លោក ស ខេង រដ្ឋមន្ត្រីក្រសួងមហាផ្ទៃ អំពាវនាវដល់គណៈកម្មាធិការប្រយុទ្ធប្រឆាំងផលិតផល ក្លែងក្លាយ ឱ្យស្វែងរកមុខជននៅពីក្រោយអាជីវកម្មផលិត ទំនិញក្លែងក្លាយយកមកផ្ដន្ទាទោស ទៅតាមច្បាប់។ ការអំពាវនាវនេះធ្វើឡើងនៅក្នុង ពិធីដុតកម្ទេចចោលនូវផលិតផលក្លែងក្លាយ និងខុសច្បាប់ជាង ៧០តោន នៅព្រឹកថ្ងៃទី១២ ខែមីនា ឆ្នាំ២០១៩។
លោក ស ខេង ថ្លែងថា ការចុះបង្ក្រាបផលិតផលក្លែងក្លាយកន្លងមក គឺឃាត់បានតែទំនិញក្លែងក្លាយដែលស្ដុកទុកនៅក្នុងឃ្លាំង ប៉ុន្តែឈ្មួញដែលផលិតទំនិញក្លែងក្លាយទាំងអស់នេះ នៅតែរួចខ្លួន និងមានឱកាសផលិតទំនិញក្លែងក្លាយយកមកលក់លើទីផ្សារដដែល។ លោក ស្នើដល់មន្ត្រីក្រោមឱវាទ ត្រូវស្វែងរកជននៅពីក្រោយការផលិតទំនិញក្លែងក្លាយយកមកផ្ដន្ទាទោសតាមផ្លូវច្បាប់៖ «មកដល់ពេលនេះយើងមិនទាន់រកឃើញ .... បើមានទស្សនៈអ៊ីចឹងរលាយតែម្ដង»។
លោក ស ខេង ក៏ស្នើដល់គណៈកម្មាធិការប្រយុទ្ធប្រឆាំងផលិតផលក្លែងក្លាយ ចុះកិច្ចសន្យាជាមួយម្ចាស់ក្រុមហ៊ុន ផលិត និងក្រុមហ៊ុននាំចូលផលិតផលទាំងអស់ ដើម្បីឲ្យពួកគេកាន់តែមានការទទួលខុសត្រូវក្នុងការចូលរួមទប់ស្កាត់ការផលិត ការនាំចូលនូវផលិតផលក្លែងក្លាយ និងខូចគុណភាព។
ផលិតផលក្លែងក្លាយជាង ៧០តោន ដែលគណៈកម្មាធិការប្រយុទ្ធប្រឆាំងផលិតផល រឹបអូសបាន និងយកមកដុតកម្ទេចចោលនាពេលនេះរួមមាន ឱសថក្លែងក្លាយជាងមួយរយមុខ (១០៦) ទឹកសុទ្ធជាងប្រាំពាន់កេស (៥.៥២០) និងជីកសិកម្មមានជិតប្រាំបីពាន់គីឡូក្រាម (៧.៨៥០)៕