សមត្ថកិច្ច​រំដោះ​កុមារី​ម្នាក់​អាយុ​ ១៤​ឆ្នាំ ក្រោយ​ពី​មេខ្យល់​ឆបោក​ទៅ​ប្រទេស​ចិន

ហេង រស្មី
2021-02-12
Share
សមត្ថកិច្ច​រំដោះ​កុមារី​ម្នាក់​អាយុ​ ១៤​ឆ្នាំ ក្រោយ​ពី​មេខ្យល់​ឆបោក​ទៅ​ប្រទេស​ចិន កុមារី​ម្នាក់​អាយុ​ ១៤​ឆ្នាំ​ កាល​ពី​ថ្ងៃ​ទី​ ១១​ កុម្ភៈ​ ត្រូវ​សមត្ថកិច្ច​រំដោះ​មក​វិញ ក្រោយ​ពី​​បាន​​បាញ់​បោក​គេនាំ​យក​ទៅ​ប្រទេស​ចិន​អស់​រយៈ​ពេល​ជាង​ ៤ខែ។
រូបថត៖​ គេហទំព័រ​អគ្គស្នងការ​នគរ​បាល​ជាតិ

សមត្ថកិច្ច​កម្ពុជា​កាល​ពី​ថ្ងៃ​ទី​ ១១​កុម្ភៈ​ កន្លង​ទៅ​នេះ​បាន​រំដោះកុមារី​អាយុ​ ១៤​ឆ្នាំម្នាក់​ ដែលចាញ់បោកមេ​ខ្យល់​នាំ​យក​​ទៅនៅ​ប្រទេស​ចិន​អស់​រយៈ​ពេល​ជាង​ ៤ខែ​ ដោយសារ​គេសន្យា​ថា​ នឹងរក​ការងារ​ធ្វើ​នៅ​ទី​នោះ។​ ​សមត្ថកិច្ច​កម្ពុជា​ សហការ​ជាមួយ​​អគ្គ​កុងស៊ុល​កម្ពុជា​ប្រចាំ​ប្រទេស​ចិន​ បាន​រំដោះ​កុមារី​រងគ្រោះ​ពី​ខេត្ត​ ហឺណាន (Hunan)​ ប្រទេស​ចិន​។​

ប្រធាន​នាយកដ្ឋាន​ប្រឆាំង​ការ​ជួញ​ដូរ​មនុស្ស និង​ការពារ​អនីតិជន​ របស់​ក្រសួង​មហាផ្ទៃ​មាន​ប្រសាសន៍​ថា​ មូលហេតុ​ដែល​នាំ​ឱ្យ​សមត្ថកិច្ច​រំដោះ​ជន​រង​គ្រោះ​បាន​មក​វិញ​គឺ​ដោយ​សារ​តែ​ក្រុម​គ្រួសារ​ស្នាក់នៅខេត្តបន្ទាយមានជ័យ​បាន​មក​ប្ដឹង​សមត្ថកិច្ច​ ក្រោយ​ពី​បាន​បាត់​កូន​ពី​ផ្ទះ​អស់​រយៈ​ ៤​ខែ​ ហើយ​ក្រុម​គ្រួសារ​បាន​ទទួល​ដំណឹង​តាម​ការ​បង្ហោះ​សារ​តាម​បណ្ដាញ​សង្គម​ហ្វេសប៊ុក​​​ថា ​កូន​របស់​ខ្លួន​កំពុង​ចាញ់​បោក​គេ​នៅ​ប្រទេស​ចិន។​

លោក​បន្តថា​​ អាជ្ញាធរ​ចិន​ និង​កម្ពុជា​បាន​ចុះ​ទៅ​ដល់​កន្លែង​កើត​ហេតុ​នៅ​ក្នុង​ខេត្ត​ហឺណាន​ ហើយ​បាន​រំដោះ​ជន​រង​គ្រោះ​ត្រឡប់​មក​កម្ពុជា​វិញ​។ ប៉ុន្តែ​ជនល្មើស​ដែល​បាន​នាំ​កុមារី​រងគ្រោះ​ទៅ​នោះ​បាន​រត់​គេច​ខ្លួន​បាត់​ ហើយ​សមត្ថកិច្ច​កំពុង​ស្វែង​រក​ចាប់​ខ្លួន ​ដើម្បី​ផ្ដន្ទាទោស​តាម​ច្បាប់។

ករណីជនសង្ស័យជួញដូរស្រ្តី និងកុមារីទៅឲ្យរៀបការនឹងបុរសចិន កើតឡើងជាញឹកញាប់។

​​​សមត្ថកិច្ច​កម្ពុជា​កាល​ពី​ថ្ងៃទី​២៩​ ខែមករា​ ក៏បាន​រំដោះ​ស្ត្រី​ខ្មែរ​អាយុ​ ២០ឆ្នាំ​ម្នាក់ ពី​ប្រទេស​ចិន​ ក្រោយ​ពី​បាន​ចាញ់​បោក​គេ​ និង​ត្រូវ​គេ​បង្ខំ​ឱ្យ​រៀប​ការ​ជាមួយ​ជនជាតិ​ចិន។

ជន​រង​គ្រោះ​អាយុ ២០ឆ្នាំ រស់​នៅ​ឃុំ​ឃ្សឹម​ក្រៅ ស្រុក​ស្នួល ខេត្ត​ក្រចេះ ត្រូវ​បាន​អគ្គ​កុងស៊ុល​កម្ពុជា​ប្រចាំ​ប្រទេស​ចិន​បញ្ជូន​មក​ដល់​ប្រទេស​កម្ពុជា​វិញ កាល​ពី​ថ្ងៃ​ទី២៨ មករា។

ជន​រងគ្រោះ​បាន​បង្ហោះ​ព័ត៌មាន​ក្នុង​គណនី​ហ្វេសប៊ុក​ថា នាង​បាន​ចាញ់​បោក​មេ​ខ្យល់​ ហើយ​ត្រូវ​បាន​គេ​បង្ខំ​ឱ្យរៀប​ការ​ជា​មួយ​ប្ដី​ជនជាតិ​ចិន​ បើ​មិន​ដូច​ច្នេះ​ទេ គេ​នឹង​យក​ទៅ​លក់​ក្នុង​ហាង​ស្ត្រី​រក​ស៊ី​ផ្លូវ​ភេទ។ កាល​ពី​ឆ្នាំ២០២០ កន្លង​ទៅ​នេះ ក្រសួង​ការ​បរទេស​បាន​រំដោះ​ស្ត្រី​ខ្មែរ ដែល​ចាញ់​បោក​មេខ្យល់​ទៅ​រស់​នៅ​ប្រទេស​ចិន បាន​ចំនួន ១៤៤នាក់​ហើយនិង​បុរស​ម្នាក់​ផង​ដែរ៕ ​​

​​កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

 

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល