សមត្ថកិច្ចបញ្ជូនបុរសម្នាក់បង្ហោះព័ត៌មានវៀតណាមចាប់ក្មេងទៅតុលាការខេត្តតាកែវ
2017.08.01
សាលាដំបូងខេត្តតាកែវ។ រូបថតថ្ងៃទី២៩ ខែមិថុនា ឆ្នាំ២០១៧
RFA/Yang Chandara
សមត្ថកិច្ចនៅខេត្តតាកែវ បានបញ្ជូនបុរសម្នាក់ដែលបង្ហោះវីដេអូឃ្លីបនៅលើហ្វេសប៊ុក (facebook) របស់ខ្លួនថា មានជនជាតិវៀតណាម ដើរចាប់ក្មេងនៅខេត្តតាកែវ ទៅអយ្យការអមសាលាដំបូងខេត្ត នៅរសៀលថ្ងៃទី១ សីហា។ សមត្ថកិច្ចបានចោទម្ចាស់គណនីហ្វេសប៊ុកឈ្មោះ ឡា ឆាយ៉ា «La chhaya» ពីបទក្លែងឯកសារ និងញុះញង់។
ការបញ្ជូនម្ចាស់គណនីហ្វេសប៊ុកឈ្មោះ ឡា ឆាយ៉ា «La chhaya» គឺលោក លី ឆៃយ៉ា ទៅអយ្យការអមសាលាដំបូងខេត្តតាកែវ គឺក្រោយពេលដែលម្ចាស់គណនីហ្វេសប៊ុកមួយនេះ បានចូលបំភ្លឺនៅស្នងការដ្ឋានខេត្តតាកែវ កាលពីព្រលប់ថ្ងៃទី៣១ កក្កដា។
ស្នងការរងខេត្តតាកែវ លោក ឈុន សារ៉េត ឲ្យដឹងនៅថ្ងៃទី១ កក្កដា ថា ក្រោយការឃុំខ្លួនមួយយប់ និងសាកសួរចប់ សមត្ថកិច្ចបានបញ្ជូនបុរសឈ្មោះ លី ឆៃយ៉ា ទៅអយ្យការអមសាលាដំបូងខេត្តតាកែវ។ នៅពេលសាកសួរ លោក លី ឆៃយ៉ា បានអះអាងថា ការបង្ហោះព័ត៌មានវៀតណាម ចាប់ក្មេងនោះ គឺធ្វើដោយខ្លួនឯង។ ស្នងការរងខេត្តដដែលបញ្ជាក់ថា ក្រុមជំនាញដោយឡែកមួយក្រុមទៀត នឹងស្រាវជ្រាវជាបន្តលើករណីនេះ៖ «ដូចបានប្រាប់ចឹងថា ទោះបីមានអ្នកនៅពីក្រោយក៏គេ (លោក លី ឆៃយ៉ា) មិនប្រាប់យើងដែរ អាហ្នឹងទាល់តែយើងព្យាយាមក្នុងជំនាញដោយឡែកទៀតអាហ្នឹង»។
កាលពីថ្ងៃទី៣១ កក្កដា ស្នងការស្ដីទីខេត្តតាកែវ លោក ស៊ុន ថន បានផ្ញើលិខិតទៅអភិបាលខេត្តតាកែវ លោក ឡាយ វណ្ណៈ ប្រាប់ថា ក្រោយមានគណនីហ្វេសប៊ុកឈ្មោះ La chhaya និង ពៅ វីរៈបុត្រ ផ្សាយថា មានជនជាតិវៀតណាម ចាប់ក្មេងស្រីនៅភូមិស្វាយទង ឃុំខ្វាវ ស្រុកសំរោង រួចមក ស្នងការខេត្តបានបញ្ជាកងកម្លាំងជំនាញខេត្ត និងកងកម្លាំងមូលដ្ឋានចុះស្រាវជ្រាវតាមស្វែងរកអត្តសញ្ញាណជនដែលផុសវីដេអូ និងក្មេងស្រីជនរងគ្រោះដើម្បីធ្វើការបំភ្លឺជាបន្ទាន់។ ក្រោយពីការបំភ្លឺ សមត្ថកិច្ចបញ្ជាក់ថា ជាករណីមិនពិត និងជាការយល់ច្រឡំតែប៉ុណ្ណោះ។
