អាមេរិកជំរុញឲ្យយុវជនកម្ពុជាចាប់អារម្មណ៍កីឡាបាល់បោះ
2016.07.14
ក្រសួងការបរទេសសហរដ្ឋអាមេរិក បានបញ្ជូនបេសកជនកីឡាករឆ្នើមផ្នែកបាល់បោះចំនួន ២រូប មកកាន់កម្ពុជា ដើម្បីជួយពង្រឹងជំនាញ និងជំរុញឲ្យយុវជនកម្ពុជា កាន់តែមានការចាប់អារម្មណ៍ច្រើនថែមទៀតលើផ្នែកកីឡាបាល់បោះ។ ទន្ទឹមគ្នានេះ គណៈកម្មាធិការជាតិអូឡាំពិកកម្ពុជា ព្រមទាំងសហព័ន្ធកីឡាបាល់បោះកម្ពុជា ចាត់ទុកបេសកជនកីឡារបស់សហរដ្ឋអាមេរិក នឹងជួយឲ្យវិស័យកីឡាបាល់បោះកម្ពុជា កាន់តែប្រសើរឡើង។
ស្ថានទូតសហរដ្ឋអាមេរិកប្រចាំកម្ពុជា រំពឹងថា វត្តមានបេសកជនកីឡាករផ្នែកបាល់បោះចំនួន២ គឺលោក វ៉េនី អេលីងតុន (Wayne Ellington) និងអ្នកស្រី ស៊ូ វីក (Sue Wicks) ដែលមកពីសមាគមកីឡាបាល់បោះបុរស និងសមាគមកីឡាបាល់បោះនារីនៅសហរដ្ឋអាមេរិក គឺជាចំណែកមួយធ្វើឲ្យយុវជនរៀនសូត្របន្ថែមពីបច្ចេកទេស និងគន្លឹះថ្មីៗពីកីឡាករបាល់បោះសហរដ្ឋអាមេរិក។
ការលើកឡើងរបស់មន្ត្រីស្ថានទូតអាមេរិក ប្រចាំកម្ពុជា នៅពេលនេះ ធ្វើឡើងនៅក្នុងសន្និសីទកាសែតស្ដីពីកម្មវិធីបេសកជនកីឡាអាមេរិក ដែលរៀបចំដោយស្ថានទូតសហរដ្ឋអាមេរិក សហការជាមួយក្រសួងអប់រំយុវជន និងកីឡា និងគណៈកម្មាធិការជាតិអូឡាំពិកកម្ពុជា ព្រមទាំងសហព័ន្ធកីឡាបាល់បោះកម្ពុជា នៅថ្ងៃទី១៣ ខែកក្កដា។
ថ្លែងក្នុងសន្និសីទកាសែតនេះ ជំនួយការប្រធានកិច្ចការសាធារណៈនៃស្ថានទូតសហរដ្ឋអាមេរិក ប្រចាំកម្ពុជា លោក ខតនី វូដ (Courtney Woods) មានប្រសាសន៍ថា សហរដ្ឋអាមេរិកយល់ថា ធនធានមនុស្សសម្រាប់កីឡាបាល់បោះនៅកម្ពុជា ទាំងយុវជន និងកុមារ នៅមានកម្រិតនៅឡើយ ខណៈកីឡាប្រភេទនេះ កំពុងតែមានប្រជាប្រិយភាពក្នុងពិភពលោក។ ហេតុនេះដំណើរទស្សនកិច្ចរបស់កីឡាករទាំង ២រូបមកកាន់កម្ពុជា មិនត្រឹមតែជួយបង្ហាត់បង្ហាញពីបច្ចេកទេសដល់កុមារ យុវជន គ្រូបង្វឹកកីឡាកម្ពុជា និងជំរុញទំនាក់ទំនងសហរដ្ឋអាមេរិក ជាមួយកម្ពុជា ប៉ុណ្ណោះទេ តែវានឹងជួយផ្សារភ្ជាប់កីឡាកម្ពុជា ទៅកាន់ពិភពលោកផងដែរ។
