សាលាឧទ្ធរណ៍រាជធានីភ្នំពេញ បដិសេធសំណើសុំនៅក្រៅឃុំបណ្ដោះអាសន្នរបស់ក្រុមមេធាវីការពារក្ដីឲ្យថ្នាក់ដឹកនាំ និងសមាជិកសហជីពទ្រទ្រង់សិទ្ធការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ (LRSU) ៨នាក់ ដោយតម្កល់សេចក្ដីសម្រេចសាលាដំបូងរាជធានីភ្នំពេញទុកនៅដដែល។ ក្រុមមេធាវី និងសង្គមស៊ីវិលសោយស្ដាយនឹងការសម្រេចរបស់តុលាការជាន់ខ្ពស់មួយនេះ ព្រោះពួកគេទាំងអស់នោះ គ្រាន់តែប្រើប្រាស់សិទ្ធិត្រឹមត្រូវតាមច្បាប់ ទាមទារដំណោះស្រាយការងារនៅកន្លែងធ្វើការ គឺមិនបានប្រព្រឹត្តកំហុសធ្ងន់ធ្ងរដូចការចោទប្រកាន់ទេ។
ចៅក្រមនៃសភាស៊ើបសួរនៃសាលាឧទ្ធរណ៍ លោក ឃុន លាងម៉េង នៅថ្ងៃទី១០ មីនា សម្រេចបន្តឃុំខ្លួនប្រធានសហជីព និងសមាជិកសហជីពណាហ្គាវើលដ៍ ៨នាក់ នៅពន្ធនាគារព្រៃសដដែល ក្រោមហេតុផលថា រក្សាជនជាប់ចោទដើម្បីឲ្យសាលាដំបូងរាជធានីភ្នំពេញ បន្តស៊ើបអង្កេតសំណុំរឿងនេះឲ្យចប់។
សេចក្ដីសម្រេចនេះ ធ្វើឡើងនៅចំពោះមុខអ្នកជាប់ឃុំទាំង ៨នាក់ នៅក្នុងបន្ទប់សវនាការអសាធារណៈ ដោយមិនអនុញ្ញាតឲ្យសង្គមស៊ីវិលដែលតាមសំណុំរឿងនេះចូលស្ដាប់បានឡើយ។
បន្ទាប់ពីតុលាការប្រកាសសាលដីកាចប់ មន្ត្រីពន្ធនាគារបានដឹកអ្នកទាំង ៨នាក់ ក្នុងសំលៀកបំពាក់ពណ៌ស្លាទុំ តាមរថយន្តទៅពន្ធនាគារវិញ ដើម្បីបន្តឃុំខ្លួនបណ្ដោះអាសន្នរង់ចាំសវនាការ ក្រោមបទចោទញុះញង់ឱ្យប្រព្រឹត្តិបទឧក្រិដ្ឋជាអាទិ៍។ ក្នុងនោះមានប្រធានសហជីពទ្រទ្រង់សិទ្ធការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៏ (LRSU) កញ្ញា ឈឹម ស៊ីថរ លេខាសហជីព អ្នកស្រី ឈឹម សុខន សមាជិកសហជីព មានអ្នកស្រី ហៃ សុភាព អ្នកស្រី ឃ្លាំង សុបិន្ត អ្នកស្រី រី សុវណ្ណឌី អ្នកនាង ស៊ុន ស្រីពេជ្រ អ្នកនាង ទូច សេរីមាស និងអតីតសមាជិកសហជីព លោក សុខ ណារិទ្ធ។
មេធាវីការពារឲ្យជនជាប់ទាំង ៨នាក់ លោក សំ ចំរើន ប្រាប់វិទ្យុអាស៊ីសេរីនៅថ្ងៃទី១០ មីនាថា សាលាឧទ្ធរណ៍ មិនខ្វាយខ្វល់ពីទុក្ខលំបាករបស់កូនក្ដីលោកទេ ក្រៅពីប្រើហេតុផលស្រដៀងគ្នានឹងសាលាដំបូងរាជធានីភ្នំពេញ ដើម្បីបន្តឃុំខ្លួនពួកគេបន្ថែមទៀត។
