អាជ្ញាធរ​ខេត្ត​កំពង់ឆ្នាំង​កំពុង​កែលំអ​ផ្សារ​មួយ​ចំនួន​ដើម្បី​ដាក់​ប្រកួត​ផ្សារ​ស្អាត​ប្រចាំ​ឆ្នាំ​២០១៦

ដោយ ជិន ជេដ្ឋា
2016-07-31
Share
រៀបចំ​អគ្គិសនី​ផ្សារ​លើ កំពង់ឆ្នាំង ២០១៦ ៨៥៥ ក្រុម​ជំនាញ​ខាង​អគ្គិសនី​រៀបចំ​ខ្សែ​ភ្លើង​នៅ​ផ្សារ​លើ​ខេត្ត​កំពង់ឆ្នាំង កាល​ពី​ថ្ងៃ​ទី​៣០ ខែ​កក្កដា ឆ្នាំ​២០១៦។ RFA/Chin Chetha
RFA/Chin Chetha

អាជ្ញាធរ​ខេត្ត​កំពង់ឆ្នាំង និង​កម្លាំង​សមត្ថកិច្ច​ចម្រុះ កំពុង​ពន្លឿន​ការ​រៀបចំ​សណ្ដាប់ធ្នាប់ និង​កែលំអ​សោភ័ណភាព​ផ្សារ​មួយ​ចំនួន​នៅ​ក្នុង​ខេត្ត ដើម្បី​ត្រៀម​ប្រកួត​ប្រជែង​ទីផ្សារ​ស្អាត ដែល​នឹង​រៀបចំ​ដោយ​ក្រសួង​ទេសចរណ៍ នៅ​ឆ្នាំ​២០១៦។ ក្រុម​អាជីវករ​សាទរ​ចំពោះ​ចំណាត់ការ​របស់​អាជ្ញាធរ​នេះ ប៉ុន្តែ​ពួក​គេ​មិន​សង្ឃឹម​ថា នឹង​អាច​យក​ឈ្នះ​ទីផ្សារ​នៅ​ខេត្ត​ដទៃ​ទេ។

អភិបាល​រង​ខេត្ត និង​ជា​ប្រធាន​គណៈកម្មការ​រៀបចំ​សណ្ដាប់ធ្នាប់​ផ្សារ​លើ​ខេត្ត​កំពង់ឆ្នាំង ឲ្យ​ដឹង​នៅ​ថ្ងៃ​ទី​៣០ ខែ​កក្កដា ថា ក្រុម​ការងារ​នឹង​លើក​យក​លក្ខណៈ​ផ្សារ​លើ និង​ផ្សារ​បី​ផ្សេង​ទៀត​ជូន​អភិបាល​ខេត្ត​ពិនិត្យ​សម្រេច​ដាក់​បញ្ចូល​ក្នុង​បញ្ជី​ប្រកួត​ប្រជែង នៅ​គ្រា​ដែល​កម្លាំង​ចម្រុះ​រៀបចំ​ប្រព័ន្ធ​អគ្គិសនី និង​សណ្ដាប់ធ្នាប់​ផ្សារ​លើ។ ផ្សារ​ទាំង​បួន គឺ​មាន​ផ្សារ​លើ ផ្សារ​ពន្លៃ ផ្សារ​សាលា​លេខ​៥ និង​ផ្សារ​ព្រៃ​ខ្មែរ។

អភិបាល​រង​ខេត្ត​កំពង់ឆ្នាំង លោក ស៊ុន សុវណ្ណារិទ្ធិ មាន​ប្រសាសន៍​ថា ចំពោះ​ផ្សារ​លើ​នៅ​មាន​បញ្ហា​សំខាន់​បី គឺ​ដំបូល​ធ្លុះ​ធ្លាយ និង​សំយាប​សង​ខាង​ផ្សារ​លយ​ចេញ​ក្រៅ និង​ការ​លក់​ដូរ​មិន​សូវ​រៀបរយ។ ក្រុម​ការងារ​នឹង​ដោះស្រាយ​បញ្ចប់​បញ្ហា​ទាំង​នេះ​យ៉ាង​យូរ​រយៈពេល​មួយ​ខែ​ទៀត មុន​គណៈកម្មការ​ចុះ​វាយ​តម្លៃ​លក្ខណៈ​សម្បត្តិ​ផ្សារ​ស្អាត៖ «ហើយ​នឹង​ឲ្យ​ក្រុម​ការងារ​ជួយ​ផ្សព្វផ្សាយ​ដល់​ប្រជាពលរដ្ឋ។ ឧទាហរណ៍​ថា ខាង​សុខាភិបាល​ពិនិត្យ​លើ​អនាម័យ ខាង​កាំកុងត្រូល​ពិនិត្យ​ទៅ​លើ​គុណភាព មន្ទីរ​ទេសចរណ៍​ពិនិត្យ និង​អប់រំ​ឲ្យ​អាជីវករ​លក់​ដូរ​មាន​ស្តង់ដារ មន្ទីរ​ផ្សព្វផ្សាយ​ពី​ធុង​សំរាម​អី ហើយ​ខាង​ប៉ូលិស ប៉េអិម ពិនិត្យ​ពី​សុវត្ថិភាព បើ​មាន​ករណី​ចោរ​ប្លន់​ក្នុង​ផ្សារ ត្រូវ​ដោះស្រាយ​របៀប​ម៉េច»

ទាក់ទង​បញ្ហា​នេះ ប្រធាន​មន្ទីរ​ទេសចរណ៍​ខេត្ត​កំពង់ឆ្នាំង លោក សេង សាលី ថ្លែង​ថា មន្ទីរ​ជំនាញ​នឹង​ផ្សព្វផ្សាយ​ជា​សាធារណៈ​នូវ​លក្ខណៈ​សម្បត្តិ​ផ្សារ​ស្អាត​ចាប់​ពី​ថ្ងៃ​ទី​១២ ខែ​សីហា ឆ្នាំ​២០១៦ ដោយ​មិន​ទាន់​កំណត់​ពេល​វាយ​តម្លៃ​ប្រកួត​ប្រជែង។ លក្ខណៈ​សម្បត្តិ​ត្រឹមត្រូវ ឬ​ផ្សារ​ដែល​ជាប់​ចំណាត់​ថ្នាក់​ទីផ្សារ​ស្អាត គឺ​ត្រូវ​មាន​ប្រាំមួយ​ចំណុច​សំខាន់ៗ ដូចជា ការ​គ្រប់គ្រង​សំរាម ឬ​អនាម័យ​បាន​ល្អ និង​សន្តិសុខ​សណ្ដាប់ធ្នាប់​ជាដើម។ លោក​ថា ដោយ​នៅ​ក្នុង​ខេត្ត​ពុំ​ទាន់​មាន​ផ្សារ​ទំនើប គណៈកម្មការ​នឹង​ជ្រើសរើស​យក​តែ​ផ្សារ​សាធារណៈ​របស់​រដ្ឋ និង​ម៉ាត (Mart) មួយ​ចំនួន​ប៉ុណ្ណោះ៖ «ផ្សព្វផ្សាយ​ថ្ងៃ​ទី​១២ ខែ​សីហា រួច គឺ​យើង​ចាប់​ផ្ដើម​ឲ្យ​បេក្ខជន​ដែល​ជា​ផ្នែក​ឯកជន អ្នក​ម៉ៅការ​ផ្សារ ឬ​ម៉ាត ដាក់​ពាក្យ​មក ដើម្បី​រៀបចំ​ប្រមូល​ផ្ដុំ​ឯកសារ និង​វាយ​តម្លៃ​ដាក់​ចំណាត់​ថ្នាក់​ឲ្យ​គាត់»

ក្រុម​អាជីវករ​លក់​ខោ​អាវ និង​គ្រឿង​អលង្ការ​ខ្លះ​ក្នុង​ផ្សារ​លើ សម្ដែង​ការ​សប្បាយ​ចិត្ដ​ដែល​អាជ្ញាធរ​រៀបចំ​សណ្ដាប់ធ្នាប់ និង​សោភ័ណភាព​ផ្សារ តាម​រយៈ​ការ​ដាក់​ប្រឡង​ប្រណាំង​ទីផ្សារ​ស្អាត​នេះ។

អាជីវករ​លក់​ស្បែក​ជើង​នៅ​ប៉ែក​ខាង​ត្បូង​ផ្សារ​ម្នាក់ លោកស្រី ហេង ស្រីមុំ មាន​ប្រសាសន៍​ថា បើ​កម្មវិធី​ប្រកួត​ប្រជែង​ផ្សារ​ស្អាត​កើត​មែន នោះ​ផ្សារ​លើ​នឹង​កាត់​បន្ថយ​ការ​លក់​ដូរ​គ្មាន​សណ្ដាប់ធ្នាប់ និង​មាន​សោភ័ណភាព​ល្អ។ លោកស្រី​ថា ទន្ទឹម​គ្នា​នេះ ប្រធាន​ផ្សារ និង​អាជ្ញាធរ​ត្រូវ​ចុះ​រៀបចំ​សណ្ដាប់ធ្នាប់​ជា​ប្រចាំ បើ​មិន​ដូច្នោះ​ទេ ការ​ប្រឡង​ប្រណាំង​មិន​មែន​ជា​ផ្នែក​មួយ​នៃ​ការ​ជំរុញ​ឲ្យ​មាន​ទីផ្សារ​ស្អាត​ឡើយ៖ «ខ្ញុំ​ចង់​ផ្សារ​លើ​មាន​ភាព​ស្អាត មាន​ផ្លូវ​ចេញ​ចូល​ស្រួល​អ៊ីចឹង ប៉ុន្តែ​ដូច​ឃើញ​រៀប​បាន​តែ​មួយ​សារៗ ហើយ​រញ៉េរញ៉ៃ​ដដែល។ សំខាន់​លើ​អ្នក​ដែល​រៀបចំ​ផ្សារ បើ​គេ​រៀបចំ​ឲ្យ​ស្អាត ខ្ញុំ​ជា​អាជីវករ​ចង់​ឲ្យ​ស្អាត​ទាំងអស់​គ្នា»

ប្រធាន​មន្ទីរ​ទេសចរណ៍ លោក សេង សាលី បញ្ជាក់​ថា ការ​ប្រឡង​នៅ​ពេល​នេះ ធ្វើ​ឡើង​ត្រឹម​ថ្នាក់​ខេត្ត​ប៉ុណ្ណោះ ប៉ុន្តែ​ចំពោះ​ផ្សារ ឬ​ម៉ាត (Mart) មាន​លក្ខណៈ​សម្បត្តិ​ត្រឹមត្រូវ ឬ​បាន​ជាប់​នៅ​ក្នុង​ការ​ប្រកួត​ប្រជែង​នេះ នឹង​ទទួល​បាន​លិខិត​សរសើរ​ចេញ​ដោយ​ក្រសួង​ទេសចរណ៍៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល