ក្រុមកម្លាំងអាជ្ញាធរចម្រុះ និងក្រុមស្លៀកពាក់ស៊ីវិលនៅតែបន្តតាមយាយីស្រែកសម្លុត និង ប្រើអំពើហិង្សារុញច្រានក្រុមកូដករបុគ្គលិកណាហ្គាវើលដ៍ (Naga World) មិនឱ្យតវ៉ាទាមទាររកដំណោះស្រាយនៅក្បែរអគារក្រុមហ៊ុនទេ នៅថ្ងៃទី១៦ ខែមីនា។ ទន្ទឹមគ្នានេះ អាជ្ញាធរបានចាប់បង្ខំកូដករ២រយ (២០០) នាក់រុញបញ្ចូលក្នុងរថយន្តក្រុងដឹកទម្លាក់នៅមណ្ឌលចត្តាឡីស័កក្នុងខណ្ឌព្រែកព្នៅម្តងទៀត។
ក្រុមកងកម្លាំងចម្រុះរាប់រយនាក់របស់រដ្ឋាភិបាលលោក ហ៊ុន សែន និងក្រុមពាក់ឯកសណ្ឋានស៊ីវិលគ្មានអត្តសញ្ញាណច្បាស់លាស់បន្តប្រើអំពើហិង្សាដោយស្រែកសម្លុតជេរប្រមាថលើក្រុមកូដករដែលភាគច្រើនជាស្ត្រីនិងបានរុញច្រានកូដករខ្ទប់នឹងរថយន្តដឹកទម្លាក់ចោលក្នុងមណ្ឌលចត្តាឡីស័កក្នុងខណ្ឌព្នៅនៅថ្ងៃទី១៦ ខែមីនា។
កូដករ និងជាបុគ្គលិកក្រុមហ៊ុនកាស៊ីណូណាហ្គាវើលដ៍លោកស្រី ចន្ថា ប្រាប់វិទ្យុអាស៊ីសេរីថា កម្លាំងអាជ្ញាធរនៅតែប្រឹងរារាំងកាងអំណាចឱ្យក្រុមហ៊ុនដោយបានប្រើអំពើហិង្សារុញច្រានធ្វើបាបក្រុមកូដករមិនឱ្យរកដំណោះស្រាយនៅក្បែរអគារក្រុមហ៊ុនឡើយ។លោកស្រីបន្តថាក្រុមកូដករនៅតែបន្តចេញកូដកម្មរហូតមានដំណោះស្រាយនិងទាមទារឱ្យថៅកែក្រុមហ៊ុននេះបញ្ឈប់ការរើសអើងសហជីពក្នុងកន្លែងធ្វើការ៖ « កូដករដូចពួកខ្ញុំត្រូវបានធ្វើបាបលើរូបរាងកាយពីក្រុមអាជ្ញាធរ និង ជនស៊ីវិលអី ហ្នឹង។ មិនដឹងខាងណាជួលមកទេ មិនថាខាងក្រុមហ៊ុន ឬមួយជា កងកម្លាំងស្លៀកពាក់ស៊ីវិល ឬយ៉ាងម៉េច។ ពេលមកដឹងតែរុញច្រានឆក់ទូរស័ព្ទកូដករដែរថត »។
វិទ្យុអាស៊ីសេរីមិនអាចទាក់ទង អ្នកនាំពាក្យក្រសួងការងារលោក ហេង សួរ និងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា ដើម្បីបំភ្លឺបញ្ហានេះបានទេនៅថ្ងៃទី១៦ ខែមីនា។
នៅថ្ងៃដដែលនេះក្រុមកូដករបុគ្គលិកក្រុមហ៊ុនបនល្បែងកាស៊ីណូណាហ្គាវើលដ៍ (Naga World)ក៍បានធ្វើយុទ្ធនាកាផុសតាមបណ្ដាញសង្គមបញ្ជាក់ជំហរថា ពួកគេនៅតែបន្តទាមទារឱ្យតុលាការទម្លាក់បទចោទលើតំណាងទាំង១១នាក់និងស្នើឱ្យក្រសួងការងារជំរុញឱ្យថៅកែចេញមុខចូលតុចរចាជាមួយតំណាងសហជីពរកដំណោះស្រាយទាំង៩ចំណុចប្រកបដោយភាពស្មោះត្រង់។ ក្រុមកូដករ ក៍ទាមទារឱ្យថៅកែបនល្បែងក្រុមហ៊ុនណាហ្គាវើលដ៍ព្រមទទួលយកបុគ្គលជាង៣រយ (៣៦៥) នាក់ដែលបានបញ្ឈប់ពីការងារឱ្យចូលធ្វើការវិញនិងត្រូវបញ្ឈប់ការរើសអើងសហជីពក្នុងកន្លែងធ្វើការ។
