កម្មករបដិសេធ​​ការ​​​ស្នាក់​​​នៅ​​ក្នុង​​រោងចក្រ​​ដោយ​សា​រ​​គ្មាន​​​ការ​​យក​​ចិត្ត​​ទុក​​ដាក់​​ខណៈ​​រោង​​ចក្រ​​កាន់​​​តែ​​​ច្រើន​​ត្រូវ​​ផ្អាក​​ដំណើរ​ការ​​

ដោយ ម៉ៅ សុធានី
2021-05-02
Share
កម្មករបដិសេធ​​ការ​​​ស្នាក់​​​នៅ​​ក្នុង​​រោងចក្រ​​ដោយ​សា​រ​​គ្មាន​​​ការ​​យក​​ចិត្ត​​ទុក​​ដាក់​​ខណៈ​​រោង​​ចក្រ​​កាន់​​​តែ​​​ច្រើន​​ត្រូវ​​ផ្អាក​​ដំណើរ​ការ​​ កម្មករកម្មការិនីខេត្តកំពង់ឆ្នាំងដែលត្រូវបានរាំងខ្ទប់មិនឱ្យធ្វើដំណើរឆ្លងចូលខេត្តពោធិ៍សាត់កាលពីថ្ងៃទី០១ ខែឧសភា ឆ្នាំ២០២១។
រូប៖ ហ្វេសប៊ុក

ក្នុង​ពេល​ស្ថានភាព​​ការ​ឆ្លង​រាតត្បាត​​ជំងឺ​កូវីដ​១៩ ​(Covid-19) នៅ​តាម​រោងចក្រ​មាន​សភាព​​កាន់​តែ​ច្រើន​ឡើង ថៅកែ​រោងចក្រ​ខ្លះបាន​​សម្រេច​ចិត្ត​រៀបចំ​​បន្ទប់ ឬ​ កន្លែង​ស្នាក់នៅ​ក្នុង​រោងចក្រ ឲ្យ​កម្មករ​ស្នាក់នៅ​បណ្ដោះ​អាសន្ន។

ជាមួយ​គ្នា​នេះ មន្ទីរ​ការងារ និង​បណ្ដុះ​បណ្ដាល​វិជ្ជា​ជីវៈ​ខេត្ត​ពោធិ៍សាត់កាល​ពី​ថ្ងៃ​ទី​២៨ ខែមេសា​ បាន​ចេញ​លិខិត​ណែនាំ​​ឱ្យ​កម្មករ​កម្មការិនី​របស់​រោងចក្រ តៃ​អ៊ីហ្ស៊ី (អត់​ស្គាល់​ឡាតាំង) ដែល​ធ្វើ​ដំណើរ​​ ចល័ត​​​​មក​ពី​ខេត្ត​កំពង់ឆ្នាំងជិត​បួន​រយ (៣៩៦) ​នាក់ ត្រូវ​ស្នាក់​នៅ​បន្ទប់​ជួល ដោយ​ឥត​គិត​ថ្លៃ រៀប​ចំ​ដោយ​ភាគី​រោង​ចក្រ។

អាជ្ញាធរ​ បញ្ជាក់ថា ការ​តម្រូវ​​នេះ គឺ​ដើម្បី​បញ្ចៀស​ការ​ធ្វើ​ដំណើរ​ទៅ​មក​តាម​យានយន្ត​​​រួម និង​ជា​ការ​ចូលរួម​ទប់ស្កាត់​ការ​រាល​ដាល​ជំងឺ​កូវីដ-១៩។​ ក្នុង​ករណី​ កម្មករ​​​មិន​ព្រម​ស្នាក់​នៅ​ក្នុង​បរិវេណ​រោងចក្រ​តាម​ការ​រៀបចំ ឬ​ផ្ទះ​បងប្អូន​ ដែល​​នៅជិត​រោងចក្រ​ទេ ​​ខាង​រោងចក្រ​ ​នឹង​ផ្អាក​ការងារ​​កម្មករ​ទាំង​នោះ​ ហើយ​កម្មករ​​ មិន​អាច​ទទួល​បាន​ផល​ប្រយោជន៍​ពី​​ថៅកែ​រោងចក្រ​ឡើយ។