ការអន្តរាគមន៍របស់សមត្ថកិច្ចក្នុងសំណុំរឿងផ្សព្វផ្សាយថា ជនជាតិវៀតណាម ចាប់ក្មេងនៅខេត្តតាកែវ នេះ គឺស្របពេលដែលមន្ត្រីនគរបាលនៃអគ្គស្នងការដ្ឋាននគរបាលជាតិ ប្រកាសថាគ្មានទេករណីចាប់ក្មេងវះយកក្រលៀន ឬគ្រឿងក្នុងនៅក្នុងប្រទេសកម្ពុជា។ សមត្ថកិច្ចបានស្រាវជ្រាវនៅតាមរាជធានី-ខេត្តទូទាំងប្រទេស ដែលលេចឮព័ត៌មានទាំងនេះ ដោយរកមិនឃើញករណីចាប់ក្មេងវះយកក្រលៀននោះទេ មានតែករណីចាប់ក្មេងជំរិតទារប្រាក់។ ស្ថាប័ននគរបាលជាតិបានដាក់ការសង្ស័យថា ករណីផ្អើលព័ត៌មានចាប់ក្មេងវះក្រលៀន អាចជាចេតនារបស់ក្រុមចាត់តាំងណាមួយដើម្បីចំណេញអ្វីមួយ។
ព័ត៌មានមិនពិតអំពីការចាប់កូនក្មេងវះយកក្រលៀន និងគ្រឿងក្នុងនេះ មិនមែនទើបតែកើតមាននៅក្នុងខេត្តតាកែវ នោះទេ។ ស្នងការរងនគរបាលជាតិ លោក គៀត ច័ន្ទថារិទ្ធិ បញ្ជាក់ថា មានខេត្ត-រាជធានីចំនួន១០ ដែលលេចឮព័ត៌មានមិនពិតនេះ ហើយចុងក្រោយ គឺករណីនៅស្រុកបារាយ ខេត្តកំពង់ធំ កាលពីថ្ងៃទី២៩ កក្កដា ដែលជនសង្ស័យរឿងចោរកម្ម ២នាក់ ត្រូវអ្នកស្រុកចាប់វាយធ្ងន់ធ្ងរ ព្រោះសង្ស័យថាជាអ្នកចាប់កូនក្មេង។ សមត្ថកិច្ចអះអាងថា ករណីនេះបានបង្កឲ្យមានអសន្តិសុខ ហើយបង្កដោយអ្នកលេងហ្វេសប៊ុកម្នាក់ជាសកម្មជនគណបក្សសង្គ្រោះជាតិ។
ទាក់ទងករណីព័ត៌មានចាប់ក្មេងនេះដែរ លោកនាយករដ្ឋមន្ត្រី ហ៊ុន សែន ក្នុងឱកាសចែកសញ្ញាបត្រដល់និស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅព្រឹកថ្ងៃទី១ សីហា បានអំពាវនាវឲ្យអ្នកលេងហ្វេសប៊ុក កុំបង្ហោះ និងកុំចែករំលែកបន្តនូវព័ត៌មានមិនពិត។ លោកនាយករដ្ឋមន្ត្រីហៅការបង្ហោះ និងការចែករំលែកព័ត៌មានមិនពិតតាមបណ្ដាញសង្គមហ្វេសប៊ុក ជាការបំពុលសង្គម។
មុនមានការអំពាវនាវរបស់លោកនាយករដ្ឋមន្ត្រី សមត្ថកិច្ចធ្លាប់បានព្រមានវិធានការផ្លូវច្បាប់ចំពោះអ្នកបង្ហោះ និងអ្នកចែករំលែកព័ត៌មានមិនពិត។
