ពលរដ្ឋប្រមាណជាង១០នាក់ តំណាងឲ្យ២២គ្រួសាររស់នៅបឹងកក់ ប្រមូលផ្ដុំគ្នាមុខសាលារាជធានីភ្នំពេញ តវ៉ាទាមទារឲ្យមានការបើកផ្លូវ ដាក់ភ្លើងអគ្គិសនីប្រើប្រាស់ ខណៈពួកគាត់រងចាំដំណោះស្រាយនេះ ពីខាងសាលាក្រុង អស់ជាច្រើនឆ្នាំមកហើយ។
មន្ត្រីផ្នែកសិទ្ធិមនុស្សយល់ថា បើអាជ្ញាធរមិនពន្លឿនដោះស្រាយហេដ្ឋារចនាសម្ពន្ធឲ្យពលរដ្ឋទេ នោះវានឹងអាចបង្កឲ្យមានផលលំបាកប៉ះពាល់ជីវភាពរស់នៅប្រចាំថ្ងៃ និងហានិភ័យដល់ពួកគាត់ទៅថ្ងៃមុខ។
អ្នកបឹងកក់ ២២គ្រួសារ ស្មើ នឹងផ្ទះ ២៤ខ្នង ដែលព្រមទទួលការដោះដូរកន្លែងរស់នៅរបស់ពួកគាត់ពីភូមិ១ មករស់នៅភូមិ២២ ម្ដុំប៉ែកខាងជើងវិហារឥស្លាមបឹងកក់ ជាង២ឆ្នាំកន្លះកន្លងមក នៅមិនទាន់មានផ្លូវធ្វើដំណើរក្នុងតំបន់ពួកគាត់រស់នៅ ដូចការគូសវាសក្នុងប្លង់របស់សាលាក្រុងភ្នំពេញ។
តំណាងអ្នកបឹងកក់ លោកស្រី វ៉ា សុភា ប្រាប់អាស៊ីសេរីថា បញ្ហាធំដែលអ្នកភូមិស្នើសុំឲ្យអាជ្ញាធរដោះស្រាយជាបន្ទាន់នោះ គឺការបើកផ្លូវសម្រាប់ធ្វើដំណើរ និងដាក់ប្រព័ន្ធលូឲ្យបានត្រឹមត្រូវ។ តំណាងអ្នកបឹងកក់រូបនេះ ឲ្យដឹងថា កន្លងទៅមានបុគ្គលិកខាងអគ្គិសនីកម្ពុជា ចុះទៅមើលជាច្រើនដង ប៉ុន្តែពួកគាត់ប្រាប់ថា មិនអាចតភ្ជាប់ឲ្យអ្នកភូមិប្រើប្រាស់ភ្លើងអគ្គិសនីរដ្ឋបាន ដោយសារគ្មានផ្លូវសម្រាប់បោះបង្គោលភ្លើង៖ «ពីបញ្ហាប្លង់ពួកខ្ញុំហ្នឹង ពេលគាត់ធ្វើចេញមកវាមានផ្លូវ ច្រកចេញចូល ប៉ុន្តែ ឥឡូវហ្នឹងពួកខ្ញុំត្រូវការ ទឹកភ្លើងប្រើ ប៉ុន្តែសំខាន់ហ្នឹង វាអត់មានផ្លូវសម្រាប់ខាងរដ្ឋាករភ្លើង គាត់ដាក់បង្គោលអីអ៊ីចឹង។ វាទើសទាល់ដោយសារផ្លូវ នៅខាងដើមផ្លូវគាត់បានប្រគល់ឲ្យទៅខាងប៉េអិមបាត់ ហើយផ្លូវខាងចុងបន្ទាប់មកទៀតហ្នឹង គឺគាត់អត់ទាន់ដោះស្រាយឲ្យប្រជាជនដែលនៅហ្នឹងផ្លូវនោះ។ អ៊ីចឹង ពួកគេមិនអនុញ្ញាតឲ្យពួកខ្ញុំដាក់បង្គោលភ្លើងទេ អ៊ីចឹងពួកខ្ញុំរកច្រកដើម្បីដាក់បង្គោលភ្លើងហ្នឹងចូលមកប្រើប្រាស់តែវាអត់មាន ដោយសារខាងសាលាក្រុង គេបានយកផ្លូវមួយចំហៀងទៅខាងប៉េអិម មួយខាងទៀត អត់ទាន់ដោះស្រាយឲ្យប្រជាជនឲ្យបានច្បាស់លាស់អ៊ីចឹង»។
ក្រោយពីឈរចាំអស់ជិត ១ម៉ោង ដើម្បីចូលជួបមន្ត្រីសាលាក្រុងភ្នំពេញដោះស្រាយរឿងនេះ តំណាងអ្នកបឹងកក់ម្នាក់ទៀត លោក ចាន់ ពុទ្ធិសក្តិ ប្រាប់អាស៊ីសេរី ថា អភិបាលខណ្ឌដូនពេញ លោក សុខ ពេញវុធ បានចេញមុខដោះស្រាយជំនួសសាលាក្រុង ដោយតម្រូវឲ្យតំណាងអ្នកភូមិធ្វើញត្តិដាក់ទៅសាលាខណ្ឌ ដើម្បីស្នើសុំដោះស្រាយបញ្ហាដែលកំពុងប្រឈម។
អ្នកបឹងកក់ឲ្យដឹងថា មន្ត្រីសាលាក្រុងរាជធានីភ្នំពេញ លោក ហុក លីម ធ្លាប់បានសន្យានឹងពួកគាត់ថា នឹងរៀបចំហេដ្ឋារចនាសម្ព័ន្ធឲ្យបានត្រឹមត្រូវ បើពួកគាត់យល់ព្រមដូរពីភូមិ១ ទៅរស់នៅភូមិ២២នោះ ប៉ុន្តែការសន្យាដោយគ្មានដំណោះស្រាយទាំងនេះ អូសបន្លាយអស់ពេលជាង២ឆ្នាំមកហើយ។
ប្រធានគ្រប់គ្រងការិយាល័យឃ្លាំមើលការរំលោភសិទ្ធិមនុស្សនៃអង្គការលីកាដូ (Licadho) លោក អំ សំអាត យល់ថា ប្រសិនបើបញ្ហាទាំងអស់នេះ មិនត្រូវបានដោះស្រាយទេ នោះវាធ្វើឲ្យប៉ះពាល់ជីវភាពពួកគាត់រស់នៅ ហើយអ្វីដែលសំខាន់នោះ គឺក្ដីបារម្ភរបស់គាត់ នៅពេលមានបញ្ហាអ្វីផ្សេងកើតឡើង ។ មន្ត្រីផ្នែកសិទ្ធិមនុស្សរូប ស្នើឲ្យអាជ្ញាធរពន្លឿនដំណោះស្រាយដល់ពលរដ្ឋ ជៀសវាងការអូសបន្លាយពេលវេលាតទៀត៖ «សំខាន់គឺដំណោះស្រាយសម្រាប់ប្រជាពលរដ្ឋទាំងអស់។ កាលណាយើងដោះស្រាយឲ្យគាត់ឆាប់ ឬលឿនពេលណា ប្រជាពលរដ្ឋលោកអាចអស់កង្វល់អស់បញ្ហា ហើយលោកមានលំនឹងក្នុងការរស់នៅ។ ហើយបើអាចមានលំនឹងក្នុងការប្រកបមុខរបរ ចិញ្ចឹមជីវភាពហើយធ្វើឲ្យមានសុវត្ថិភាពក្នុងមូលដ្ឋានពួកគាត់ដែរ បើផ្លូវមានទឹកមានភ្លើង»។
បច្ចុប្បន្ន អ្នកបឹងកក់ ២២គ្រួសារ ប្រើប្រាស់ភ្លើងអគ្គិសនីឯកជន ដែលមានតម្លៃថ្លៃលើសពីតម្លៃភ្លើងអគ្គិសនីរបស់រដ្ឋពី ២ ទៅ ៣ដង ហើយផ្លូវបណ្ដោះអាសន្នដែលពួកគាត់ធ្វើដំណើរទៅមករាល់ថ្ងៃ គឺជាផ្លូវក្រោយផ្ទះអ្នកភូមិ ចំណែកផ្លូវនៅជាប់ស្នាក់ការកងរាជអាវុធហត្ថ ដែលពួកគាត់ធ្លាប់ធ្វើដំណើរកន្លងមក ត្រូវបានបិទ និងហាមពលរដ្ឋមិនឲ្យឆ្លងកាត់។
អ្នកបឹងកក់ប្រកាន់ជំហរថា ប្រសិនបើអាជ្ញាធរ មិនខិតខំដោះស្រាយបញ្ហាឲ្យពួកគាត់ ដូចតាមការសន្យារបស់ខ្លួនទេ នោះពួកគាត់នឹងលើកគ្នាទៅតវ៉ាមុខសាលាក្រុងភ្នំពេញ និងសាលាខណ្ឌដូនពេញជាថ្មីទៀត លុះត្រាតែទទួលបានដំណោះស្រាយផ្នែកហេដ្ឋារចនាសម្ពន្ធ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។