សមត្ថកិច្ច​បង្ក្រាប​ជនជាតិ​ចិន ១១នាក់​ពាក់ព័ន្ធ​ផលិត​គ្រឿងញៀន​ជិត ២តោន និង​នាំ​សារធាតុ​គីមី​ផ្សំ​ជាង ៣០០តោន

ដោយ ជី វិតា
2022.07.13
Share on WhatsApp
Share on WhatsApp
សមត្ថកិច្ច​បង្ក្រាប​ជនជាតិ​ចិន ១១នាក់​ពាក់ព័ន្ធ​ផលិត​គ្រឿងញៀន​ជិត ២តោន និង​នាំ​សារធាតុ​គីមី​ផ្សំ​ជាង ៣០០តោន ​ក្រុម​ឧក្រិដ្ឋជន​ជនជាតិ​ចិន​ចំនួន ១១នាក់ ដែល​អាជ្ញាធរ​ប្រឆាំង​បទល្មើស​គ្រឿងញៀន​​ចាប់​បាន ពេល​បង្ក្រាប​គ្រឿងញៀន នៅ​ទីតាំង​មួយ​ចំនួន។
រូប៖ ហ្វេសប៊ុកអគ្គស្នងការដ្ឋាននគរបាលជាតិ 2022-07-13

អាជ្ញាធរ​ប្រឆាំង​បទល្មើស​គ្រឿងញៀន​បន្ត​បង្ក្រាប​បាន​ក្រុម​ឧក្រិដ្ឋជន​ជនជាតិ​ចិន​ចំនួន ១១នាក់​បន្ថែម​ទៀត និង​បាន​រឹបអូស​គ្រឿងញៀន ដែល​ក្រុម​ឧក្រិដ្ឋជន​ផលិត​សម្រេច​បាន​ជិត ២តោន និង​សារធាតុ​គីមី​ផ្សំ​ជា​គ្រឿងញៀន ២៧៦តោន​ព្រម​ទាំង​រក​ឃើញ​ទីតាំង​ផ្ទុក​សារធាតុ​ញៀន​នៅ​តាម​បណ្ដា​ខេត្ត​មួយ​ចំនួន។ មន្ត្រី​សង្គម​ស៊ីវិល លើក​ឡើង​ថា រំហូរ​គ្រឿងញៀន​បាន​បន្ត​កើន​ឡើង​យ៉ាង​គំហុក​តាម​រយៈ​ជនជាតិ​ចិន​បើក​រោងចក្រ​ផលិត​កែច្នៃ។

អាជ្ញាធរ​ប្រឆាំង​បទល្មើស​គ្រឿងញៀន សហការ​ជាមួយ​សមត្ថកិច្ច​ចម្រុះ​រាជធានី​ភ្នំពេញ ខេត្តស្វាយរៀង ព្រៃវែង និង​ខេត្កកណ្តាល បន្ត​បង្ក្រាប​បាន​ក្រុម​ឧក្រិដ្ឋជន​ចិន​សរុប​ចំនួន ១១នាក់ ដែល​ពួក​គេ​បាន​លួច​សម្ងំ​បើក​រោងចក្រ​ផលិត​គ្រឿងញៀន​ទ្រង់ទ្រាយ​ធំ​នៅ​កម្ពុជា។ សមត្ថកិច្ច​ឱ្យ​ដឹង​ថា ក្រុម​ឧក្រិដ្ឋជន​គ្រឿងញៀន​ទាំង ១១នាក់​នោះ ត្រូវ​បាន​កម្លាំង​សមត្ថកិច្ច​ចុះ​បង្ក្រាប​បាន​នៅ​ចំណុច​ទីតាំង​ផ្សេង​គ្នា។

គេហទំព័រ​អគ្គស្នងការដ្ឋាន​នគរបាល​ជាតិ​នៅ​ថ្ងៃ​ទី១៣ ខែកក្កដា បង្ហាញ​ថា ការ​បង្ក្រាប​ទីតាំង​រោងចក្រ​ផលិត​គ្រឿងញៀន​ចំនួន ៧ទីតាំងខុសៗគ្នារបស់ក្រុមឧក្រិដ្ឋជនចិន ទាំង​នោះ​សមត្ថកិច្ច​ជំនាញ បាន​បើក​ការ​ស៊ើបអង្កេត​អស់​រយៈ​ពេល​ជាង ៣ខែ​មក​ហើយ។ សមត្ថកិច្ច​បញ្ជាក់​ថា កន្លែង រោងចក្រ​ផលិត​គ្រឿងញៀន និង​ទីតាំង​ឃ្លាំង​សម្រាប់​ផ្ទុក​សារធាតុ​គីមី​ផ្សំ​គ្រឿងញៀន​ទាំង​នោះ មាន​ដូច​ជា ស្ថិត​នៅ​រាជធានី​ភ្នំពេញ​ចំនួន ២ទីតាំង ខេត្តកណ្តាល២ទីតាំង ខេត្តស្វាយរៀង ២ទីតាំង ខេត្តព្រៃវែង​មួយ​ទីតាំង។ គ្រឿងញៀន ដែល​សមត្ថកិច្ច​រឹបអូស​បាន​ជា​ប្រភេទ​កេតាមីន (Ketamine) ជិត ២តោន សារធាតុ​គីមី​ផ្សំ​ជា​គ្រឿងញៀន ២៧៦តោន និង​ឧបករណ៍ សម្ភារគ្រឿងបន្លាស់​សម្រាប់ កែច្នៃ ផលិត គ្រឿងញៀន​មួយ​ចំនួន​ធំ ព្រមទាំង​លិខិត​កាន់កាប់ អចលនទ្រព្យ ចំនួន ៧កន្លែង ដែល​ជា​ទីតាំង​សម្រាប់​ផលិត​គ្រឿងញៀន​របស់​ក្រុម​ឧក្រិដ្ឋជន។​ សមត្ថកិច្ច​អះអាង​ថា ជនជាតិ​ចិន​ទាំង ១១នាក់​នោះ សមត្ថកិច្ច​បាន​កសាង​សំណុំរឿង​បញ្ជូន​ទៅ​សាលាដំបូង​រាជធានី​ភ្នំពេញ​តាម​នីតិវិធី​រួចរាល់​ហើយ។

អគ្គ​ស្នងការ​រង​នគរបាល​ជាតិ​ទទួលបន្ទុក​ប្រឆាំង​បទល្មើស​គ្រឿងញៀន លោក ម៉ក់ ជីតូ ​ប្រាប់​វិទ្យុ​អាស៊ីសេរី​ថា ឧក្រិដ្ឋជន​ទាំង ១១នាក់​នោះ បាន​ដឹក​ជញ្ជូន​ល្បាយ​សារធាតុ​គីមី​ផ្សំ​គ្រឿងញៀន និង​គ្រឿង​ម៉ាស៊ីន​ប្រតិកម្ម ចូល​កម្ពុជា​ឆ្លង​កាត់​សមុទ្រ​វៀតណាម ចូល​តាម​ច្រក​កំពង់ផែ​ក្រុងភ្នំពេញ​តាំង​ពី​ថ្ងៃ​ទី៧ ខែមេសា។ លោក​ថា បន្ទាប់មក ក្រុម​ឧក្រិដ្ឋជន​ទាំង​នោះ ចាប់​ផ្ដើម​បែងចែក​ស្តុក​សារធាតុ​គីមី​ផ្សំ ទៅ​តាម​ឃ្លាំង​ផលិត​របស់​ពួក​គេ​តាម​ដំណាក់​កាល​នីមួយៗ។ លោក​អះអាង​ថា ការណ៍​ដែល​ជនជាតិ​ចិន​ទាំង​នោះ អាច​នាំ​សារធាតុ​គីមី​ផ្សំ​ចូល​កម្ពុជា​បាន​ជា​បន្ត​បន្ទាប់​នេះ ដោយសារ​តែ​ពួក​គេ​បន្លំ​សារធាតុ​គីមី​ផ្សំ​ទាំង​នោះ​ដាក់​ក្នុង​ចំណោម​សារធាតុ​គីមី ដែល​ប្រើប្រាស់​ក្នុង​វិស័យ​ឧស្សាហកម្ម៖ «វា​បន្លំ​ដាក់​ចូល​មក​ វា​ដាក់​កុងទឺន័រ ​មក​ឧទាហរណ៍​ថា ជា​អាស៊ីដ​ស្អី​អ៊ីចឹង​ដែល​ក្រៅ​ពី​បញ្ជី​ ព្រោះ​ធម្មតា​សារជាតិ​គីមី​វា​មាន​នៅ​ក្នុង​តារាង​បួន​ ដែល​យើង​ហាម​ប្រាម។ អ៊ីចឹង ​វា​ដាក់​មក​ដឹកជញ្ជូន​មក​បាន​ន័យ​ថា​មិនមែន​សារជាតិ​គីមី​ហ្នឹង​ទេ។ ដូច​ថា​សារជាតិ​គីមី​ផ្សេង​ដែល​យើង​អត់​ហាម​ហើយ​វា​បន្លំ​យក​ទៅ​រៀប​ចំ​ធ្វើ​ល្បាយ។ ល្បាយ​ហ្នឹង​គេ​ហៅថា​ល្បាយ​កេតាមីន (Ketamine) ឬ​ក៏​គេ​ហៅ​ថា កេតាមីន​បាស់ (Ketamine) គោលដៅ​របស់​ពួក​ឧក្រិដ្ឋជន​ហ្នឹង​ គឺ​នាំ​ទៅ​តៃវ៉ាន់ ​អូស្តា្រលី។ ធម្មតា​វា​ចង់​មិនមែន​ចង់​ឥឡូវ​ទេ​គឺ​ចង់​យូរ​ហើយ។ វា​ចង់​យក​កម្ពុជា​ធ្វើ​កន្លែង​ផលិត​ ប៉ុន្តែ​ឧបាយកល​វា​យើង​វាយ​បំបាក់​រហូត»

លោក ម៉ក់ ជីតូ ឱ្យ​ដឹង​ទៀត​ថា ក្រុម​ឧក្រិដ្ឋជន​គ្រឿងញៀន​ជនជាតិ​ចិន ដែល​ពាក់ព័ន្ធ​នឹង​ករណី​នេះ អាច​មាន​ចំនួន​ច្រើន​នាក់​ទៀត ដែល​កំពុង​ព្យាយាម​រត់​គេច​ខ្លួន​ចេញ​ពី​កម្ពុជា និង​មាន​មួយ​ចំនួន​ទៀត​បាន​រត់​គេច​ខ្លួន​ទៅ​ក្រៅ​ប្រទេស។ ប៉ុន្តែ លោក​អះអាង​ទៀត​ថា ករណី​ឧក្រិដ្ឋកម្ម​គ្រឿងញៀន​ទ្រង់ទ្រាយ​ធំៗ នា​រយៈ​ពេល​ចុង​ក្រោយ​នេះ សមត្ថកិច្ច​មិន​មាន​តម្រុយ​ណា​មួយ ដែល​ជាប់​ពាក់ព័ន្ធ​នឹង​មន្ត្រី​អាជ្ញាធរ និង​អ្នក​មាន​អំណាច​ណា​មួយ​នៅ​ពី​ក្រោយ​ខ្នង​នោះ​ទេ។

ទោះ​ជា​យ៉ាង​ណា​ក្ដី ក្រុម​មន្ត្រី​សង្គម​ស៊ីវិល​ព្រួយ​បារម្ភ និង​សង្ស័យ​ថា ដំណើរ​នៃ​ការ​នាំ​ចូល​សារធាតុ​ញៀន​រាប់​រយ​តោន​នេះ បើ​គ្មាន​អ្នក​មាន​អំណាច ឬ​មន្រ្តី​អាជ្ញាធរ​ជួយ​សម្របសម្រួល គឺ​ក្រុម​ឧក្រិដ្ឋជន​ទាំង​នោះ​មិន​អាច​ប្រព្រឹត្ត​ទៅ​បាន​ឡើយ។