កាលពីថ្ងៃទី១៥ ខែមីនា រដ្ឋមន្ត្រីក្រសួងមហាផ្ទៃលោក ស ខេង បានថ្លែប្រាប់តាមកិច្ចពិភាក្សាតាមប្រព័ន្ធវីដេអូទៅកាន់អ្នករាយការណ៍ពិសេសទទួលបន្ទុកសិទ្ធិមនុស្សនៅកម្ពុជាលោក វិទិត មុនតាប៊ន (Vitit Muntabhorn) ថាលោកបានជំរុញឱ្យភាគីពាក់ព័ន្ធប្រកាន់យកការចរចាដើម្បីឈានទៅរកដំណោះស្រាយ។ លោក ស ខេង បញ្ជាក់ថា ការដោះលែងតំណាងមួយចំនួនឱ្យនៅក្រៅឃុំជាបណ្ដោះអាសន្នគឺដើម្បីស្វែងរកការចរចាក្រោមការសម្របសម្រួលពីក្រសួងការងារនិងបណ្ដុះបណ្ដាលវិជ្ជាជីវៈដើម្បីឈានទៅបញ្ចប់វិវាទការងារនេះឱ្យបានឆាប់ដែរ។
កាលពីថ្ងៃទី១៥ ខែមីនា រដ្ឋាភិបាលបានចេញសេចក្តីថ្លែងការណ៍មួយ អះអាងថា ក្រសួងការងារកំពុងខិតខំដោះស្រាយវិវាទការងារនេះ។ បើតាមរដ្ឋាភិបាល អតីតបុគ្គលក្រុមហ៊ុនណាហ្គាវើលដ៍ជាង១រយនាក់(១៥៣) ក្នុងចំណោមបុគ្គលិកជិត៤រយនាក់ (៣៧៣) បានយល់ព្រមទទួលយកការទូរទាត់ប្រាក់បំណាច់បញ្ចប់កិច្ចសន្យាការងារជាមួយក្រុមហ៊ុន និងនៅសល់អតីតបុគ្គលិកជាង២រយនាក់ (២២០) ដែលមិនព្រមទទួលយកសំណង។
ចំណែកឯសំណើរបស់កូដករ៣នាក់ដែលកំពុងជាប់ឃុំក្រោមបទល្មើសវិធានសុខាភិបាល ក្រសួងការងារកំពុងរៀបចំស្នើទៅកាន់ក្រសួងយុត្តិធម៌ និងក្រសួងសុខាភិបាល ដើម្បីពិនិត្យអន្តរាគមន៍ដោះលែងតាមនីតិវិធីច្បាប់។
សេចក្តីថ្លែងការណ៍ដដែលរបស់រដ្ឋាភិបាល បានលើកឡើងជំនួសភាគីក្រុមហ៊ុនថា ដោយសារតែវិបត្តិជំងឺកូវីដ១៩ ប៉ះពាល់ធ្ងន់ធ្ងរមកលើវិស័យទេសចរណ៍ ក្រុមហ៊ុនណាហ្គាវើលដ៍ បានកាត់បន្ថយបុគ្គលិកប្រហែល ២៥ភាគរយ មកនៅត្រឹមជាង ៦ពាន់នាក់។ ក៏ប៉ុន្តែ ជាក់ស្តែង ផ្ទុយពីការលើកឡើងនេះ ក្រុមហ៊ុនកាស៊ីណូណាហ្គាវើលដ៍នេះ កំពុងផ្សាយពាណិជ្ជកម្មជ្រើសរើសបុគ្គលិកបន្ថែមនៅលើគេហទំព័ររបស់ខ្លួន។
ក្រសួងការងារបានចេញសេចក្តីជូនដំណឹងមួយនៅថ្ងៃទី១៦ ខែមីនា ថាខ្លួនសោកស្តាយដែលតំណាងភាគីកម្មករនិយោជិតមិនបានមកចូលរួមប្រជុំស្វែងរកដំណោះស្រាយចំពោះវិវាទការងារនេះនៅទីស្តីការក្រសួងនៅថ្ងៃទី១៦ ខែមីនា។ ក្រសួងការងារបន្តអំពាវនាវឱ្យភាគីតំណាងកម្មករនិយោជិតមកចូលរួមប្រជុំនៅថ្ងៃស្អែក ទី១៧ ខែមីនា ដើម្បីដោះស្រាយបញ្ចប់ករណីវិវាទការងាររួមនេះ។
