ក្រសួងការបរទេសបញ្ជាក់ថា កម្ពុជានឹងអនុវត្តអនុសញ្ញាស្ដីអំពីជនភៀសខ្លួនឆ្នាំ១៩៥១ ដើម្បីជ្រើសរើស និងទទួលយកជនភៀសខ្លួនដែលមានបំណងសុំសិទ្ធិជ្រកកោននៅប្រទេសអូស្ត្រាលី ប៉ុន្តែត្រូវអូស្ត្រាលី បដិសេធទទួលយក។
ការអះអាងនេះ ធ្វើឡើងបន្ទាប់មន្ត្រីសិទ្ធិមនុស្សជាតិ និងអន្តរជាតិ បានរិះគន់កម្ពុជាថា ការយល់ព្រមទទួលយកសំណើរបស់អូស្ត្រាលី គឺដើម្បីប្តូរយកជំនួយនៅពេលដែលកម្ពុជា មិនទាន់មានសមត្ថភាពគ្រប់គ្រាន់ដើម្បីទទួលជនភៀសខ្លួននៅឡើយ។
នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ លោក ហ្វីល រ៉ូប៊ើតសុន (Phil Robertson) បញ្ជាក់ថា ជំនួយជាថវិការបស់អូស្ត្រាលីជាមូលហេតុសំខាន់មួយដែលបណ្ដាលឲ្យរដ្ឋាភិបាលកម្ពុជា ទទួលយកជនភៀសខ្លួនដែលត្រូវបានបដិសេធសិទ្ធិជ្រកកោននៅប្រទេសអូស្ត្រាលី។ បច្ចុប្បន្ន កម្ពុជាមានជនភៀសខ្លួនចំនួន ៦៩នាក់ ប៉ុន្តែពួកគេកំពុងប្រឈមបញ្ហាក្នុងការប្រកបរបររស់នៅ ហើយកំពុងមានជីវភាពដុនដាប។
លោក ហ្វីល រ៉ូប៊ើតសុន៖ «ក្តីកង្វល់របស់យើង គឺដោយសារតែរដ្ឋាភិបាលកម្ពុជា មិនអាចផ្តល់ការការពារ និងផ្តល់សេវាកម្មផ្សេងៗទៀតដល់ជនភៀសខ្លួនមកពីអូស្ត្រាលី។ កម្ពុជាក៏មិនបានផ្តល់ការពារសិទ្ធិមនុស្សដល់ជនភៀសខ្លួនឡើយ កាលពីពេលអតីតកាលខ្មែរកម្ពុជាក្រោម ដែលរត់ពីការធ្វើទុក្ខបុកម្នេញ ត្រូវបានចាប់បញ្ជូនទៅវៀតណាមវិញ ហើយចំណែកជនភៀសខ្លួន អ៊ុយហ្គរ៍ ត្រូវបានចាប់បញ្ជូនទៅចិន វិញដែរ។ កម្ពុជា មិនមែនជាប្រទេសដែលអាចផ្ទេរការទទួលសុខត្រូវផ្នែកជនភៀសខ្លួនបានឡើយ»។
កាលពីថ្ងៃអង្គារ ទី៣ មិថុនា លោក ហោ ណាំហុង រដ្ឋមន្ត្រីក្រសួងការបរទេស ត្រូវបានសារព័ត៌មានអូស្ត្រាលី ឈ្មោះ Fairfax Media ដកស្រង់សម្ដីថា កម្ពុជានឹងស៊ើបអង្កេតប្រវត្តិរូបជនភៀសខ្លួន និងតម្រូវឲ្យពួកគេចុះហត្ថលេខាយល់ព្រមដោយស្ម័គ្រចិត្តមករស់នៅកម្ពុជា មុនពេលកម្ពុជា ព្រមទទួលយកជនភៀសខ្លួនទាំងនោះ។ កម្ពុជានឹងអនុវត្តអនុសញ្ញាស្ដីអំពីជនភៀសខ្លួនឆ្នាំ១៩៥១ ដើម្បីជ្រើសរើស និងទទួលយកជនភៀសខ្លួន។
