របបក្រុងភ្នំពេញ បានបញ្ជាឲ្យក្រុមហ៊ុនអ៊ីនធឹណេតរាំងខ្ទប់ ឬ ប្លុក (block) អសយដ្ឋានគេហទំព័រសារព័ត៌មានជាង ១០ មិនឲ្យបើកមើលឃើញ រយៈពេល ២ថ្ងៃ នៅក្នុងពេលរបបមួយនេះ កំពុងរៀបចំការបោះឆ្នោតដ៏ចម្រូងចម្រាសមួយ។ សង្គមស៊ីវិលហៅទង្វើនេះថា ជាការបំបិទសិទ្ធិសេរីភាព របស់ពលរដ្ឋ នៅពេលបោះឆ្នោត។ អ្នកវិភាគថា របបក្រុងភ្នំពេញភ័យខ្លាច ពលរដ្ឋបានដឹងព័ត៌មានពិត ពីប្រព័ន្ធផ្សព្វផ្សាយឯករាជ្យ ទើបលាបពណ៌ ដើម្បីរាំងខ្ទប់គេហទំព័រទាំងនោះ។
អ្នកនាំពាក្យនិយ័តករទូរគមនាគមន៍កម្ពុជា លោក អ៊ឹម វុត្ថា បញ្ជាក់ប្រាប់អាស៊ីសេរី នៅថ្ងៃទី២៨ កក្កដាថា ក្រសួងទូរគមនាគមន៍ បានបញ្ជាឲ្យបិទគេហទំព័រ ឬ វ៉ឹបសៃត៍ (Website) ជាង ១០ ដោយសារតែគេហទំព័រមួយចំនួននេះ បានធ្វើខុសច្បាប់ស្ដីពីការបោះឆ្នោត ត្រង់មាត្រា ៧២ និងមាត្រា ១៤២។ លោក អ៊ឹម វុត្ថា អះអាងថា របបក្រុងភ្នំពេញ ធ្លាប់បានជូនដំណឹងព្រមានរួចហើយ ទៅគេហទំព័រទាំងអស់ តាមរយៈប្រកាសអន្ដរក្រសួងលេខ ១៧០ ចុះកាលពីថ្ងៃទី២៨ ខែឧសភា ដើម្បីព្រមានពីការបិទ ឬរាំងខ្ទប់គេហទំព័រណា ដែលផ្សព្វផ្សាយព័ត៌មានខុសច្បាប់នៅកម្ពុជា។
មន្ត្រីជាន់ខ្ពស់នៃរបបលោក ហ៊ុន សែន ៣នាក់ គឺ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធិ រដ្ឋមន្ត្រីក្រសួងមហាផ្ទៃ លោក ស ខេង និងរដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ត្រាំ អ៊ីវតឹក បាននាំគ្នាចេញសេចក្ដីប្រកាសអន្តរក្រសួងមួយ ស្ដីពីការគ្រប់គ្រងផ្សព្វផ្សាយតាមគេហទំព័រ និងបណ្ដាញទំនាក់ទំនងសង្គម ដែលដំណើរការតាមប្រព័ន្ធអ៊ីនធឺណិត។
ប្រកាសអន្តរក្រសួងចុះកាលបរិច្ឆេទថ្ងៃទី២៨ ឧសភា តែត្រូវបានផ្សព្វផ្សាយនៅថ្ងៃទី០៤ មិថុនា កន្លងទៅមន្ត្រីជាន់ខ្ពស់ទាំង៣ បានកំណត់តួនាទីគ្នាថា ក្រសួងព័ត៌មានជាអ្នកគ្រប់គ្រងការចេញផ្សាយតាមប្រព័ន្ធអេឡិចត្រូនិច ខ្លឹមសារទាំងស្រុង សារជាអក្សរ សំឡេង រូបភាព វីដេអូ ឬទម្រង់ផ្សេងៗ ជាដើម។ចំណែកក្រសួងប្រៃសណីយ៍ ត្រូវតម្រូវឲ្យក្រុមហ៊ុនសេវាអ៊ីនធឺណិតទាំងអស់ មានកម្មវិធីសូហ្វវ៉ែ (Software) និងបំពាក់កម្មវិធីគ្រប់គ្រងអ៊ីនធឺណិត ដើម្បីងាយស្រួលក្នុងការត្រងច្រោះ (Filter) ឬរាំងខ្ទប់ (Block) គេហទំព័រ ឬគណនី (Account) ឬ ទំព័រ (Page) របស់បណ្ដាញទំនាក់ទំនងសង្គម ដែលធ្វើអាជីវកម្ម ឬការផ្សាយណា ដែលពួកគេយល់ថា ល្មើសច្បាប់។ ក្រសួងទាំងពីរនេះ ក៏ត្រូវសហការជាមួយស្ថាប័នដទៃទៀត ដើម្បីរាំងខ្ទប់ ឬបិទគេហទំព័រ ឬបណ្ដាញសង្គមណា ដែលធ្វើអាជីវកម្មខុសច្បាប់ ឬផ្សាយល្មើសច្បាប់ ដែលមានលក្ខណៈញុះញង់ បំបែកបំបាក់សាមគ្គីភាព ការរើសអើងចេតនាបង្កចលាចល ដែលបណ្ដាលឲ្យមានការអន្តរាយដល់សន្តិសុខជាតិ ប្រយោជន៍សាធារណៈនិងសណ្ដាប់ធ្នាប់សង្គមជាដើម។ រីឯក្រសួងមហាផ្ទៃ ជាអ្នកបង្ក្រាបរាល់សកម្មភាពទាំងអស់នោះ។
