អាជ្ញាធរក្រុងភ្នំពេញរាប់រយនាក់ នៅរសៀលថ្ងៃទី១០ ខែមិថុនានេះ បានប្រើអំពើហិង្សារុញច្រាន និងបង្ខំ ឲ្យក្រុមកូដករណាហ្គាវើលដ៍ (Nagaworld) ៧៧នាក់ ឡើងរថយន្តក្រុង ដឹកយកទៅទម្លាក់ចោលនៅជាយក្រុងដូចសព្វដង ដោយបង្ក្រាបមិនឱ្យតវ៉ានៅក្បែរអាគារក្រុមហ៊ុននោះឡើយ។
កូដករម្នាក់នៃក្រុមហ៊ុនកាស៊ីណូណាហ្គាវើលដ៍ គឺកញ្ញា ចាន់ ណារឿន ប្រាប់វិទ្យុអាស៊ីសេរីមុនការផ្សាយនេះបន្តិចថា អាជ្ញាធរបានទាត់កញ្ញាពីក្រោយ នៅពេលកំពុងឡើងរថយន្តក្រុង។ កញ្ញាថា ការប្រើអំពើហិង្សានេះ គឺជារឿងអមនុស្សធម៌ និងមិនអាចអត់ឱនបានឡើយ៖ « ពួកខ្ញុំទៅធ្វើកូដកម្មទាមទារឲ្យមានសហជីព នៅកន្លែងធ្វើការ ហើយអាជ្ញាធរ តែងតែកៀងពួកខ្ញុំ ឲ្យឡើងឡានគាត់។ ដូច្នេះ គ្មានដំណោះស្រាយទេ។ ពួកខ្ញុំក៏ឡើងឡានទៅ ហើយក៏មានអាជ្ញាធរស្ត្រី ចាប់ដៃខ្ញុំជាប់ ខ្ញុំប្រាប់ថា លែងដៃខ្ញុំទៅ ហើយស្រាប់តែមានអាជ្ញាធរគាត់មកពីក្រោយ ឡើងជង្គង់វាយឆ្មក់ខ្ញុំពីក្រោយ »។
ស្របពេលដែលក្រុមកូដករនាំគ្នាបន្តការតវ៉ាប្រមាណជាង ៥ខែមកនេះ ការចរចាជាច្រើនលើកច្រើនសា រវាងភាគីសហជីពតំណាងបុគ្គលិកកម្មករ និងភាគីក្រុមហ៊ុនកាស៊ីណូណាហ្គាវើលដ៍ (Nagaworld) នៅតែគ្មានដំណោះស្រាយដដែល។ ក្រុមហ៊ុននៅតែបន្តបដិសេធ មិនព្រមទទួលយកបុគ្គលិកឱ្យចូលធ្វើការវិញ ចំនួនជិត ២រយនាក់ ក្រោមហេតុផលថា ក្រុមហ៊ុនមានបុគ្គលិកច្រើនលើសតម្រូវការ។ ភាគីទាំង២ គ្រោងជួបគ្នាចរចាជាថ្មីទៀតនៅថ្ងៃពុធ ទី២២ ខែមិថុនាខាងមុខ។
ការជួបជុំតវ៉ាកន្លងមកនេះ ក្រុមកូដករមិនត្រឹមតែមិនទទួលបានដំណោះស្រាយសមរម្យនោះទេ ប៉ុន្តែថែមទាំងទទួលរងអំពើហិង្សា និងការធ្វើទុក្ខបុកម្នេញពីអាជ្ញាធរក្រុងភ្នំពេញជាហូរហែ។ ក្រុមកូដករអះអាងថា ពួកគេនៅតែបន្តការតវ៉ា រហូតដល់មានដំណោះស្រាយសមរម្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។