កិច្ចប្រជុំរកដំណោះស្រាយវិវាទការងារក្រុមហ៊ុនកាស៊ីណូណាហ្គាវើលដ៍ (Nagaworld) ដែលត្រូវបានរៀបចំដោយក្រសួងការងារនៅរសៀលថ្ងៃទី១៨ ឧសភានេះ បានបញ្ចប់ទៅដោយមិនទទួលបានលទ្ធផលអ្វីនោះឡើយ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ប្រាប់វិទ្យុអាស៊ីសេរីថា កិច្ចប្រជុំនេះប្រើពេលត្រឹមតែកន្លះម៉ោងប៉ុណ្ណោះ ដោយសារមិនមានអ្វីត្រូវនិយាយ ព្រោះភាគីក្រុមហ៊ុននៅតែប្រកាន់ជំហរមិនព្រមទទួលយកបុគ្គលិកប្រមាណ ២រយនាក់ ឱ្យចូលធ្វើការវិញនោះទេ។ កញ្ញាបន្តថា កិច្ចប្រជុំបន្ទាប់ទៀតនឹងត្រូវធ្វើឡើងនៅថ្ងៃទី២៧ ឧសភា សប្ដាហ៍ក្រោយនេះ។
ស្របពេលដែលកិច្ចប្រជុំរកដំណោះស្រាយមិនទទួលបានផ្លែផ្កានេះ ក្រុមកូដករ ១២៥នាក់ ដែលភាគច្រើនជាស្ត្រី បានប្រមូលផ្ដុំគ្នានៅក្បែរអាគារក្រុមហ៊ុនណាហ្គាវើលដ៍។ ដូចសព្វដងដែរ អាជ្ញាធររាជធានីភ្នំពេញបានបន្តរារាំង និងគំរាមកូដករមិនឱ្យឈរតវ៉ា និងលើកបដានៅក្បែរអាគារក្រុមហ៊ុនឡើយ។
អាជ្ញាធរបានបង្ខំក្រុមកូដករឱ្យឡើងឡានក្រុងដឹកយកទៅទុកចោលនៅកន្លែងស្ងាត់ក្នុងខណ្ឌព្រែកព្នៅ រហូតដល់ម៉ោងជាង ៤រសៀលទើបដឹកពួកគាត់មកទម្លាក់នៅចំណតឡានក្រុងក្បែរទីលានប្រជាធិបតេយ្យក្នុងខណ្ឌឫស្សីកែវវិញ។
កូដករមួយរូប កញ្ញា ពៅ រស្មី រិះគន់ថា អាជ្ញាធរគួរណាស់តែជួយរកដំណោះស្រាយឱ្យកូដករ មិនមែនតាមធ្វើទុក្ខបុកម្នេញឥតស្រាកស្រាន្តលើពួកគាត់ពួកគាត់យ៉ាងដូច្នេះឡើយ៖ « ខ្ញុំពិតជាសោកស្ដាយខ្លាំងណាស់ចំពោះទង្វើ និងពាក្យសម្ដីរបស់អាជ្ញាធរ ដែលគាត់តែងតែនិយាយថា គាត់មកការពារពួកខ្ញុំ។ តែទង្វើ និងកាយវិការមកការពារណាហ្គា វើលដ៍ សុទ្ធសាធ គ្រាន់តែកូដករទៅណាហ្គា ក៏មិនឱ្យទៅដែរ។ គោលជំហររបស់ពួកខ្ញុំ គឺនៅដដែល។ ដរាបណាគ្មានដំណោះស្រាយ ពួកខ្ញុំនៅតែចេញតវ៉ារហូត ព្រោះនេះជាវិវាទការងារក្រុមហ៊ុនណាហ្គាវើលដ៍ជាមួយបុគ្គលិក។ អ៊ីចឹងណាហ្គាវើលដ៍ ត្រូវតែចេញមុខដោះស្រាយបញ្ចប់វិវាទការងារនេះ អត់ត្រូវអូសបន្លាយ ហើយអត់ត្រូវរុញច្រានវិវាទនេះទៅជាវិវាទអ្វីផ្សេងនោះទេ ព្រោះនេះជាវិវាទការងារទាំងអស់ » ។
ក្រុមបុគ្គលិកកាស៊ីណូណាហ្គាវើលដ៍បានចាប់ផ្ដើមធ្វើកូដកម្មតាំងពីខែធ្នូ ឆ្នាំ២០២១ ដើម្បីទាមទារដំណោះស្រាយវិវាទការងារជាមួយភាគីក្រុមហ៊ុន ដែលពួកគាត់ចោទថា បានរំលោភសិទ្ធិ និងអនុវត្តផ្ទុយពីច្បាប់ទាក់ទងនឹងការបញ្ឈប់បុគ្គលិក និងសហជីពពីការងារ។ ក្នុងការតវ៉ាប្រមាណ ៥ខែមកនេះ ពួកគាត់មិនត្រឹមតែមិនទទួលបានដំណោះស្រាយសមរម្យនោះទេ ប៉ុន្តែថែមទាំងទទួលរងអំពើហិង្សា និងការធ្វើទុក្ខបុកម្នេញឥតឈប់ឈរពីសំណាក់អាជ្ញាធរក្រុងភ្នំពេញថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។