ការប្រកាសស្វែងរកបុគ្គលិកតាមអនឡាញ (Online) ដើម្បីបម្រើការងារនៅតាមក្រុមហ៊ុនឆបោកតាមអនឡាញកំពុងពេញនិយម និងបន្តកើតឡើងយ៉ាងផុលផុសតាមបណ្ដាញសង្គម។ ទោះយ៉ាងណាក្ដី ប្រទេសនៅក្នុងតំបន់មួយចំនួន បានណែនាំដល់ពលរដ្ឋពួកគេឱ្យប្រុងប្រយ័ត្នខ្ពស់មុននឹងសម្រេចមកធ្វើការនៅកម្ពុជា។
ក្រុមហ៊ុនឆបោកតាមអនឡាញនៅកម្ពុជានៅតែបន្តសម្ងំលាក់ខ្លួននៅតាមបណ្ដាខេត្តមួយចំនួន ខណៈបុគ្គលិកធ្វើការឱ្យក្រុមហ៊ុនឆបោកបន្តផ្សព្វផ្សាយស្វែងរកបុគ្គលិកបម្រើការងារតាមបណ្ដាញសង្គម។ ក្រុមអ្នកប្រកាសស្វែងរកបុគ្គលិកតាមបណ្ដាញសង្គមឱ្យក្រុមហ៊ុនឆបោក ហាក់បង្ហាញពីការធ្វើការងារបែបងាយស្រួលដោយគ្រាន់តែឆាតទាក់ទង (Add Contact) ភ្ញៀវបរទេសនៅជុំវិញពិភពលោក ដើម្បីណែនាំឱ្យទាក់ទងថៅកែធំជាជនជាតិចិន ហើយអាចរកប្រាក់ចំណូលប្រចាំខែ ១ពាន់ដុល្លារ។
ពលរដ្ឋខ្មែរមួយចំនួនដែលបានធ្វើការឱ្យក្រុមហ៊ុនអនឡាញភាគច្រើនដឹងអំពីការប្រឈមមុខការចុះបង្ក្រាបរបស់សមត្ថកិច្ច ប៉ុន្តែពួកគេមួយចំនួននៅតែបន្តធ្វើការងារលើវិស័យនេះ ដ្បិតការងារប្រភេទឆបោកតាមអនឡាញអាចងាយស្រួល និងរកចំណូលបានច្រើនជាងការងារក្នុងស្រុកមួយចំនួន។
អ្នកកំពុងធ្វើការងារឱ្យក្រុមហ៊ុនអនឡាញនៅខេត្តព្រះសីហនុដែលអ្នកនិពន្ធដាក់ឈ្មោះថា ធន់ ចិន្តា ដោយសារតែព្រួយបារម្ភពីបញ្ហាសុវត្ថិភាព បានទម្លាយប្រាប់វិទ្យុអាស៊ីសេរីថា ប្រភេទការងារអនឡាញនៅទីក្រុងព្រះសីហនុភាគច្រើនមានថៅកែគ្រប់គ្រងជាជនជាតិចិន ហើយគ្មានឈ្មោះក្រុមហ៊ុនជាក់លាក់នោះទេ និងតែងផ្លាស់ប្ដូរទីតាំងពីមួយកន្លែងទៅមួយកន្លែង។ ចំណែក បុគ្គលិកវិញធ្វើការតាមអគារដែលថៅកែចិនជួល។ បុគ្គលិកឈ្មោះ ធន់ ចិន្តា រៀបរាប់ឱ្យដឹងទៀតថា ការងារអនឡាញ ឬការឆាតទាក់ទងទៅកាន់ភ្ញៀវ (Add Contact) គឺទាក់ទងអតិថិជនជុំវិញពិភពលោក ហើយការនិយាយទៅកាន់ភ្ញៀវបរទេស ថៅកែ ឬអ្នកគ្រប់គ្រងគឺជាអ្នករៀបចំអត្ថបទក្នុងការសន្ទនារួចជាស្រេច។ បុគ្គលិករូបនោះពន្យល់ថា ការឆបោកតាមអនឡាញ បែងចែកជាពីរដំណាក់កាលធំៗ។
