សង្គមស៊ីវិលយល់ថា ការអំពាវនាវរបស់មេដឹកនាំរបបក្រុងភ្នំពេញ លោក ហ៊ុន សែន ឲ្យម្ចាស់ផ្ទះសំណាក់សណ្ឋាគារ នៅខេត្តជាប់សមុទ្ទទាំងអស់ កុំឡើងថ្លៃបន្ទប់ជួល ក្នុងអំឡុងពេលបុណ្យឆ្លងឆ្នាំសកលនោះ គ្មានប្រសិទ្ធិភាពទេ និងគ្រាន់តែជានយោបាយប្រជាភិថុតិ បើអាជ្ញាធរមិនមានឆន្ទ និងវិធានការច្បាស់លាស់។
លោក ហ៊ុន សែន អំពាវនាវដល់អាជីវករម្ចាស់ផ្ទះសំណាក់ សណ្ឋាគារ នៅខេត្តកោះកុង ខេត្តព្រះសីហនុ ខេត្តកំពត និងខេត្តកែប ឲ្យខិតខំរក្សាតម្លៃបន្ទប់ជួល នៅដដែល ក្នុងកំឡុងពេល ពលរដ្ឋនឹងទៅសម្រាកលំហែ ឆ្លងឆ្នាំសកល នៅចុងខែធ្នូនេះ។ នៅចំពោះមុខកម្មករ កម្មការិនីរោងចក្រ នៅខេត្តកំពង់ស្ពឺ ថ្ងៃទី១២ ធ្នូ លោក ហ៊ុន សែន ឆ្លៀតរិះគន់ថា តម្លៃសណ្ឋាគារនៅខេត្តព្រះសីហនុ ឬខេត្តជាប់មាត់សមុទ្ទនានា មិនឡើងថ្លៃដូចសណ្ឋាគារនៅទីក្រុងញូយ៉ក របស់សហរដ្ឋអាមេរិកទេ៖ « មិនចាំបាច់ទៅនិយាយឯណាទេ។ ទៅនិយាយជាមូយអាមេរិកកាំងតែម្ដង នៅញូយ៉ក ( ទីក្រុង ) ឲ្យតែខែមហាសន្និបាតអង្គការសហប្រជាជាតិថ្លៃសណ្ឋាគារឡើង ១០០ភាគរយ ឬឡើង ១២០ភាគរយ ឡើងលើស ១០០ភាគរយ ថ្លៃសណ្ឋាគារ។ បើយើងបូកពន្ធ ថាឥឡូវ ដូចជាយើងត្រៀមបំរុងថា ខែ៩ ត្រូវទៅអង្គការសហប្រជាជាតិ ចឹងកក់ពីខែ១ ខែ២ ទៅ អាហ្នឹង អាចនឹងបានថោក។ ប៉ុន្តែចាប់ជិតដល់ នៅ១ខែ ឬ២ខែ អាហ្នឹងខ្ពស់ហើយ។ សូម្បីតែចៅខ្ញុំរៀននៅប្រទេសអង់គ្លេស ចៅស្រីរៀននៅប្រទេសអង់គ្លេស ដើម្បីមកជួបខ្ញុំ នៅហ្សឺណែវ ( ប្រទេសស្វីស ) ពេលដែលខ្ញុំទៅដល់ហ្សឺណែវ ចៅត្រូវទិញសំបុត្រយន្ដហោះលើសថ្លៃធម្មតា ៧០ភាគរយ»។
ក្នុងចំណោមខេត្តទាំង៤ ជាប់មាត់សមុទ្ទ តម្លៃផ្ទះសំណាក់ និងសណ្ឋាគារ នៅខេត្តព្រះសីហនុ មានតម្លៃថ្លៃជាងគេ។ ពលរដ្ឋរអ៊ូថា សូម្បីតែថ្ងៃធម្មតា ក៏តម្លៃផ្ទះសំណាក់ សណ្ឋាគារនៅខេត្តព្រះសីហនុ មានតម្លៃថ្លៃរួចទៅហើយ។ រដ្ឋបាលខេត្តព្រះសីហនុ កាលពីថ្ងៃទី២៨ វិច្ឆិកា បានបញ្ជាឲ្យមន្ត្រីចុះស្រង់ស្ថិតិ និងតម្លៃបន្ទប់ជួលតាមសណ្ឋាគារ ផ្ទះសំណាក់ បឹងហ្គាឡូ និងរីហ្សត (Resort) នានា ក្នុងខេត្តព្រះសីហនុ ក្រោយរងការរិះគន់យ៉ាងចាស់ដៃ តាមបណ្ដាញសង្គមហ្វេសប៊ុក ពីតម្លៃបន្ទប់ជួលស្នាក់នៅ ឡើងថ្លៃខ្លាំង នៅខណៈដែលម្ចាស់អាជីវកម្ម ភាគច្រើនលើសលុបជាជនជាតិចិន។ បេសកកម្ម មន្ត្រីចុះស្រង់តម្លៃបន្ទប់ជួលតាមផ្ទះសំណាក់ សណ្ឋាគារ បឹងហ្គាឡូ រីហ្សត នឹងត្រូវបញ្ចប់នៅថ្ងៃទី៣១ ខែធ្នូ ហើយរបាយការណ៍ នឹងត្រូវរដ្ឋបាលខេត្ត យកទៅប្រជុំអនុម័ត នៅពេលក្រោយ។
