មន្ត្រីប៉ូលិសចូលនិវត្តន៍នៅខេត្តតាកែវ ថ្លែងថា ពួកគាត់មិនដែលបើកប្រាក់ខែគ្រប់ចំនួនតាមតួលេខដែលចុះក្នុងបញ្ជីបើកលុយទេ។
អតីតមន្ត្រីប៉ូលិសនៃស្នងការដ្ឋាននគរបាលខេត្តតាកែវ សុំមិនបញ្ចេញឈ្មោះ ថ្លែងនៅថ្ងៃទី២២ ខែវិច្ឆិកា ថា តាំងពីចូលឆ្នាំ២០១៣ គឺក្រោយពីមន្ទីរសង្គមកិច្ចខេត្ត បញ្ជូនប្រាក់ខែចូលនិវត្តន៍របស់គាត់ទៅកាន់ការិយាល័យសង្គមកិច្ចស្រុកទ្រាំង ឲ្យបើកប្រាក់ឲ្យគាត់មក ប្រាក់ខែជាង ៥៧ម៉ឺនរៀល ដែលចុះនៅក្នុងបញ្ជីនៅពេលបើកជាក់ស្តែង គឺបាត់ជាង ១ម៉ឺនរៀលជានិច្ច។ លោកថា បើកាត់ប្រាក់ចូលរួមបង់ឲ្យសមាគមប៉ូលិស តាមគាត់ដឹងកាត់តែប្រាក់ ៤ពាន់រៀលទេ៖ «៥៧១.៣៦៩រៀល។ អ៊ីចឹងដល់ពេលបើកឲ្យខ្ញុំបានតែ ៥៦ម៉ឺនរៀលទេ កាត់ទៅលើអីឯណា ប៉ិនគាត់ថា កាត់សមាគម។ ប៉ុន្តែកាត់សមាគមណាដល់ទៅ ១ម៉ឺនជាង»។
មន្ត្រីប៉ូលិសម្នាក់ទៀតជាអតីតអនុប្រធានប៉ុស្តិ៍រដ្ឋបាល ថ្លែងថា ប្រាក់ខែគាត់ជាង ៤៩ម៉ឺនរៀល នៅពេលបើកពីការិយាល័យសង្គមកិច្ចស្រុកទ្រាំង នោះទទួលបាន ជួនកាល ៤៧ម៉ឺនរៀល ជួនកាល ៤៨ម៉ឺនរៀល តាមចិត្តមន្ត្រីអ្នកបើកលុយនោះចង់បើកឲ្យគាត់។ លោកថា មន្ត្រីចូលនិវត្តន៍មានវ័យចាស់ជរា មិនអាចរកការងារធ្វើ ឬលក់ពលកម្មងាយស្រួលទេ។ គាត់រំពឹងប្រាក់ខែនោះចិញ្ចឹមគ្រួសារ ប៉ុន្តែអ្នកបើកលុយបានកាត់ប្រាក់ប្រពន្ធ និងប្រាក់កូនយកខ្ទេចខ្ទី។ លោករំពឹងថា នៅពេលប្រាក់ចូលនិវត្តន៍របស់គាត់ បើកពីធនាគារអេស៊ីលីដា (Acleda Bank) នឹងមិនមានបញ្ហាកាត់យកស្រស់ៗដូចមន្ត្រីក្នុងតំណែងសង្គមកិច្ចកាត់យកនោះទេ៖ «ហើយវាបាត់តែរហូត។ ហើយដល់លុយប្រពន្ធខ្ញុំកន្លងមក អត់ដែលបានមួយរៀលទេ ព្រោះវាយកទៅស៊ីសំណូកសូកប៉ាន់ក៏មានទៅ អាកិបកេងប្រវ័ញ្ចរបស់មន្ត្រីរាជការដែលគ្នាពិការពលីចូលនិវត្តន៍ ហើយនិងគ្នាកិបកេងគ្នាអ៊ីចឹង ងាប់គ្នាដាច់ខ្យល់ងាប់ហើយ»។
បំភ្លឺតបនឹងការចោទនោះ លោក ឈួន ផាន់នី មន្ត្រីគណនេយ្យការិយាល័យសង្គមកិច្ចស្រុកទ្រាំង ថ្លែងថា ប្រាក់ដែលកាត់នោះ គឺកាត់លុយកូនដែលលើសអាយុ ១៨ឆ្នាំ ហួសអាយុដែលរដ្ឋាភិបាលចិញ្ចឹម។ កូនខ្លះអាយុក្រោម ១៨ឆ្នាំ នៅពេលចូលរៀនឆ្នាំសិក្សា២០១៣-២០១៤ ក្រសួងសង្គមកិច្ច តម្រូវឲ្យមានឯកសារបញ្ជាក់ពីសាលារៀន។ ប៉ុន្តែ ពួកគាត់អត់បំពេញតាមច្បាប់កំណត់ ទើបកាត់ប្រាក់កូន។ ម្យ៉ាងទៀត មន្ត្រីយោធា និងប៉ូលិសចូលនិវត្តន៍ ដែលកាត់ប្រាក់ គឺកាត់ចូលសមាគមម្នាក់ ៤ពាន់រៀល សម្រាប់ជួយពេលមានអ្នកស្លាប់ នឹងបានប្រាក់ ៤លានរៀលវិញ។ លោកបន្ថែមថា ការកាត់ប្រាក់ពីមន្ត្រីចូលនិវត្តន៍នោះ សម្រាប់ទិញក្រដាស ឬជួលថតចម្លង និងចាក់សាំងធ្វើដំណើររត់ការ ដែលរដ្ឋាភិបាលមិនមានខ្ទង់ចំណាយទៅលើបញ្ហានោះ ទើបគាត់សុំលុយខ្លះពីមន្ត្រីចូលនិវត្តន៍៖ «គាត់ថា កាត់ដល់ ១ម៉ឺនជាង គឺអត់មានទេ។ ហើយខ្ញុំសុំតិចតួចតាមលទ្ធភាពដែលគាត់ឲ្យ បើគាត់ឲ្យ បានយក បើគាត់មិនឲ្យ ក៏ខ្ញុំអត់មានថាអីដែរ។ ហើយបើឯកសារ គឺថាអត់មានជំពូកណាសម្រាប់ដោះស្រាយទេ នៅមូលដ្ឋាននេះ»។
ប្រធានមន្ទីរសង្គមកិច្ច ខេត្តតាកែវ លោក សោម អ៊ុំមុន្នីរ៉ា បញ្ជាក់ថា មន្ត្រីចូលនិវត្តន៍ទាំងស៊ីវិល និងកងប្រដាប់អាវុធ បើកប្រាក់នៅការិយាល័យស្រុកទ្រាំង មានជាង ៣០០នាក់។ ឯអ្នកចូលនិវត្តន៍នៅទូទាំងខេត្តតាកែវ មានជាង ១ពាន់នាក់។ លោកថា ចាប់ពីឆ្នាំ២០១៤ ទៅ អ្នកចូលនិវត្តន៍នឹងបើកប្រាក់ខែតាមគណនីដែលគាត់បានចុះហត្ថលេខាជាមួយធនាគារអេស៊ីលីដា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។