ហ្វូងសត្វប្រជៀវរាប់ម៉ឺនក្បាល តែងតែបង្ហាញខ្លួនចេញពីល្អាងភ្នំសំពៅ គឺជាគោលដៅទេសចរយ៉ាងសំខាន់ ក្នុងខេត្តបាត់ដំបង ដែលភ្ញៀវទេសចរជាតិ និងអន្តរជាតិចាប់អារម្មណ៍ទៅទស្សនាកម្សាន្ត។ អាជ្ញាធរអះអាងថា មន្ត្រីជំនាញបន្តយកចិត្តទុកដាក់ កែច្នៃតំបន់ភ្នំសំពៅ ជាគោលដៅទេសចរណ៍ដ៏សំខាន់មួយ ក្នុងខេត្តនេះ ដើម្បីរក្សាអត្តសញ្ញាណប្រវត្តិសាស្ត្រ និងបង្កើនប្រាក់ចំណូលសហគមន៍។
បើយើងធ្វើដំណើរតាមផ្លូវជាតិលេខ៥៧ ចាប់ពីទីរួមខេត្តបាត់ដំបង ទៅទិសខាងលិច ឆ្ពោះទៅខេត្តប៉ៃលិន បានចម្ងាយផ្លូវជាង ១២គីឡូម៉ែត្រ យើងនឹងឃើញភ្នំធំមួយនៅជាប់ផ្លូវខាងឆ្វេងដៃ ដែលមានជញ្ជាំងខ្ពស់ចោទពីធម្មជាតិ សណ្ឋានរាងដូចដូចជាសំពៅ។ ភ្នំនោះ មានឈ្មោះថា ភ្នំសំពៅ ដែលស្ថិតនៅក្នុងតំបន់ប្រជុំភ្នំជាច្រើនទៀត ដែលជារមណីយដ្ឋានទេសចរណ៍ប្រវត្តិសាស្ត្រ។ ភ្នំសំពៅបច្ចុប្បន្ន មានរូបចម្លាក់ព្រះពុទ្ធបដិមាយ៉ាងធំស្កឹមស្កៃ គេឆ្លាក់ជាប់ជញ្ជាំងថ្ម នៅជើងនឹងជើងភ្នំ ដែលជាទីទាក់ទាញភ្ញៀវទេសចរឱ្យទៅទស្សនា។ ក្រៅពីព្រះពុទ្ធបដិមាអង្គធំ និងល្អាងជាច្រើន ហ្វូងសត្វប្រចៀវជាច្រើនក្បាល ក៏ជាកត្តាទាក់ទាញភ្ញៀវទេសចរដែរ។
ភ្ញៀវទេសចរជាតិ និងអន្តរជាតិរាប់រយនាក់ តែងតែអង្គុយរង់ចាំងើយមើលសត្វប្រចៀវចេញពីល្អាងភ្នំជារៀងរាល់ពេលល្ងាចធ្វើឱ្យតំបន់នោះ ស្រូបទាញភ្ញៀវទេសចរដ៏ល្បីល្បាញ។
អ្នកនាំភ្ញៀវទេសចរទស្សនាល្អាងប្រចៀវ លោក ក្រម រឿយ ប្រាប់វិទ្យុអាស៊ីសេរី នៅថ្ងៃទី៥ មករា ថា អាជ្ញាធរមូលដ្ឋានកំពុងរឹតបន្តឹងអភិរក្សហ្វូងសត្វប្រចៀវទាំងនេះ ដោយមិនអនុញ្ញាតឱ្យមានការបរបាញ់ និងដាក់អន្ទាក់នោះឡើយ។
ក៏ប៉ុន្តែលោកបារម្ភថា អ្នកខាងក្រៅតែងតែលួចបរបាញ់ និងដាក់អន្ទាក់ចាប់ប្រចៀវធ្វើអាជីវកម្មជាទ្រង់ទ្រាយតូចៗ នៅពេលដែលពួកវាហើរចេញពីល្អាងភ្នំ។ លោកថា ហ្វូងប្រចៀវទាំងនេះ គឺជាប្រភពប្រាក់ចំណូលរបស់ពលរដ្ឋ ដែលលោកចង់ឱ្យអាជ្ញាធរថែរក្សាឱ្យគង់វង្ស។