មន្ត្រីតស៊ូមតិផ្នែកជនភៀសខ្លួនឲ្យដឹងថា មានជនភៀសខ្លួនប្រមាណមួយពាន់នាក់ ដែលព្យាយាមជិះទូកទៅប្រទេសអូស្ត្រាលី ហើយត្រូវបានចាប់ឃុំនៅប្រទេសណាវរ៉ូ ត្រូវបានរដ្ឋាភិបាលអូស្ត្រាលី គ្រោងនឹងបញ្ជូនមករស់នៅកម្ពុជា។
លោក កុយ គួង មន្ត្រីនាំពាក្យក្រសួងការបរទេសបញ្ជាក់ថា រដ្ឋាភិបាលកម្ពុជា និងអូស្ត្រាលី កំពុងបន្តចរចាបន្ថែមទៀតមុននឹងចុះហត្ថលេខាលើកិច្ចព្រមព្រៀងស្ដីពីការយល់ព្រមទទួលយកជនភៀសខ្លួនពីប្រទេសអូស្ត្រាលី។
ចំណែកសារព័ត៌មាន The Sydney Morning Herald ក៏បានដកស្រង់សម្ដីរដ្ឋមន្ត្រីអន្តោប្រវេសន៍អូស្ត្រាលី ថា កិច្ចចរចាស្ដីពីជនភៀសខ្លួនកំពុងមានដំណើរការល្អ ប៉ុន្តែមិនទាន់មានលទ្ធផលនៅឡើយ។
លោក ហ្វីល រ៉ូប៊ើតសុន បន្ថែមទៀតថា តាមប្រភពព័ត៌មានមួយចំនួនដែលមិនទាន់ជាផ្លូវការបង្ហាញថា កម្ពុជានឹងទទួលបានលុយពីប្រទេសអូស្ត្រាលី ជាថ្នូរនឹងការទទួលយកជនភៀសខ្លួន៖ «ការដែលមន្ត្រីនាំពាក្យក្រសួងការបរទេសដែលអះអាងថា រដ្ឋាភិបាលកម្ពុជា មិនទទួលបានជំនួយពីអូស្ត្រាលីជាថ្នូរនៃការទទួលយកជនភៀសខ្លួនពីប្រទេសអូស្ត្រាលី គឺមិនមែនជាការពិតទេ។ គាត់ចង់បង្ហាញថា កិច្ចសហប្រតិបត្តិការមិនអាចទិញបានទេ ប៉ុន្តែបទពិសោធន៍បង្ហាញថា លុយបានដើរតួនាទីសំខាន់ក្នុងរដ្ឋាភិបាលនេះ ហើយប្រសិនបើមានលុយនោះ រដ្ឋាភិបាលនឹងងាកទៅរកហើយ ដោយមិនបានគិតថា សំណើនោះល្អឬអាក្រក់ឡើយ»។
ទោះបីជាយ៉ាងណាក៏ដោយ លោក កុយ គួង អះអាងថា កម្ពុជានឹងមានការទទួលខុសត្រូវចំពោះជនភៀសខ្លួន។ លោកបដិសេធការលើកឡើងរបស់មន្ត្រីអង្គការសិទ្ធិមនុស្សដែលចោទថា កម្ពុជាទទួលបានផលប្រយោជន៍សេដ្ឋកិច្ចជាថ្នូរនឹងជនភៀសខ្លួន។
សារព័ត៌មាន The Sydney Morning Herald កាលពីថ្ងៃអង្គារ ទី៣ មិថុនា ក៏ដកស្រង់សម្ដីជនភៀសខ្លួនម្នាក់ដែលកំពុងជាប់ឃុំនៅប្រទេសណាវរ៉ូ ថា ជនភៀសខ្លួនស្វែងរកកិច្ចការពារពីរដ្ឋាភិបាលអូស្ត្រាលី មិនមែនទៅរស់នៅប្រទេសកម្ពុជាឡើយ។ ជនភៀសខ្លួនរូបនោះបន្តទៀតថា កម្ពុជាជាប្រទេសមិនទាន់អភិវឌ្ឍន៍ និងក្រីក្រថែមទៀត។ ប្រទេសនេះមិនអាចថែរក្សាជនភៀសខ្លួនបានឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។