អង្គភាព​ប្រឆាំង​អំពើ​ពុករលួយ​ប្រកាស​ហាម​ករណី​បក្សពួក​និយម​ក្នុង​ស្ថាប័ន​រដ្ឋ

ដោយ យន់ សាមៀន
2014.03.31
Share on WhatsApp
Share on WhatsApp
ឱម យ៉ិនទៀង ៦២០ ប្រធាន​អង្គភាព​ប្រឆាំង​អំពើ​ពុករលួយ លោក ឱម យ៉ិនទៀង ថ្លែង​ក្នុង​សន្និសីទ​កាសែត​ស្ដីពី​ការ​វាយ​តម្លៃ និង​ត្រួត​ពិនិត្យ​លើ​កិច្ច​ខិតខំ​ប្រឹងប្រែង​ប្រយុទ្ធ​ប្រឆាំង​អំពើ​ពុករលួយ នៅ​ថ្ងៃ​ទី​៩ តុលា ឆ្នាំ​២០១៣។
RFA

អង្គការ​សង្គម​ស៊ីវិល​ឃ្លាំមើល​អំពើ​ពុករលួយ​នៅ​កម្ពុជា បាន​រិះគន់​អង្គភាព​ប្រឆាំង​អំពើ​ពុករលួយ​ថា អង្គភាព​នេះ​នៅ​មិន​ទាន់​ចាត់​វិធានការ​ឲ្យ​មាន​ប្រសិទ្ធភាព​ប្រឆាំង​នឹង​មន្ត្រី​រដ្ឋាភិបាល​ជាន់​ខ្ពស់​ដែល​ជាប់​ពាក់ព័ន្ធ​នឹង​អំពើ​ពុករលួយ​នៅ​ឡើយ​ទេ។ អង្គភាព​នេះ​បាន​ដោះស្រាយ និង​ស៊ើប​អង្កេត​តែ​លើ​ករណី​អំពើ​ពុករលួយ​បង្ក​ឡើង​ដោយ​មន្ត្រី​រដ្ឋាភិបាល​តូចតាច​មួយ​ចំនួន​តែប៉ុណ្ណោះ។

អង្គការ​សង្គម​ស៊ីវិល​ស្នើ​ឲ្យ​អង្គភាព​នេះ​ត្រូវ​ចាត់​វិធានការ និង​ផ្ដន្ទាទោស​លើ​មន្ត្រី​ជាន់​ខ្ពស់​និង​តូចតាច ដោយ​មិន​យោគយល់​ពី​និន្នាការ​នយោបាយ​ឡើយ។

អង្គភាព​ប្រឆាំង​អំពើ​ពុករលួយ កាល​ពី​សប្ដាហ៍​មុន​បាន​ប្រកាស​ហាមឃាត់​ករណី​បក្សពួក​និង​គ្រួសារ​និយម​ក្នុង​ស្ថាប័ន​រដ្ឋ មាន​ន័យ​ថា ប្រសិន​បើ​មាន​ឪពុក​ជា​អ្នក​ដឹកនាំ​ក្នុង​ស្ថាប័ន​រដ្ឋ​នោះ គឺ​មិន​ត្រូវ​មាន​កូន ឬ​សមាជិក​គ្រួសារ​ធ្វើ​ការ​ក្នុង​ស្ថាប័ន​ជាមួយ​គ្នា​ឡើយ។

ការ​ហាមឃាត់​កើត​ឡើង​ក្រោយ​ពី​មាន​បណ្ដឹង​មួយ​ចំនួន​ចោទ​ប្រកាន់​ថា មន្ត្រី​រាជការ​នៅ​ខេត្ត​ឧត្តរមានជ័យ មាន​ឪពុក​ជា​ប្រធាន​មន្ទីរ ចំណែក​កូន​ជា​ប្រធាន​គណនេយ្យ។ កាល​ពី​ដើម​ខែ​មីនា អង្គភាព​ប្រឆាំង​អំពើ​ពុករលួយ​ក៏​ទទួល​បាន​ករណី​ចោទ​ប្រកាន់​ពី​អំពើ​ពុករលួយ​ស្រដៀង​គ្នា​នេះ​ដែរ ប៉ុន្តែ​អង្គភាព​នេះ​មាន​វិធានការ​ដោះស្រាយ​ផ្សេង​ទៅ​វិញ។

