ស្នងការខេត្តបន្ទាយមានជ័យរងការចោទថាកាត់ឈ្មោះមន្ត្រីប៉ូលិសដោយអយុត្តិធម៌
2016.12.26
អតីតមន្ត្រីប៉ូលិសប្រចាំការនៅស្រុកអូរជ្រៅ ខេត្តបន្ទាយមានជ័យ លោក ស៊ឺ ចាន់ណារិទ្ធ ផ្ដល់បទសម្ភាសន៍នៅថ្ងៃទី២៤ ខែធ្នូ ឆ្នាំ២០១៦។ RFA/Hum Chamroeun
RFA/Hum Chamroeun
អតីតមន្ត្រីប៉ូលិសម្នាក់នៅខេត្តបន្ទាយមានជ័យ ចោទប្រកាន់ស្នងការនគរបាលខេត្តនេះ ថាបញ្ជូនឈ្មោះរបស់គាត់ទៅក្រសួងមហាផ្ទៃ កាត់ចេញពីក្របខ័ណ្ឌនគរបាលជាតិដោយអយុត្តិធម៌។ ស្នងការនគរបាលខេត្តបញ្ជាក់យ៉ាងខ្លីថា ការកាត់ឈ្មោះនេះធ្វើឡើងទៅតាមវិន័យរបស់នគរបាលជាតិ។
អតីតមន្ត្រីប៉ូលិសប្រចាំការនៅស្រុកអូរជ្រៅ ខេត្តបន្ទាយមានជ័យ លោក ស៊ឺ ចាន់ណារិទ្ធ ថ្លែងនៅថ្ងៃទី២៦ ធ្នូ ថា មន្ត្រីនៃអគ្គស្នងការដ្ឋាននគរបាលជាតិ បានកាត់ឈ្មោះរបស់លោកចេញពីក្របខ័ណ្ឌកាលពីថ្ងៃទី១៥ ខែសីហា ឆ្នាំ២០១៦ ក្រោមហេតុផលបំពេញការងារមិនទៀងទាត់។
លោកអះអាងថា ស្នងការនគរបាលខេត្តបន្ទាយមានជ័យ បញ្ជូនឈ្មោះរបស់លោកទៅក្រសួងមហាផ្ទៃ ដើម្បីកាត់ឈ្មោះចេញពីក្របខ័ណ្ឌនេះ ធ្វើឡើងដោយអយុត្តិធម៌។ លោកថា ដោយសារមិនពេញចិត្តដែលលោកបានបង្ហោះវីដេអូឃ្លីបតាមហ្វេសប៊ុក (Facebook) កាលពីដើមឆ្នាំ២០១៦ អំពីការប្ដូរទីស្នាក់ការប៉ុស្តិ៍នគរបាលរដ្ឋបាលឃុំមួយកន្លែងនៅស្រុកអូរជ្រៅ ចេញពីទីប្រជុំជនដែលមានមនុស្សរស់នៅច្រើន ទៅដាក់នៅទីដាច់ស្រយាលចម្ងាយប្រមាណ ១០គីឡូម៉ែត្រ ដែលគ្មានទឹក និងគ្មានចរន្តអគ្គិសនីប្រើប្រាស់។ លោកអះអាងថា ចាប់តាំងពីពេលនោះមក ខាងស្នងការនគរបាលខេត្ត ចាប់ផ្ដើមរកកំហុសលោកជាបន្តបន្ទាប់៖ «គិតមើលទៅ ការកាត់ឈ្មោះនេះបើត្រូវតាមបច្ចេកទេស ក៏ខ្ញុំមិនតវ៉ាដែរ បើគាត់ហៅខ្ញុំធ្វើការអប់រំនៅអធិការដ្ឋានម្ដងជា ២ដង ខ្ញុំមិនរាងចាល ហើយបញ្ជូនមកណែនាំនៅស្នងការដ្ឋានណែនាំដាក់វិន័យខ្ញុំ ហើយបញ្ជូនឈ្មោះទៅក្រសួងដើម្បីធ្វើការដាក់វិន័យ ហើយបញ្ឈរជើងខ្ញុំនៅក្រសួង ប្រសិនបើខ្ញុំមិនគោរពតាមវិន័យទេ ហើយក្រសួងធ្វើលិខិតដេញខ្ញុំចោល គឺខ្ញុំមិនតូចចិត្តទេ»។