ប៉ុន្តែ​កម្មករ​រស់​នៅ​ខេត្ត​កំពង់ឆ្នាំងជាច្រើន មិន​ពេញ​ចិត្ត​ នឹង​ការ​តម្រូវ​នេះ​ទេ ហើយ​ពួកគាត់ សុខ​ចិត្ត​លា​ឈប់​ពី​ការងារ ដើម្បី​បាន​រស់​នៅ​ជួបជុំ​ក្រុម​គ្រួសារ ក្នុង​ស្រុក​កំណើត។

កម្មការិនី​ម្នាក់រស់​នៅ​ស្រុក​បរិបូរណ៍ខេត្ត​កំពង់ឆ្នាំង​លោកស្រី ផល ចាន់រ៉ុង បាន​ដាក់​ពាក្យ​លាឈប់ពី​ការងារ ក្រោយ​ពេល​មាន​ការ​តម្រូវ​ឲ្យ​​កម្មករ​ស្នាក់​នៅ​ក្នុង​រោងចក្រ។ លោកស្រីប្រាប់​អាស៊ី​សេរីថា លោកស្រី មាន​កូន​តូច​៤នាក់ និង​ម្ដាយ​ចាស់​ជរា​ម្នាក់​នៅ​ផ្ទះ ដូច្នេះ លោកស្រី​មិន​អាច​ស្នាក់នៅ​ក្នុង​រោងចក្រ តាម​ការ​តម្រូវ​បាន​ទេ។

Worker_in_Kampong_Chnang_01_05_2021_01.jpg
កម្មករដែលរាំងខ្ទប់មិនឱ្យធ្វើដំណើរពីខេត្តកំពង់ឆ្នាំងទៅធ្វើការនៅក្នុងខេត្តពោធិ៍សាត់ស្នើសុំឱ្យថៅកែរោងចក្រផ្អាកការងារមួយខែសិន ព្រោះបារម្ភពីការឆ្លងជំងឺកូវីដ១៩។

ម្យ៉ាង​ទៀតលោកស្រី ​អះអាង​ថា ការ​ស្នាក់នៅ​ក្នុង​រោងចក្រ មិន​មាន​លក្ខណៈ​ល្អ​ប្រសើរ​ទេ ព្រោះ​ថៅកែ បាន​ដាក់​​ឲ្យ​កម្មករស្នាក់នៅ​តាម​បន្ទប់​តូច​ចង្អៀត​ រស់​នៅ​ប្រជ្រៀត​គ្នាច្រើន​នាក់ក្នុង​មួយ​បន្ទប់ និង​គ្មាន​បណ្ដាញ​ទឹក​ភ្លើង ប្រើ​ប្រាស់​ត្រឹមត្រូវ​ទេ​។ លោកស្រីឲ្យ​ដឹង​ថា កម្មករ​ភាគច្រើន បាន​ដាក់​ពាក្យ​លាឈប់ តែ​ខាង​រដ្ឋបាល​បដិសេធពាក្យ​លាឈប់​នេះ៖ «នៅ​ម្ដេច​កើត ម្ដាយ​ក៏​ចាស់ ប្ដី​ក៏​ជាប់​គុក​ផង ហើយ​កូន​តូចៗឲ្យ​រញង់ នៅ​អត់​កើត​ទេ។ អ៊ីចឹង​ ​មាន​ជម្រើស​មួយ គឺ​កុំ​ឲ្យ​ពាក់ព័ន្ធ​ជាមួយ​គេ ក៏​ដាក់​ក្រដាស​សុំ​លា​ឈប់។ តែ​ដល់​ពេលគេ​អត់​ឲ្យ​ឈប់​ មិន​ដឹង​​ធ្វើ​ម្ដេច? ​ឲ្យ​តែ​ជុំ​កូន កុំ​ឲ្យ​បែក​កូន។ បើ​គេ​បិទ គេ​បិទ​៣​ខែ។ តែ​មិន​ដឹង​គេ​បិទ​ប៉ុន្មាន ចុះ​បើ​ដូច​ភ្នំពេញ​ទៅ។ ពួក​ខ្ញុំ បែក​ម៉ែ បែក​កូន បាន​នរណា​មើល​កូន។ គេ​មិន​ឲ្យ​យើង​នៅ​ទេ។ អ្នក​និយាយ​ចេះ​តែ​និយាយ​ស្រួល​ហើយ។ គេ​អ្នក​ទៅ​នៅ​មុន ប្អូនៗ​ខ្ញុំ ជិះ​ឡាន​​ជាមួយ​ខ្ញុំ​ថា ទៅ​នៅ​ផ្ទះ​ជួល​គេ​រៀបចំ​ឲ្យ​ ដល់​ពេល​ទៅ​ ទឹក​ក៏​មិន​មាន​ប្រើ​គ្រប់គ្រាន់​ ហើយ​ផ្ទះ​ជួល ក៏​ចង្អៀត។ ទៅ​នៅ​តាម​ភូមិ ក៏​​គេ​​ឲ្យ​យើង​បញ្ជាក់​តាម​ភូមិ​ឃុំ ស្រុក​គេ។ យើង​មិន​មែន​ចេះ​ទៅ​នៅឯណា​ស្រួលៗ»។​​​​

