សមត្ថកិច្ចបញ្ជូនប្រជាពលរដ្ឋ ៣នាក់ ទៅសាលាដំបូងខេត្តបាត់ដំបង នៅរសៀលថ្ងៃទី១២ កក្កដា។ ការបញ្ជូននេះធ្វើឡើងបន្ទាប់ពីសមត្ថកិច្ចបញ្ចប់ការសាកសួរពលរដ្ឋ ៤នាក់នៅស្រុកភ្នំព្រឹក ពាក់ព័ន្ធរឿងកៀរគរពលរដ្ឋតវ៉ាប្រឆាំងនឹងសមត្ថកិច្ចដាក់ជញ្ជីងចល័តត្រួតពិនិត្យរថយន្តដឹកពោតរបស់កសិករ។ សាច់ញាតិពលរដ្ឋចាត់ទុកការចាប់ខ្លួននេះ គឺជារឿងអយុត្តិធម៌ និងជាការធ្វើបាបកសិករក្រីក្រ។ សង្គមស៊ីវិលយល់ឃើញថា ការចាប់ខ្លួនពលរដ្ឋនេះ គឺជាការគំរាមកំហែងដល់សិទ្ធិសេរីភាពបញ្ចេញមតិរបស់ពលរដ្ឋ ហើយអំពាវនាវដល់សាលាដំបូងខេត្តបាត់ដំបងឱ្យដោះលែងប្រជាពលរដ្ឋឱ្យមានសេរីភាពវិញ។
ស្នងការនគរបាលខេត្តបាត់ដំបង បានបញ្ជូនប្រជាពលរដ្ឋ៣នាក់ ទៅនៅសាលាដំបូងខេត្ត ក្រោយពីបានឃុំខ្លួនសួរ នាំខ្លួន នៅស្នងការនគរបាលខេត្តបាត់ដំបងអស់រយៈពេល ២ថ្ងៃ ពាក់ព័ន្ធនឹងការ ចោទប្រកាន់ថា បានកៀរគរប្រជាពលរដ្ឋប្រមូលផ្តុំគ្នាតវ៉ា ឱ្យអាជ្ញាធរ និងក្រុមជញ្ជីងចល័តផ្អាកត្រួតពិនិត្យ រថយន្តថៃដឹកពោតរបស់កសិករទៅលក់ប្រទេសថៃ។
អាជ្ញាធរបានឃាត់ខ្លួនអ្នកទាំង៣ កាលពីរសៀលថ្ងៃទី១០ កក្កដា ស្ថិតក្នុងឃុំអូររំដួល ស្រុកភ្នំព្រឹក។
សាច់ញាតិអ្នកដែលសមត្ថកិច្ចចាប់ខ្លួនស្នើដល់សាលាដំបូងពិចារណា ដោះលែងគ្រួសារពួកគាត់មកវិញ ព្រោះពួកគាត់យល់ថា ការចាប់ខ្លួននេះជារឿងអយុត្តិធម៌។
មនុស្ស៣នាក់ដែលត្រូវបញ្ជូនខ្លួននៅសាលាដំបូងរួមមាន លោក សែម ឌីយ៉ា អ្នកសារព័ត៌មានបាត់ដំបងប៉ុស្តិ៍ លោក ហ៊ឹម ចាន់គ្រឹះស្នា កូនម្ចាស់សៃឡូ ឬកន្លែងប្រមូលទិញពោត និង លោក កែវ វាសនា ជាកសិករ។ ចំណែកប្រពន្ធលោក កែវ វាសនា លោកស្រី ដន ឌី សមត្ថកិច្ចដោះលែងឱ្យមានសេរីភាព វិញហើយ នៅព្រឹកថ្ងៃទី១២ កក្កដា។
ម្ចាស់សៃឡូ ឬកន្លែងប្រមូលទិញពោត ជាឪពុករបស់លោក ហ៊ឹម ចានគ្រឹះស្នា ប្រាប់វិទ្យុអាស៊ីសេរីថ្ងៃ១២ កក្កដា ថា លោកមិនទាន់ដឹងថា ចោទប្រកាន់កូនប្រុសរបស់លោក ពីបទអ្វីនោះឡើយ។ លោកលើកឡើងថា កូនរបស់លោកមិនបានប្រព្រឹត្តិខុសច្បាប់អ្វីឡើយ ។ លោកបញ្ជាក់ថា រថយន្តដឹកពោតរបស់ជនជាតិថៃ ដែលត្រូវបានសមត្ថកិច្ច និងក្រុមការងារជញ្ជីងចល័តចាប់នោះ មិនមែនជារបស់លោកឡើយ៖ «គេអត់ទាន់បញ្ជូនទេបង គេថាបញ្ជូនថ្ងៃនេះ ឥឡូវខ្ញុំកំពុងរង់ចាំដែរបង ។ គេចោទកូនខ្ញុំយ៉ាងម៉េចៗ ក៏ខ្ញុំមិនទាន់ដឹងអ៊ីចឹងណាបង