ជនរងគ្រោះ​ ៣​នាក់​​​ស្លាប់ និង​ ១៣​នាក់​​ផ្សេង​ទៀត​រង​របួស ​ក្នុង​ការ​បាក់​សាលា​ធម្មសភា​នៅ​ក្នុង​ខេត្ត​សៀមរាប

ដោយ ហេង រស្មី
2019-12-02
អ៊ីម៉ែល
មតិ
Share
បោះពុម្ព
ក្រុម​អ្នក​ជួយ​សង្គ្រោះ​រុក​រក​កម្មករ​បាត់​ខ្លួន​ក្នុង​គំនរ​ដែក និង​ថ្ម​នៃ​ការ​បាក់​រលំ​សាលា​ធម្មសភា​កំពុង​សង់​ក្នុង​វត្ត​ប្រាសាទ​គោក​ចក ក្នុង​ក្រុង​សៀមរាប នៅ​ថ្ងៃ​ទី២ ខែ​ធ្នូ ឆ្នាំ២០១៩។
ក្រុម​អ្នក​ជួយ​សង្គ្រោះ​រុក​រក​កម្មករ​បាត់​ខ្លួន​ក្នុង​គំនរ​ដែក និង​ថ្ម​នៃ​ការ​បាក់​រលំ​សាលា​ធម្មសភា​កំពុង​សង់​ក្នុង​វត្ត​ប្រាសាទ​គោក​ចក ក្នុង​ក្រុង​សៀមរាប នៅ​ថ្ងៃ​ទី២ ខែ​ធ្នូ ឆ្នាំ២០១៩។
រូប៖ ហ្វេសប៊ុក​រដ្ឋបាល​ខេត្ត​សៀមរាប

ក្រុម​អ្នក​ជួយ​សង្គ្រោះ​កំពុង​បន្ត​រុករក​កម្មករ​បាត់ខ្លួន​ក្នុង​ការ​បាក់​សាលា​ធម្មសភា​ក្នុង​វត្ត​ប្រាសាទ​គោក​ចក ​នៅ​ក្នុង​ខេត្ត​សៀមរាប​ ដែល​បាន​បណ្ដាល​ឱ្យ​មាន​ជនរងគ្រោះ​ស្លាប់​ចំនួន​ ៣​នាក់​ និង​ ១៣​ នាក់​ផ្សេង​ទៀត​រង​របួស ក្នុង​នោះ​មាន​ព្រះ​សង្ឃ​ចំនួន ២អង្គផង​ដែរ។

ទេសរដ្ឋមន្ត្រី​ និង​ជាអនុប្រធានទី១ ​នៃ​អាជ្ញាធរ​ជាតិ​គ្រប់គ្រង​គ្រោះ​មហន្តរាយ ​លោក គន់ គីម ប្រាប់​អាស៊ី​សេរី កាល​ពី​​យប់​ថ្ងៃ​ទី២​ ខែ​ធ្នូ​​​ថា អ្នក​ជួយ​សង្គ្រោះ​ប្រមាណ​ជាង ៧០០​នាក់​កំពុង​ប្រតិបត្តិការ​​រុករក​អ្នក​ដែល​បាន​បាត់​ខ្លួន​នៅ​ក្នុង​គំនរ​បាក់បែក​នៃ​ការ​បាក់​រលំ​សាលា​ធម្មសភា​ក្នុង​វត្ត​ប្រាសាទ​គោកចក នៅ​ខេត្ត​សៀមរាប។

លោក​បញ្ជាក់​ថា​ ក្រុម​អ្នក​រុករក​មិន​ទាន់​រក​ឃើញ​អ្នក​ដែល​បាន​បាត់​ខ្លួន​បន្ថែម​ទៀត​ទេ មក​ដល់​ម៉ោង​អាស៊ី​សេរី​កំពុង​ផ្សាយ​នេះ។ លោក​បញ្ជាក់​ថា​ មក​ដល់​ពេល​នេះ​មាន​ជន​រងគ្រោះ​សរុប​ចំនួន​ ១៦​រូប​ រង​របួស ​១៣​នាក់ ​ក្នុង​នោះ​មាន​ព្រះសង្ឃ​ចំនួន​ ២​អង្គ ​​និង​ ស្លាប់​ចំនួន ៣នាក់​ ដោយសារ​តែ​បំណែក​ដុំ​ថ្ម​សង្កត់​ពី​លើ។ តែ​ទោះ​ជា​យ៉ាង​ណា​លោក​មិន​អាច​បញ្ជាក់​លម្អិត​ពី​មូល​ហេតុ​នៃ​ការ​បាក់​រលំ​សាលា​ឆាន់​នេះ​នៅ​ឡើយ​ទេ ហើយ​ក៏​គ្មាន​អ្នក​ទទួល​ខុស​ត្រូវ​ណា​ម្នាក់ ត្រូវ​បាន​នាំ​យក​មក​កាត់​ទោស​នៅ​ឡើយ​ដែរ៖ «យើង​សាកសួរ​បងប្អូន​អ្នក​ស្រុក​ក្រុម​ជាង​ហ្នឹង​ គេ​ថា​បាត់​បង់​តែ​ប៉ុណ្ណឹង​នាក់​ទេ។ តែ​ឥឡូវ​ឃើញ​តែ​ប៉ុណ្ណឹង​ យើង​ស៊ើប​បន្ត​ទៅ​ទៀត​ថា មាន​បាត់បង់​បន្ត​ទៅ​ទៀត​ទេ? គាត់​បាន​ឆ្លើយ​ថា មិន​មាន​ការ​បាត់​បង់​បន្ត​ទៅ​ទៀត​ទេ ហើយ​ក្រុម​ប្រតិបត្តិការ​របស់​យើង​នៅ​​តែ​បន្ត​ឲ្យ​អស់​​លទ្ធភាព​គំនរ​ដែល​នៅ​សេសសល់»

រដ្ឋបាល​សាលា​ខេត្ត​សៀមរាប​កាល​ពី​ថ្ងៃ​ទី២ ខែ​ធ្នូ ​បាន​ចេញ​សេចក្ដី​ប្រកាស​ព័ត៌មាន​មួយ​ដោយ​ទទួល​ស្គាល់​ការ​បាក់​រលំ​អគារការដ្ឋាន​សាងសង់​សាលា​ធម្មសភា ដែល​កំពុង​សាងសង់ នៅ​វត្ត​ប្រាសាទ​គោកចក ដែល​មាន​ទីតាំង​នៅ​ក្នុង​ភូមិ​វាល សង្កាត់​គោកចក ក្រុង​សៀមរាប ខេត្ត​សៀមរាប ដែល​បណ្ដាល​ឱ្យ​មាន​ជន​រងគ្រោះ​សរុប​ចំនួន ១៦នាក់។

លោក ហ៊ុន សែន នាយករដ្ឋមន្ត្រី និង​ជា​ប្រធាន​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ បាន​ប្រកាស​ផ្តល់​ថវិកា​ប្រមាណ ២០លានរៀល​ គឺ​ប្រមាណ ៥ពាន់​ដុល្លារ​ដល់​ជន​រងគ្រោះ​ម្នាក់ៗ ដែល​បាន​ស្លាប់ និង ៣លានរៀល សម្រាប់​អ្នក​រង​របួស​ក្នុង​ហេតុការណ៍​បាក់​រលំ​អគារ​នេះ។

កាលពី​ថ្ងៃ​ទី២២ ខែ​មិថុនា​កន្លង​ទៅ​នេះ​ អគារ​កម្ពស់ ៧ជាន់ ដែល​កំពុង​សាងសង់​ដោយ​គ្មាន​ច្បាប់​អនុញ្ញាត និង​វិនិយោគ​ដោយ​ជនជាតិ​ចិន បាន​បាក់​រលំ​បណ្ដាល​ឱ្យ​កម្មករ​សំណង់​ស្លាប់ ២៨នាក់ និង​របួស ២៦​នាក់​។ អាជ្ញាធរ​បាន​ប្រើ​ពេលវេលា ៣ថ្ងៃ ក្នុង​ការ​រុករក និង​ជួយសង្គ្រោះ​ជនរងគ្រោះ ដែល​កប់​ក្នុង​គំនរ​អគារ​បាក់​បែក​កាល​ពី​ពេល​​នោះ។

លោក​នាយកមន្ត្រី ហ៊ុន សែន ធ្លាប់​បាន​ព្រមាន​ថា នឹង​មិន​មានការ​លើក​លែង​នោះ​ទេ ចំពោះ​ការ​សាងសង់​អគារ​ដោយ​ខុសច្បាប់ ហើយ​លោក​ចាត់​ទុក​គ្រោះថ្នាក់​បាក់​អគារ​នៅ​ក្រុងព្រះសីហនុ​នេះ​គឺជា​មេរៀន​មួយ។ ទោះ​ជា​យ៉ាង​នេះ​ក្តី ក្រោយ​ពី​មាន​ការ​ព្រមាន​ពី​លោក ហ៊ុន សែន រហូត​មក​ទល់​ពេល​នេះ អគារ​សាងសង់​គ្មាន​គុណភាព​នៅ​តែ​បន្ត​បាក់​រលំ​ជាបន្តបន្ទាប់៕