មន្ត្រីជំនាញផ្នែកដែនដី បានបញ្ជាភ្លាមៗឲ្យក្រុមហ៊ុនសាងសង់សណ្ឋាគារមួយ ផ្អាកសកម្មភាពរបស់ខ្លួន បន្ទាប់ពីសង្ស័យថាការសាងសង់ ធ្វើឲ្យអាគារមានវ័យចំណាស់មួយ នៅក្នុងកណ្ដាលក្រុងភ្នំពេញនៅក្បែរនោះ ដែលគេស្គាល់ជាភាសាបារាំងថាបូឌិញចេញស្នាមប្រេះស្រាំ។
ទោះមិនទាន់រកឃើញថាមូលហេតុនៃការប្រេះស្រាំនេះ បណ្ដាលមកពីការបុកគ្រឹះរបស់ក្រុមហ៊ុនសាងសង់សណ្ឋាគារក្ដី វិធានការណ៍ធំៗ ត្រូវបានមន្ត្រីជំនាញបញ្ជា ទៅក្រុមហ៊ុនសាងសង់នៅថ្ងៃទី០២ ខែកុម្ភៈ គឺផ្អាកបណ្ដោះអាសន្ន និងត្រូវមានវិធានការ ការពារកុំឲ្យដាក់ដីបន្តទៀត ដោយរបាំងក្នុងដីដែលបានកាយរួច។
ក្រុមមន្ត្រីថា ពួកគេថាមិនបញ្ឈប់ការសាងសង់របស់ក្រុមហ៊ុននេះឡើយ និងថាការបែកប្រេះជញ្ជាំងអាគារនេះ បណ្ដាលមកពីការបុកគ្រឹះ ឬស្នាមប្រេះចាស់នោះទេ។
អនុរដ្ឋលេខាធិការ ក្រសួងរៀបចំដែនដីនគរូបនីយកម្ម និងសំណង់ ទទួលបន្ទុកផែនសំណង់ លោក កើត សារ៉េត ថ្លែងក្រោយចុះអង្កេតថា លោកឃើញមានស្នាមប្រេះពិតមែន ប៉ុន្តែមិនទាន់អាចសន្និដ្ឋានស្នាមប្រេះនេះ ជាស្នាមចាស់ ឬស្នាមថ្មីទេ។ លោកថា ពេលនេះលោកបញ្ជាឲ្យក្រុមហ៊ុនធ្វើក្រវាត់ដែកមួយជាន់ បន្ថែមពីលើកន្លែងចាស់ ការពារកុំបាក់ដីឲ្យប៉ះពាល់ប្រជាពលរដ្ឋ៖ «ក្រុមហ៊ុនដែលកំពុងសាងសង់សណ្ឋាគារនេះ ត្រូវតែឆ្លើយតបទៅនឹងសុវត្ថិភាពរបស់ពលរដ្ឋ»។
កាលពីរាត្រីថ្ងៃទី១ ខែកុម្ភៈ នៅពេលក្រុមហ៊ុនម៉ៅការសាងសង់សណ្ឋាគារ កំពុងដំណើរការ បុកគ្រឹះនិងកាយដី ពលរដ្ឋរស់នៅអាគារបូឌិញឲ្យដឹងថា ស្រាប់តែផ្នែកខ្លះ នៃអាគារនេះចេញស្នាមប្រេះ។ នៅពេលនោះពួកគេបានចាកចេញពីអាគារ និងអ្នកខ្លះទៅគេងនៅផ្ទះសាច់ញាតិ និងអ្នកខ្លះទៀតទៅគេងនៅផ្ទះសំណាក់។
លោកស្រី សៀ អៀង ពលរដ្ឋរស់នៅអាគារបូឌិញ ទាមទារឲ្យបញ្ឈប់ការសាងសង់នេះ ដោយលោកស្រី យល់ថា ប្រសិនអាគារថ្មីសាងសង់អាគារបូឌិញនឹងដួលរលំ៖ «ខ្ញុំមិនឲ្យសាងសង់ជាដាច់ខាត ! បើសាងសង់ផ្ទះខ្ញុំរលំហើយ។ ខ្ញុំរស់នៅសុខសាន្តយូរណាស់មកហើយ មិនដែលមានរឿងអី»។
