រដ្ឋមន្ត្រីក្រសួងការងារថា អាត្រាអ្នកមានការងារធ្វើ ៩៩,៣% ឯខាងសហជីពថាផ្ទុយពីតួលេខនេះ
2018.10.29
លោក អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ថ្លែងក្នុងពិព័រណ៍ការងារ និងផលិតភាពជាតិ នៅកោះពេជ្រ រាជធានីភ្នំពេញ កាលពីថ្ងៃទី២៧ ខែតុលា ឆ្នាំ ២០១៨។
រូបថត៖ ហ្វេសប៊ុកក្រសួងការងារ និងបណ្ដុះបណ្ដាលវិជ្ជាជីវៈ។
រដ្ឋមន្ត្រីក្រសួងការងារ លោក អ៊ិត សំហេង អះអាងថា អាត្រាអ្នកមានការងារធ្វើមានចំនួនដល់ទៅជាង ៩៩,៣% នៃកម្លាំងពលកម្មសរុបជិត ១០លាននាក់ទូទាំងប្រទេស។
ការលើកឡើងនេះ ធ្វើឡើងក្នុងការតាំងពិពណ៌ការងារ និងផលិតភាពជាតិ ឆ្នាំ២០១៨ កាលពីថ្ងៃទី២៧ ខែតុលា នៅកោះពេជ្រ រាជធានីភ្នំពេញ។ លោកអះអាងថា «អាត្រាការងារខ្ពស់នេះ ដោយសារការបន្ដរីកលូតលាស់ផ្នែកសេដ្ឋកិច្ច ដែលសំដៅធានាស្ថិរភាព សន្ដិសុខ និរន្ដរភាពការងារ ប្រាក់ចំណូល ភាពកក់ក្ដៅក្នុងចិត្ដសម្រាប់កម្មករនិយោជិត និងគ្រួសារ។
ក៏ប៉ុន្តែ ប្រធានសម្ព័ន្ធសហភាពការងារកម្ពុជាលោក អាត ធន់ មានប្រសាសន៍ប្រាប់អាស៊ីសេរី មុនការផ្សាយបន្តិចថា អ្នកដែលគ្មានការងារធ្វើច្រើន នៅកម្ពុជាបច្ចុប្បន្ន រួមមាន អ្នកជំនាញ និងនិស្សិតផងដែរ។ លោកបន្តថា ស្ថិតិដែលអាជ្ញាធរក្រុងភ្នំពេញរាប់បញ្ចូលអ្នកមានការងារធ្វើរហូតដល់ជាង ៩០% នេះ រួមមានទាំងអ្នកលក់ដូរ អ្នករត់ម៉ូតូឌុប និងអ្នកមានរបរតិចតួចជាដើម៖ «គេកំណត់អ្នកមានការងារធ្វើ ២ ឬ ៣ម៉ោង ឬអ្នកធ្វើការងារមិនគ្រប់ម៉ោង (Part time) ក៏ចាត់ទុកថា មានការងារធ្វើដែរ។ ដូចនេះ ចំនួនអ្នកអត់ការងារធ្វើតិចមែនទែន យើងមើលសហរដ្ឋអាមេរិក និងអឺរ៉ុប អ្នកអត់ការងារធ្វើ គេមាន ៤ ឬ ៥% ហើយយើងមានតែ ០.៧% ដូចជាតិចពេក។ យកចំនួននេះ មកធ្វើជាមូលដ្ឋានមិនទាន់គ្រប់គ្រាន់ទេ»។
លោក អាត ធន់ បន្តថា របាយការណ៍របស់អង្គការអន្តរជាតិខាងការងារ ហៅកាត់ថា ILO និងរបាយការណ៍របស់របបក្រុងភ្នំពេញថ្មីៗ នេះ បានបង្ហាញថា ជាមធ្យមក្នុងមួយគ្រួសារមានគ្នា ៥,៣នាក់ អត្រាអ្នកមានការងារធ្វើ គឺពាក់កណ្តាល ដែលនេះមានន័យថា មនុស្សម្នាក់ ត្រូវចិញ្ចឹមមនុស្សម្នាក់។
ចំណែក ប្រធានការិយាល័យស៊ើបអង្កេតនៃអង្គការសិទ្ធិមនុស្ស លីកាដូ លោក អំ សំអាត ក៏បានចោទជាសំណួរថា តើស្ថិតិនៃអត្រាអ្នកមានការងារធ្វើនៅកម្ពុជានេះ ក្រសួងការងារស្រាវជ្រាវផ្អែកលើមូលដ្ឋានអ្វីច្បាស់លាស់។ លោក អំ សំអាត បញ្ជាក់ថា ប្រសិនបើកម្ពុជា សម្បូរការងារធ្វើដូចនេះ មិនចាំបាច់មានពលរដ្ឋខ្មែរជាងមួយលាននាក់ទាំងស្របច្បាប់ និងមិនស្របច្បាប់ ធ្វើចំណាកស្រុកទៅធ្វើការនៅប្រទេសជិតខាងនោះទេ ជាពិសេស គឺប្រទេសថៃ៖ «ខ្ញុំអត់ដឹងថា រដ្ឋាភិបាលស្រាវជ្រាវ និងជំរឿន ឬធ្វើស្ថិតិយ៉ាងម៉េចទេ។ ប្រសិនបើមានការងារនៅស្រុកខ្មែរមានធ្វើច្រើនហើយ ប្រជាពលរដ្ឋពេញកម្លាំងមិនធ្វើចំណាកស្រុកទេ។ ហេតុផលដែលចំណាកស្រុក ដោយសារទី១ រកការងារធ្វើក្នុងស្រុកបាន ហើយទី២ ទាក់ទងនឹងប្រាក់បៀវត្សទាប។ យើងមិនដឹងថា រដ្ឋាភិបាលយកកម្លាំងពលកម្មប្រភេទណា។ ប៉ុន្តែកម្លាំងពលកម្មជាទូទៅ ប្រជាពលរដ្ឋពិបាកទទួលយកណាស់»។
កាសែតភ្នំពេញប៉ុស្ត៍ផ្សាយនៅថ្ងៃចន្ទ ទី២៩ ខែតុលា បានដកស្រង់សំដីរដ្ឋមន្ត្រីការងារ លោក អ៊ិត សំហេង ដែលបានអះអាងថា សហគ្រាសគ្រឹះស្ថានសេដ្ឋកិច្ចក្នុងប្រព័ន្ធដែលបានចុះបញ្ជីក្នុងក្រសួងការងារ មានចំនួនសរុប ១ម៉ឺន ២ពាន់គ្រឹះស្ថាន និងមានកម្មករនិយោជិតចំនួន ១លាន ៥សែននាក់។ សហគ្រាស គ្រឹះស្ថាននៃសេដ្ឋកិច្ចក្រៅប្រព័ន្ធមានប្រមាណ ៦សែនគ្រឹះស្ថាន ដែលមានកម្មករនិយោជិតប្រមាណ ២លាន ៤សែននាក់។ ចំណែកវិស័យកសិកម្មវិញ គឺមានកម្មករនិយោជិតជាង ៤លាននាក់ ពលករធ្វើការនៅក្រៅប្រទេសមាន ១លាន ២សែននាក់ និងមន្ដ្រីសាធារណៈប្រមាណ ៥សែននាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សភាកម្ពុជាប្រតិកម្មទៅនឹងការសម្រេចរបស់សភាអឺរ៉ុបរឿងដកប្រព័ន្ធអនុគ្រោះពន្ធEBA បន្ថែម
- ស្ត្រីដែលគ្រូពេទ្យវះកាត់ខុសបច្ចេកទេសបានបាត់បង់ជីវិត
- កម្ពុជារកចំណូលបាន ១.៤ពាន់លានដុល្លារ ពីកំណើនភ្ញៀវទេសចរបរទេសក្នុងឆ្នាំ២០២២
- លោក ហ៊ុន សែន ប្រើលុយដើម្បីដោះស្រាយបញ្ហាកម្មករក្នុងពេលរោងចក្រជាច្រើនបិទទ្វារ
- លោក ហ៊ុន សែន ជួយលោក ហ៊ុន ម៉ាណែត ឱ្យឡើងសក្ដិមួយកម្រិតទៀត