លោក ក្រម រឿយ៖«ប្រចៀវនេះ វាហើរចេញពីល្អាងភ្នំសំពៅទៅ ចម្ងាយប្រហែលជា ១គីឡូដី ឬ ២គីឡូដី ទើបបែកចេញជាក្រុម ហើយបែកចេញជាក្រុមហ្នឹង វាហើរចេញទៅតាមសមុទ្រ និងទន្លេសាប ដោយសារនៅទីនោះ សំបូរសត្វល្អិត ហើយជាពិសេសបងប្អូនប្រជាពលរដ្ឋខ្មែរ និងភ្ញៀវបរទេសហ្នឹង គាត់មក គាត់ចង់ឃើញសត្វប្រចៀវហើរនៅតំបន់រមណីយដ្ឋាននេះឯង បានមានភ្ញៀវមកច្រើនកុះករ»។
អ្នកខេត្តបាត់ដំបង បានហៅហ្វូងប្រជៀវទាំងនោះថា ជា “កងទ័ពប្រជៀវ" ព្រោះគេសម្គាល់ ថា ការ ហោះហើររបស់ពួកវាជាហ្វូង តម្រង់ជួរគ្នាដូចជាកងទ័ពចេញច្បាំង លេចសម្រស់ដ៏ស្រស់ស្អាត។ ភ្ញៀវទេសចរតែងតែងើយមើលលើមេឃមិនដាក់ភ្នែក និងខ្លះទៀត ថតរូបភាព និងវីដេអូ បង្ហោះតាមបណ្ដាញសង្គម ឬហ្វេសប៊ុក (Facebook)។
បន្ថែមពីនេះទៀត ហ្វូងសត្វប្រចៀវមានអត្ថប្រយោជន៍ច្រើន គឺវាជួយស៊ីសត្វល្អិតៗចង្រៃដែលបំផ្លាញផលដំណាំ របស់កសិករហើយលាមករបស់វា គេយកធ្វើជាជីកសិកម្មធម្មជាតិដ៏មានតម្លៃ។
អាជ្ញាធរខេត្តបាត់ដំបង អះអាងថា ហ្វូងសត្វប្រជៀវទាំងនេះ បានក្លាយជាជាផលិតផលទេសចរណ៍ដ៏សំខាន់ ផ្តល់ប្រយោជន៍សេដ្ឋកិច្ចសហគមន៍ក្នុងខេត្តបាត់ដំបង។ បច្ចុប្បន្នមានពលរដ្ឋជាច្រើនគ្រួសារ លក់ដូរម្ហូបអាហារ វត្ថុអនុស្សាវរីយ៍ និងមានផ្ទះលម្ហែកម្សាន្តនៅតំបន់ភ្នំសំពៅ ហើយពលរដ្ឋខ្លះទៀត បានទិញរថយន្ត និងម៉ូតូ សម្រាប់ដឹកភ្ញៀវទេសចរឡើងភ្នំ។
យុវជនរស់នៅខេត្តបាត់ដំបង កញ្ញា ឡូត សៅដា សង្កេតឃើញថា វត្តមានសត្វប្រចៀវទាំងនេះមានសារៈសំខាន់ណាស់ នៅពេលដែលមានមនុស្សជាច្រើនចាប់អារម្មណ៍ ហើយវាអាចការពារភ្នំប្រវត្តិសាស្ត្រមួយនេះគេចចេញពីការបំផ្លាញដោយក្រុមហ៊ុនឯកជន ដើម្បីទាញយកថ្ម និងរ៉ែ ធ្វើអាជីវកម្ម។
កញ្ញាសង្កេតឃើញថា ភ្នំធម្មជាតិនៅខេត្តបាត់ដំបងជាច្រើន ទទួលរងការកាយកម្ទេច ដើម្បីយកថ្ម និងរ៉ែ ធ្វើឱ្យប៉ះពាល់ដល់សម្រស់បរិស្ថាន នៅពេលដែលពុំសូវមានមនុស្សចាប់អារម្មណ៍។
កញ្ញា ឡូត សៅដា៖ «ខ្ញុំគិតថា អាជ្ញាធរគួរដាក់ទោសជនបំផ្លាញសត្វព្រៃ និងព្រៃឈើ នៅតំបន់អភិរក្សហ្នឹង ពិន័យជាប្រាក់ និងដាក់ពន្ធនាគារទៅតាមកម្រិតទោស។ មួយទៀត អាជ្ញាធរគួរចំណាយថវិកា ដាក់កងការពារទីនោះ»។
អតីតអ្នកយាមល្អាងប្រចៀវ លោក ក្រម រឿយ បន្ថែមថា កន្លងទៅមានជនឆ្លៀតឱកាសតែងតែលួចបរបាញ់ ដើម្បីយកសាច់ប្រចៀវធ្វើអាជីវកម្ម។ ក៏ប៉ុន្តែមកទល់ពេលនេះអាជ្ញាធរបានពង្រឹងការអភិរក្ស ដោយមានឆ្មាំយាមល្បាតយ៉ាងប្រុងប្រយ័ត្នជារៀងរាល់ថ្ងៃ។
លោកបន្ថែមថា ពលរដ្ឋខ្លះពុំសូវយល់ដឹងពីប្រយោជន៍សត្វប្រចៀវ ហើយពួកគាត់តែងតែលួចបរបាញ់ ធ្វើជាអាហារ នៅពេលវាហើរចេញពីល្អាងភ្នំ។
លោក ក្រម រឿយ៖ «អត់យកក្នុងល្អាងទេ ប្រចៀវហើរចេញក្រៅ ក្មេងគុបហូប ឬអាចខ្លះច្រើន វាអត់មានឡើងយកទាំងការុង ដូចពីមុនៗទេ»។
ទាក់ទងនឹងវិស័យទេសចរណ៍ អនុប្រធានមន្ទីរទេសចរណ៍ខេត្តបាត់ដំបង លោក ហម អរុណ ប្រាប់វិទ្យុអាស៊ីសេរីថា អាជ្ញាធរបន្តពង្រឹងសណ្ដាប់ធ្នាប់សន្តិសុខ និងរក្សាតម្លៃម្ហូបអាហារឱ្យបានសមរម្យ។ លោកចាត់ទុក ភ្នំសំពៅជាគោលដៅទេសចរប្រណិតប្រចាំខេត្តបាត់ដំបង។
លោកបញ្ជាក់ថា មន្ត្រីជំនាញបានយកចិត្តទុកដាក់អភិរក្សសត្វប្រចៀវ និងសត្វព្រៃ នៅតំបន់ភ្នំសំពៅឱ្យគង់វង្ស ដើម្បីទាក់ទាញភ្ញៀវទេសចរ។
លោក ហម អរុណ៖ «យើងនៅអាចនិយាយបានថា ភ្នំសំពៅជាគោលដៅទេសចរមួយដ៏សំខាន់ មន្ទីរទេសចរក៏ដូចជារដ្ឋបាលខេត្ត យកចិត្តទុកដាក់ អភិវឌ្ឍន៍ និងរៀបចំទីនោះហើយ នឹងបង្កើនភាពទាកទាញភ្ញៀវបន្ថែម។ យើងនឹងពង្រឹងបន្ថែមផលិតទាំងអស់នោះ ក៏ដូចជាអនាម័យ»។
លើកំពូលភ្នំសំពៅ មានវត្តអារាមចំណាស់មួយ ដោយមានល្អាងភ្នំជាច្រើនរួមមាន ល្អាងផ្កាស្លា ល្អាងប្រចៀវ និងល្អាងខ្មោចជាដើម។ ដោយឡែក នៅក្បែរភ្នំសំពៅមានចង្កោមភ្នំសំខាន់ៗ មួយចំនួនទៀតរួមមាន ភ្នំក្តោង ភ្នំក្រពើ ភ្នំអណ្ដើក ភ្នំទ្រុងមាន់ ទ្រុងទា ភ្នំនាងរំសាយសក់ និងភ្នំតាគ្រាមជាដើម ដែលភ្នំទាំងសុទ្ធសឹងជាភ្នំប្រវត្តិសាស្ត្រ។
របាយការណ៍របស់មន្ទីរទេសចរណ៍ខេត្តបាត់ដំបងឱ្យដឹងថា គិតចាប់ពីខែមករា ដល់ខែធ្នូ ឆ្នាំ ២០២៣ មានភ្ញៀវទេសចរជាតិ និងអន្តរជាតិ ទៅទស្សនានៅតំបន់រមណីយដ្ឋាននានា ទូទាំងខេត្តនេះ មានជាង ៦សែន ២ម៉ឺននាក់ (៦២៥.១៥២)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។