំពាក់ និងដេរស្បែកជើង។
តំណាងសហជីពកម្មករ បានលើកឡើងថា ការទាមទារប្រាក់ខែអប្បបរមាចំនួន ១៧៧ដុល្លារក្នុងមួយខែនេះ ដោយសារមានការស្រាវជ្រាវ និងរកឃើញថា ការបែងចែកប្រាក់ចំណេញរបស់និយោជកមិនយុត្តិធម៌ គឺពួកថៅកែរកចំណូលប្រហែល ៦ពាន់លានដុល្លារក្នុងមួយឆ្នាំ ហើយយកមកចំណាយលើកម្លាំងពលកម្មរបស់កម្មករប្រហែល ១០ភាគរយប៉ុណ្ណោះនៃប្រាក់ចំណូលនោះ។
លោក គង់ អាទិត្យ តំណាងសហជីពសហភាពការងារកម្ពុជា ដែលបានចូលរួមប្រជុំ ថ្លែងឲ្យដឹងថា កន្លងមកមានការទាមទារប្រាក់ខែអប្បបរមាចំនួន ១៦០ដុល្លារក្នុងមួយខែ ប៉ុន្តែភាគីថៅកែរោងចក្រ និងរដ្ឋាភិបាល បានសម្រេចផ្តល់ប្រាក់ខែឲ្យកម្មករក្នុងមួយខែត្រឹម ១០០ដុល្លារ៖ «បើគេមិនព្រម យើងធ្វើយុទ្ធនាការឲ្យទីផ្សារអីទទួលខុសត្រូវរឿងនេះដែរ ជាពិសេសយើងដាក់សម្ពាធទៅទីផ្សារ និងថៅកែ ដែលជាអ្នកចំណេញច្រើននេះ។ យើងនឹងតវ៉ាទៅរដ្ឋាភិបាលដែរ ឲ្យនៅខាងយើង ការពារកម្មករ ហើយសហជីពដែលស៊ីញេលើនេះ គឺទាំងសហជីពគាំទ្រ និងប្រឆាំងរដ្ឋាភិបាលអី ឥឡូវគេសាមគ្គីគ្នាហើយ»។
លោក គង់ អាទិត្យ បានឲ្យដឹងបន្ថែមថា ការទាមទាររបស់តំណាងសហជីពនេះ ធ្វើឡើងនៅមុនពេលមានការប្រជុំរួមរវាងសហជីពតំណាងកម្មករ និងថៅកែរោងចក្រនៅខែសីហា និង កញ្ញា នេះ។ ភាគីសហជីពតំណាងកម្មករ ចង់ឲ្យថៅកែរោងចក្រ អនុវត្តការផ្តល់ប្រាក់ខែ ១៧៧ដុល្លារក្នុងមួយខែនេះចាប់ពីខែតុលា តទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។