អាជ្ញាធរកម្ពុជា និងវៀតណាម បានសហការគ្នាជួយសង្គ្រោះពលរដ្ឋវៀតណាមជាង៦០០នាក់ ដែលចាញ់បោកគេឲ្យមកធ្វើការនៅកម្ពុជា។
សារព័ត៌មានវៀតណាម (VietNam News) បានចុះផ្សាយកាលពីថ្ងៃទី២ កញ្ញា ថាមនុស្សជាង៦០០នាក់នេះ ត្រូវបានចាញ់បោក និងការល្បួងឲ្យចូលមកធ្វើការនៅកម្ពុជាខុសច្បាប់។ អាជ្ញាធរកម្ពុជា និងទីភ្នាក់ងារតំណាងរបស់វៀតណាមបានសហការជាមួយក្រសួងការបរទេសកម្ពុជា កំពុងរៀបចំបញ្ជួនពួកគេទៅប្រទេសវៀតណាមវិញក្នុងពេលឆាប់ៗនេះ។
ទោះបីជាយ៉ាងនេះក្ដី សារព័ត៌មានដដែលមិនបានបញ្ជាក់ច្បាស់ជនជាតិវៀតណាមជាង ៦០០នាក់ ត្រូវបានគេជួយសង្គ្រោះពីទីតាំងណា ហើយឥលូវនេះគេយកទៅដាក់កន្លែងមានសុវត្តិភាពណានៅឡើយទេ។
វិទ្យុអាស៊ីសេរីមិនអាចទាក់ទងអ្នកនាំពាក្យក្រសួងការបរទេសកម្ពុជា ដើម្បីសុំសួរអំពីបញ្ហានេះបន្ថែមបានទេ កាលពីយប់ថ្ងៃទី២ កញ្ញា។
កាលពីថ្ងៃទី១ ខែកញ្ញាអាជ្ញាធរកម្ពុជាប្រគល់ពលរដ្ឋវៀតណាមចំនួន ២៦ នាក់ដែលចាញ់បោកគេមកធ្វើការនៅកម្ពុជា ឲ្យទៅឆ្មាំព្រំដែនខេត្ត អាន យ៉ាង (An Giang) នៃខេត្តតាមដងទន្លេមេគង្គនិងកងកម្លាំងពាក់ព័ន្ធនៅច្រកទ្វារព្រំដែនអន្តរជាតិ Tinh Bien។
ប្រធានប៉ុស្តិ៍ការពារព្រំដែននៅច្រកទ្វារព្រំដែនអន្តរជាតិ តិញបៀន (Tịnh Biên) លោកវរសេនីយ៍ទោ លោក ត្រាំង ហូហៀប (Trần Hoa Hiệp) បានប្រាប់សារព័ត៌មានវៀតណាមថា ក្នុងចំណោមមនុស្សទាំង២៦នាក់នេះ មានស្ត្រី ៣នាក់ និងបុរស ២៣ នាក់ ក្នុងនោះមាន ១១នាក់ពាក់ព័ន្ធកាស៊ីណូ Rich World ដែលកម្មករជាច្រើនបានព្យាយាមរត់ចេញពីទីកន្លែងបង្ខាំងនៅក្នុងកាស៊ីណូ កាលពីថ្ងៃទី១៨ សីហាកន្លងទៅ។
កាលពីថ្ងៃទី១៨ ខែសីហា មនុស្សចំនួន៤០នាក់ ក្នុងនោះប្រុស៣៥នាក់ បានរត់គេចខ្លួនចេញកន្លែងឃុំឃាំងនៅក្នុងកាស៊ីណូ Rich World ស្ថិតក្នុងឃុំសំពៅពូន ស្រុកកោះធំ ខេត្តកណ្តាល។ ពួកគេបានហែលឆ្លងទន្លេ ប៊ិញឌី ត្រឡប់ទៅប្រទេសវៀតណាមវិញ។ ក្នុងពេលហែលទឹកទន្លេនោះ មានម្នាក់ស្លាប់ និងម្នាក់ទៀត ត្រូវបានសន្តិសុខកាស៊ីណូចាប់ខ្លួន។
