មន្ត្រីអង្គការសង្គមស៊ីវិលទទូចឲ្យរដ្ឋាភិបាលលុបបំបាត់អំពើពុករលួយ និងអំពើនិទ្ទណ្ឌភាព ដើម្បីលុបការជួញដូរគ្រឿងញៀននៅកម្ពុជា។
ប្រធានសមាគមនិស្សិតបញ្ញវន្តខ្មែរលោក កើត សារ៉ាយ ប្រាប់អាស៊ីសេរីនៅថ្ងៃទី៥ វិច្ឆិកា ថា លោកបារម្ភចំពោះអនាគតយុវជន នៅពេលគ្រឿងញៀននៅតែមានចរាចរណ៍នៅកម្ពុជា។ លោកបន្តថា បញ្ហាគ្រឿងញៀននេះ បណ្ដាលមកពីការគ្រប់គ្រងទំនិញចេញចូលនៅតាមច្រកទ្វារព្រំដែន និងការអនុវត្តច្បាប់ធូររលុង។
លោក កើត សារ៉ាយ៖ «នេះហើយគឺ ជាក្ដីបារម្ភហើយមិនមែនជាការបារម្ភសម្រាប់តែខ្ញុំម្នាក់ទេ តែសង្គមស៊ីវិលតែម្នាក់ទេ តែត្រូវតែជាការបារម្ភរបស់រាជរដ្ឋាភិបាល ហើយក៏ដូចជាការបារម្ភរបស់ប្រជាពលរដ្ឋខ្មែរទូទាំងប្រទេសដែរ។ នៅពេលដែលគ្រឿងញៀន ចាប់បានតែអ្នកប្រើប្រាស់ ប៉ុន្តែអ្នកចែកចាយ អ្នកជួញដូរហ្នឹង គឺមិនអាចចាប់បាន ហើយបើចាប់បាន គឺផ្នែកមួយតូចបំផុតហើយយើងក៏មើលឃើញថា កំណើននៃការចែកចាយគ្រឿងញៀននៅតែផុលផុសដដែល»។
ការលើកឡើងនេះ ក្រោយកម្លាំងមន្ទីរជំនាញប្រឆាំងបទល្មើសគ្រឿងញៀន កាលពីយប់ថ្ងៃទី០៣ វិច្ឆិកា បានចុះបង្ក្រាបក្លឹបកម្សាន្តពីរកន្លែងគឺ ក្លឹបកម្សាន្តណាំប៊ឺរណាញ (Number 9) ស្ថិតនៅសង្កាត់ទន្លេបាសាក់ ខណ្ឌចំការមន និងក្លឹបកម្សាន្តឌ្រីប១៣ (DRIP13) ស្ថិតនៅសង្កាត់វត្តភ្នំ ក្នុងរាជធានីភ្នំពេញ និងបានឃាត់ខ្លួនមនុស្ស២៤៧ នាក់ ដើម្បីសាកសួរ ធ្វើតេស្តរកសារធាតុញៀន ដើម្បីកសាងសំណុំរឿង បញ្ជូនទៅតុលាការ។
វិទ្យុអាស៊ីសេរី នៅពុំទាន់អាចទាក់ទងអគ្គស្នងការរងនគរបាលជាតិទទួលបន្ទុកបង្ក្រាបបទល្មើសគ្រឿងញៀន លោក ម៉ក់ ជីតូ ដើម្បីសុំការអត្ថាធិប្បាយពីបញ្ហានេះ បន្ថែមបានទេនៅថ្ងៃទី៥ វិច្ឆិកា។
ការបង្ក្រាបករណីគ្រឿងញៀននេះ ត្រូវបានសង្គមរិះគន់ថា ជាការឃាត់ខ្លួនបានត្រឹមតែអ្នកប្រើប្រាស់ និងអ្នកចែកចាយតែប៉ុណ្ណោះ ចំណែកឯមេខ្លោងជួញដូរ ដែលជាអ្នកមានលុយ មានអំណាច អាជ្ញាធរគ្មានសមត្ថភាពឃាត់ខ្លួននោះទេ។ បើទោះជាឃាត់ខ្លួនអ្នកទាំងនោះបានក្ដី ក៏ពួកគេអាចរួចខ្លួនវិញ បន្ទាប់ពីអនុវត្តទោសក្នុងពន្ធនាគារមួយរយៈ ដូចករណីបងប្រុសឧកញ៉ា គិត ម៉េង គឺឧកញ៉ា គិត ធាង ដែលចាត់ចែងសម្របសម្រួលឲ្យប្រើប្រាស់សារធាតុញៀនខុសច្បាប់ និងសមគំនិត ពាក់ព័ន្ធករណីគ្រឿងញៀនជិត៥០ (៤៩,៤៤) គីឡូក្រាម នៅក្នុងក្លឹបកម្សាន្តមួយកន្លែងនៅភ្នំពេញ ត្រូវបានតុលាការក្រុងភ្នំពេញកាត់ទោសជាប់ពន្ធនាគារត្រឹមតែរយៈពេល៤ឆ្នាំ និងត្រូវសាលាឧទ្ធរណ៍ដោះលែង ក្រោយពីអនុវត្តទោសត្រឹមតែ ២ឆ្នាំប៉ុណ្ណោះ នៅបន្ទប់ពិសេស នៃមន្ទីរពេទ្យមួយកន្លែងក្រៅពន្ធនាគារ។
របាយការណ៍អាជ្ញាធរជាតិប្រយុទ្ធប្រឆាំងគ្រឿងញៀន បង្ហាញថា នៅក្នុងឆ្នាំ២០២២ មានមនុស្សជាង១ម៉ឺន៥ពាន់នាក់ (១៥.០០០) ត្រូវអាជ្ញាធរចាប់ខ្លួនជាប់ពាក់ព័ន្ធនឹងករណីគ្រឿងញៀន និងរឹបអូសបានគ្រឿងញៀនជិត១៥តោន ព្រមទាំងសារធាតុគីមីផ្សំចំនួនជាង ៥០៤តោន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។