អ្នកសម្របសម្រួលសមាគមសិទ្ធិមនុស្ស អាដហុក ប្រចាំខេត្តព្រះសីហនុ អ្នកស្រី ជាប សុធារី ឲ្យដឹងថា មូលហេតុនៃការអំពាវនាវកន្លងមកគ្មានប្រសិទ្ធិភាព ដោយសារអាជ្ញាធរគ្មានវិធានការ ឬយន្ដការបន្ថែម ពីលើការអំពាវនាវនោះ។ សង្គមស៊ីវិលរូបនេះ យល់ថា ការអំពាវនាវរបស់លោក ហ៊ុន សែន ពេលនេះ ក៏ទំនងគ្មានប្រសិទ្ធិភាពដែរ។ អ្នកស្រី ជាប សុធារី ឲ្យដឹងបន្ថែមថា ពេលនេះ អាជីវកម្មផ្ទះសំណាក់ សណ្ឋាគារ ភាគច្រើន គ្រប់គ្រងដោយជនជាតិចិន ហើយម្ចាស់ផ្ទះសំណាក់ខ្លះ មិនទទួលយកការកក់មុន សម្រាប់ថ្ងៃបុណ្យទានទេ ជាហេតុធ្វើឲ្យមានការដំឡើងថ្លៃតាមគ្នា។
អ្នកស្រី ជាប សុធារី ផ្ដល់យោបល់ថា ដើម្បីឲ្យការអំពាវនាវរបស់ លោក ហ៊ុន សែន មានប្រសិទ្ធិភាពមេដឹកនាំរបបមួយនេះ គួរមានវិធានការតឹងរឹងផ្លូវច្បាប់។ ម្យ៉ាងទៀត ម្ចាស់ផ្ទះសំណាក់ សណ្ឋាគារខ្លះ ក៏ជាមន្ត្រី និងសាច់ញាតិ របស់មន្ត្រីធំៗ ឬសាច់ញាតិរបស់អាជ្ញាធរនៅខេត្តព្រះសីហនុទៀតផង ដែលគួរតែអនុវត្តតម្លៃបន្ទប់ជួលសមរម្យជាគំរូ៖ « កុំឲ្យគាត់ឡើង ( ថ្លៃ ) ចឹងគាត់ ( អាជីវករម្ចាស់ផ្ទះសំណាក់ ម្ចាស់សណ្ឋាគារ ) អត់មានខាតណា។ យើងមិនមែនឲ្យគាត់បញ្ចុះតម្លៃឯណា គ្រាន់ថា គាត់ជួលធម្មតាឲ្យគាត់ជួលធម្មតា។ ចឹងទាល់តែអាជ្ញាធរ រាជរដ្ឋាភិបាលហ្នឹង គាត់មានការពន្យល់ហេតុផលយ៉ាងណា ឲ្យគាត់ស្ដាប់។ តាមពិតយើងមិនមែន ចង់ឲ្យគាត់ខាតទេ គ្រាន់តែថា កុំយកតម្លៃលើសហ្នឹងឯង ហើយ វាត្រូវមានអ្នកចាប់ផ្ដើមធ្វើជាគំរូមុនគេ .... យ៉ាងហោចណាស់ ត្រូវមានអ្នកចាប់ផ្ដើមធ្វើជាគំរូមុនគេ ខ្វះអ្វីអ្នកខ្លះ គាត់ជាអ្នករកស៊ីធំៗ អាចជាមន្ត្រីរាជការ ចឹងដែរ ចឹងឲ្យពួកគាត់ ចាប់ផ្ដើមធ្វើជាគំរូមុនគេទៅ » ។
អភិបាលខេត្តព្រះសីហនុ លោក យន្ដ មីន លើកទឹកចិត្តឲ្យអាជីវករក្នុង និងក្រៅប្រទេស បន្ថែមការវិនិយោគ វិស័យផ្ទះសំណាក់ និងសណ្ឋាគារបន្ថែម នៅខេត្តព្រះសីហនុ ដើម្បីទប់ទល់ការឡើងថ្លៃបន្ទប់ជួល ដែលអនុវត្តតាមទីផ្សារសេរី។
ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ លោក វន់ ពៅ ផ្ដល់យោបល់ថា ដើម្បីដោះស្រាយឲ្យមានប្រសិទ្ធិភាព របបលោក ហ៊ុន សែន គួរបង្កើតក្រុមអធិការកិច្ចឯករាជ្យ ត្រួតពិនិត្យមើលតម្លៃជួល ក្នុងថ្ងៃបុណ្យទាន។ តែមិនមែនជាក្រុមមន្ត្រីអធិការកិច្ច ចាំទទួលយកសំណូកពីម្ចាស់ផ្ទះសំណាក់ និងសណ្ឋាគារទេ។ លោក វ៉ន់ ពៅ បន្តថា ក្រៅពីវិធានការផ្លូវច្បាប់ របបក្រុងភ្នំពេញ គួរមានយន្តការជួយសម្រួលដល់ភ្ញៀវទេសចរណ៍ ដូចជា បង្កើតផ្ទះសំណាក់រដ្ឋ ដើម្បីប្រជែងនឹងផ្ទះសំណាក់ សណ្ឋាគារឯកជន ហើយក្រសួងទេសចរណ៍ត្រូវដើរតួនាទីយ៉ាងសំខាន់ ក្នុងការកំណត់តម្លៃផ្ទះសំណាក់ ក្នុងតម្លៃសមរម្យ មិនមែនទុកឲ្យឈ្មួញឡើងថ្លៃស្រេចតែចិត្ត ដូចសព្វថ្ងៃទេ។
លោក វន់ ពៅ ក៏ជំរុញឲ្យក្រុមការងារខេត្តព្រះសីហនុ ដែលកំពុងចុះស្រង់តម្លៃផ្ទះសំណាក់ សណ្ឋាគារ បឹងហ្គាឡូ រីហ្សត ត្រូវធ្វើការឲ្យបានលឿន ហើយរដ្ឋបាលខេត្តព្រះសីហនុ ត្រូវចាត់វិធានការជាបន្ទាន់ មុនថ្ងៃឆ្លងឆ្នាំមកដល់។ សង្គមស៊ីវិលរូបនេះ យល់ថា ប្រសិនបើត្រឹមជាការអំពាវនាវ ដែលគ្មានយន្តការច្បាស់លាស់ទេ វាគ្រាន់តែជាការធ្វើប្រជាភិថុតិនយោបាយ បែបបោក និងលួងចិត្តពលរដ្ឋប៉ុណ្ណោះ៖ « ខ្ញុំមើលឃើញ វាហាក់ដូចជារបៀបឆន្ទៈនយោបាយច្រើនជាង ពីព្រោះកាលណា ចង់យកចិត្តរាស្ត្រអ្វីមួយ គេធ្វើបែបហ្នឹង ហើយបន្ទាប់អត់មានយន្តការណា ច្បាស់លាស់ឲ្យមានប្រសិទ្ធិភាពទេ។ យើងឃើញច្រើនហើយ អារឿងកិច្ចការទាំងអស់ហ្នឹង តាំងពីរឿងទប់ស្កាត់កុំឲ្យមានការកាប់បំផ្លាញព្រៃឈើ ទប់ស្កាត់ ដោះស្រាយរឿង វិបត្តិដីធ្លី មានរឿងជាច្រើនទៀតឃើញថា ធ្វើឡើងមួយឆាវៗ វាបាត់ទៅវិញ។ ចឹងហើយ ខ្ញុំគិតថា ត្រូវធ្វើឲ្យមែនទែន កុំធ្វើមួយឆាវៗ ហើយបាត់ » ។
លោក វន់ ពៅ អះអាងថា បច្ចុប្បន្នក្រុមពលរដ្ឋរកស៊ីរបរសេដ្ឋកិច្ចក្រៅប្រព័ន្ធ នៅខេត្តព្រះសីហនុ កំពុងរងគ្រោះ ពីការដំឡើងថ្លៃសព្វមុខទំនិញ។ លោក បារម្ភថា នៅថ្ងៃឆ្លងឆ្នាំ ពលរដ្ឋនឹងមិនទៅកម្សាន្តខេត្តព្រះសីហនុ ដូចកាលពីរដូវភ្ជុំបិណ្ឌ ជាហេតុធ្វើឲ្យអ្នករកស៊ីរបរកំប៉ិចកំប៉ុក ក្រៅប្រព័ន្ធ នៅខេត្តព្រះសីហនុ បាត់បង់ការងារ និងគ្មានចំណូល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។