ឆ្លើយតបនឹងការចោទប្រកាន់នេះ ស្នងការនគរបាលខេត្តបន្ទាយមានជ័យ លោក អាត់ ខែម មានប្រសាសន៍យ៉ាងខ្លីថា បញ្ហានេះគឺជាការងាររបស់នគរបាលជាតិ ហើយពុំមានអ្វីត្រូវបកស្រាយវែងឆ្ងាយនោះទេ។ ទោះជាយ៉ាងនេះក្ដី លោកអះអាងថា ការកាត់ឈ្មោះចេញពីក្របខ័ណ្ឌ គឺធ្វើឡើងចំពោះតែមន្ត្រីទាំងឡាយណាដែលមានកំហុសតាមវិន័យរបស់នគរបាលជាតិប៉ុណ្ណោះ៖ «ការធ្វើមិនមែនខ្ញុំអត្តនោម័តិម្នាក់ឯងទេ គឺមានក្រុមប្រឹក្សាវិន័យរបស់គេ ព្រោះនគរបាលគេមានអង្គភាពក្រុមប្រឹក្សាវិន័យរបស់គេ ទាក់ទងទៅនឹងមន្ត្រីដែលខុសឆ្គង ដែលមិនអាចទទួលយកបាន ឬសេរី ឬនៅពេលណាមានបញ្ហាជាមួយប្រជាពលរដ្ឋ គឺគេដោះស្រាយបញ្ហានោះហើយ»។
ទោះបីជាយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តបន្ទាយមានជ័យ លោក ស៊ុំ ច័ន្ទគា មានប្រសាសន៍ថា ករណីនេះ អគ្គស្នងការនគរបាលជាតិ គួរតែពិនិត្យឡើងវិញឲ្យបានច្បាស់លាស់ ពីព្រោះអតីតមន្ត្រីនគរបាលរូបនោះធ្លាប់បានបំពេញការងារជូនសង្គមជាតិជាច្រើនឆ្នាំមកហើយ។ លោកបន្ថែមថា ប្រសិនបើរកមិនឃើញកំហុសធំដុំដែលអាចបញ្ឈប់គាត់បានទេ គឺអគ្គស្នងការនគរបាលជាតិ ត្រូវតែផ្ដល់ឱកាសឲ្យគាត់បានបំពេញការងារដូចដើមឡើងវិញ៖ «ព្រោះថាយើងឃើញកន្លងមក សូម្បីអតីតស្នងការនគរបាលខេត្តបន្ទាយមានជ័យ លោក ហ៊ុន ហ៊ាន ហើយស្នងការរង និងបក្ខពួកជាច្រើននាក់ទៀត ត្រូវបានតុលាការផ្ដន្ទាទោសដាក់ពន្ធនាគារហើយ តែឈ្មោះពួកគាត់មិនទាន់កាត់ឈ្មោះចេញពីបញ្ជីពីអង្គភាពនគរបាលនោះទេ ហើយទទួលបានប្រាក់បៀវត្សរ៍រៀងរាល់ខែទៀត ព្រោះតុលាការមិនបានចេញសេចក្ដីសម្រេចណាមួយថា បញ្ឈប់គាត់ចេញពីនគរបាលជាតិទេ»។
អតីតមន្ត្រីប៉ូលិសដែលកាត់ចេញពីក្របខ័ណ្ឌរដ្ឋ ចូលបម្រើការងារជាមន្ត្រីនគរបាលនៅខេត្តបន្ទាយមានជ័យ តាំងពីឆ្នាំ១៩៩៤ មក។ កាលពីដើមឆ្នាំ២០១៦ លោកមានតួនាទីជានាយរងសេនាធិការនគរបាលស្រុកអូរជ្រៅ ខេត្តបន្ទាយមានជ័យ។ អតីតមន្ត្រីប៉ូលិសរូបនេះអះអាងថា កន្លងមក លោកធ្លាប់ទៅសុំអន្តរាគមន៍ពីក្រសួងមហាផ្ទៃ ដើម្បីឲ្យជួយដោះស្រាយបញ្ហានេះដែរ ប៉ុន្តែពុំទទួលបានលទ្ធផលនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- ធនាគារABA មិនព្រមបើកប្រាក់ជាង១ម៉ឺន ៥ពាន់ដុល្លារ ដែលឧបត្ថម្ភដល់បុគ្គលិកណាហ្គាវើលដ៍
- ថៃយល់ព្រមឱ្យកម្ពុជាប្រើពាក្យ «គុនខ្មែរ» ក្នុងព្រឹត្តិការណ៍ស៊ីហ្គេម២០២៣
- «ករណីឧកញ៉ា សៀង ចាន់ហេង ប្រគល់ដីឲ្យប្អូនស្រីនាយករដ្ឋមន្ត្រីបង្ហាញថា អ្នកធំតែងឈ្នះ»
- លោក ហ៊ុន សែន បន្តប្រកាសថា នឹងការពារមិនឱ្យមានរដ្ឋប្រហារ ដើម្បីអភិវឌ្ឍប្រទេសឱ្យរីកចំរើន
- ក្រុមមន្ត្រីជាន់ខ្ពស់គណបក្សកាន់អំណាចប្រតិកម្មនឹងពលរដ្ឋខ្មែររស់នៅក្រៅប្រទេស ជេរប្រមាថលោក ហ៊ុន ម៉ាណែត តាមបណ្ដាញសង្គម