មុនកាលប្រកាសអន្តរក្រសួងនេះ អាជ្ញាធរក្រុងភ្នំពេញធ្លាប់បានធ្វើសកម្មភាពបង្ក្រាបបែបនេះ ម្ដងរួចហើយ ទៅលើគេហទំព័រសារព័ត៌មានឯករាជ្យ ឌឹ ខេមបូឌា ដេលី (The Cambodia Daily) គឺក្រោយពេលអគ្គនាយកដ្ឋានពន្ធដារ បង្ខំឲ្យបិទកាសែតនេះ ក្រសួងប្រៃសណីយ៍ បានបង្គាប់ឲ្យក្រុមហ៊ុនអ៊ីនធឺណិតទាំងអស់នៅកម្ពុជា ត្រូវធ្វើការរាំងខ្ទប់ មិនឲ្យអ្នកប្រើប្រាស់អ៊ីនធឺណិត មើលឃើញគេហទំព័រនិងទំព័រហ្វេសប៊ុក របស់កាសែតឯករាជ្យមួយនេះ ខណៈដែលរបបក្រុងភ្នំពេញ បានប្ដឹងម្ចាស់កាសែត ទៅតុលាការក្នុងរបបក្រុងភ្នំពេញ។
នៅក្នុងបញ្ជីមួយ មានត្រាក្រសួងព័ត៌មាន ដែលអាស៊ីសេរីទទួលបានបញ្ជាក់ថា គេហទំព័រដែលរងការបញ្ជាឲ្យបិទ ឬរាំងខ្ទប់ មិនឲ្យមើលឃើញនៅកម្ពុជា មានចំនួន ១៥ ក្នុងនោះមានគេហទំព័រវិទ្យុអាស៊ីសេរី (RFA) គេហទំព័រវិទ្យុសំឡេងសហរដ្ឋអាមេរិក (VOA) វិទ្យុសំឡេងប្រជាធិបតេយ្យ (VOD) គេហទំព័រវិទ្យុសំឡេងព្រះសង្ឃឯករាជ្យ គេហទំព័រគណបក្ស សង្គ្រោះជាតិ និងគេទំព័រមួយចំនួនទៀត។
អាស៊ីសេរីមិនទាន់អាចសុំការបញ្ជាក់បន្ថែមពីអ្នកនាំពាក្យក្រសួងព័ត៌មាន លោក អ៊ុក គឹមសេង បាននៅទេ នៅថ្ងៃទី២៨ កក្កដា។ ប៉ុន្ដែនៅរាល់លើកក្នុងអំឡុងពេលបោះឆ្នោត ក្រោមការក្ដោបក្ដាប់របស់លោក ហ៊ុន សែន កន្លងមក របបមួយនេះ តែងបានធ្វើទុក្ខបុកម្នេញដល់ប្រព័ន្ធផ្សព្វផ្សាយឯករាជ្យ ដូចជា បញ្ជាមិនឲ្យវិទ្យុអេហ្វអឹម (FM) ក្នុងស្រុក ផ្សាយបន្ដព័ត៌មាននៃវិទ្យុអាស៊ីសេរី (RFA) វិទ្យុសំឡេងសហរដ្ឋអាមេរិក (VOA) ជាដើម ក្រោមហេតុផលផ្សេងៗ។
ជុំវិញការ អះអាង ពីមន្ត្រីជាន់ខ្ពស់នៃរបបក្រុងភ្នំពេញថា គេហទំព័រជាង ១០នេះ បានធ្វើខុសច្បាប់បោះឆ្នោត អ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បញ្ជាក់ប្រាប់អាស៊ីសេរីថា គ.ជ.ប ពិតជាធ្លាប់ធ្វើសំណើសុំឲ្យក្រសួងមានសមត្ថកិច្ចទប់ស្កាត់ប្រព័ន្ធផ្សព្វផ្សាយណា ដែលផ្សព្វផ្សាយធ្វើឲ្យពលរដ្ឋយល់ច្រឡំលើការបោះឆ្នោតពិតមែន។ ប៉ុន្ដែមិនបានចុចចំឈ្មោះប្រព័ន្ធផ្សព្វផ្សាយមួយណាទេ ដោយទុកលទ្ធភាពឲ្យក្រសួងមានសមត្ថកិច្ចជាអ្នកពិនិត្យ។ លោក ហង្ស ពុទ្ធា បន្ដថា ការបិទ ឬរាំងខ្ទប់គេហទំព័រសារព័ត៌មានទាំងនោះ មិនប៉ះពាល់ដល់រៀបចំការបោះឆ្នោត ដែល គ.ជ.ប គ្រោងទុកទេ។