ចំណែកប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាព លោក យង់ គិមអេង សម្ដែងការសោកស្ដាយចំពោះអ្នកលេងហ្វេសប៊ុកដែលបង្ហោះ និងផ្សព្វផ្សាយព័ត៌មានមិនពិតតាមហ្វេសប៊ុក។ តែទោះជាយ៉ាងណា លោកយល់ថា សមត្ថកិច្ចមិនគួរឈានដល់ការចោទប្រកាន់ពលរដ្ឋទៅតុលាការនោះទេ គួរតែអប់រំ ឬព្រមានឲ្យសុំទោសជាសាធារណៈ ជាជាងការប្ដឹងពលរដ្ឋ៖ «រដ្ឋាភិបាល ឬក៏អគ្គស្នងការនគរបាលជាតិ ឬក្រសួងមហាផ្ទៃ អាចធ្វើការព្រមានគាត់ (អ្នកបង្ហោះព័ត៌មានមិនពិតតាមហ្វេសប៊ុក) ចឹងទៅ ឲ្យគាត់ (អ្នកបង្ហោះព័ត៌មានមិនពិតតាមហ្វេសប៊ុក) មានការសុំទោសជាសាធារណៈ អាហ្នឹងខ្ញុំយល់ថាវាសមរម្យជាង»។
លោក យង់ គិមអេង ថាព័ត៌មានជនជាតិវៀតណាម ដើរចាប់ក្មេង ឬករណីចាប់ក្មេងវះយកក្រលៀន មិនមែនជារឿងថ្មីនោះទេ ដោយឮមានករណីបែបនេះយូរមកហើយ ដូច្នេះសង្គមស៊ីវិលស្នើឲ្យអាជ្ញាធរធ្វើការវិនិច្ឆ័យចំពោះពលរដ្ឋដោយយកចិត្តទុកដាក់ ដើម្បីជៀសវាងការខាតបង់ប្រយោជន៍ធំសម្រាប់ក្រុមគ្រួសារដែលសមត្ថកិច្ចចោទប្រកាន់។ សម្រាប់ការព្រមានចាត់វិធានការផ្លូវច្បាប់ចំពោះអ្នកបង្ហោះ និងចែករំលែកព័ត៌មានមិនពិតនោះ សង្គមស៊ីវិលយល់ថា នឹងធ្វើឲ្យពលរដ្ឋភ័យខ្លាច និងមានការប្រុងប្រយ័ត្នជាងមុន ប៉ុន្តែការព្រមាននេះមិនមែនជាវិធានការល្អនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- តុលាការដោះលែងសកម្មជនគណបក្សប្រឆាំង និយមលោក កឹម សុខា គឺលោក យឹម ស៊ីណន ឱ្យនៅក្រៅឃុំបណ្ដោះអាសន្ន
- អាជ្ញាធរក្រុងភ្នំពេញ ចាប់ខ្លួនមន្ត្រីគណបក្សភ្លើងទៀន៣នាក់
- "លោក ហ៊ុន សែន សម្ញែងនាឡិកាដៃតម្លៃរាប់លានដុល្លារ បង្ហាញថា លោកជាមេដឹកនាំពុករលួយ"
- ជប៉ុនប្រកាសមិនបញ្ជូនអ្នកសង្កេតការណ៍សំរាប់ការបោះឆ្នោតជាតិនៅខែកក្កដាខាងមុខនេះទេ
- សង្គមស៊ីវិលប្រតិកម្មនឹងក្រសួងអប់រំដែលឱ្យសិស្សឈប់សំរាកយូរដើម្បីគាំទ្រកីឡាស៊ីហ្គេម
