កម្ពុជាគ្រោងទាក់ទាញទេសចរអាមេរិកាំងឱ្យបានកាន់តែច្រើនថែមទៀត
2016.01.26
រដ្ឋមន្ត្រីក្រសួងទេសចរណ៍ លោក ថោង ខុន ធ្វើសន្និសីទកាសែតបន្ទាប់ពីវិលត្រឡប់មកពីប្រជុំវេទិកាទេសចរណ៍អាស៊ាន កាលពីថ្ងៃទី២៣ ខែមករា ឆ្នាំ២០១៦ នាខេត្តសៀមរាប។
RFA/Hang Savyouth
មន្ត្រីក្រសួងទេសចរណ៍សម្លឹងឃើញថា ជនជាតិអាមេរិកាំង គឺជាទីផ្សារទេសចរណ៍ដ៏សំខាន់មួយសម្រាប់កម្ពុជា ក្នុងចំណោមប្រទេសចំនួន ១០ផ្សេងទៀត ដូចជាចិន កូរ៉េខាងត្បូង ជប៉ុន អង់គ្លេស អូស្ត្រាលី កាណាដា ថៃ និងវៀតណាម ជាដើម។
ដោយសារតែមើលឃើញពីសារសំខាន់យ៉ាងដូច្នេះ រដ្ឋាភិបាលកំពុងរៀបចំឱ្យមានតំណាងក្រសួងទេសចរណ៍ប្រចាំតាមស្ថានទូតខ្មែរ នៅសហរដ្ឋអាមេរិក និងកាណាដា សម្រាប់សម្របសម្រួល ព្រមទាំងជំរុញការផ្សព្វផ្សាយអំពីសក្ដានុពលផ្នែកទេសចរណ៍ ដើម្បីទាក់ទាញពលរដ្ឋនៃប្រទេសទាំងពីរនេះឱ្យមកទស្សនាកម្ពុជា បានកាន់តែច្រើនឡើងថែមទៀត ក្នុងពេលអនាគត។
មន្ត្រីក្រសួងទេសចរណ៍កម្ពុជា ត្រៀមខ្លួនធ្វើកិច្ចសហការជាមួយនឹងនារីឯកខ្មែរ-អាមេរិកាំងម្នាក់ ប្រចាំនៅរដ្ឋកាលីហ្វ័រញ៉ា (California) ដើម្បីធ្វើយុទ្ធនាការផ្សព្វផ្សាយអំពីសក្ដានុពលទេសចរណ៍ក្នុងគោលបំណងទាក់ទាញជនជាតិអាមេរិកាំង ឱ្យធ្វើទេសចរណ៍មកលេងកម្ពុជា បានកាន់តែច្រើនថែមទៀតសម្រាប់អនាគត។
ការប្រឹងប្រែងទាក់ទាញពលរដ្ឋអាមេរិកាំង ឱ្យមកទស្សនាកម្ពុជា នេះ ដោយសារតែគេមើលឃើញថា បច្ចុប្បន្នជនជាតិអាមេរិកាំង ជាច្រើននៅមិនទាន់ស្គាល់កម្ពុជា ទេ ហើយចំនួនអ្នកទេសចរណ៍អាមេរិកាំង ដែលមកកម្ពុជា ក៏នៅមានកម្រិតទាប។
រដ្ឋមន្ត្រីក្រសួងទេសចរណ៍ គឺលោក ថោង ខុន។ លោកមានប្រសាសន៍ក្នុងពេលវិលត្រឡប់ពីកិច្ចប្រជុំនៃវេទិកាទេសចរណ៍អាស៊ាន កាលពីល្ងាចថ្ងៃទី២៣ ខែមករា ថាបច្ចុប្បន្នថ្វីត្បិតតែប្រទេសកម្ពុជា ទទួលបានភ្ញៀវទេសចរបរទេសប្រមាណ ៥លាននាក់ ក៏ប៉ុន្តែពលរដ្ឋអាមេរិកាំង ដែលមកទស្សនាកម្ពុជា គឺនៅមានចំនួនតិចតួចនៅឡើយ។
លោក ថោង ខុន បញ្ជាក់ថា ក្រសួងទេសចរណ៍កំពុងរៀបចំខ្លួនដើម្បីធ្វើកិច្ចសហការជាមួយនារីឯកខ្មែរ-អាមេរិកាំង ម្នាក់ប្រចាំរដ្ឋកាលីហ្វ័រញ៉ា គឺអ្នកស្រី ជេកហ្គឺលីន បាហ្កាវ៉ាន (Jacqueline Bhagavan) ឱ្យជួយផ្សព្វផ្សាយ និងទាក់ទាញពលរដ្ឋអាមេរិកាំង ឱ្យមកទស្សនាកម្ពុជា កាន់តែច្រើនថែមទៀតសម្រាប់អនាគត។