នាយក​ទទួល​បន្ទុក​កិច្ចការ​ទូទៅ​នៃ​អង្គការ​សិទ្ធិមនុស្ស​លីកាដូ (LICAHDO) លោក អំ សំអាត​ ជំរុញ​ដល់​អាជ្ញាធរ​ជំនាញ​ឱ្យ​បើក​ការ​ស៊ើប​អង្កេត​ដោយ​តម្លាភាព និង​បង្ហាញ​ការ​អនុវត្ត​ត្រឹមត្រូវ​តាម​នីតិវិធី​ច្បាប់​លើ​ក្រុម​ឧក្រិដ្ឋជន​ទាំង​នេះ។ លើស​ពី​នេះ លោក​ថា ទីតាំង​ផលិត​គ្រឿងញៀន ដែល​សមត្ថកិច្ច​បង្ក្រាប​បាន ត្រូវ​ឱ្យ​សមត្ថកិច្ច​ជំនាញ​ចុះ​ស្រាវជ្រាវ​ឱ្យ​បាន​ម៉ត់ចត់ ដើម្បី​ចាប់​អ្នក​ពាក់ព័ន្ធ និង​មេ​ខ្លោង​ធំៗ នៅ​ពី​ក្រោយ។

លោកសង្កត់ធ្ងន់ថា បើ​បញ្ហា​គ្រឿងញៀន​នៅ​តែ​បន្ត​រាតត្បាត​នៅ​កម្ពុជា​ដូច​សព្វថ្ងៃ​នេះ នឹង​ប៉ះពាល់​ដល់​សន្តិសុខ​ជាតិ​កាន់​តែ​ខ្លាំង ជា​ពិសេស វា​នឹង​បំផ្លាញ​ធនធាន​យុវជន ដែល​ជា​សសរ​ទ្រូង​សម្រាប់​អភិវឌ្ឍន៍​ប្រទេស​ជាតិ​នា​ថ្ងៃ​អនាគត៖ «ហើយ​ប្រសិន​ជា​ មាន​រោងចក្រ​ផលិត​ណា ដែល​វា​មាន​ទីតាំង​សង្ស័យ ​ហើយ​ខុសច្បាប់​ អា​ហ្នឹង​ចាត់​វិធាន​ការ​តាម​ផ្លូវ​ច្បាប់​ ដើម្បី​បង្ក្រាប​នូវ​ការ​ទប់​ស្កាត់​ជា​មុន។ អា​ហ្នឹង​វា​ជា​រឿង​ល្អ។ យើង​ឃើញ​មាន​ការ​ឆក​ល្វែង​ នៅ​ខ្វះ​ចន្លោះ​អាជ្ញាធរ​ដែល​ពាក់ព័ន្ធ​មាន​ការ​បង្ក្រាប។ ប៉ុន្តែ​ការ​ត្រួត​ពិនិត្យ​ និង​អធិការកិច្ច​ទៅ​លើ​រោងចក្រ​សហគ្រាស ​ដែល​សង្ស័យ​ហ្នឹង​ គឺជា​រឿង​មួយ​ដែល​ត្រូវ​ពង្រឹង​ឡើងវិញ​ ដើម្បី​ធ្វើ​ការ​ត្រួត​ពិនិត្យ​ នូវ​រោងចក្រ​សហគ្រាស​ណា ​ដែល​មាន​ការ​សង្ស័យ​ ហើយ​ចាត់​វិធាន​ការ​តាម​ផ្លូវច្បាប់​ឱ្យ​បាន​រឹងមាំ​ទោះបីជា​អ្នក​ហ្នឹង​មាន​ខ្នង​បង្អែក​ប៉ុណ្ណា​ក៏​ដោយ​ត្រូវ​តែ​ចាត់​វិធាន​ការ​ទាំង​អស់»

