អាជ្ញាធរក្រុងភ្នំពេញរាប់រយនាក់នៅតែបន្តរារាំងបំបែកក្រុមកូដករក្រុមហ៊ុនណាហ្គាវើលដ៍ (Naga World) មិនឱ្យប្រមូលផ្ដុំគ្នា ដោយសន្តិវិធីដើម្បីទាមទារដំណោះស្រាយការងារពីភាគីក្រុមហ៊ុន។ សង្គមស៊ីវិលថា អាជ្ញាធរកំពុងតែអនុវត្តតួនាទីផ្ទុយពីច្បាប់ និងបង្កបរិយាកាសកាន់តែអាក្រក់ក្នុងការដោះស្រាយវិវាទការងារមួយនេះ។
ក្រុមកងកម្លាំងអាជ្ញាធររាប់រយនាក់បានរារាំងស្រែកសម្លុត និងបង្រ្កាបដោយប្រើអំពើហិង្សាចាប់ទាញអូសសែងក្រុមកូដករមិនឱ្យប្រមូលផ្តុំគ្នានៅក្បែរអគារក្រុមហ៊ុនបនល្បែងណាហ្គាវើលដ៍ (Naga World) នៅថ្ងៃទី១៤ ខែមីនា។ អាជ្ញាធរបានរុញច្រានកូដករបោកនឹងថ្នល់ និងបានចាប់ខ្លួនកូដករ ១៦២នាក់ ញាត់ចូលរថយន្តក្រុងទាំងកម្រោលដឹកទៅមណ្ឌលចត្តាឡីស័កព្រែកព្នៅដូចសព្វដង។
កូដករនិងជាបុគ្គលិកក្រុមហ៊ុនកាស៊ីណូណាហ្គាវើលដ៍ កញ្ញា ណុប រ៉ាំរ៉ាវ ប្រាប់វិទ្យុអាស៊ីសេរីនៅថ្ងៃទី១៤ ខែមីនាថា ក្រុមកូដករបានព្យាយាមឈរទាំងកណ្ដាលថ្ងៃក្តៅនៅមុខអគារក្រុមហ៊ុនស្រែកឱ្យថៅកែចេញមុខមកដោះស្រាយ។ ប៉ុន្តែមិនដល់ ៥នាទីផង កញ្ញាថា ក្រុមប៉ូលីសពាក់ឯកសណ្ឋានស៊ីវិលជាច្រើននាក់សម្រុកមកបង្ក្រាបរុញច្រានកូដករទាំងកម្រោលដោយបង្ខំឱ្យឡើងរថយន្តក្រុង។
កញ្ញាចាត់ទុកការបង្ក្រាបមកលើក្រុមកូដករដដែលនេះថា ជាអំពើឃោរឃៅធ្វើបាបក្រុមស្ត្រីទន់ខ្សោយ ដែលគ្រាន់តែទាមទារឆ្នាំងបាយ បញ្ឈប់ការរើសអើសសហជីព និងដោះលែងតំណាង ១១នាក់ដែលកំពុងជាប់ឃុំទាំងអយុត្តិធម៌៖ «យើងជាប្រជាជនមានបញ្ហាអីមួយតែងតែស្នើឱ្យអាជ្ញាធរជួយដោះស្រាយ។ ពួកខ្ញុំមានវិវាទជាមួយក្រុមហ៊ុនសោះ អាជ្ញាធរចេញមុខការពារក្រុមហ៊ុនបែបនេះ ពួកខ្ញុំទទួលយកអត់បានទេ។ អាជ្ញាធរធ្វើទង្វើបែបនេះសាហាវ គឺគាត់ធ្វើយ៉ាងម៉េចទាញពួកកូដករចេញពីក្រុមហ៊ុនណាហ្គាវើលដ៍ចូលរថយន្តទោះបីមានអ្នកទម្ងន់ក៍ដោយ »។
កូដករម្នាក់ទៀត កញ្ញា ចាន់ ស្រីម៉ុម ថាមានកម្លាំងស្លៀកឯកសណ្ឋានពេទ្យពីរនាក់គ្មានអត្តសញ្ញាណច្បាស់លាស់បានចាប់ទាញអូសនាងតាមបណ្តោយថ្នល់ញាត់បញ្ចូលរថយន្តទាំងកម្រោល និងបានដាល់នាងចំកណ្កាលមុខបណ្ដាលឱ្យរងបួសមានស្នាមជាំលើផ្ទៃមុខ។ កញ្ញាបន្តក្រុមអាជ្ញាធរកំពុងតែព្យាយាមបង្កើតរូបភាពកាន់តែអាក្រក់ ដើម្បីឈរកាងអំណាចឱ្យក្រុមហ៊ុន ហើយបន្តធ្វើបាបក្រុមកូដករទាំងអយត្តិធម៌៖ « មានកម្លាំង ២នាក់ពាក់ខោអាវពេទ្យមានម្នាក់មកវាយខ្ញុំចំច្រម្រុះឡើងក្រហម។ អាជ្ញាធរចង្អុលផង គំរាមផង ពួកយើងគ្រាន់តែទាមទារសិទ្ធ លើកដៃរកវាយទៀតផង តែឃើញពួកខ្ញុំថតអត់ហ៊ានដែរ »។
ការបង្រ្កាបរបស់កម្លាំងចម្រុះរបស់រដ្ឋាភិបាលលោកហ៊ុន សែន ២ថ្ងៃជាប់គ្នាមកនេះ មានកូដករជាច្រើននាក់អះអាងថា ពួកគេកំពុងមានសភាពទ្រុឌទ្រោមនិងមានស្នាមជាំពេញរូបរាងកាយដោយសារតែរងអំពើហិង្សាពីសំណាក់អាជ្ញាធរ។ ក្រុមសហជីព និងកូដកចាត់ទុកការបង្ក្រាបទាំងប្រើអំពើហិង្សារបស់អាជ្ញាធរចម្រុះទាំងនោះថាជាមន្រ្តីគ្មានក្របខណ្ឌច្បាស់លាស់ អនុវត្តតួនាទីគ្មានវិជ្ជាជីវៈ និងស្នើឱ្យក្រសួងកិច្ចការនារីមានចំណាត់ឱ្យមានប្រសិទ្ធទៅលើជនដៃដល់ទាំងនោះ។
លើសពីនេះ អាជ្ញាធរក្រុងភ្នំពេញក៍បានពង្រាយកងកម្លាំងរាប់រយនាក់ស្រែកសម្លុតអ្នកឃ្លាំមើលដំណើរការធ្វើកូដកម្មនៅបរិវេណក្រុមកូដករទាមទារដំណោះស្រាយនៅក្បែរអគារបនល្បែងណាហ្គាវើលដ៍ផងដែរ។ អាជ្ញាធរបានគំរាមកំហែងរឹតត្បិតអ្នកសារព័ត៌មានជាតិនិងអន្តរជាតិ មន្ត្រីសង្គមស៊ីវិល និងអ្នកឃ្លាំមើលសិទ្ធិមនុស្សអង្គការសហប្រជាជាតិ (UN) មិនឱ្យចូលថតផ្តិតរូបភាពការធ្វើកូដកម្មរបស់ក្រុមកូដករឡើយ។
វិទ្យុអាស៊ីសេរីមិនអាចទាក់ទង អ្នកនាំពាក្យក្រសួងការងារលោក ហេង សួរ និងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា ដើម្បីបំភ្លឺបញ្ហានេះបានទេនៅថ្ងៃទី១៤ ខែមីនា។