លោក ថោង ខុន មានជំនឿថា នារីឯកខ្មែរ-អាមេរិកាំង នៅរដ្ឋកាលីហ្វ័រញ៉ា នេះ អាចនឹងមានឥទ្ធិពលច្រើនលើការទាក់ទាញទីផ្សារទេសចរណ៍ពីអាមេរិក៖ «យើងសព្វថ្ងៃនេះ ក្នុងចំនួនទេសចរណ៍បរទេស ១០០% គឺ ៧៧% មកពីអាស៊ី-ប៉ាស៊ីហ្វិក។ ក្នុងហ្នឹងមកពីតំបន់អាស៊ាន ជាង ៤០% មកពីអឺរ៉ុប ១៦% ប៉ុន្តែមកពីអាមេរិក តែ ៨% ទេ»។
លោក ថោង ខុន បញ្ជាក់ថា ក្រសួងទេសចរណ៍នឹងរៀបចំផលិតជាប័ណ្ណផ្សព្វផ្សាយ (poster) និងស្ប៉ត (Spot) វីដេអូ ស្ដីពីសក្ដានុពលទេសចរណ៍កម្ពុជា ដើម្បីឱ្យនារីឯកខ្មែរ-អាមេរិកាំង អ្នកស្រី ជេកហ្គឺលីន យកទៅជួយផ្សព្វផ្សាយនៅអាមេរិក។
អ្នកស្រី ជេកហ្គឺលីន បាហ្កាវ៉ាន ដែលបាននាំស្វាមី និងកូនមកលេងមាតុភូមិ បានមានប្រសាសន៍ថា ថ្វីត្បិតតែអ្នកស្រីជាជនជាតិអាមេរិកាំង ប៉ុន្តែបេះដូងរបស់អ្នកស្រីនៅតែជាខ្មែរ។ អ្នកស្រីសន្យាថា នឹងជួយផ្សព្វផ្សាយអំពីសក្ដានុពលទេសចរណ៍កម្ពុជា ទៅកាន់ពលរដ្ឋអាមេរិក ជាច្រើនទៀត។
ប្រធានមន្ទីរទេសចរណ៍ខេត្តសៀមរាប លោក ង៉ូវ សេងកាក់ មានប្រសាសន៍ថា កាលពីឆ្នាំ២០១៥ មានជនជាតិអាមេរិក ជាង ៩១.០០០នាក់ បានមកទស្សនាខេត្តសៀមរាប។ ចំនួននេះគឺកើនឡើង ០,១% បើប្រៀបធៀបនឹងឆ្នាំ២០១៤ កន្លងទៅ។
លោក ង៉ូវ សេងកាក់ បញ្ជាក់ថា ពលរដ្ឋអាមេរិកាំង ដែលមកទេសចរណ៍ខេត្តសៀមរាប ចូលចិត្តទៅមើលតំបន់អេកូទេសចរណ៍ និងប្រាសាទខ្លះដែលសំបូរដើមឈើ៖ «នៅក្នុងនេះ គឺតំបន់អង្គរ បាយ័ន តាព្រហ្ម។ បីហ្នឹង គឺបំណង គោលដៅសំខាន់របស់ពួកគេ»។
កាលពីឆ្នាំ២០១៥ កន្លងទៅ មានភ្ញៀវទេសចរបរទេសប្រមាណ ៥លាននាក់ បានមកទស្សនាកម្ពុជា ដោយក្នុងចំណោមភ្ញៀវទេសចរបរទេសទាំងនោះ គឺជនជាតិចិន បានជាប់លំដាប់ថ្នាក់លេខ១ កូរ៉េ លំដាប់ថ្នាក់លេខ២ ជប៉ុនលេខ៣ ថៃ លំដាប់ថ្នាក់លេខ៤ និងសហរដ្ឋអាមេរិក ជាប់លំដាប់ថ្នាក់លេខ៥៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
សង្គម
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់
- សារជូនពរឆ្នាំថ្មី ២០២៤
- ពលរដ្ឋចាញ់បោកអ្នកស្រី ឡេង ចាន់ណា ព្រមានឡើងមកតវ៉ានៅមុខផ្ទះលោក ហ៊ុន សែន បើតុលាការខេត្តសៀមរាបពន្យារពេលដោះស្រាយ