ទន្ទឹមគ្នានេះ តំណាងបេសកជនកីឡា មកពីសមាគមកីឡាបាល់បោះនារីនៅសហរដ្ឋអាមេរិក អ្នកស្រី ស៊ូ វីក ដែលបានជាប់ជាជម្រើសជុំដំបូងដោយក្រុម New York Liberty នៅក្នុងការជ្រើសរើសកីឡាការិនីជាលើកដំបូងក្នុងឆ្នាំ១៩៩៧ នោះ យល់ថា ទោះជាបេសកកម្មរបស់អ្នកស្រីមកកាន់កម្ពុជា មានរយៈពេលខ្លីក្ដី ប៉ុន្តែអ្នកស្រីប្ដេជ្ញាជួយផ្ដល់គន្លឹះ និងបច្ចេកទេសល្អៗ ដើម្បីឲ្យក្លាយជាកីឡាករបាល់បោះអាជីពទៅថ្ងៃអនាគត។
ចំណែកអគ្គនាយកនៃអគ្គនាយកដ្ឋានកីឡានៃក្រសួងអប់រំយុវជន និងកីឡា លោក អ៊ុក សិទ្ធិជាតិ សាទរចំពោះសហរដ្ឋអាមេរិក ដែលជួយជំរុញវិស័យកីឡាបាល់បោះកម្ពុជា។ លោកថា កន្លងមកផ្នែកកីឡាបាល់បោះកម្ពុជា មានបញ្ហាប្រឈមច្រើនដូចជា សមត្ថភាពកីឡាករនៅមានកម្រិតខ្វះធនធានមនុស្ស ផ្នែកគ្រូបង្វឹក និងកង្វះទីកន្លែងហ្វឹកហាត់ដែលមានស្តង់ដារ។
លោកថា នេះជាជាឱកាសល្អសម្រាប់យុវជនកម្ពុជា រៀនសូត្របន្ថែម៖ «ការលែងកីឡាបាល់បោះវាត្រូវការសម្ភារៈវាត្រូវការទីតាំង និងមនុស្សដែលមានទេពកោសល្យ ប៉ុន្តែបច្ចុប្បន្នយើងនៅខ្វះទីតាំង និងហេដ្ឋារចនាសម្ព័ន្ធ ព្រោះអត់មាននេះហើយ យើងពិបាកលេង តែបើសិនមានគ្រូ ឬអ្នកមានសមត្ថភាព វាជួយឲ្យប្រសើរឡើង»។
ស្ថានទូតសហរដ្ឋអាមេរិកប្រចាំកម្ពុជា ឲ្យដឹងថា នេះជាលើកទីមួយហើយដែលសហរដ្ឋអាមេរិក បានបញ្ជូនកីឡាករបាល់បោះឆ្នើមរបស់ខ្លួនមកកម្ពុជា។
ក្នុងសន្និសីទកាសែតនោះដែរ គណៈកម្មាធិការជាតិអូឡាំពិកកម្ពុជា សហព័ន្ធកីឡាបាល់បោះកម្ពុជា ក៏បានស្នើឲ្យសហរដ្ឋអាមេរិក បញ្ជូនកីឡាករខ្មែរផ្នែកបាល់បោះទៅសហរដ្ឋអាមេរិក ដើម្បីមកបណ្ដុះបណ្ដាលធនធានមនុស្សនៅកម្ពុជា ផងដែរ។
ជាងនេះទៀត អគ្គនាយកដ្ឋានកីឡានៃក្រសួងអប់រំយុវជន និងកីឡា ក៏អះអាងថា ដើម្បីបង្កើនធនធានមនុស្សផ្នែកកីឡាបាល់បោះ រដ្ឋាភិបាលកំពុងសាងសង់ទីតាំងកន្លែងបាល់បោះដែលមានស្តង់ដារបន្ថែម ព្រមទាំងផ្ដល់ឱកាសឲ្យយុវជនអាចហ្វឹកហាត់នៅពហុកីឡដ្ឋានជាតិអូឡាំពិក ដោយសេរី ដើម្បីត្រៀមសម្រាប់ការប្រកួតកីឡា ស៊ី ហ្គែម ឆ្នាំ២០២៣ ដែលកម្ពុជា ធ្វើជាម្ចាស់ផ្ទះ៕