អត់មានអ្នកណាម្នាក់ប្រាប់យើងអ៊ីចឹងហាស់ ឥឡូវបានតែរង់ចាំមើល ។ ខ្ញុំកំពុងចាំមើលសំណុំបែបបទ សំណុំរឿងហ្នឹង តើគេចោទកូនខ្ញុំទៅជាយ៉ាងម៉េច អីម៉េច ? ព្រោះកូនខ្ញុំគ្នានៅក្មេងណាស់ ហើយគ្នាក៏គ្មានបំណងដែរ គ្នាដោយខ្វះការចេះដឹង គ្នាឡាយគ្នាអីលេង អ៊ីចឹងគ្នាមិនមែនជាអ្នកកៀរគរ មិនមែនជាអ្នកញុះញង់ទេ តើច្បាប់ត្រូវកាត់ទោសគ្នាយ៉ាងម៉េច ខ្ញុំក៏ចាំមើលអ៊ីចឹងណាបង»។
លោកសំណូមពរដល់សាលាដំបូងខេត្តបាត់ដំបង ឱ្យដោះលែងកូនប្រុសរបស់លោក។ លោកក៏សំណូមពរឱ្យមន្ត្រីនៃក្រុមជញ្ជីងចល័ត បន្ធូរបន្ថយការត្រួតពិនិត្យមួយរយៈ ដើម្បីឱ្យកសិករប្រមូលផលពោតរួចរាល់សិន ព្រោះកសិករទើបតែរងគ្រោះព្រោះវិបត្តិកូវីដ-១៩ មិនទាន់បញ្ចប់ ស្របពេលមានភ្លៀងខ្លាំងបន្តបន្ទាប់ធ្វើឱ្យដំឡូងរលួយអស់ ឥឡូវទើបបានប្រមូលផលពោត ដែលកសិករគិតថាបានតម្លៃខ្ពស់អាចទប់ទល់ និងដោះស្រាយបំណុលធនាគារបាន។
ពាក់ព័ន្ធករណីនេះ វិទ្យុអាស៊ីសេរីមិនអាចទាក់ទង ព្រះរាជអាជ្ញា កែវ សុជាតិ ស្នងការរងនគរបាលខេត្តបាត់ដំបងទទួលផែនការងារព្រហ្មទណ្ឌ លោក លឹម ពុទ្ធីឡា និងនាយការិយាល័យនគរបាលព្រហ្មទណ្ឌកំរិតស្រាល លោក ឈឿន គឹមសុង ដើម្បីសុំអត្ថាធិប្បាយជុំវិញបញ្ហានេះបានទេ នៅថ្ងៃទី១២ កក្កដា ដោយទូរស័ព្ទចូលគ្មានអ្នកទទួល។ ប៉ុន្តែព្រះរាជអាជ្ញានៃសាលាដំបូងខេត្តបាត់ដំបង លោក កែវ សុជាតិ បានប្រាប់សារព័ត៌មានក្នុងស្រុកថា ហ្វ្រេសញូវ (Fresh News) អាជ្ញាធរបានបញ្ចប់ការសាកសួរពលរដ្ឋ ៤នាក់ ដែលប៉ូលិសចាប់ខ្លួននោះហើយ តែត្រូវបញ្ជូនបន្តចំនួន ៣នាក់ ទៅសាលាដំបូងខេត្តបាត់ដំបង។ លោកបន្តថា ម្នាក់ដែលត្រូវអនុញ្ញាតឲ្យត្រឡប់ទៅផ្ទះវិញនោះ ឈ្មោះ ដន ឌី រស់នៅឃុំពេជ្រចិន្តា ស្រុកភ្នំព្រឹក។
កន្លងមកព្រះរាជអាជ្ញា កែវ សុជាតិ ក៏ធ្លាប់ចេញដីកាចាប់ខ្លួនអ្នកសារព័ត៌មានគេហទំព័រកម្ពុជារាល់ថ្ងៃ គឺលោក សុខ សារ៉ាន់ ដែលធ្វើការឡាយហ្វេសបុក (Facebook) ដោយចោទពីបទញុះញង់ឱ្យប្រព្រឹត្តបទល្មើសជាអាទិ៍ ព្រោះលោក សុខ សារ៉ាន់ បានទៅយកព័ត៌មានពលរដ្ឋតវ៉ានៅតំបន់៣ ព្រៃលិចទឹក ស្ថិតនៅស្រុកឯកភ្នំ ខេត្តបាត់ដំបង កាលពីដើមខែមករាកន្លងទៅ និងផ្ដន្ទាទោសដាក់ពន្ធនាគារ ៦ខែ អនុវត្តទោស ៥ខែ ហើយទោសនៅសល់ត្រូវបានព្យួរទោស។
ជុំវិញរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុក ខេត្តបាត់ដំបង លោក យិន ម៉េងលី ប្រាប់អាស៊ីសេរី ថា ការដឹកលើសទម្ងន់ មិនមែន ទើបតែពេលនេះទេ គឺរាល់រដូវប្រមូលផល រថយន្តថៃតែងតែចូល មកដឹកជញ្ជូនកសិផលទៅលក់នៅប្រទេសថៃ ។ លោកបន្តថា ហេតុអ្វីការដឹកជញ្ជូនពីមុនៗមក គ្មានវិធានការត្រួតពិនិត្យរបស់ក្រសួងពាក់ព័ន្ធក្រុមជញ្ជីងចល័ត បែរជាពេលប្រមូលផលទើបមានការត្រួតពិនិត្យ។ លោក យិន ម៉េងលី លើកឡើងថា អាជ្ញាធរចាប់ខ្លួនអ្នកសារព័ត៌មានចុះយកព័ត៌មាននៅពេលមានបញ្ហាកើតឡើង ទៅតាមក្រមសីលធម៌ វិជ្ជាជីវៈ គឺជារឿងមិនត្រឹមត្រូវឡើយ៖ «មន្ទីរសាធារណការដែលជាសេនាធិការ ថ្នាក់ក្រោយជាតិ លោកធ្វើអីបានចាំបាច់ពីលើមក ធ្វើអីតិចក៏យើង ចាំបាច់តែថ្នាក់ជាតិស្អែក ថ្នាក់ជាតិបញ្ជាមកបានធ្វើ យើងមិនចាំបាច់ឱ្យមាននូវថ្នាក់ក្រោមជាតិទេ អ្វីៗយើងទុកឱ្យនៅលើតែថ្នាក់ជាតិទាំងអស់ទៅ អាហ្នឹងវាចូលទៅរបៀបវិមជ្ឈការ វាចូលជាមជ្ឈការ ។ ទី២ បើសិនជាអ្នកសារព័ត៌មានហ្នឹងគាត់មិនទៅឡាយ គាត់មិនចុះទៅរកព័ត៌មានដល់កន្លែងកើតហេតុទេ ធ្វើម៉េចបានយកបានព័ត៌មានពិត ឬក៏សារព័ត៌មានហ្នឹងនៅអង្គុយនៅការិយាល័យ ចាំឱ្យអាជ្ញាធរបាញ់ព័ត៌មានឱ្យ ចាំឱ្យសមត្ថកិច្ចបាញ់ព័ត៌មានឱ្យ ហើយសារព័ត៌មានគាត់ផ្សាយតាម តែអាហ្នឹងជាព័ត៌មានពិតទេ អ៊ីចឹងតួនាទីរបស់អ្នកសារព័ត៌មាន គឺគាត់ចុះទៅដល់កន្លែងកើតហេតុ ដើម្បីស្វែងរកព័ត៌មានពិត ស្វែងរកការពិត ដើម្បីយកមកធ្វើការផ្សព្វផ្សាយ»។
លោក យិន ម៉េងលី បន្ថែមថា រដ្ឋាភិបាល និងក្រសួងពាក់ព័ន្ធត្រូវមានផែនការយុទ្ធសាស្ត្រច្បាស់លាស់ ស្វែងរកទីផ្សារលក់កសិផល និងបង្កើតរោងចក្រសំរាប់កែច្នៃកសិផល ដើម្បីជួយលើកកម្ពស់ដល់ជីវភាពកសិករ។
សមត្ថកិច្ចស្រុកភ្នំព្រឹក ខេត្តបាត់ដំបង បានចាប់ខ្លួន ប្រជាពលរដ្ឋ៤នាក់ ដើម្បីសាកសួរ ពាក់ព័ន្ធការឡាយហ្វេសប៊ុក កៀរគរពលរដ្ឋមកតវ៉ា លើការហាមឃាត់ក្រុមជញ្ជីងចល័តចាប់ឡានដឹកពោតរបស់កសិករទៅលក់នៅប្រទេសថៃ ។ ពលរដ្ឋមើលឃើញថា មូលហេតុដែលតម្លៃពោតចុះថោក និងគ្មានអ្នកទិញ គឺមកពីសមត្ថកិច្ច បន្តដាក់ជញ្ជីងចល័ត។ កសិករបាននាំគ្នាតវ៉ាទាមទារឱ្យសមត្ថកិច្ចបញ្ឈប់ការដាក់ជញ្ជីងចល័តត្រួតពិននិត្យរថយន្តដឹកពោតរបស់កសិករកាលពីយប់ថ្ងៃទី៩ កក្កដា និងព្រឹកថ្ងៃ១០ កក្កដា ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។