កាលពីចុងឆ្នាំ២០១៤ អភិបាលរាជធានីភ្នំពេញ លោក ប៉ា សុជាតិវង្ស បានអនុញ្ញាតឲ្យ លោក ឬធី សំណាង និងអ្នកស្រី ភូ ឈាលីន ជាប្ដីប្រពន្ធគ្នាសាងសង់សណ្ឋាគារ ដែលកម្ពស់១១ជាន់ នៅជាប់អាគារបូឌិញ ដែលស្ថិតក្នុង សង្កាត់ទន្លេបាសាក់ ខណ្ឌចំការមន។ ភ្លាមៗនោះដែរ ពលរដ្ឋចំនួន៥០០នាក់ បានប្ដឹងទៅអាជ្ញាធរមូលដ្ឋាន ទាមទារឲ្យក្រុមហ៊ុនសាងសង់ ទទួលខុសត្រូវការខូចខាតប្រេះស្រាំអាគារ និងប្រព័ន្ធលូបង្ហូរទឹកកខ្វក់ ក្នុងករណី ប៉ះពាល់នៅពេលសាងសង់ហើយអាជ្ញាធរបានឯកភាព។
លោក តន់ វុទ្ធី កំពុងរៀបចំឥវ៉ាន់ចេញ ពីបន្ទប់ដោយភ័យខ្លាចអាគារស្រុតបាក់ ឲ្យដឹងថាមូលហេតុដែលលោកចាកចេញនេះ ព្រោះអាជ្ញាធរមូលដ្ឋានមិនយកចិត្តទុកដាក់ពីពលរដ្ឋ៖ «អាយុជីវិតសំខាន់ណាស់ បានជាខ្ញុំចេញជាបណ្តើរៗ ព្រោះអាជ្ញាធរមិនយកចិត្តទុកដាក់បញ្ហាពលរដ្ឋ»។
តាមការអង្កេតដីនៅក្បែរកន្លែងបុកគ្រឹះមានស្នាមប្រេះ និងស្រុតចុះ បើធៀបនឹងដីនៅកន្លែងផ្សេង។ ជញ្ជាំងអាគារដែលប្រេះស្រាំ មានស្នាមវែងប៉ុនចុងចង្កឹះ ដែលអាចមើលឃើញ ពីផ្ទៃខាងក្នុងពីម្ខាងទៅម្ខាង។ តំណាងក្រុមហ៊ុនសាងសង់សណ្ឋាគារ លាក់លៀមព័ត៌មានពីការសាងសង់នេះ ដោយប្រើពាក្យសំដីធ្ងន់ៗ ដាក់អ្នកកាសែតនិងបានលុបរូបថត អ្នកកាសែតចោលនៅពេលដែលថតរូបទីតាំងការដ្ឋានសាងសង់។
នាយកប្រតិបត្តិអង្គការសមាគមធាងត្នោត លោក អ៊ី សារ៉ុម សម្ដែងការព្រួយបារម្ភ ដោយបញ្ជាក់ថា ស្នាមប្រេះនេះជាស្នាមប្រេះថ្មី ខណៈដែលអាគារបូឌិញកំពុងភាពទ្រុឌទ្រោមដូចនេះ។ លោកទាមទារឲ្យមន្ត្រីរដ្ឋាភិបាលសិក្សាជ្រាវរឿងនេះ ឲ្យបានត្រឹមត្រូវ ព្រោះរឿងនេះទាកទង់អាយុជីវិតរបស់ពលរដ្ឋ៖ «តាមរយៈការសិក្សារបស់យើងស្នាមប្រេះនេះជាស្នាមប្រេះថ្មី » ។
អាគារបូឌិញដែលមានវ័យចំណាស់ និងមានសភាពទ្រុឌទ្រោមស្រាប់ទៅហើយនោះ ពេលនេះរឹតតែធ្វើឲ្យពលរដ្ឋរស់នៅទីនោះភ័យឆោឡោ និងអ្នកខ្លះរើឥវ៉ាន់ចេញទៅស្នាក់នៅ កន្លែងផ្សេងទាំងយប់។
ទោះមានការទទូចពីពលរដ្ឋឲ្យបញ្ឈប់ការសាងសង់នេះក្ដី ប៉ុន្តែអនុរដ្ឋលេខាធិការក្រសួងរៀបចំដែនដីនគរូបនីយកម្ម និងសំណង់ លោក កើត សារ៉េត លើកឡើងថា តាមគោលការណ៍ច្បាប់ និងលក្ខណៈបច្ចេកទេស អាជ្ញាធរមិនអាចបញ្ឈប់ការសាងសង់សណ្ឋាគារនេះឡើយ។ នៅក្នុងការដ្ឋាននោះមានដែកបន្ទះធំៗ បុកចូលដី និងបានកាយដីចេញក្បែរជញ្ជាំងអាគារបូឌិញ មានជម្រៅជាងប្រហែលជាពី៦ម៉ែត្រ ទៅ១០ម៉ែត្រ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។