ជាមួយ​គ្នា​នេះ​ដែរ ប្រធាន​មជ្ឈមណ្ឌល​ប្រជា​ពលរដ្ឋ​ដើម្បី​អភិវឌ្ឍន៍ និង​សន្តិភាព (PDP-Center) លោក យង់ គិម​អេង យល់​ថា ការ​បណ្ដែតបណ្ដោយ ឬ​ធ្វេសប្រហែស​ឱ្យ​ជន​ជាតិ​ចិន បន្ត​បើក​រោងចក្រ​ផលិត​គ្រឿងញៀន​នៅ​កម្ពុជា​ឥត​ឈប់​ឈរ​បែប​នេះ គឺ​ជា​រឿង​អាម៉ាស់​មួយ​សម្រាប់​រដ្ឋាភិបាល។ ក្រៅ​ពី​នេះ លោក​មើល​ឃើញ​ថា ការ​ទប់ស្កាត់​បទល្មើស​គ្រឿង​នេះ​នៅ​តែ​គ្មាន​ប្រសិទ្ធភាព ដែល​លោក​ថា បណ្ដាល​មក​ពី​អំពើ​ពុករលួយ​របស់​មន្ត្រី​អាជ្ញាធរ៖ «បញ្ហា​មួយ​ទៀត​ យើង​ឃើញ​ថា​ ជនជាតិ​ចិន​ ផលិត​គ្រឿងញៀន​ ការ​ជួញដូរ​គ្រឿងញៀន​នៅ​កម្ពុជា​ យក​កម្ពុជា​ ជា​កន្លែង​ផលិត​កន្លែង​ ជួញដូរ​កន្លែង​ឆ្លង​កាត់​អី​ហូរហែ​ហ្នឹង​ជា​សោកនាដកម្ម​មួយ​ដ៏​ធំ​សម្រាប់​ប្រទេស​កម្ពុជា។ គួរតែ​មាន​ការ​ប្រុងប្រយ័ត្ន​ដែរ​សម្រាប់​ពួក​ជនជាតិ​ចិន​បើក​អាជីវកម្ម​ផ្សេងៗ អាច​ផលិត​សង្ស័យ​គ្រឿងញៀន​ហ្នឹង​គួរតែ​មាន​ការ​ត្រួត​ពិនិត្យ​ឱ្យ​បាន​ច្បាស់លាស់​ដែរ»

មន្ត្រី​សង្គម​ស៊ីវិល​លើក​ឡើង​ថា កម្ពុជា​នា​រយៈ​ពេល​ចុង​ក្រោយ​នេះ កំពុង​រង​ការ​ញាំញី​យ៉ាង​ខ្លាំង​ពី​រំហូរ​គ្រឿងញៀន​ដ៏​ច្រើន​សន្ធឹកសន្ធាប់​តាម​រយៈ​ក្រុម​ឧក្រិដ្ឋជន​ជនជាតិ​ចិន ដែល​បន្ត​បើក​រោងចក្រ​ផលិត​គ្រឿងញៀន​ជា​បន្ត​បន្ទាប់។ ពួកគាត់ ជំរុញ​ដល់​អាជ្ញាធរ​អនុវត្ត​ច្បាប់​ឱ្យ​មាន​ប្រសិទ្ធ ដោយ​បន្ត​ស៊ើបអង្កេត​រក​មន្ត្រី​អាជ្ញាធរ និង​អ្នក​មាន​អំណាច ដែល​បាន​ឃុបឃិត​គ្នា​ជាមួយ​ក្រុម​ឧក្រិដ្ឋជន។ មន្រ្តី​សង្គម​ស៊ីវិល ព្រួយ​បារម្ភ​ថា បើ​អាជ្ញាធរ​គ្មាន​ចំណាត់​ច្បាស់លាស់​ក្នុង​ការ​ស្រាវជ្រាវ​រក​មេ​ខ្លោង​ធំៗ ទាំង​នោះ​ទេ រំហូរ​គ្រឿងញៀន​នឹង​មិន​អាច​ទប់​ស្កាត់​បាន​ឡើយ ដែល​ជា​ហេតុ​នាំ​ឱ្យ​សង្គម​ជាតិ​ទាំង​មូល​នឹង​កាន់តែ​មាន​ភាព​អនាធិបតេយ្យ និង​វិបត្តិ​សង្គម​កាន់​តែ​ធ្ងន់ធ្ងរ៕



កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។