សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា ហៅកាត់ថា អាដហុក (Adhoc) និងអង្គការអុកស្វាម (Oxfam) បានសហការគ្នាតាំងពិព័រណ៍រូបភាព ស្ដីពីសិទ្ធិទទួលបានយុត្តិធម៌ នៅរាជធានីភ្នំពេញ ដើម្បីលើកកម្ពស់ការដោះស្រាយបញ្ហាក្រៅប្រព័ន្ធតុលាការ ដែលគេយល់ថាមានប្រសិទ្ធភាពខ្ពស់។
ប្រធានសមាគមអាដហុក លោក ធន សារាយ មានប្រសាសន៍នៅថ្ងៃទី១៦ ខែកញ្ញា ថា គោលបំណងនៃការរៀបចំពិព័រណ៍នេះ បង្ហាញពីការបង្កើនលទ្ធភាពរកយុត្តិធម៌ជូនពលរដ្ឋក្រីក្រ និងជនងាយរងគ្រោះនៅកម្ពុជា តាមរយៈការដោះស្រាយបណ្ដឹងក្រៅប្រព័ន្ធរបស់អាដហុក ដែលគាំទ្រដោយអង្គការអុកស្វាម សហភាពអឺរ៉ុប និងស្ថាប័នផ្សេងទៀត។ លោក ធន សារាយ បញ្ជាក់ថា តាមរយៈសកម្មភាពដោះស្រាយបញ្ហាក្រៅប្រព័ន្ធតុលាការនេះ រួមមានករណី អំពើហិង្សាក្នុងគ្រួសារ ជម្លោះក្នុងគ្រួសារ ជម្លោះព្រំដី ជម្លោះកេរមរតក ជម្លោះរវាងអ្នកក្រ និងអ្នកមានអំណាច ដែលឃើញថាមានប្រសិទ្ធភាពខ្ពស់ ហើយចំណេញបានច្រើន ជាជាងការដោះស្រាយដោយប្រព័ន្ធតុលាការ។ ក៏ប៉ុន្តែលោកថា ករណីរំលោភសិទ្ធិធ្ងន់ធ្ងរ លោកក៏នឹងមិនលើកទឹកចិត្តឲ្យដោះស្រាយតាមការសម្របសម្រួលតាមរបៀបនេះដែរ។
លោក ធន សារាយ៖ «យើងឲ្យមានការស្រុះស្រួលភាគីទាំងសងខាងតែម្ដង ហើយយើងយកទឡ្ហីករណ៍ផ្នែកច្បាប់ ទឡ្ហីករណ៍ផ្នែកសង្គម ទឡ្ហីករណ៍រវាងគ្រួសារ និងគ្រួសារ អនាគតកូនចៅទាក់ទងរឿងគូភាគីដែលឈ្លោះគ្នា ដែលជិតខាងគ្នា ដែលមើលមុខគ្នាមិនចំ ហើយដែលយើងចំណាយអស់ទ្រព្យធន ពេលវេលាឆ្ងាយ ព្រោះយើងនៅចុងកាត់មាត់ញក យើងទៅប្ដឹងនៅតុលាការ តុលាការមានតែនៅតាមទីរួមខេត្ត។ យើងចំណាយពេលវេលា ចំណាយលុយអស់ច្រើន ទំនាស់បន្តិចបន្តួច យើងអាចនិយាយគ្នាបាន យើងចំណេញច្រើនណាស់ បើសិនយើងអាចរកការដោះស្រាយតាមរយៈការសម្រុះសម្រួលគ្នាហ្នឹង ប្រជាពលរដ្ឋគាត់សប្បាយចិត្តច្រើន ហើយគាត់បានទទួលយុត្តិធម៌ល្អជាង។ តុលាការជាផ្លូវការហ្នឹង ជួនកាលបាននូវអយុត្តិធម៌មកទៀតក៏មានដែរ»។
ពិព័រណ៍ស្ដីពីសិទ្ធិទទួលបានយុត្តិធម៌នេះ នឹងបើកឲ្យសាធារណជនចូលទស្សនា ចាប់ពីថ្ងៃទី១៦ ដល់ថ្ងៃទី២៤ ខែកញ្ញា នៅមជ្ឈមណ្ឌលមេតាអាតកម្ពុជា ផ្ទះលេខ៣៧ ផ្លូវសុធារស សង្កាត់ទន្លេបាសាក់ ខណ្ឌចម្ការមន រាជធានីភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។