អាជ្ញាធរពន្ធនាគារបញ្ជូនសមាជិកយុវជនខ្មែរថាវរៈ កញ្ញា សូ មេត្តា ទៅព្យាបាលរបួសនៅមន្ទីរពេទ្យរុស្ស៊ី នៅថ្ងៃទី២៦ វិច្ឆិកានេះ ក្រោយពេលយុវជនរូបនេះដួលនៅក្នុងបន្ទប់ទឹកពន្ធនាគារ របួសជើងរលាត់ដល់ឆ្អឹង។ ប្អូនស្រីកញ្ញា សូ មេត្តា អះអាងថា បងស្រីរបស់ខ្លួនដួល និងរងការឈឺចាប់ តាំងពីថ្ងៃទី១៦ វិច្ឆិកា មកម្ល៉េះ ប៉ុន្តែមន្ត្រីពន្ធនាគារមិនបានបញ្ជូនមកមន្ទីរពេទ្យភ្លាមៗនោះទេ ដោយទុករហូតនាងមានអាការៈធ្ងន់ធ្ងរ។ មន្ត្រីសិទ្ធិមនុស្សយល់ថា មន្ត្រីពន្ធនាគារមិនគួរយឺតយ៉ាវក្នុងការបញ្ជូនអ្នកជាប់ឃុំមកទទួលការព្យាបាលនៅមន្ទីរពេទ្យខាងក្រៅបែបនេះទេ។
ប្អូនស្រីកញ្ញា សូ មេត្តា គឺកញ្ញា អេង វ៉ាន់ឌី ឲ្យអាស៊ីសេរីដឹងថា បងស្រីរបស់នាងបានរអិលដួលក្នុងបន្ទប់ទឹក ប៉ះទង្គិចជើង បណ្ដាលឲ្យរបួសជ្រៅដល់ឆ្អឹង ជាច្រើនថ្ងៃមកហើយ។ កញ្ញាថា គ្រូពេទ្យនៅក្នុងពន្ធនាគារបានដេររបួសជើងឱ្យកញ្ញា សូ មេត្តា ដោយមិនបានចាក់ថ្នាំស្ពឹកនោះទេ ធ្វើឱ្យបងស្រីនាងឈឺចាប់មុខរបួសជាខ្លាំង រហូតហូរទឹកភ្នែក និងគេងពុំលក់នោះទេ។ កញ្ញាបន្តថា នៅពន្ធនាគារពុំមានថ្នាំគ្រប់គ្រាន់ផ្ដល់ឲ្យបងស្រីនាង ដើម្បីលេបបំបាត់ការឈឺចាប់ឡើយ ហើយមន្ត្រីពន្ធនាគារទៀតសោតក៏មិនសូវអើពើនឹងអាការៈរបួសរបស់កញ្ញា សូ មេត្តា ដែរ ដោយទុក រហូតជើងរបស់នាងឡើងហើម មានខ្ទុះនៅតាមមុខរបួស ហើយដើរមិនរួច ទើបបញ្ជូនទៅមន្ទីរពេទ្យនៅក្រៅពន្ធនាគារ។
កញ្ញា អេង វ៉ាន់ឌី លើកឡើងទៀតថា កញ្ញាបានទៅសួរសុខទុក្ខបងស្រីនៅមន្ទីរពេទ្យរុស្ស៊ី ដោយមានមន្ត្រីពន្ធនាគារយាមកាមយ៉ាងតឹងរ៉ឹង។ កញ្ញាបន្ថែមថា កញ្ញាអាណិតបងស្រីជាខ្លាំង នៅពេលឃើញបងស្រីមានសភាពស្លេកស្លាំង ជើងមានរបួស ហើយស្គមជាងមុន និងមានកន្ទួលរមាស់លើផ្ទៃមុខ និងដងខ្លួន៖ «គាត់ក៏ព្យាយាមសួរពេទ្យថា គាត់បានមុតដល់ឆ្អឹង ហើយទៅគាត់ខ្លាចប៉ះពាល់ដល់សរសៃគាត់អញ្ចឹង ហើយទៅពេទ្យដូចអត់មានប្រាប់ដល់គាត់ក្បោះក្បាយអ៊ីចឹង។ គ្រាន់តែថា អត់អីទេ អាការៈហ្នឹងវាអត់សូវអីទេ ចាំព្យាបាលទៅជាហើយ គាត់អត់ប្រាប់ដិតដល់ៗបងខ្ញុំទេ។ អ៊ីចឹងបងខ្ញុំបារម្ភខ្លាំងណាស់បង។ ជើងគាត់ហ្នឹងឥឡូវដើរអត់រួចទេ ទាល់តែគេគ្រាម្នាក់ ឬក៏២នាក់អីហើយ ទៅការមើលថែគាត់ក៏អត់សូវដិតដល់ដែរបង»។
