រដ្ឋមន្ត្រីការបរទេសអូស្ត្រាលី អ្នកស្រី ផេនី វ៉ង់ (Penny Wong) ចូលរួមសម្ពោធទីតាំងថ្មីនៃមជ្ឈមណ្ឌលអូស្ត្រាលីសំរាប់ការបណ្តុះបណ្តាលភាសាអង់គ្លេស (ACE) នៅសាខាចាក់អង្រែក្រោម ដោយមានការចូលរួមពីរដ្ឋមន្ត្រីក្រសួងអប់រំ លោក ហង់ ជួន ណារ៉ុន កាលពីថ្ងៃទី៤ ខែសីហា។
ថ្លែងក្នុងពិធីសម្ពោធទីតាំងថ្មីនេះ អ្នកស្រី ផេនី វ៉ង់ គូសបញ្ជាក់ថា សាលាបណ្តុះបណ្តាលភាសាអង់គ្លេស (ACE) គឺជាផ្នែកមួយនៃមោទនភាពរបស់អូស្ត្រាលី នៅប្រទេសកម្ពុជា និងបានចូលរួមចំណែកអភិវឌ្ឍវិស័យអប់រំនិងភាសា ព្រមទាំងបង្កើតនិងថែរក្សានាយកដ្ឋាន (ដេប៉ាតឺម៉ង់) ភាសាអង់គ្លេស នៅសកលវិទ្យាល័យភូមិន្ទភ្នំពេញ ក្នុងទសវត្សរ៍ឆ្នាំ១៩៨០ និង១៩៩០។
អ្នកស្រី ផេនី វ៉ង់ (Penny Wong) បន្តថា មជ្ឈមណ្ឌលអូស្ត្រាលីសំរាប់ការបណ្តុះបណ្តាលភាសាអង់គ្លេស (ACE) បង្កើតឡើងកាលពី៣០ឆ្នាំមុន ដើម្បីឆ្លើយតបទៅនឹងតម្រូវការបណ្តុះបណ្តាលភាសា របស់អាជ្ញាធរបណ្ដោះអាសន្ននៃអង្គការសហប្រជាជាតិនៅកម្ពុជា (UNTAC)។
រហូតមកដល់ពេលនេះ មជ្ឈមណ្ឌល ACE បានកើនឡើងដល់ចំនួន៦ទីតាំងហើយ និងបានបណ្តុះបណ្តាលសិស្ស ចាប់ពីអាយុ៧ឆ្នាំឡើងទៅ បានជាង ៨ម៉ឺននាក់ (៨០.០០០) ក្នុងមួយឆ្នាំៗ។ អ្នកស្រីថា ពលរដ្ឋខ្មែរចំនួន៥សែននាក់ (៥០០.០០០) បានសិក្សានៅសាលាភាសាអង់គ្លេស (ACE) នេះ ដោយបានប្រើប្រាស់ជំនាញរបស់ពួកគេ ដើម្បីបន្តការសិក្សាថ្នាក់ឧត្ដមសិក្សា នៅប្រទេសអូស្ត្រាលី និងទទួលបានការងារល្អប្រសើរ ព្រមទាំងការបើកអាជីវកម្មថ្មីជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។