កាលពីថ្ងៃទី៩ ខែមីនា រដ្ឋមន្ត្រីក្រសួងមហាផ្ទៃលោក ស ខេង បានកោះប្រជុំជាមួយក្រសួងពាក់ព័ន្ធច្រើនស្ថាប័ន ដើម្បីដោះស្រាយវិវាទការងារមួយនេះ។ ប៉ុន្តែមកដល់ពេលនេះក្រុមកូដករឱ្យដឹងថា មិនទាន់មានក្រសួងណាមួយជំរុញឱ្យមានការដោះលែងតំណាងពួកគេកំពុងជាប់ឃុំដើម្បីមកចរចាជាមួយថៅកែដោះស្រាយវិវាទនេះឡើយ ក្រៅពីការធ្វើទុកបុកម្នេញលើក្រុមកូដករឥតស្រាកស្រាន្ត។
ទាក់ទងបញ្ហានេះ នាយកទទួលបន្ទុកកិច្ចការទូទៅនៃអង្គការលីកាដូ (LICADO) លោក អំ សំអាត មានប្រសាសន៍ថា ការបង្រា្កបទាំងអំពើហិង្សាមកក្រុមកូដករបែបនេះ កាន់តែបង្កភាពតានតឹងនិងបានរំលោភសិទ្ធិមូលដ្ឋានរបស់ក្រុមកូដករ។ លោកសង្កេតឃើញថា អាជ្ញាធរហាក់មិនបានយកជួយរកយុត្តិធម៌ឱ្យក្រុមកូដករឡើយ ប៉ុន្តែបែរជាប្រឹងប្រែងធ្វើបាបកូដករ ព្រមទាំងរឹតត្បិតអ្នកសារព័ត៌មានជាតិអន្តរជាតិដែលបំពេញតួនាទីទៅតាមវិជ្ជាជីវៈកាន់តែខ្លាំង។ លោករិះគន់ថា ចំណាត់ការបែរនេះកាន់តែមានការថ្កោលពីសហគមន៍ជាតិ និងអន្តរជាតិបន្ថែមទៀត៖ « អាជ្ញាធរហាមមិនឱ្យថតរូប គឺគាត់មានចេតនារុញច្រានលើក្រុមកូដករ ឬធ្វើអីខ្លាចកាមេរ៉ា។ ព្រោះនេះមិនមែនបង្ក្រាបបទល្មើសឧក្រិដ្ឋ បទល្មើសមជ្ឈិម ឬការស៊ើបអង្កេតដែលពាក់ព័ន្ធប៉ះពាល់ដំណើរការនីតិវិធីអាជ្ញាធរទេ។ ប៉ុន្តែអាជ្ញាធរខ្លាចនឹងការឃ្លាំមើល និងការថតរូប »។
ក្រុមកូដករនៅតែបញ្ជាក់ជំហរថា ពួកគេនឹងនៅតែបន្តតស៊ូធ្វើកូដកម្មដើម្បីទាមទារឱ្យថៅកែក្រុមហ៊ុនចេញមុខដោះស្រាយ និងមានដោះលែងតំណាងសហជីពទាំង ១១នាក់ឱ្យមានសេរីភាពវិញដោយគ្មានលក្ខខណ្ឌ។ ក្រុមសហជីព និងអង្គទូតបណ្ដាប្រទេសលោកសេរីធំៗ និងឧត្តមស្នងការសិទ្ធិមនុស្សអង្គការសហប្រជាជាតិ បានរិះគន់រដ្ឋាភិបាលកម្ពុជាថា កំពុងប្រើច្បាប់កូវិដដើម្បីគាបសង្កត់រឹតត្បិតសិទ្ធិបញ្ចេញមតិ និងការប្រមូលផ្តុំដោយសន្តិវិធីរបស់ក្រុមកូដករ។ ពួកគេទទូចដល់រដ្ឋាភិបាលកម្ពុជាឱ្យបញ្ចប់ការបង្ក្រាបទាំងនេះ និងដោះលែងតំណាងសហជីព ១១នាក់នោះឱ្យមានសេរីភាពវិញ ព្រមទាំងកោះហៅភាគីក្រុមហ៊ុនមកដោះស្រាយវិវាទការងារមួយនេះស្របតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។