មន្ត្រីពន្ធនាគារបានបញ្ជូនកញ្ញា សូ មេត្តា ត្រឡប់ទៅមន្ទីរឃុំឃាំងវិញ នៅព្រឹកថ្ងៃទី២៦ វិច្ឆិកាដដែល ក្រោយក្រុមគ្រូពេទ្យពិនិត្យ និងឆ្លុះមើលជើងរបស់នាងរួច ដោយមិនអនុញ្ញាតឲ្យសម្រាកព្យាបាលនោះទេ។
អ្នកនាំពាក្យអគ្គនាយកដ្ឋានពន្ធនាគារលោក នុត សាវនា បញ្ជាក់ថា ការមិនអនុញ្ញាតឱ្យសម្រាកព្យាបាលនេះ គឺដោយសារអាការៈរបួសរបស់កញ្ញា សូ មេត្តា ពុំមានសភាពធ្ងន់ធ្ងរដែលត្រូវសម្រាកព្យាបាលនៅមន្ទីរពេទ្យនោះទេ៖ «ពេទ្យនៅប៉ុស្តិ៍សុខភាពយើងហ្នឹងគឺបានជួយពិនិត្យព្យាបាលគាត់នៅប៉ុស្តិ៍ហ្នឹង តែគាត់ខ្លួនឯងគាត់ស្នើសុំទៅពិនិត្យព្យាបាលនៅខាងពេទ្យខាងក្រៅ អ៊ីចឹងក៏ដើម្បីឲ្យគាត់អស់ចិត្ត យើងក៏បានបញ្ជូនគាត់ទៅពេទ្យទៅខាងក្រៅហ្នឹង ដើម្បីពិនិត្យព្យាបាលជើងគាត់ហ្នឹង ប៉ុន្តែអត់មានបញ្ហាអីធ្ងន់ធ្ងរទេ ខ្ញុំសួរអស់ហើយ»។
កន្លងមក សកម្មជន ប្រជាពលរដ្ឋ និងអង្គការផ្នែកសិទ្ធិមនុស្សមួយចំនួន ធ្លាប់បានរិះគន់អាជ្ញាធររបបក្រុងភ្នំពេញជុំវិញការអនុវត្តស្តង់ដារពីរចំពោះអ្នកជាប់ឃុំដែលក្រីក្រ និងអ្នកមានលុយមានអំណាច។ អ្នកជាប់ឃុំក្រីក្រ និងអ្នកទោសមនសិការ មិនងាយទទួលបានការអនុញ្ញាតឱ្យសម្រាកព្យាបាលនៅមន្ទីរពេទ្យខាងក្រៅឡើយ ទោះជាពួកគេមានជំងឺធ្ងន់ធ្ងរ ឬក៏ស្នើសុំច្រើនដងបែបណាក្តី។ ផ្ទុយទៅវិញ អ្នកជាប់ឃុំខ្លះដែលជាឧក្រិដ្ឋជន តែមានលុយ ឬមានអំណាច អាចទទួលបានការអនុញ្ញាតឱ្យសម្រាកព្យាបាលរយៈពេលវែងនៅមន្ទីរពេទ្យខាងក្រៅពន្ធនាគារ។
ជាឧទាហរណ៍ បងប្រុសបង្កើតរបស់ឧកញ៉ា គិត ម៉េង គឺឧកញ៉ា គិត ធាង ដែលពាក់ព័ន្ធនឹងករណីជួញដូរគ្រឿងញៀនទ្រង់ទ្រាយធំនោះ ត្រូវអាជ្ញាធរបញ្ជូនចេញពីពន្ធនាគារទៅសម្រាកព្យាបាលនៅមន្ទីរពេទ្យរុស្ស៊ីតាំងពីថ្ងៃទី១ ខែមេសា ឆ្នាំ២០១៩ មកម្ល៉េះ ក្រោមហេតុផលថា មានជំងឺសួត និងស្ទះដង្ហើម បន្ទាប់ពីជាប់ឃុំក្នុងពន្ធនាគាររាជធានីភ្នំពេញប៉េហ្ស៊ី (PJ) រយៈពេលប្រមាណកន្លះខែ។ បុគ្គលិកពេទ្យរស្ស៊ីធ្លាប់ប្រាប់សារព័ត៌មានក្នុងស្រុកថា លោក គិត ធាង គ្មានជំងឺអ្វីធ្ងន់ធ្ងរដល់ថ្នាក់ចាក់ថ្នាំ ឬឱ្យថ្នាំលេបនោះទេ ប៉ុន្តែលោក គិត ធាង មិនព្រមត្រឡប់ទៅវិញ ព្រោះលោកមានសមត្ថភាពជួលបន្ទប់ពិសេសរបស់មន្ទីរពេទ្យ ដើម្បីស្នាក់នៅដែលអាចងាយស្រួលជាងការរស់នៅក្នុងពន្ធនាគារ។
អ្នកនាំពាក្យសមាគមការពារសិទ្ធិមនុស្សអាដហុក(Adhoc) លោក ស៊ឹង សែនករុណា មានប្រសាសន៍ថា មន្ត្រីពន្ធនាគារត្រូវអនុវត្តឲ្យស្មើភាពគ្នាចំពោះអ្នកជាប់ឃុំ ឬអ្នកទោសទាំងអស់នៅក្នុងពន្ធនាគារ ដោយមិនត្រូវរឹតត្បិតលើអ្នកទោសនយោបាយ ហើយផ្តល់សិទ្ធិសេរីភាពឲ្យអ្នកទោស ឬឧក្រិដ្ឋជនធំៗ ដែលមានលុយ មានអំណាច រស់នៅយ៉ាងស្រួល ខុសពីអ្នកជាប់ឃុំធម្មតានោះទេ៖ «ខ្ញុំស្នើដល់ខាងមន្ត្រីជាពិសេសអគ្គនាយកដ្ឋានពន្ធនាគារ សូមលោកពិនិត្យមើលនៅក្នុងបញ្ហាទាំងអស់នេះឡើងវិញ មិនគួរឲ្យកកើតមានរបៀបហ្នឹងជាបន្តទៀតទេ ពីព្រោះបញ្ហាទាំងអស់នេះ គឺតែងតែមានការរិះគន់ជាបន្តបន្ទាប់មកហើយ អ៊ីចឹងគួរតែមានការពិនិត្យមើល និងសិក្សាឲ្យបានច្បាស់លាស់អំពីរឿងទាំងអស់ហ្នឹង ហើយធ្វើការកែលំអរឲ្យវាកាន់តែល្អប្រសើរឡើង កុំឲ្យរងការរិះគន់បែបហ្នឹងតទៅទៀត ធ្វើឲ្យប៉ះពាល់ទៅដល់មុខមាត់របស់រាជរដ្ឋាភិបាលផង ហើយប៉ះពាល់ទៅដល់ខាងពន្ធនាគារហ្នឹងផងដែរ រួមទាំងថ្នាក់ដឹកនាំខាងពន្ធនាគារផងដែរ»។
កញ្ញា សូ មេត្តា ដែលមានឈ្មោះពិតថា អេង ម៉ាឡៃ ត្រូវបានអាជ្ញាធរចាប់ខ្លួន កាលពីថ្ងៃទី៧ កញ្ញា នៅខណ្ឌច្បារអំពៅ ហើយបញ្ជូនទៅតុលាការ ដោយចោទប្រកាន់ពីបទញុះញង់បង្កភាពវឹកវរធ្ងន់ធ្ងរ ដល់សន្តិសុខសង្គម។ ការចាប់ខ្លួននេះ ក្រោយពេលកញ្ញា សូ មេត្តា និងយុវជនដទៃទៀត ព្យាយាមប្រមូលផ្ដុំគ្នាតវ៉ាសម្ដែងមតិ នៅទីលានប្រជាធិបតេយ្យថ្មី នៅខណ្ឌឫស្សីកែវ។ ប៉ុន្តែគម្រោងនេះបានបរាជ័យ ដោយសារការរារាំងពីអាជ្ញាធរ។ គិតពីខែមករា រហូតដល់ចុងខែវិច្ឆិកានេះ របបលោក ហ៊ុន សែន បានចាប់ខ្លួនសកម្មជន អ្នកនយោបាយ យុវជននិងមន្ត្រីសង្គមស៊ីវិល ដាក់ពន្ធនាគារជាង ៤០នាក់ ហើយ ដោយចោទប្រកាន់ពួកគេពីបទញុះញង់ បទរួមគំនិតក្បត់ ឬបទប្រមាថថ្នាក់ដឹកនាំរដ្ឋាភិបាលជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។