សេចក្ដី​ប្រកាស​ព័ត៌មាន​របស់​អង្គភាព​ប្រឆាំង​អំពើ​ពុករលួយ ផ្សាយ​កាល​ពី​ថ្ងៃ​ទី​១៤ មីនា បញ្ជាក់​ថា អង្គភាព​នេះ​ទទួល​បាន​ពាក្យ​បណ្ដឹង​ជា​បន្តបន្ទាប់​ពី​ការ​ចោទ​ប្រកាន់​កូន​ប្រុស​រដ្ឋមន្ត្រី​ក្រសួង​ការបរទេស លោក ហោ ណាំហុង គឺ​លោក ហោ សុធន ដែល​ជា​អគ្គលេខាធិការ​ពាក់ព័ន្ធ​នឹង​ភាព​មិន​ប្រក្រតី​មួយ​ចំនួន​ក្នុង​ការ​បំពេញ​តួនាទី​នៅ​ឯ​ក្រសួង។ ប៉ុន្តែ​អង្គភាព​នេះ មិន​បាន​ស៊ើប​អង្កេត​ករណី​នេះ​ឡើយ ផ្ទុយ​ទៅ​វិញ បាន​អនុញ្ញាត​ឲ្យ​លោក ហោ សុធន ឆ្លើយ​តប​ចំពោះ​ការ​ចោទ​ប្រកាន់​នេះ​វិញ។

នាយក​ប្រតិបត្តិ​អង្គការ​តម្លាភាព​កម្ពុជា លោក ព្រាប កុល មាន​ប្រសាសន៍​ថា កន្លង​មក​លោក​សង្កេត​ឃើញ​ថា អង្គភាព​ប្រឆាំង​អំពើ​ពុករលួយ​បាន​ស៊ើប​អង្កេត និង​ចាប់​ខ្លួន​មន្ត្រី​តូចតាច​មួយ​ចំនួន ប៉ុន្តែ​នៅ​មិន​ទាន់​អាច​ចាត់​វិធានការ​ដោះស្រាយ​ប្រឆាំង​នឹង​អំពើ​ពុករលួយ​ពាក់ព័ន្ធ​នឹង​មន្ត្រី​ជាន់​ខ្ពស់​រដ្ឋាភិបាល​បាន​នៅ​ឡើយ។ លោក​បន្ត​ថា បណ្ដឹង​ពាក់ព័ន្ធ​នឹង​មន្ត្រី​រដ្ឋាភិបាល​នៅ​តាម​ក្រសួង​ភាគ​ច្រើន បាន​ត្រឹម​តែ​ផ្លាស់ប្ដូរ​តួនាទី​តែប៉ុណ្ណោះ។

កាល​ពី​ថ្ងៃ​ទី​២៣ មីនា ប្រធាន​អង្គភាព​ប្រឆាំង​អំពើ​ពុករលួយ​ លោក ឱម យ៉ិនទៀង បាន​ឆ្លើយ​តប​ចំពោះ​ការ​រិះគន់​ថា អង្គភាព​នេះ បាន​ស៊ើប​អង្កេត​ល្អិតល្អន់​អំពី​ពាក្យ​ប្ដឹង​ប្រឆាំង​នឹង​លោក ហោ សុធន ពី​បទ​រំលោភ​អំណាច និង​ពុករលួយ ប៉ុន្តែ​គ្មាន​ភស្តុតាង​គ្រប់គ្រាន់។ លោក​បន្ត​ថា អង្គភាព​បាន​អនុញ្ញាត​ឲ្យ​ដើម​បណ្ដឹង​រក​ភស្តុតាង​កាន់​តែ​រឹងមាំ​បន្ថែម​ទៀត​ជុំវិញ​ករណី​នេះ។

ចំណែក​ករណី​មន្ត្រី​ក្រសួង​សុខាភិបាល​ប្រព្រឹត្ត​អំពើ​ពុករលួយ​ប្រាក់​ជំនួយ​របស់​មូលនិធិ​សកល (Global Fund) វិញ ក៏​មិន​មាន​ការ​ផ្ដន្ទាទោស​នៅ​ឡើយ​ទេ។

លោក ឱម យ៉ិនទៀង មាន​ប្រសាសន៍​ថា អង្គភាព​នេះ​បាន​បង្គាប់​មន្ត្រី​ជាន់​ខ្ពស់​ក្រសួង​សុខាភិបាល សង​ប្រាក់​ទៅ​ឲ្យ​មូលនិធិ​សកល​វិញ ហើយ​អង្គភាព​បាន​បិទ​បញ្ចប់​ការ​ស៊ើប​អង្កេត​ករណី​នេះ។ លោក ឱម យ៉ិនទៀង បន្ត​ថា រដ្ឋាភិបាល​មិន​ប្ដឹង​មន្ត្រី​ក្រសួង​សុខាភិបាល​ ដែល​ប្រព្រឹត្ត​អំពើ​ពុករលួយ​ទៅ​កាន់​តុលាការ​ឡើយ ដោយសារ​តែ​មន្ត្រី​ទាំង​នោះ​បាន​កសាង​គុណសម្បត្តិ កម្ចាត់​ជំងឺ​គ្រុន​ចាញ់ និង​ជំងឺ​អេដស៍​នៅ​កម្ពុជា។

មូលនិធិ​សកល​ បាន​ចេញ​របាយការណ៍​ស៊ើប​អង្កេត​មួយ ​កាល​ពី​ថ្ងៃ​ទី​១៤ ខែ​វិច្ឆិកា ឆ្នាំ​២០១៣ ដោយ​បង្ហាញ​ភស្តុតាង​ជា​ច្រើន​ទាក់ទង​នឹង​បណ្ដាញ​ប្រព្រឹត្ត​អំពើ​ពុករលួយ​ក្នុង​ក្រសួង​សុខាភិបាល។

របាយការណ៍​ស៊ើប​អង្កេត​កម្រាស់ ៨៣​ទំព័រ របស់​មូលនិធិ​សកល រក​ឃើញ​ថា ​មជ្ឈមណ្ឌល​ជាតិ​ប្រយុទ្ធ​ជំងឺ​គ្រុនចាញ់ បាន​ទទួល​ប្រាក់​សគុណ​ចំនួន​ជិត ៥​សែន​ដុល្លារ ពី​ក្រុមហ៊ុន​ផ្គត់ផ្គង់​មុង​ចំនួន​ពីរ​នៅ​បរទេស។ ក្រុមហ៊ុន​ទាំង​ពីរ​បាន​ផ្ដល់​ប្រាក់​សគុណ​ជូន​មន្ត្រី​ទាំង​នេះ​ជា​ថ្នូរ​នឹង​កិច្ចសន្យា​ជាមួយ​ក្រសួង​សុខាភិបាល។

របាយការណ៍​របស់​អង្គភាព​ប្រឆាំង​អំពើ​ពុករលួយ​ ដែល​ផ្សព្វផ្សាយ​នៅ​លើ​គេហទំព័រ​អង្គភាព​នេះ បាន​បង្ហាញ​ថា មន្ត្រី​នៅ​តាម​មូលដ្ឋាន នៅ​តាម​ក្រសួង​រដ្ឋ បាន​ចូល​រួម​បង្ហាញ​ពី​អំពើ​ពុករលួយ​ជា​ច្រើន​ករណី។ ភាគ​ច្រើន​នៃ​បណ្ដឹង​តូចតាច​ទាំង​នោះ ត្រូវ​បាន​អង្គភាព​ប្រឆាំង​អំពើ​ពុករលួយ​ដោះស្រាយ ឬ​បំភ្លឺ។

កាល​ពី​ខែ​ឧសភា ឆ្នាំ​២០១៣ អង្គភាព​ប្រឆាំង​អំពើ​ពុករលួយ​បាន​ព្រមាន​ចាត់​វិធានការ​តាម​ផ្លូវ​ច្បាប់​ប្រឆាំង​នឹង​ព្រះអង្គម្ចាស់ ស៊ីសុវត្ថិ ធម្មិកោ ប្រសិន​បើ​ព្រះអង្គ​មិន​ព្រម​ប្រកាស​ទ្រព្យ​សម្បត្តិ។ ការ​ព្រមាន​នេះ ត្រូវ​បាន​មើល​ឃើញ​ថា ជា​គំនាប​នយោបាយ​ប្រឆាំង​នឹង​ព្រះអង្គម្ចាស់ ស៊ីសុវត្ថិ ធម្មិកោ នៅ​ពេល​ព្រះអង្គ​ចូល​រួម​នឹង​គណបក្ស​សង្គ្រោះ​ជាតិ។

មន្ត្រី​នាំ​ពាក្យ​អង្គភាព​ប្រឆាំង​អំពើ​ពុករលួយ លោក កែវ រ៉េមី បាន​បិទ​ទូរស័ព្ទ​មិន​ឆ្លើយ​តប​នឹង​សំណួរ​របស់​វិទ្យុ​អាស៊ីសេរី កាល​ពី​ថ្ងៃ​ទី​៣១ ខែ​មីនា នៅ​ពេល​សាកសួរ។

លោក ព្រាប កុល ស្នើ​ឲ្យ​អង្គភាព​ប្រឆាំង​អំពើ​ពុករលួយ​ត្រូវ​ចាត់​វិធានការ​ប្រឆាំង​នឹង​អំពើ​ពុករលួយ​ទាំង​មូល ដោយ​មិន​ត្រូវ​ប្រកាន់​នឹង​និន្នាការ​នយោបាយ ឬ​មន្ត្រី​ជាន់​ខ្ពស់ ឬ​មន្ត្រី​តូចតាច​ឡើយ។

ទោះ​បី​ជា​យ៉ាង​ក៏ដោយ លោក​កត់សំគាល់​ថា ពលរដ្ឋ​ជា​ច្រើន​បច្ចុប្បន្ន​ស្វែង​យល់​ពី​ពី​បញ្ហា​អំពើ​ពុករលួយ ហើយ​កំពុង​ចូល​រួម​បំបាត់​អំពើ​នេះ ចំណែក​មន្ត្រី​ពុករលួយ​មួយ​ចំនួន​ក៏​កំពុង​ប្រព្រឹត្ត​អំពើ​ពុករលួយ ដោយ​បិទ​បាំង​មិន​ចំហ​ដូច​កាល​ពី​មុន​ឡើយ។

របាយការណ៍​ឆ្នាំ​២០១២ របស់​អង្គការ​តម្លាភាព​អន្តរជាតិ​នៅ​កម្ពុជា ស្ដីពី​អំពើ​ពុករលួយ បាន​រក​ឃើញ​ថា អំពើ​ពុករលួយ​នៅ​កម្ពុជា មាន​លក្ខណៈ​ធ្ងន់ធ្ងរ​ស្ថិត​នៅ​ក្នុង​លំដាប់​លេខ ១៥៧ ក្នុង​ចំណោម​ប្រទេស​សរុប ១៧៦​ប្រទេស ដែល​អង្គការ​នេះ បាន​សិក្សា។ របាយការណ៍​បង្ហាញ​ថា ចំណាត់​កម្ពុជា ប្រសើរ​ជាង​ប្រទេស​ឡាវ ជាប់​ចំណាត់​ថ្នាក់​លេខ ១៦០ និង​ប្រទេស​មីយ៉ាន់ម៉ា ឬ​ភូមា ជាប់​ចំណាត់​ថ្នាក់ ១៧២៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។