ក្រោយពីអាជ្ញាធរពន្ធនាគារដោះលែងតំណាងសហជីពទាំង៨នាក់ឱ្យនៅក្រៅឃុំបណ្ដោះអាសន្នកាលពីថ្ងៃទី១៤មីនា ក្រសួងការងារក៍បានទទួលស្គាល់ពីការចុះបញ្ជីសមាសភាពដឹកនាំអង្គការសហជីពថ្មី។ ក្រុមកូដករ បដិសេធចំពោះការចាត់តាំងតំណាងសហជីពថ្មីនេះ ដោយក្រុមកូដករប្រកាន់ជំហរថាក្រុមបុគ្គលិកណាហ្គាវើលដ៍មានសហជីពតែមួយគត់គឺ កញ្ញា ឈឹម ស៊ីថរ ដែលកើតចេញពីការបោះឆ្នោតធ្វើជាតំណាងរបស់ពួកគេ។
ជុំវិញនឹងបញ្ហានេះ នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូ(LICADO) លោក អំ សំអាត យល់ថា ការណ៍ដែលក្រុមកូដករនៅតែបន្តចេញធ្វើកូដកម្មដោយសារពួកគាត់មិនទាន់មានជំនឿចិត្តលើភាគីក្រុមហ៊ុនក្នុងការអូសបន្លាយពេលវិវាទការងារមួយនេះ។ចំណែកឯកូដករ៣នាក់ដែលកំពុងជាប់ពន្ធនាគាររាជធានីភ្នំពេញប៉េហ្ស៊ី (PJ) ក៍មិនទាន់ត្រូវបានដោះលែងក្រោយពីពួកគាត់បានស្នើទៅក្រសួងការងារសុំនៅក្រៅឃុំបណ្ដោះអាសន្ន៖ «នៅពេលដោះលែងតំណាងម៉េចកូដករមិនបញ្ឈប់ការធ្វើកូដកម្ម ខ្ញុំគិតថាមកពីមិនទាន់មានជំនឿទុកចិត្តពីក្រុមហ៊ុនដោយវិវាទនេះអូសបន្លាយពេលយូរពេក។ ពីមុនមកការចរចាមាន តែក្រោយមកគ្មានលទ្ធផល ហើយតំណាងពួកគាត់ត្រូវបានចាប់ឃុំក្នុងពន្ធនាគារទាំង១១នាក់។ បើនិយាយពីតម្លាភាព សុច្ចរិតភាព និងយុត្តិធម៌ការចរចាទ័លតែតំណាងកូដករមានសេរីភាពពេញលេញ ដើម្បីភាពយុត្តិធម៌ពេញលេញគួរតែទម្លាក់ចោលបទចោទ »។
មន្ត្រីឃ្លាំមើលសិទ្ធិមនុស្សរូបនេះរំពឹងថា ក្រសួងពាក់ព័ន្ធនឹងឈរលើភាពអព្យាក្រឹត្យមានឆន្ទៈដោះស្រាយបញ្ចប់វិវាទការងារមួយនេះដោយភាពស្មោះត្រង់ តម្លាភាព និងយុត្តិធម៌។
ក្រុមកូដករ សហជីព និងអ្នកជំនាញសិទ្ធិមនុស្សបន្តទាមទារឱ្យតុលាការទម្លាក់ចោលបទចោទប្រកាន់មកលើតំណាងទាំង១១នាក់និងដោះលែងកូដករ៣នាក់កំពុងឃុំក្នុងពន្ធនាគាររាជធានីភ្នំពេញប៉េហ្ស៊ី (PJ) ឱ្យមានសេរីភាពវិញដោយគ្មានលក្ខខណ្ឌ។ចំណែកឯក្រុមកូដករ២រយ (២០០) ដែលអាជ្ញាធរដឹកទម្លាក់នៅមណ្ឌលចត្តាស័កក្នុងខណ្ឌព្រែកព្នៅមកដល់ពេលនេះអាជ្ញាធរមិនទាន់ដោះលែងពួកគាត់ឱ្យត្រឡប់ទៅផ្ទះវិញឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។