កម្មការិនីរស់​នៅ​ខេត្ត​កំពង់ឆ្នាំង​ម្នាក់​ទៀត គឺ​លោកស្រី ស៊ុម សុភាព ក៏​បដិសេធ​ការ​ស្នាក់​នៅ​ក្នុង​រោងចក្រ​ដែរ ដោយសារ​មូលហេតុ​ប្រហាក់​ប្រហែល​គ្នា​ដែរ​។ កម្មការិនី​រូប​នេះ គ្មាន​កូន​តូច​ក្នុង​បន្ទុក​ទេ ប៉ុន្តែលោកស្រីយល់​ថា ការ​ស្នាក់នៅ​បន្ទប់​តូច​ចង្អៀត​ក្នុង​រោងចក្រ គឺ​គ្មាន​សុវត្ថិភាព​ដូច​គ្នា។ ដូច្នេះលោកស្រី សុខ​ចិត្ត​ប្រឈម​ការ​ធ្វើ​ដំណើរ​ទៅ​ធ្វើការ​ ព្រឹក​ល្ងាច​ដដែល បើ​ពុំ​ដូច្នេះ​ទេលោកស្រី សុខ​ចិត្ត​លាឈប់ ដើម្បីបាន​រស់​នៅ​ជួបជុំ​ក្រុម​គ្រួសារ​វិញ៖ «ព្រោះ​អ្វី​នៅ​រោងចក្រ ក៏​ដូច​តែ​គ្នា។ ពេល​ខ្លះ​នៅ​រោងចក្រ​ពិបាក​ជាង​​​ជិះ​ឡាន​ទៀត។ ពេល​ចេញ​​មក ដល់​ម៉ោង​ចេញ​ហូប​បាយ ឬ​ម៉ោង​ចេញ​ទៅ​ផ្ទះ​អ្វី​ដើរ​ប្រជ្រៀត​គ្នា ហើយ​អត់​មាន​ជួរ​អ្វី​​តម្រង់​​ទេ ដើរ​ប្រជ្រៀត​គ្នា​យក​បណ្ដោយ ហើយ​កម្មករ​រាប់​ម៉ឺន​នាក់ មក​ជួប​គ្នា​នៅ​ឯ​ហ្នឹង ហើយ​បើ​ឲ្យ​កម្មករ​ទៅ​នៅ​​ផ្ទះ​ជួល ក៏​ដូច​គ្នា។ បន្ទប់​មួយ មិន​មែន​ឲ្យ​នៅ​ម្នាក់ ឬ​២នាក់​ឯណា។ ៣ ទៅ​៤​នាក់ ទៅ​៥​នាក់​»។