អ្នកឃ្លាំមើលសិទ្ធិមនុស្សនៅកម្ពុជា ធ្លាប់បារម្ភថា ប្រកាសអន្ដរក្រសួង ដែលមានចេតនាបិទ ឬរាំងខ្ទប់ ប្រព័ន្ធផ្សព្វផ្សាយរបស់អន្ដរក្រសួងនោះ ជាចេតនាក្នុងការបំបិទការចែកផ្សាយព័ត៌មាន ក្នុងពេលបោះឆ្នោត។
ចំណែកអ្នកឃ្លាំមើលការបោះឆ្នោតវិញ គឺប្រធានអង្គការ ខុមហ្វ្រែល លោក គល់ បញ្ជា បានលើកឡើងក្នុងហ្វេសប៊ុកលោកថា បន្ថែមលើបញ្ហាកំពុងមាន ការបោះឆ្នោត និងលទ្ធផលឆ្នោត អាចខ្វះតម្លាភាព និងសុចរិតភាព ព្រោះប្រព័ន្ធផ្សព្វផ្សាយឯករាជ្យ និងគេហទំព័ររបស់ពួកគេ ត្រូវបានបិទ។
នាយកប្រព័ន្ធផ្សព្វផ្សាយ នៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ ហៅកាត់ថា វីអូឌី (VOD) លោក ណុប វី បង្ហាញការខកចិត្តនៅពេលឃើញរបបក្រុងភ្នំពេញ រាំងខ្ទប់គេហទំព័រសារព័ត៌មានឯករាជ្យ។ លោក ណុប វី យល់ថា ការរាំងខ្ទប់គេហទំព័រទាំងនេះ នឹងធ្វើឲ្យពលរដ្ឋម្ចាស់ឆ្នោត កាន់តែខ្វះព័ត៌មានបន្ថែមទៀត ខណៈមុនការបោះឆ្នោតឆ្នាំ២០១៨ មានការរឹតត្បិតសេរីភាពសារព័ត៌មាន។
លោក ណុប វី ហៅការរាំងខ្ទប់គេហទំព័ររបស់មជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ ដែលជាអង្គការក្រៅរដ្ឋាភិបាលមួយថា ជារឿងអយុត្តិធម៌ ព្រោះអង្គការមួយនេះ បានក្លាយជាអង្គការស្របច្បាប់មួយ ក្នុងចំណោមអង្គការជាង ១.០០០អង្គការ ដែលបានចុះបញ្ជីត្រឹមត្រូវនៅក្រសួងមហាផ្ទៃ។
សមាជិកក្រុមអ្នកវិភាគវ័យក្មេង លោក បុង ដែត យល់ថា របបក្រុងភ្នំពេញ ឬគណបក្សកាន់អំណាចភ័យខ្លាច ចំពោះប្រព័ន្ធផ្សព្វផ្សាយឯករាជ្យ ទើបមានការលាបពណ៌ ដើម្បីដាក់បន្ទុក និងរាំងខ្ទប់គេហទំព័រទាំងនោះ។ លោក បុង ដែត សង្គេតឃើញថា នៅរាល់ពេលបោះឆ្នោតរបបក្រុងភ្នំពេញតែងធ្វើទុក្ខបុកម្នេញបែបនេះ ទើបបណ្ដាលឲ្យពលរដ្ឋយល់ថា ការបោះឆ្នោត មិនត្រឹមត្រូវ មិនប្រក្រតី។ ប៉ុន្ដែ ទោះយ៉ាងណាអ្នកវិភាគថា នៅពេលដែលរបបមួយខិតខំគាបសង្គត់ បំបិទសិទ្ធិសេរីភាព ពលរដ្ឋនឹងកាន់តែរើបម្រះកាន់តែខ្លាំង។
ក្រុមមេដឹកនាំនៃរបបក្រុងភ្នំពេញ បានចាប់ផ្ដើមធ្វើទុក្ខបុកម្នេញ ឬបំបិទប្រព័ន្ធផ្សព្វផ្សាយ បណ្ដេញសង្គមស៊ីវិលឯករាជ្យចេញពីកម្ពុជា តាំងពីកំឡុងឆ្នាំ២០១៧ គឺក្រោយពេល ដែលគណបក្សកាន់អំណាច បានធ្លាក់ប្រជាប្រិយភាពខ្លាំង នៅក្រោយការបោះឆ្នោតឃុំសង្កាត់ កាលពីឆ្នាំ២០១៧៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។