ទាក់ទងនឹងជនជាតិចិនឆកបោកតាមអនឡាញយកជនបរទេសឲ្យមកធ្វើការនៅកម្ពុជាហើយចាប់បង្ខាំងនេះ រដ្ឋាភិបាលឥណ្ឌូណេស៊ីឯណោះវិញ កាលពីថ្ងៃទី១ កញ្ញា បានប្រកាសពីការរឹតបន្តឹងជនជាតិរបស់ខ្លួនមិនឲ្យកម្ពុជាដែរ។ ការប្រកាសរឹតបន្តឹងរបស់រដ្ឋាភិបាលឥណ្ឌូណេស៊ីនេះ នៅក្រោយពីជនជាតិឥណ្ឌូណេស៊ីរាប់សិបនាក់ កាលពីខែសីហា ត្រូវបានក្រុមជនជាតិចិនចាប់បង្ខាំងឲ្យធ្វើការនៅកាស៊ីណូក្នុងខែត្រព្រះសីហនុ ដែលជាតំបន់អភិវឌ្ឍន៍កន្លែងក្លាយ។
រដ្ឋមន្ត្រីការបរទេសឥណ្ឌូណេស៊ី អ្នកស្រី រ៉េតណូ ម៉ាស៊ូឌី ( Retno Marsudi) បានប្រាប់សភាកាលពីថ្ងៃព្រហស្បតិ៍ ទី១ កញ្ញា ថា ពលរដ្ឋឥណ្ឌូណេស៊ីជាច្រើននាក់ ត្រូវបានជនឆបោកឲ្យមកធ្វើការនៅកម្ពុជា តាមរយៈការសន្យាថា ឲ្យប្រាក់ខែខ្ពស់។ អ្នកស្រីបន្ថែមថា ការឆបោកនេះ បានកើតឡើងយ៉ាងគំហុក បើប្រៀបធៀបកាលពីឆ្នាំ២០២១ មានចំនួន ១១៩នាក់ រីឯឆ្នាំ២០២២ គិតត្រឹមខែសីហាបានកើតដល់ ៤៤៦នាក់។
អ្នកស្រីបន្ថែមថា កាលពីដើមខែសីហា អ្នកស្រីបានពិភាក្សាជាមួយរដ្ឋមន្ត្រីក្រសួងមហាផ្ទៃ អំពីការឆបោកតាមអនឡាញ ពិសេសការចាប់បង្ខាំពលរដ្ឋឥណ្ឌូណេស៊ីឲ្យធ្វើការនៅក្រុងព្រះសីហនុ ដែលរួមទាំងធ្វើទារុណកម្មផងនោះ។ អ្នកស្រីបន្ថែមថា នៅក្នុងខែកក្កដា និងខែសីហា អាជ្ញាធរបានជួយសង្គ្រោះពលរដ្ឋឥណ្ឌូណេស៊ីចំនួន ២៤១នាក់ចេញពីខែត្រព្រះសីហនុ ដែលជាតំបន់កាស៊ីណូរបស់ចិន។
ក្រសួងមហាផ្ទៃឱ្យដឹងថា គិតត្រឹមថ្ងៃទី១ ខែមករា ដល់ថ្ងៃទី២០ ខែសីហា ឆ្នាំ២០២២ សមត្ថកិច្ចបានរកឃើញ និងជួយសង្គ្រោះជនបរទេសចំនួន ៨៧ករណី ស្មើនឹង៨៦៥នាក់ និងបានកសាងសំណុំរឿងបញ្ជូនទៅ តុលាការចំនួន ១៧ករណី ក្នុងនោះមាន ជនសង្ស័យចំនួន ៦០នាក់។
របាយការណ៍របស់ក្រសួងការបរទេសអាមេរិកស្ដីពីការជួញដូរមនុស្សឆ្នាំ២០២២ ចេញផ្សាយកាលពីខែកក្កដា បានទម្លាក់ចំណាត់ថ្នាក់កម្ពុជាចុះមកលំដាប់ទី៣ ដែលមានន័យថា អាក្រក់បំផុត និងពុំធ្លាប់មានទេ ចាប់តាំងពីឆ្នាំ២០១៥ មក។ របាយការណ៍អាមេរិកបង្ហាញថា កម្ពុជាដើរថយក្រោយ និងគ្មានឆន្ទៈក្នុងការលុបបំបាត់ការជួញដូរមនុស្ស ដោយសារតែបញ្ហាអំពើពុករលួយជាប្រព័ន្ធ ដែលបានរារាំងដល់ការអនុវត្តច្បាប់លើក្រុមជនល្មើស ដែលជាប់ពាក់ព័ន្ធនឹងករណីជួញដូរមនុស្សនៅកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។