នៅ​ព្រឹក​ថ្ងៃ​ទី​០១ ខែឧសភា អាជ្ញាធរ​ខេត្ត​ពោធិ៍សាត់ ​ បាន​​​រារាំង​រថយន្ត​ដឹក​កម្មករ​​រោង​ចក្រ​តៃអ៊ីហ្ស៊ី ច្រើន​គ្រឿង​ ​នៅ​​ចំណុច​ព្រំ​ប្រទល់​ខេត្ត​កំពង់ឆ្នាំង និង​ខេត្ត​ពោធិ៍សាត់ ​មិន​ឱ្យ​ធ្វើ​ដំណើរ​ឆ្លង​ខេត្ត ក្នុង​ហេតុផល​ ​ទប់ស្កាត់​ការ​រាល​ដាល​ជំងឺ​កូវីដ-១៩​។ ក្រោយ​ការ​រារាំង​នេះ​ កម្មករ​ច្រើន​ឡាន បាន​ត្រលប់​មក​ផ្ទះ​វិញ នៅ​ខេត្ត​កំពង់ឆ្នាំង​។

កម្មករ​ឲ្យ​ដឹង​ថា ខាង​រោងចក្រ បាន​អនុញ្ញាត​ឲ្យ​ពួកគេ​ឈប់​សម្រាក​​ នៅ​ថ្ងៃ​ទី​០១ ខែឧសភា​ មួយ​ថ្ងៃ ដោយ​សារ ការ​ខកខាន​នេះ តែ​តម្រូវ​ឲ្យ​​កម្មករ​ទៅ​ធ្វើការ​សង​ ​នៅ​ថ្ងៃ​អាទិត្យ ទី​០២​ ឧសភា នេះ​វិញ។

Worker_in_Kampong_Chnang_01_05_2021_03.jpg
នៅ​ព្រឹក​ថ្ងៃ​ទី​០១ ឧសភា អាជ្ញាធរ​ខេត្ត​ពោធិ៍សាត់ ​ បាន​​​រារាំង​រថយន្ត​ដឹក​កម្មករ​​រោង​ចក្រ​តៃអ៊ីហ្ស៊ី ច្រើន​គ្រឿង​ ​មិន​ឱ្យ​ធ្វើ​ដំណើរ​ឆ្លង​ខេត្ត ក្នុង​ហេតុផល​ទប់ស្កាត់​ការ​រាល​ដាល​ជំងឺ​កូវីដ-១៩​។

ពាក់ព័ន្ធ​នឹង​ការ​រៀបចំ​ឲ្យ​កម្មករ​ស្នាក់នៅ​ក្នុង​រោងចក្រ​នេះ ប្រធាន​មន្ទីរ​ការងារ និង​បណ្ដុះ​​បណ្ដាល​វិជ្ជា​ជីវៈ​ខេត្ត​ពោធិ៍សាត់លោក កុល ប៊ុនធឿន ប្រាប់​អាស៊ី​សេរី យ៉ាង​ខ្លី​ថា ទីតាំង​ទាំង​អស់​នោះ​ ខាង​រោងចក្រ​ជា​អ្នក​រៀបចំ តែ​កម្មករ​ខ្លះបដិសេធ ដោយសារ​ជាប់​មើល​ថែ​កូន​តូច​នៅ​ផ្ទះ៖ «រោងចក្រ​បាន​រៀបចំ​ឲ្យ​កម្មករ​ស្នាក់​នៅ​ឯ​ហ្នឹង​។ តែ​មាន​កម្មករ​មួយ​ចំនួន គាត់​អត់​ព្រម​ស្នាក់​នៅ។ គាត់​សុំ​ចល័ត​ទៅ​មក ដោយសារ​គាត់​មាន​កូន​តូច​អ៊ីចឹង​ណា»។

អាស៊ី​សេរី មិន​អាច​សុំ​ការ​បញ្ជាក់​ពី​ខាង​ថៅកែរោងចក្រ​​ តៃអ៊ីហ្សី​ បាន​ទេ​​ នៅ​ថ្ងៃ​ដដែល​។ គិត​ត្រឹម​​ដើម​ខែ​ឧសភា​នេះ​ មិន​ទាន់​មាន​ករណី​ឆ្លង​ជំងឺ​កូវីដ​១៩ ក្នុង​រោងចក្រនៅ​ខេត្ត​ពោធិ៍សាត់​ទេ។ ប៉ុន្តែ មាន​ពលរដ្ឋ​​រស់​នៅ​ខេត្ត​ពោធិ៍សាត់ចំនួន​១៣​នាក់ ​ឆ្លង​ជំងឺ​កូវីដ​១៩។ ចំណែក​​ នៅ​ខាង​ខេត្ត​កំពង់ឆ្នាំង​វិញ មាន​ពលរដ្ឋ​​ និង​កម្មករ​រោងចក្រចំនួន​១៦​នាក់ បាន​ឆ្លង​ជំងឺ​កូវីដ​១៩។ តួលេខ​នេះ គិត​ត្រឹម​ចុង​ខែ​មេសា។

កម្មករ​​រោងចក្រ​ នៅ​តាម​ខេត្ត​ផ្សេង​ទៀត​​ក៏​កំពុង​ប្រឈម ការ​​ឆ្លង​ជំងឺ​កូវីដ​១៩​​ដែរ​។ នៅ​ថ្ងៃ​ទី​០១ ឧសភា​នេះ អាជ្ញាធរ​ខេត្ត​ព្រះសីហនុ បាន​ប្រកាស​​ឲ្យ​ផ្អាក​ដំណើរ​ការ​រោងចក្រ​មួយ​ចំនួន ក្នុង​តំបន់​សេដ្ឋកិច្ច​ពិសេស​ក្រុង​ព្រះសីហនុនៅ​ស្រុក​ព្រៃនប់មួយ​រយៈ​សិន ដោយសាររក​ឃើញ​កម្មករមាន​​ឆ្លង​ជំងឺ​កូវីដ​១៩ ជា​បន្ត​បន្ទាប់​។

កម្មករ​​ម្នាក់ ធ្វើ​ការ​​​​ក្នុង​រោងចក្រ​មួយនៃ​​ស្រុក​ព្រៃនប់​​​លោក ពេជ្រ ពិសិដ្ឋ ឲ្យ​ដឹង​ថា មាន​កម្មករ​ខ្លះ បាន​ដាក់​ពាក្យ​លាឈប់ ដោយសារ​ខ្លាច​ឆ្លង​ជំងឺ​។ ឯ​កម្មករ​ផ្សេង​ទៀត ស៊ូទ្រាំទៅ​ធ្វើការ​ទាំង​អារម្មណ៍​ភ័យ​ខ្លាច​ ព្រោះ​ជាប់​ជំពាក់​បំណុល​ធនាគារ​ច្រើន​។

កម្មករ​រូប​នេះបារម្ភ​ថា ការ​ឆ្លង​ជំងឺ​នេះ នឹង​កើត​ឡើង​ក្នុង​ពេល​​ធ្វើ​ដំណើរ​រួម​គ្នា​មក​ធ្វើការ​ ព្រោះ​កម្មករ​ នៅ​តែ​បន្ត​ឈរ​លើ​​ឡាន​រួម​គ្នា ទៅនិង​មក​ រោងចក្រ​​ដដែល។ លោក ពិសិដ្ឋ ស្នើសុំ​ឲ្យ​អាជ្ញាធរ រក​វិធី​កាត់​បន្ថយ​ហានិភ័យ​នេះ ឬ អាច​ផ្ដល់​ប្រាក់​ឧបត្ថម្ភ​ខ្លះ ហើយ​​អនុញ្ញាត​ឲ្យ​កម្មករ​ឈប់​សម្រាក​មួយ​រយៈ ​ដើម្បី​ចូលរួម​ទប់​ស្កាត់​ជំងឺ​កូវីដ​១៩​​៖ «ខ្ញុំ​គិត​ថា ​វា​ជា​វិបត្តិ​ទាំង​អស់​គ្នា​។ មិន​​មែន​តែ​វិបត្តិ​តែ​ក្រុមហ៊ុន ឬ​វិបត្តិ​តែ​កម្មករ​ទេ។ តែ​គេ​ឲ្យ​៥០​%​ ខ្ញុំ​គិត​ថា​ វា​ជា​រឿង​មួយ ដែល​ជួយ​ចែក​រំលែក​គ្នា​ហើយ ព្រោះ​អ្វី គាត់​ក៏​មាន​វិបត្តិ​ ខ្ញុំ​ក៏​មាន​វិបត្តិ។ នេះ​ជា​ទស្សនៈ​របស់​ខ្ញុំ​»។