ដំណាលកាលទីមួយ សម្រាប់ពលរដ្ឋខ្មែរភាគច្រើន ថៅកែតម្រូវឱ្យស្វែងរកភ្ញៀវបរទេសនៅតាមបណ្ដាប្រទេសនានាចំនួន ២០នាក់ ឬច្រើនជាងនេះ ដើម្បីល្បួងលួងភ្ញៀវបរទេស ទាក់ទងបន្តទៅកាន់ថៅកែធំ ដែលជាអ្នកគ្រប់គ្រង ឬហៅថា ឃៀលលើ (Killer)។ ចំណែកដំណាក់កាលទីពីរនោះ អ្នកគ្រប់គ្រងមានតួនាទីល្បួងលួងភ្ញៀវបរទេសឱ្យដាក់លុយជាមួយក្រុមហ៊ុន។ លោកបញ្ជាក់ថា អ្នកគ្រប់គ្រងធ្វើការនៅទីតាំងផ្សេងទៀត ដែលភាគច្រើននៅតាមអគារកាស៊ីណូធំៗ ហើយពួកគេរងការរឹតត្បិតសេរីភាពផ្ទាល់ខ្លួន។
«បើអ្នកឃៀល(Killer)នៅកាស៊ីណូ បើកន្លែងខ្ញុំនៅ មិនមែនហៅកាស៊ីណូទេ គេហៅតែអគារគេធ្វើការ ដូចអគារគេជួលឱ្យមនុស្សដេកអ៊ីចឹង។ អ្នកឃៀល(Killer)បានគេហៅថា កាស៊ីណូ រកភ្ញៀវប៉ិនបោក វាខុសច្បាប់ដូចតែគ្នាហ្នឹង។ ខ្ញុំនៅជាយៗ ភាគច្រើនប៉ូលិសអត់សូវដែលមករញ៉េរញ៉ៃទេ»។
ការលើកឡើងរបស់បុគ្គលិក ធន់ ចិន្តា ហាក់ស៊ីសង្វាក់នឹងអតីតបុគ្គលិកធ្លាប់បម្រើការងារអនឡាញនៅភ្នំបូកគោម្នាក់ទៀតដែលធ្លាប់ប្រាប់វិទ្យុអាស៊ីសេរីថា អ្នកគ្រប់គ្រង នោះមានតួនាទីល្បួងឱ្យភ្ញៀវបរទេសដែលបុគ្គលិករកបាន ដើម្បីនិយាយឱ្យភ្ញៀវផ្ញើគណនីធនាគារក្នុងការបញ្ជាទិញទំនិញខ្យល់ និងបញ្ចុះបញ្ចូល ដាក់លុយសម្រាប់ការវិនិយោគក្លែងក្លាយ។
ធន់ ចិន្តា៖«ឆាត(Chat)ជាមួយភ្ញៀវទាក់ទង ដើម្បីភ្ញៀវនិយាយអំពីរឿងដកដាក់លុយ ឬក៏ទិញអីវ៉ាន់បោកប្រាស់ របៀបបោកបញ្ឆោត។ ប៉ុន្តែ អាហ្នឹងគាត់[បុគ្គលិកជនបរទេស]ជាខ្សែរបស់គាត់ដូចជាក្រុមការងារ(Team Work)របស់គាត់ពីរបៀបធ្វើការបោកប្រាស់ របៀបធ្វើជាអ្នកជំនួយការទិញអីវ៉ាន់ខ្យល់»។
