កូដករក្រុមហ៊ុនកាស៊ីណូណាហ្គាវើលដ៍ (NagaWorld) ម្នាក់ដែលមានផ្ទៃពោះជាង ១ខែនោះ កំពុងតែប្រឈមបញ្ហារលូតកូន ក្រោយពីអាជ្ញាធររដ្ឋាភិបាលលោក ហ៊ុន សែន ប្រើអំពើហិង្សារុញច្រានបោកខ្ទប់នឹងរថយន្ត ពេលដែលលោកស្រីចេញតវ៉ាទាមទារឱ្យថៅកែបញ្ឈប់ការរំលោភច្បាប់កម្ពុជា និងសិទ្ធិកម្មករនៅកន្លែងធ្វើការងារ។ មន្ត្រីសង្គមស៊ីវិលផ្នែកឃ្លាំមើលសិទ្ធិមនុស្ស បន្តស្នើដល់ស្ថាប័នមានសមត្ថកិច្ចឱ្យចាត់វិធានការលើមន្ត្រី ដែលអនុវត្តតួនាទីផ្ទុយពីច្បាប់ ដើម្បីទប់ស្កាត់នូវទម្រង់ហិង្សា និងការរំលោភបំពានលើស្ត្រីភេទទន់ខ្សោយតទៅទៀត។
កូដករម្នាក់ក្នុងចំណោមកូដករជាង ២០០នាក់ ដែលកំពុងតស៊ូមតិសិទ្ធិការងារនៅក្រុមហ៊ុនកាស៊ីណូណាហ្គាវើលដ៍ លោកស្រី សុខ រតនា ឱ្យដឹងថា ក្រោយពីអាជ្ញាធរបានរុញច្រានបោកខ្ទប់នឹងរថយន្ត កាលពីថ្ងៃទី១១ ឧសភា លោកស្រីមានអាការៈចុកពោះ និងធ្លាក់ឈាម។
លោកស្រី សុខ រតនា ប្រាប់វិទ្យុអាស៊ីសេរីនៅថ្ងៃទី១៧ ឧសភាថា ក្រោយពីលោកស្រីបានទៅពិនិត្យផ្ទៃពោះនៅមន្ទីរពេទ្យឯកជនមួយកន្លែង ដោយគ្រូពេទ្យសន្និដ្ឋានថា កូនលោកស្រីក្នុងផ្ទៃមានសង្ឃឹមរស់ត្រឹមតែ ៥០ភាគរយតែប៉ុណ្ណោះ ដោយសារតែមានដុំឈាមកកស្ថិតនៅចំណុចក្បែរកូនក្នុងផ្ទៃ។ លោកស្រីឱ្យដឹងថា មុនមានបញ្ហាប្រឈមដល់កូនក្នុងផ្ទៃនេះ កាលពីថ្ងៃទី១១ ឧសភា អាជ្ញាធរបានរុញច្រានលោកស្រីទាំងកម្រោលបោកខ្ទប់នឹងរថយន្តក្រុង ក្នុងនោះអាជ្ញាធរ និងជនស៊ីវិល ក៏បានប្រើអំពើហិង្សាទាត់ធាក់ ព្រមទាំងជេរប្រមាថលើកូដករ ដែលភាគច្រើនជាស្រ្តី។ លោកស្រីថា មកដល់ពេលនេះនៅតែមានអាការៈចុកត្រង់បរិវេណពោះ ខ្សោះអស់កម្លាំង និងត្រូវតាមដានសុខភាពកូនក្នុងផ្ទៃពីសំណាក់គ្រូពេទ្យបន្តទៅទៀត៖ « ខ្ញុំបានអេកូម្សិលមិញ ខ្ញុំបានធ្លាក់ឈាមពេលព្រឹកបន្ទាប់មកខ្ញុំក៏បានទៅអេកូពេទ្យថែសុខភាព។ លទ្ធផលចេញមកគឺ ៥០ភាគរយ។ មានន័យថា កូនអាចអត់នៅ ៥០ភាគរយ អាចនៅ ៥០ភាគរយ ដោយសារតែនៅក្នុងស្បូនខ្ញុំហ្នឹងវាមានឈាម។ ខ្ញុំប៉ះពាល់តាំងពីថ្ងៃទី១១ ឧសភាមកម្ល៉េះ ហើយខ្ញុំមានអារម្មណ៍ថា ឆ្អល់ៗ តែខ្ញុំចាប់អារម្មណ៍ថា ប៉ះពាល់ដល់ថ្នាក់ហ្នឹង។ ប្រសិនជា កូនខ្ញុំមានបញ្ហា ព្រោះយើងជាស្ត្រី ស្ត្រីក៏មានសិទ្ធដែរ ក៏ជាមនុស្សដែរ។ នេះមិនមែនតែប្រើអំពើហិង្សាតែលើខ្ញុំទេ គឺប៉ះពាល់ដល់កូនខ្ញុំទៀត។ អ៊ីចឹងខ្ញុំនឹងមានគម្រោងប្ដឹង ប្រសិនជាកូនខ្ញុំអត់នៅ »។
លោកស្រី សុខ រតនា ចាត់ទុកការចំណាត់ការរបស់អាជ្ញាធរថា កំពុងតែអនុវត្តតួនាទីផ្ទុយពីច្បាប់។ លោកស្រីបន្ថែមថា ការទាមទាររបស់កូដករកន្លងមកនេះតែ ក្រុមកូដករតែងតែអនុវត្តតាមគោលការណ៍ច្បាប់ជាតិ និងអន្តរជាតិ ហើយការធ្វើកូដកម្មទាមទារសិទ្ធិសេរីភាពការងារ ក៏មិនមែនជាបទឧក្រិដ្ឋ ដែលត្រូវបានអាជ្ញាធរបង្ក្រាបបែបនេះដែរ៖ « ព្រោះយើងមានច្បាប់ទាំងអស់។ យើងមានច្បាប់ការងារ ច្បាប់សហជីព ដែលចែងក្នុងរដ្ឋធម្មនុញ្ញ ហើយមានច្បាប់ធ្វើកូដកម្មទៀត។ ចុះហេតុអីក៏នៅតែ មកបង្ក្រាបពួកខ្ញុំជាស្ត្រីជាកូដករ ដដែលៗ វាយធ្វើបាប រុញច្រាន បោចសក់ ទាត់ធាក់មានគ្រប់ទម្រង់ ប៉ុន្មានខែនេះ គឺទក់អស់ហើយ។ ជើងស្រីវិញគឺជាំអស់ហើយ។ ខ្ញុំផ្ទាល់ក៏ត្រូវបានគាត់ ( អាជ្ញាធរ ) រុញច្រាន សម្រាប់កូដករស្រី ផ្សេងៗ ត្រូវបាន ( អាជ្ញាធរ ) អូសទៅអូសមក បង្វិលទៅបង្វិលមក ដូចបាល់អ៊ីចឹង។ ប្រសិនបើមានការបាត់បង់កូន ខ្ញុំពិតជាមានការសោកស្ដាយណាស់ ព្រោះស្រុកយើងមានច្បាប់មានទម្លាប់ត្រឹមត្រូវ »។
វិទ្យុអាស៊ីសេរីមិនអាចទាក់ទងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា និងអភិបាលរាជធានីក្រុងភ្នំពេញ លោក ឃួង ស្រេង ដើម្បីបកស្រាយបំភ្លឺបញ្ហានេះបានទេ នៅថ្ងៃទី១៧ខែឧសភា។
ប៉ុន្តែកន្លងទៅ លោក សាន សុខសីហា និងរដ្ឋបាលក្រុងភ្នំពេញបានចាត់ការធ្វើកូដកម្មរបស់ក្រុមកូដករថា ជាការធ្វើបាតុកម្មខុសច្បាប់។ លើសពីនេះ លោក សាន សុខសីហា ក៏ធ្លាប់បានលើកឡើងថា សមត្ថកិច្ចមិនបានប្រើអំពើហិង្សាណាមួយណាលើក្រុមកូដករឡើយ ផ្ទុយទៅវិញក្រុមកូដករទាំងនោះតែងតែបង្កើតរូបភាពរុញច្រានមកលើសមត្ថកិច្ច ដើម្បីបំភ័ន្តភ្នែកមហាជន។
ទោះជាយ៉ាងណាក្ដី មន្ត្រីសង្គមស៊ីវិល និងក្រុមសហជីព មើលឃើញថា ចំណាត់ការរបស់អាជ្ញាធរបានរំលោភសិទ្ធិកូដករទាំងស្រុង ដោយសារតែអាជ្ញាធរបានបង្ក្រាបកូដករជាសាធារណៈ និងមានលក្ខណៈរៀបចំជាប្រព័ន្ធ។ ក្រៅពីនេះ រូបភាពដែលអាជ្ញាធរបានបង្ក្រាបកូដករកន្លងមកនេះ ត្រូវបានចែកចាយនៅលើបណ្ដាញសង្គមដោយពួកគេសុទ្ធសឹងតែមានស្លាកស្នាមជាំនៅលើដងខ្លួន។ ទោះជាបែបនេះក្ដី មកដល់ពេលនេះ គ្មានស្ថាប័នពាក់ព័ន្ធណាកោះហៅមន្ត្រីដៃដល់ទាំងនោះធ្វើការអប់រំ ឬមានចំណាត់ការតាមផ្លូវច្បាប់នោះដែរ។
នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ (LICADO) លោក អំ សំអាត សោកស្ដាយ ដែលវិវាទការងារដ៏រ៉ាំរ៉ៃមួយនេះនៅតែបន្តអូសបន្លាយពេល ដែលបណ្ដាលឱ្យកូដករបន្តទទួលរងអំពើហិង្សា។ លោក អំ សំអាត បារម្ភថា បើការដោះស្រាយវិវាទការងារនេះនៅតែគ្មានច្រកចេញ គឺក្រុមកូដករនៅតែរងនូវភាពអយុត្តិធម៌ និងការធ្វើទុកបុកម្នេញកាន់តែខ្លាំងបន្ថែមទៀតពីសំណាក់អាជ្ញាធរ៖ « អ្វីដែលការសោកស្ដាយ និងកាន់តែបារម្ភ បើដូចជាការលើកឡើងរបស់កូដកររហូតដល់មានរងនូវអំពើហិង្សា ប៉ះពាល់ដល់កូនក្នុងផ្ទៃ ដែលមិនទាន់ដឹងក្ដីផងនោះ នេះជាបញ្ហាប្រឈមមួយទៀតដែលអាជ្ញាធរមានការគិតគូរឡើងវិញ។ ចំពោះការប៉ះទង្គិច រវាងអាជ្ញាធរជាមួយនឹងកូដករ ព្រោះបើជាការប៉ះទង្គិច មានភាពធ្ងន់ធ្ងរ បង្កឱ្យមានបញ្ហាព្យសនកម្មធ្ងន់ធ្ងរបន្តទៀត »។
លោក អំ សំអាត បន្ថែមថា ការប្រើកម្លាំងសមត្ថកិច្ចចម្រុះបង្ក្រាបកូដករនាពេលកន្លងមកនេះ រដ្ឋាភិបាលមិនបានផលចំណេញអ្វីឡើយ ក្រៅពីទទួលរងការរិះគន់ និងថ្កោលទោសពីសហគមន៍ជាតិ អន្តរជាតិ។ លោកបន្តស្នើយ៉ាងទទូចដល់ក្រសួងការងារថា គួរឈរលើចំណុចកណ្ដាល រកដំណោះស្រាយសមស្របឱ្យគូភាគីទាំងសងខាង ដើម្បីបញ្ចប់រាល់បញ្ហាប្រឈមនានា របស់ក្រុមកូដករ។
ទោះជាយ៉ាងណាក្ដី ការធ្វើកូដកម្ម របស់ក្រុមកូដករក្រុមហ៊ុនកាស៊ីណូណាហ្គាវើលដ៍ជាង ៥ខែកន្លងមកនេះ ពួកគាត់មិនត្រឹមតែគ្មានដំណោះស្រាយសមរម្យនោះទេ ប៉ុន្តែបែរជាទទួលរងការប្រើអំពើហិង្សាពីសំណាក់អាជ្ញាធរថែមទៀត។ ទន្ទឹមនឹងនេះ ថៅកែក្រុមហ៊ុននៅតែបន្តបដិសេធមិនព្រមទទួលយកកម្មករចំនួន ២០០នាក់ ឱ្យចូលបម្រើការងារវិញឡើយ ដោយភាគីក្រុមហ៊ុនអះអាងថា បុគ្គលិកក្នុងក្រុមហ៊ុនមានចំនួនលើសពីតម្រូវការ។ ប៉ុន្តែ ក្រុមកម្មករថា ក្រុមហ៊ុនបនល្បែងមួយនេះកំពុងតែផ្សាយរើសបុគ្គលិកបន្ថែម ដោយពួកគាត់យល់ថា ភាគីក្រុមហ៊ុនពិតជាមានចេតនាចង់រំលាយសំឡេងសហជីព។ ក្រុមកូដករនៅតែប្រកាន់ជំហរថា នឹងបន្តចេញធ្វើកូដកម្មដោយសន្តិវិធី ដើម្បីទាមទារឱ្យថៅកែក្រុមហ៊ុនបញ្ឈប់ការរើសអើងសហជីព និងត្រូវទទួលយកបុគ្គលិកចំនួន ២០០នាក់ឱ្យចូលបម្រើការងារវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។