លោកបញ្ជាក់ថា មេធាវីនឹងពិភាក្សាជាមួយកូនក្ដី និងពិនិត្យមើលសាលដីការបស់សាលាឧទ្ធរណ៍ឡើងវិញ រួចប្ដឹងសារទុក្ខទៅតុលាការកំពូល ដើម្បីឲ្យពួកគេបាននៅក្រៅឃុំបណ្ដោះអាសន្ន៖ «ហេតុផលនោះគ្មានហេតុអ្វីចម្លែកទេ គ្មានហេតុផលចាំបាច់ទេ។ យើងដាក់បណ្ដឹងសិន ហើយយើងពិនិត្យមើលខ្លឹមសារនៃសាលដីកាមើល៍ តើមានចំណុចឆ្គាំឆ្គងកន្លែងណា ឬចំណុចធ្វេសប្រហែសកន្លែងណា ដើម្បីយើងត្រូវធ្វើការសន្និដ្ឋាននៅមុខតុលាការកំពូលតទៅទៀត»។
ទាក់ទងនឹងរឿងនេះ នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត សោកស្ដាយការសម្រេចរបស់តុលាការជាន់ខ្ពស់មួយនេះ ដោយមិនបានពិចារណាឲ្យបានច្បាស់លាស់ ក្នុងសំណុំរឿងនេះ ដែលផ្ដើមចេញពីវិវាទការងារនៅក្រុមហ៊ុនណាហ្គាវើលដ៍ គ្មានដំណោះស្រាយជាង ១ឆ្នាំមកហើយ។
លោកយល់ថា អ្នកទាំងអស់នោះសមទទួលបានការអនុញ្ញាតឲ្យនៅក្រៅឃុំ ជួបជុំក្រុមគ្រួសារឡើងវិញ ព្រោះពួកគេ គ្រាន់តែប្រើប្រាស់សិទ្ធិធ្វើកូដកម្មជាជម្រើសចុងក្រោយតាមផ្លូវច្បាប់ ដើម្បីទាមទារដំណោះស្រាយពីថៅកែក្រុមហ៊ុន មិនគួររងការចោទប្រកាន់ធ្ងន់ធ្ងរតាមផ្លូវតុលាការបែបនេះឡើយ៖ «ម្សិលមិញមានការដឹកនាំប្រជុំដោយឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីស្វែងរកដំណោះស្រាយវិវាទការងារណាហ្គាវើលដ៍ដោយសន្តិវិធី។ អ៊ីចឹង ! ចំណុចដែលចាប់ផ្ដើមដំបូងវាគួរតែមានការដោះលែងអ្នកទាំងអស់ឲ្យមានសេរីភាព ហើយបន្តក្នុងការចរចាដោយសន្តិវិធីដើម្បីបញ្ចប់វិវាទការងារហ្នឹង។ ហ្នឹងគឺជារឿងត្រូវចាំបាច់។ ហើយការមិនអនុញ្ញាតឲ្យក្រៅឃុំនេះ ក៏វាមិនអាចស្វែងរកដំណោះស្រាយបញ្ចប់វិវាទការងាររវាងក្រុមហ៊ុនណាហ្គាវើលដ៍ និងកូដករហ្នឹងបានដែរ»។
ក្នុងពេលតុលាការបើកសវនាការ យ៉ាងហោចណាស់ក៏មាន ក្រុមកម្មករណាហ្គវើលដ៍ប្រមាណ ៥០នាក់ ឈរលើកទឹកចិត្តដល់តំណាងរបស់ពួកគេ និងស្រែកទាមទារឲ្យតុលាការដោះលែងអ្នកជាប់ឃុំទាំងអស់ឲ្យមានសេរីភាពវិញ។
