អាជ្ញាធរខណ្ឌចំការមនរារាំងមិនឲ្យសង់រោងបុណ្យសពលោក ប៉ែន សុវណ្ណ នៅក្នុងវត្តថាន់
ក្រុមសន្តិសុខខណ្ឌចំការមន ក្រុងភ្នំពេញ ត្រូវបានដាក់ពង្រាយក្នុងបរិវេណវត្តនួនមណីរាម ហៅវត្តថាន់ នៅថ្ងៃទី១ ខែវិច្ឆិកា ឆ្នាំ២០១៦។ RFA/Rann Samnang
RFA/Rann Samnang
អាជ្ញាធរខណ្ឌចំការមន រាជធានីភ្នំពេញ នាំកម្លាំងសន្តិសុខប្រមាណ ៤០នាក់រារាំងមិនឲ្យគណបក្សសង្គ្រោះជាតិ សង់រោងបុណ្យសពលោក ប៉ែន សុវណ្ណ អតីតនាយករដ្ឋមន្ត្រីសម័យសាធារណរដ្ឋប្រជាមានិតកម្ពុជា នៅក្នុងវត្តនួនមណីរាម ហៅវត្តថាន់ រាជធានីភ្នំពេញ នៅរសៀលថ្ងៃទី១ វិច្ឆិកា។
តំណាងរាស្ត្រគណបក្សប្រឆាំងម្នាក់បញ្ជាក់ថា ការរារាំងនេះ ប្រហែលជាអាជ្ញាធរក្រុងភ្នំពេញព្រួយបារម្ភខ្លាចអ្នកគាំទ្រគណបក្សសង្គ្រោះជាតិ ចូលរួមកម្មវិធីបុណ្យច្រើន។
តំណាងរាស្ត្រគណបក្សសង្គ្រោះជាតិ លោក ហូរ វ៉ាន់ មានប្រសាសន៍ថា កម្លាំងសន្តិសុខខណ្ឌចំការមន រាជធានីភ្នំពេញ បានបណ្ដេញរថយន្តដឹកសម្ភារៈសម្រាប់សង់រោងបុណ្យសពលោក ប៉ែន សុវណ្ណ ប្រមាណ ៣គ្រឿង ឲ្យចាកចេញពីវត្តនួនមណីរាម ហៅវត្តថាន់ ទាំងបង្ខំ ខណៈរថយន្តទាំងនោះចូលចតក្នុងវត្តដើម្បីសង់រោងបុណ្យ ក្រោមហេតុផលពុំបានសុំច្បាប់អនុញ្ញាតពីសាលារាជធានីភ្នំពេញជាមុន៖ «ចំពោះប្រជាពលរដ្ឋ និងសកម្មជន គាត់ហាក់ដូចជាភ្ញាក់ផ្អើលថាមានរឿងធំ និងមានការភ័យខ្លាច ប៉ុន្តែតាមខ្ញុំយល់ ប្រហែលគេយល់ថាគណបក្សសង្គ្រោះជាតិ មុខតែមកជួយគ្រួសារសពក្នុងការធ្វើបុណ្យនេះហើយ។ ដូច្នេះគាត់ប្រហែលជាគាត់គិតថា ត្រូវរក្សាសុវត្ថិភាព»។
ឆ្លើយតបនឹងបញ្ហានេះ អភិបាលខណ្ឌចំការមន លោក ព្រហ្ម សំខាន់ មានប្រសាសន៍យ៉ាងខ្លីថា ករណីនេះ សមត្ថកិច្ចនឹងដកកម្លាំងសន្តិសុខចេញវិញភ្លាម ប្រសិនបើអ្នករៀបចំកម្មវិធីបុណ្យសពមានច្បាប់អនុញ្ញាតពីសាលារាជធានីភ្នំពេញត្រឹមត្រូវនោះ៖ «ពីព្រោះរឿងធ្វើរឿងធ្វើបុណ្យធ្វើទាន ខ្ញុំគិតថា លិខិតរបស់រដ្ឋសភាដូចអត់មានឲ្យធ្វើនៅវត្តថាន់ គឺឲ្យធ្វើនៅគេហដ្ឋាន។ អ៊ីចឹងទេ ខ្ញុំគិតថា អត់ទាន់មានលិខិតពីសាលារាជធានីភ្នំពេញ ខ្ញុំរង់ចាំទទួលពីបញ្ជាពីសាលារាជធានីភ្នំពេញ បាទ!»។
កម្លាំងសន្តិសុខខណ្ឌចំការមន មានចំនួន ៣រថយន្ត ឬស្មើនឹងប្រមាណ ៤០នាក់ ដាក់ប្រចាំការឃ្លាំមើលនៅក្នុងវត្តថាន់ រហូតមកទល់ម៉ោង ៦រសៀលថ្ងៃទី១ វិច្ឆិកា នៅពុំទាន់ដកចេញនៅឡើយ។
ទោះបីជាយ៉ាងនេះក្ដី ប្រធានគ្រប់គ្រងការិយាល័យស៊ើបអង្កេតសិទ្ធិមនុស្សនៃអង្គការសិទ្ធិមនុស្សលីកាដូ (LICADHO) លោក អំ សំអាត លើកឡើងថា ការធ្វើបុណ្យសពនៅក្នុងវត្តអារាម ពុំចាំបាច់សុំច្បាប់ពីអាជ្ញាធរឡើយ។ លោកយល់ឃើញថា អាជ្ញាធរក្រុងភ្នំពេញរារាំងមិនឲ្យគណបក្សប្រឆាំងសង់រោងបុណ្យសពលោក ប៉ែន សុវណ្ណ នៅក្នុងវត្តថាន់ ថាជាករណីរើសអើងនិន្នាការគណបក្សនយោបាយ៖ «នេះវាមិនមែនជាចេតនារបស់មន្ត្រីរដ្ឋាភិបាលថ្នាក់លើទេ ជួនកាលថ្នាក់ក្រោមគាត់ធ្វើហួសហេតុពេក ដោយពុំបានគិត ហើយបើយើងមើលតែរូបភាពមិនបានជជែកគ្នា ព្រោះនេះជាកម្មវិធីបុណ្យ ហើយបើយើងនិយាយពីលោក ប៉ែន សុវណ្ណ គឺជាសមាជិករដ្ឋសភា ដែលជាតំណាងរាស្ត្រទូទៅ ហើយមិនអាចធ្វើបុណ្យបានក្នុងទីវត្តផង ចុះទម្រាំប្រជាពលរដ្ឋសាមញ្ញ ទៅជាយ៉ាងម៉េចវិញ?»។
តំណាងរាស្ត្រគណបក្សសង្គ្រោះជាតិ អះអាងថា បើទោះជាអាជ្ញាធរក្រុងភ្នំពេញ បញ្ជូនកម្លាំងសន្តិសុខរារាំងមិនឲ្យសង់រោងបុណ្យក៏ដោយ ក៏គណៈកម្មការរៀបចំកម្មវិធីបុណ្យសព ប្រកាន់ជំហរមិនបោះបង់គម្រោងរៀបចំពិធីបុណ្យសពលោក ប៉ែន សុវណ្ណ នោះទេ។ លោក ហូរ វ៉ាន់ បន្ថែមថា លោកបានទាក់ទងទៅអាជ្ញាធរពាក់ព័ន្ធ ដើម្បីរៀបចំពិធីបុណ្យនេះរួចហើយ។ លោកបន្ថែមថា តំណាងរាស្ត្រគណបក្សសង្គ្រោះជាតិ រៀបចំបុណ្យសពលោក ប៉ែន សុវណ្ណ ចំនួន ៤ថ្ងៃ គឺចាប់ពីថ្ងៃទី២ ដល់ថ្ងៃទី៦ វិច្ឆិកា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
- ស្ដាប់ផ្ទាល់ (ព្រឹក ៥:៣០-៦:៣០ ល្ងាច ៧:៣០-៨:៣០)
- សំឡេង
- លោក ហ៊ុន សែន ប្រកាសតាមចាប់ខ្លួនបណ្ឌិត សេង សារី ដែលវិភាគរឿងលទ្ធភាពបង្កើតរដ្ឋាភិបាលបង្រួបបង្រួមជាតិ
- អ្នកជំនាញ និងសង្គមស៊ីវិល៖ រដ្ឋាភិបាលមិនគួរប្រថុយចាក់វ៉ាក់សាំងឲ្យក្មេងអាយុ ៦ឆ្នាំដល់ ១១ឆ្នាំមុនការសម្រេចរបស់ WHO ឡើយ
- សមាគមខ្មែរក្រោមត្រៀមមេធាវីដើម្បីជួយការពារក្ដីអតីតសង្ឃ ប៉ាង សុដា
- លោក សម រង្ស៊ី ថា លោក ហ៊ុន សែន ជាប់អន្ទាក់ខ្លួនឯងមិនអាចផ្ទេរអំណាចទៅកូនប្រុសបាន
- មន្ត្រីបក្សប្រឆាំងមិនតក់ស្លុត ឬភ័យខ្លាច ចំពោះការលបចូលរួមប្រជុំតាមអនឡាញ (Zoom) របស់លោក ហ៊ុន សែន ទេ