អាស៊ី​សេរី មិន​អាច​សុំ​ការ​បញ្ជាក់​ពី​អ្នក​នាំ​ពាក្យ​ក្រសួង​ការងារ និង​បណ្ដុះ​បណ្ដាល​វិជ្ជា​ជីវៈលោក ហេង សួរ បាន​ទេ នៅ​ថ្ងៃ​ទី​០១ ខែឧសភា។ តែ​យ៉ាង​ណាលោក ហេង សួរ​ ​ធ្លាប់​បង្ហាញ​ក្ដី​រំពឹង​ថា កម្មករ​នឹង​មាន​សុវត្ថិភាព​ ក្រោយ​ពេល​បាន​ចាក់​វ៉ាក់សាំង​បង្ការ​ជំងឺ​កូវីដ​១៩ បាន​គ្រប់​គ្នា​រួច​រាល់។

អនុ​ប្រធាន​​សហព័ន្ធ​សហជីព​កម្ពុជាអ្នកស្រី ម៉ន ចាន់ណា គាំទ្រ​ចំពោះ​ការ​រៀបចំ​ទី​តាំង ដែល​មាន​លក្ខណៈ​ប្រសើរ​ឲ្យ​កម្មករ​ស្នាក់​នៅ​ក្នុង​រោងចក្រ។ ប៉ុន្តែ អ្នកស្រី ស្នើសុំ​ឲ្យ​ខាង​រោងចក្រ ត្រូវ​​អនុញ្ញាត​​ឲ្យ​កម្មករ ដែល​មាន​កូន​តូច និង​ម្ដាយ​ឪពុក​ចាស់​ជរា​ បាន​ត្រលប់​ទៅ​ស្នាក់​នៅ​តាម​ផ្ទះ​វិញ​។

សហជីព​រូប​នេះ ​ក៏​ជំរុញ​ឲ្យ​រដ្ឋាភិបាល​ និង​ថៅកែ ​​ឧបត្ថម្ភ​ប្រាក់ឲ្យ​កម្មករ​ខ្លះ ដើម្បី​ផ្អាក​ដំណើរ​ការ​រោងចក្រ​មួយ​រយៈ ​ក្នុង​គោល​បំណង​កាត់​បន្ថយ​ការ​ចម្លង​ជំងឺ​កូវីដ​១៩​ កាន់​​តែ​ច្រើន​ជាង​នេះ​ទៀត​៖ «រោងចក្រ​មួយ​ចំនួនគាត់​ធ្វើ​រួច​ហើយ​។ អ៊ីចឹង​ណា គឺ​​កម្មករ​ឈប់​ឲ្យ​កម្មករ​ឈប់​ចំនួន​១៤​ថ្ងៃ។ តែ​គាត់​ឲ្យ​ប្រាក់​ឈ្នួល​កម្មករ​ហ្នឹង ​៥០​%។ រោងចក្រ​ហ្នឹង​ក៏គួរ​តែ​ផ្ដល់​អា​អ៊ីចឹង​ដែរ។ ព្យួរ​ឈ្មោះ គាត់​ទៅ ហើយ​ផ្ដល់​ឲ្យ​៥០%​ទៅ​»។

គិត​ត្រឹម​ចុង​ខែ (២៨)​ មេសា មាន​រោងចក្រ សហគ្រាស ជាង​ពីរ​រយ (២៥៦)​ ហើយ​​ បាន​ផ្អាក​ដំណើរ​ការ​បណ្ដោះ​អាសន្ន ដោយសារកម្មករ​ឆ្លង​ជំងឺ​កូវីដ​១៩។ ​​ កម្មករ និង​ និយោជិត ជិត​ពីរ​ពាន់ (១.៦៦៣)​ នាក់ ធ្វើការ​នៅ​រោងចក្រ​ជាង​២០០ (២០៦) ​បាន​ឆ្លង​ជំងឺ​កូវីដ-១៩។ ចំណែក ​កម្មករ ​និយោជិត ​​រង​ផល​ប៉ះពាល់​ពី​វិបត្តិ​នេះ មាន​ជាង​មួយ​លាន (​​ប្រមាណ​១​លាន​២​សែន​) ​នាក់​៕

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល