ក្រុមយុវជនចង់ឲ្យលោក ហ៊ុន សែន ចំណាយពេលអានសៀវភៅទស្សនទានបណ្ឌិត កែម ឡី
2016.10.16
ពលរដ្ឋអានសៀវភៅដែលចងក្រងអំពីទស្សនៈរបស់បណ្ឌិត កែម ឡី ឈ្មោះ "អ្នករូតវាំងននសង្គម" នៅវត្តចាស់ ក្នុងសង្កាត់ជ្រោយចង្វារ កាលពីថ្ងៃទី១៤ ខែតុលា ឆ្នាំ២០១៦។
RFA/Cheu Sideth
ក្រុមអ្នកចងក្រងសៀវភៅទស្សនទានលោកបណ្ឌិត កែម ឡី អំពាវនាវឲ្យប្រជាពលរដ្ឋខ្មែរ និងអ្នកនយោបាយ ជាពិសេសលោកនាយករដ្ឋមន្ត្រី ហ៊ុន សែន តែម្តង គួរតែចំណាយពេលអានសៀវភៅទស្សនទានលោកបណ្ឌិត កែម ឡី ទាំងពីរភាគ។ ពួកគេថា សៀវភៅនេះមានយុទ្ធសាស្ត្រល្អៗសម្រាប់ចូលរួមដោះស្រាយបញ្ហាសង្គមជាតិ។
មូលហេតុដែលក្រុមយុវជនប្រាថ្នាចង់ឃើញប្រជាពលរដ្ឋខ្មែរ ជាពិសេសអ្នកដឹកនាំប្រទេសអានសៀវភៅទស្សនទានលោកបណ្ឌិត កែម ឡី នោះ ព្រោះពួកគេយល់ថា សៀវភៅនេះឆ្លុះបញ្ចាំងពីតថភាពសង្គមកម្ពុជា ពិតជាក់ស្ដែង និងបង្ហាញពីដំណោះស្រាយបញ្ហាក្នុងសង្គមទៀតផង។
ប្រធានសមាគមសម្ព័ន្ធនិស្សិតបញ្ញវន្តខ្មែរ និងជាសមាជិកក្រុមចងក្រងសៀវភៅ គឺលោក មួង សូនី និយាយថា គំនិតទស្សនទានលោកបណ្ឌិត កែម ឡី នៅក្នុងសៀវភៅនេះ ពិតជាមានតម្លៃ និងមានខ្លឹមសារល្អណាស់សម្រាប់ឲ្យសាធារណជន ក៏ដូចជាអ្នកនយោបាយ ជាពិសេសលោកនាយករដ្ឋមន្ត្រី ហ៊ុន សែន យកទៅសិក្សាស្វែងយល់ដើម្បីដោះស្រាយបញ្ហាសង្គម៖ «សូមអំពាវនាវទៅដល់មិនថាគណបក្សនយោបាយ តំណាងរាស្ត្រក្នុងសភា ជាពិសេសនាយករដ្ឋមន្ត្រីយើងតែម្តង និងរដ្ឋមន្ត្រីតាមក្រសួងនានា បើគាត់បានអានសៀវភៅនេះ នឹងដឹងអំពីផែនការយុទ្ធសាស្ត្រអភិវឌ្ឍន៍ជាតិ ព្រោះសៀវភៅនេះនិយាយពីតថភាពក្នុងសង្គម ស្ថានភាពក្នុងសង្គម ហើយមានដំណោះស្រាយទាំងអស់រាល់ការអភិវឌ្ឍជាតិ»។
លោក មួង សូនី បន្ថែមថា បើក្រសួង ឬស្ថាប័នរដ្ឋាភិបាលត្រូវការសៀវភៅទាំងពីរភាគនេះ លោកនឹងចំណាយថវិកាបោះពុម្ពសៀវភៅជូនដោយមិនគិតថ្លៃឡើយ។
អាស៊ីសេរី មិនអាចសុំការឆ្លើយតបពីអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន និងអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេនៅថ្ងៃទី១៦ ខែតុលា ដោយសារទូរស័ព្ទមិនអាចទំនាក់ទំនងបាន។
សៀវភៅទស្សនទានលោកបណ្ឌិត កែម ឡី ចែកចេញជាពីរភាគ ដោយភាគទី១ មានចំណងជើងថា "អ្នករូតវាំងននសង្គម" និងភាគទី២ គឺ "ទស្សនៈសង្គម និងនយោបាយ" ដែលកត់ត្រាទុកអំពីទស្សនទានរបស់បណ្ឌិត កែម ឡី ជុំវិញបញ្ហានយោបាយ សេដ្ឋកិច្ច និងសង្គមកិច្ច ការអប់រំ បរិស្ថាន ធម្មជាតិ បូរណភាពទឹកដី ជាដើម។
ក្នុងរយៈពេលពីរថ្ងៃនៃពិធីបុណ្យខួប ១០០ថ្ងៃជូនលោកបណ្ឌិត កែម ឡី នៅវត្តចាស់ រាជធានីភ្នំពេញ ចាប់ពីថ្ងៃទី១៤ ដល់ថ្ងៃទី១៥ ខែតុលា គឺក្រុមយុវជនបានលក់សៀវភៅអស់ចំនួន ៦.៥០០ក្បាល។
រីឯអ្នកស្រាវជ្រាវការអភិវឌ្ឍសង្គម លោកបណ្ឌិត មាស នី សង្កេតឃើញថា ចរិតអ្នកនយោបាយ ជាពិសេសអ្នកដឹកនាំខ្មែរបច្ចុប្បន្ន ហាក់ដូចជាមិនសូវទទួលយកមតិ ឬគំនិតពីខាងក្រៅឡើយ។ លោក មាស នី បន្តថា ថ្វីត្បិតតែគំនិតរបស់លោក កែម ឡី មិនត្រឹមត្រូវទាំងអស់ក្តី ប៉ុន្តែមានគំនិតភាគច្រើនល្អត្រឹមត្រូវ ដែលរដ្ឋាភិបាលគួរតែយកទៅសិក្សាពិចារណាសម្រាប់ដោះស្រាយបញ្ហាសង្គមក្នុងពេលបច្ចុប្បន្ន និងអនាគត៖ «រាល់ចំណុចទាំងអស់ដែលលោក កែម ឡី លើកយកមកហ្នឹង វាមិនមែនជារឿងដែលយកមកបំផ្លើសពីណាៗមកទេ គឺជារឿងដែលគាត់ចុះទៅជួបជាមួយប្រជាពលរដ្ឋ ជួបជាមួយមនុស្សគ្រប់ស្រទាប់វណ្ណៈ សូម្បីមន្ត្រីរដ្ឋាភិបាលក៏មានការពិភាក្សាទៅតាមជំនាញអីដែរ។ អ៊ីចឹងទៅ ចំណុចទាំងនេះ គឺជាកញ្ចប់សម្រាប់ឆ្លុះបញ្ចាំងទៅលើស្ថានភាពពិតនៃសង្គមសេដ្ឋកិច្ច នយោបាយខ្មែរបច្ចុប្បន្ន»។
ក្រោយពីប្រមូលចងក្រងគំនិត និងស្នាដៃរបស់លោកបណ្ឌិត កែម ឡី ឲ្យចេញជាសៀវភៅហើយនោះ គឺក្រុមអ្នកចងក្រង នឹងចាប់ផ្ដើមប្រមូលផ្ដុំការសិក្សាស្រាវជ្រាវទាំងឡាយរបស់បណ្ឌិត កែម ឡី ដែលលោកធ្លាប់បានធ្វើឲ្យអង្គការសង្គមស៊ីវិលជាតិ និងអន្តរជាតិ ព្រមទាំងស្ថាប័នរដ្ឋដើម្បីទុកជាឯកសាររឹងមាំសម្រាប់អ្នកចង់សិក្សាស្វែងយល់អំពីបញ្ហានានាដែលកំពុងកើតមាននៅកម្ពុជា និងដឹងអំពីដំណោះស្រាយបញ្ហាទាំងអស់នោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ឃួង ស្រេង ពីមន្ត្រីខណ្ឌតូចតាចទៅជាអភិបាលក្រុងភ្នំពេញដោយសារស្នាដៃបម្រើគ្រួសារត្រកូលហ៊ុន
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- មន្ត្រីបក្សកាន់អំណាចព្យាយាមលាងជម្រះលោក ហ៊ុន សែន ពាក់ព័ន្ធឃាតកម្មលើលោក លិម គិមយ៉ា
- លោក សម រង្ស៊ី អំពាវនាវឱ្យកងកម្លាំងប្រដាប់អាវុធ និងអ្នកនយោបាយរួមគ្នាផ្លាស់ប្ដូររបបត្រកូល ហ៊ុន
អត្ថបទពេញនិយម
សង្គម
- មនុស្ស ៤នាក់ស្លាប់ និង ៥នាក់ទៀតរបួសធ្ងន់ ពេលប្រជ្រៀតគ្នាយកអាំងប៉ាវនៅភូមិគ្រឹះលោក សុខ គង់
- ជនសង្ស័យ៥នាក់ត្រូវបានឃាត់ខ្លួនករណីក្លែងបន្លំឯកសណ្ឋានសមត្ថកិច្ចដើរជំរិតទារប្រាក់
- មន្ត្រីសិទ្ធិមនុស្សទាមទារឱ្យរដ្ឋាភិបាលទទួលខុសត្រូវលើករណីមនុស្សដណ្ដើមអាំងប៉ាវនៅផ្ទះលោក សុខ គង់ ស្លាប់និងរបួស
- អ្នកឃ្លាំមើលរិះគន់ថា អាជ្ញាធរមិនបានបង្ក្រាបមេខ្លោងបនល្បែងធំៗ ទើបទីតាំងបនល្បែងតាមអនឡាញរីករាលដាលខ្លាំង