អគារក្រុមហ៊ុនឆបោកតាមអនឡាញភាគច្រើនមានសន្តិសុខយាមកាមតឹងរ៉ឹង ខណៈទីតាំងនៃអគារខ្លះ ថែមទាំងមានសមត្ថកិច្ចយាមកាមតាមខ្លោងទ្វារចេញចូលនៃអគារទៀតផង។ ក្រុមហ៊ុនឆបោកតាមអនឡាញតែងចល័ត ទីតាំងដូចជានៅខេត្តព្រះសីហនុ កណ្ដាល ក្រុងបាវិត ខេត្តស្វាយរៀង ទីក្រុងប៉ោយបែត និងនៅរាជធានីភ្នំពេញជាដើម។ នេះបើយោងតាមអតីតបុគ្គលិកធ្លាប់ធ្វើការក្នុងមជ្ឈមណ្ឌលទីក្រុងហេងហេង នៅក្រុងបាវិតដែលបានរាយការណ៍ប្រាប់វិទ្យុអាស៊ីសេរី។ ប្រភេទក្រុមហ៊ុនអនឡាញឆបោកតាមប្រព័ន្ធអនឡាញនៅកម្ពុជា កាលពីអំឡុងខែសីហា ឆ្នាំ២០២២ កន្លងមក ហាក់ស្ងប់ស្ងាត់ម្ដងហើយ បន្ទាប់ពីអតីតរដ្ឋមន្ត្រីក្រសួងមហាផ្ទៃលោក ស ខេង ដាក់បទបញ្ជារឹតបន្តឹងផ្នែកសន្តិសុខ ក្នុងយុទ្ធនាការប្រឆាំងអំពើជួញដូរ និងការឆបោកតាមប្រព័ន្ធអនឡាញ។ ប៉ុន្តែ នារយៈពេលចុងក្រោយនេះ ក្រុមហ៊ុនមួយចំនួននៅតែបន្តដំណើរការ និងប្រកាសស្វែងរកបុគ្គលិកជាបន្តបន្ទាប់។
វិទ្យុអាស៊ីសេរីបានទាក់ទងអ្នកប្រកាសស្វែងរកបុគ្គលិកបម្រើការតាមអនឡាញមួយចំនួន ដោយភាគច្រើនពួកគេនិយាយថា ជាប្រភេទការងារទាក់ទង និងឆ្លើយតបឆាត (Chat) ជាមួយភ្ញៀវ។
បុគ្គលិកកំពុងបម្រើការងារអនឡាញនៅខេត្តព្រះសីហនុ បុគ្គលិក ធន់ ចិន្តា ឱ្យវិទ្យុអាស៊ីសេរីដឹងទៀតថា ថៅកែជនជាតិចិនកម្រមិនបើកប្រាក់ខែឱ្យបុគ្គលិកខ្មែរ ហើយក្រុមថៅកែពុំហ៊ានយកបុគ្គលិកខ្មែរបង្ខាំងធ្វើទារុណកម្មនោះទេ ដ្បិតក្រុមថៅកែទាំងនោះភ័យខ្លាចបុគ្គលិកខ្មែរផ្សេងទៀតរាយការណ៍ប្រាប់សមត្ថកិច្ច។ បុគ្គលិករូបនោះ បញ្ជាក់ទៀតថា បុគ្គលិកជាជនជាតិចិន ឬបុគ្គលិកបរទេសផ្សេងទៀតត្រូវបានថៅកែចាប់ឃុំឃាំងធ្វើទារុណកម្ម ដោយសារតែពួកគេភាគច្រើនជំពាក់បំណុលថៅកែយកលុយទៅលេងល្បែង ហើយត្រូវបានថៅកែបង្ខំឱ្យរកលុយតាមរយៈការស្វែងរកភ្ញៀវតាមអនឡាញឱ្យក្រុមហ៊ុន។
