នៅក្នុងឱកាសបុណ្យចូលឆ្នាំថ្មីនេះ អាជ្ញាធរខេត្តតាកែវផ្ដោតការយកចិត្តទុកដាក់ លើការការពារសុវត្ថិភាពចរាចរណ៍ផ្លូវគោក។ ជាពិសេសការការពារសុវត្ថិភាពចរាចរណ៍នៅតាមដងផ្លូវជាតិលេខ២ និងលេខ៣ ស្ថិតក្នុងភូមិសាស្ត្រខេត្ត ដែលជាផ្លូវជាតិដ៏មមាញឹកជាងគេពេលបុណ្យចូលឆ្នាំ។
នៅក្នុងពិធីរាប់បាត្រ និងជួបជុំបុគ្គលិកមន្ត្រីរាជការខេត្ត ដើម្បីអបអរថ្ងៃចូលឆ្នាំថ្មី ថ្ងៃទី១៤ មេសា អភិបាលខេត្តតាកែវ លោក ឡាយ វណ្ណៈ បានប្រកាសថា លោកចាត់វិធានការការពារគ្រោះថ្នាក់ចរាចរណ៍ជាចម្បង ក្នុងចំណោមវិធានការផ្សេងៗទៀត ដើម្បីការពារសុវត្ថិភាព ជូនប្រជាពលរដ្ឋលេងសប្បាយ ក្នុងឱកាសបុណ្យចូលឆ្នាំថ្មី ៖ « យើងបានរៀបចំដាក់កម្លាំងដើម្បីល្បាត ដាក់កម្លាំងតាមគោលដៅ ខ្ញុំបានផ្ដាំផ្ញើក្នុងពេលប្រជុំគណៈបញ្ជាការឯកភាពបីថ្ងៃមុននេះ ថាសុំឲ្យមើលផ្លូវជាតិលេខ២ លេខ៣កុំឲ្យគ្រោះថ្នាក់ចរាចរណ៍ ឲ្យកម្លាំងប៉ូលិសចរាចរណ៍ឈរនៅតាមផ្លូវ ដើម្បីសម្រួលចរាចរណ៍ ហើយកម្លាំងសន្តិសុខសណ្ដាប់ធ្នាប់ ឈរនៅតាមទីផ្សារ នៅតាមបណ្ដោយផ្លូវជាតិលេខ២ លេខ៣ ធ្វើម៉េចកុំឲ្យស្ទះព្រោះថាប្រជាពលរដ្ឋ គាត់សម្រុកចេញពីក្រុងភ្នំពេញមកតាមបណ្ដាខេត្តផ្សេងៗ។ អ៊ីចឹងផ្លូវជាតិលេខ២ លេខ៣នេះ គឺនឹងមានប្រជាពលរដ្ឋធ្វើចរាចរណ៍ច្រើន ការយកចិត្តទុកដាក់របស់ខេត្តគឺថាធ្វើម៉េច កុំឲ្យផ្លូវជាតិលេខ២ លេខ៣ហ្នឹង នៅតាមទីប្រជុំជន នៅតាមផ្សារ ជាពិសេសគឺដាក់កម្លាំងឲ្យសម្រួលចរាចរណ៍កុំឲ្យស្ទះ»។
ក្រៅពីនេះ លោកបានរំលឹកដល់ប្រជាពលរដ្ឋទាំងអស់ ឲ្យគោរពច្បាប់ចរាចរណ៍ និងការពារកុំឲ្យមានភ្លើងឆេះផ្ទះ។
ខេត្តតាកែវ មានផ្លូវជាតិ២ឆ្លងកាត់ គឺផ្លូវជាតិលេខ២ និងលេខ៣។ ផ្លូវជាតិលេខ៣ មានចរាចរណ៍មមាញឹកជាងគេ ដោយសារផ្លូវនេះមានអ្នកធ្វើដំណើរឆ្លងកាត់ពីក្រុងភ្នំពេញ ខេត្តកំពតដែលជាខេត្តទេសចរមានមនុស្ស ច្រើនចូលចិត្តទៅលំហែកាយពេលបុណ្យទានម្ដងៗ។ ចំណែកផ្លូវជាតិលេខ២ មានអ្នកធ្វើដំណើរឆ្លងកាត់ពីភ្នំពេញ និងខេត្តផ្សេងទៀតទៅព្រំដែនវៀតណាម។
ជាទូទៅ គ្រោះថ្នាក់ចរាចរណ៍បានកើនឡើងកម្រិតខ្ពស់ខុសពីថ្ងៃធម្មតា ប្រៀបធៀបថ្ងៃពេលបុណ្យទានម្ដងៗ ប្រការនេះធ្វើឲ្យប្រជាពលរដ្ឋខ្លះ សម្រេចចិត្តមិនធ្វើដំណើរឆ្ងាយទេ ដោយខ្លាចគ្រោះថ្នាក់។
ជាអាទិ៍ យុវជនឈ្មោះ ច្រាយ លីហួ នៅក្រុងតាកែវ បានសម្រេចចិត្តដើរលេងជិតៗផ្ទះ មិនធ្វើដំណើរឆ្ងាយទេ ក្នុងពិធីបុណ្យចូលឆ្នាំ៣ថ្ងៃនេះ។
កត្តាដែលធ្វើឲ្យយុវជន ច្រាយ លីហួ និងមិត្តភ័ក្ដិគាត់ខ្លាចមិនហ៊ានធ្វើដំណើរឆ្ងាយ ព្រោះគាត់យល់ថា ពេលបុណ្យចូលឆ្នាំម្ដង មានមនុស្សស្រវឹងច្រើនជាងថ្ងៃធម្មតា ដែលអាចបង្កគ្រោះថ្នាក់ចរាចរណ៍បានដោយងាយ។ «»
តាមរបាយការណ៍ក្រសួងមហាផ្ទៃឆ្នាំ២០១៣ មានមនុស្សជិត២ពាន់នាក់បានស្លាប់ និងជាង៥ពាន់នាក់ទៀតរបួសដោយគ្រោះថ្នាក់ចរាចរណ៍នៅទូទាំងប្រទេស ក្នុងនោះបណ្ដាលឲ្យបាត់បង់ថវិកាជាតិចំនួនប្រមាណ ២៧៩លានដុល្លារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។