កម្មករម្នាក់ក្នុងចំណោមនោះ លោកស្រី សុខ រតនា ថ្លែងថា ពួកគាត់នឹងចេញធ្វើកូដកម្មជាថ្មីទៀត រហូតដល់មានការដោះលែងតំណាងសហជីពនិងបុគ្គលិកសរុបចំនួន១១នាក់ ហើយថៅកែក្រុមហ៊ុនណាហ្គាវើលដ៍ត្រូវចេញមុខដោះស្រាយបញ្ចប់វិវាទការងារមួយនេះឲ្យបានឆាប់៖ «វិវាទនេះជាវិវាទការងារ កុំព្យាយាមបង្វែរពួកខ្ញុំឲ្យទៅឈ្មោះជាមួយក្រុមអាជ្ញាធរ។ ទៅឈ្លោះជាមួយក្រសួងផ្សេងវាអត់ល្អទេ។ កុំព្យាយាមទាញក្រសួងផ្សេងៗ មកពាក់ព័ន្ធ។ វិវាទនេះ មានតែពីរ បីទាំងក្រសួងការងារ។ ទី១ តំណាងពួកខ្ញុំ ដែលជាក្រុមកូដករ ទី២ ថៅកែណាហ្គាវើលដ៍ ទី៣ ក្រសួងការងារ ដែលឈរនៅចំណុចកណ្ដាល ដែលគួរដោះស្រាយវិវាទនេះបាន»។
កាលពីខែមករា ចៅក្រមស៊ើបសួរនៃសាលាដំបូងរាជធានីភ្នំពេញ លោក អ៊ឹម វណ្ណៈ សម្រេចឃុំខ្លួនថ្នាក់ដឹកនាំ និងសមាជិកសហជីពណាហ្គាវើលដ៍ (NagaWorld) ៨នាក់ដាក់ពន្ធនាគារព្រៃស ក្រោមបទចោទ "ញុះញង់បង្កឲ្យមានវឹកវរធ្ងន់ធ្ងរដល់សន្តិសុខសង្គម" ក្រោយពីកម្មករណាហ្គាវើលដ៍ជាង ១ពាន់នាក់ ចេញធ្វើកូដកម្មនៅខាងក្រុមហ៊ុនបនល្បែង ទាមទារឲ្យថៅកែទទួលយកបុគ្គលិកជាង៣រយនាក់ចូលធ្វើការវិញ និងទទួលស្គាល់វត្តមានសហជីពនៅកន្លែងការងារ។
គិតត្រឹមថ្ងៃទី១០ មីនា ថ្នាក់ដឹកនាំ និងសមាជិកសហជីពនៃកម្មករណាហ្គាវើលដ៍ ៨នាក់ កំពុងជាប់ឃុំក្នុងពន្ធនាគារព្រៃសអស់រយៈពេល ៧០ថ្ងៃហើយ។
ក្រុមអង្គការសង្គមស៊ីវិលចាត់ទុកសេចក្ដីសម្រេចរបស់សាលាឧទ្ធរណ៍នេះ ហាក់ផ្ទុយពីស្មារតីនៃកិច្ចប្រជុំផ្ទៃក្នុងរបស់អន្តរក្រសួង និងអាជ្ញាធរពាក់ព័ន្ធ ធ្វើឡើងដោយរដ្ឋមន្ត្រីក្រសួងមហាផ្ទៃ លោក ស ខេង នៅសាលារាជធានីភ្នំពេញ កាលពីថ្ងៃទី៩ មីនា ក្នុងការស្វែងរកដំណោះស្រាយការងារនៅក្រុមហ៊ុនណាហ្គាវើលដ៍។ គិតមកពេលនេះ លទ្ធផលនៃកិច្ចប្រជុំនោះ នៅមិនទាន់មានប្រភពណាមួយទម្លាយឲ្យសាធារណជនដឹងនៅឡើយទេ។
សង្គមស៊ីវិលស្នើសុំស្ថាប័នតុលាការ និងក្រសួងពាក់ព័ន្ធទាំងអស់ ពន្លឿនដំណោះស្រាយរឿងនេះ ដោយទម្លាក់ចោលការចោទប្រកាន់ រួចដោះលែងតំណាងសហជីព សមាជិកសហជីព និងកម្មករណាហ្គាវើលដ៍ចំនួន ១១នាក់ ឲ្យមានសេរីភាពវិញ ដើម្បីវិលចូលតុចរចាជាមួយក្រុមហ៊ុនណាហ្គាវើលដ៍ បញ្ចប់វិវាទការងារនេះដោយសន្តិវិធី ទើបជាដំណោះស្រាយល្អប្រសើរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។