បុគ្គលិក ធន់ ចិន្តា ឱ្យដឹងទៀតថា នៅពេលបុគ្គលិកបរទេសមិនអាចរកលុយសងថៅកែ ពួកគេមួយចំនួន បានសម្រេចធ្វើអត្តឃាតខ្លួនឯងក្នុងរូបភាពផ្សេងៗ។ បុគ្គលិក ធន់ ចិន្តា អះអាងថា ជនបរទេសដែលសម្រេចចិត្តបញ្ចប់ជីវិតដោយខ្លួនឯងតាមរយៈការលោតសម្លាប់ខ្លួនពីលើអគារ ក្នុងករណីខ្លះអាចមិនមែនជារឿងចៃដន្យនោះទេ ព្រោះពួកគេមិនអាចទ្រាំទ្រនឹងការឈឺចាប់ដោយសារតែទទួលរងការធ្វើទារុណកម្ម។
បុគ្គលិក ធន់ ចិន្តា៖«បើដឹងហែងចង់លួចចេញដឹងតែងាប់ប៉ុនវាហើយ។ បើវាចាប់បានម្ដងហើយថា ចិនហ្នឹងចង់លួចចេញអ៊ីចឹង វាអត់ទុកយូរទេវាឃុំឃាំងយកហ្មង ខ្សែគ្នាវា អ្នកស្គាល់អីក៏វាធ្វើដែរ ហើយបន្ទប់ឃុំឃាំងគ្នាវាពីរនាក់ បន្ទប់ងងឹតស្លុង ស្រែកម៉េចក៏មិនឮដែរ បន្ទប់គេមិនដឹងធ្វើពីស្អីទេ ស្រែកម៉េចស្រែកទៅ។ ចិនគ្នាវាពាក់តែលីអូទេបន្ទប់ងងឹតស្លុង ឃុំទុកនៅហ្នឹងយកបាយឱ្យហូបរហូតហ្នឹង ប៉ុន្តែ យើងអត់ហ៊ាននិយាយដែរហ្នឹងបើចេញចង់លួចរត់ដាក់ឃុំឃាំងហើយ។ ចិនខ្លះវាឈឺចិត្តពេកវាលោតពីលើអគារមកងាប់ក៏មាន លក្ខណៈថា ជីវិតវាអត់មានន័យខ្ចីគេក៏ច្រើន នៅក៏អត់ស្រួលទៀតវាមានតែបញ្ចប់ជីវិតវា»។
ទាក់ទងនឹងរឿងនេះដែរ ស្ថានទូតថៃប្រចាំកម្ពុជាកាលពីចុងខែធ្នូ ឆ្នាំ២០២៣ ប្រកាសថា មានជនជាតិថៃជាច្រើននាក់បានចាញ់បោកការបញ្ឆោតលួងលោមនៃបណ្ដាញទំនាក់ទំនងក្រុមហ៊ុន ឬ (Call Center) បញ្ចុះបញ្ចូលជនជាតិថៃថា មានការងារអាចមានចំណូលខ្ពស់នៅកម្ពុជា ប៉ុន្តែនៅពេលពួកគេមកធ្វើជាក់ស្ដែងមិនដូចនឹងអ្វីក្រុមហ៊ុនប្រកាសនោះទេ។ ស្ថានទូតថៃព្រមានដល់ ពលរដ្ឋខ្លួនត្រូវគិតគូរសិក្សាឱ្យបានច្បាស់មុននឹងសម្រេចចិត្តមកធ្វើការនៅកម្ពុជា។
កម្ពុជាបានស្ថិតក្នុងបញ្ជីនៃការតាមដានរបស់អាមេរិក ២ឆ្នាំចុងក្រោយនេះ ក្នុងចំណោមប្រទេសមានស្ថានភាពអាក្រក់ នៃអំពើជួញដូរមនុស្ស។ ទន្ទឹងគ្នានេះ អង្គការសហប្រជាជាតិ (UN) រកឃើញថា មនុស្សប្រមាណ ១សែននាក់ កំពុងរងគ្រោះនពីការបង្ខំឱ្យបម្រើការងារឆបោកតាមអនឡាញនៅកម្ពុជា។ របាយការណ៍អង្គការសហប្រជាជាតិបង្ហាញថា នៅទូទាំងសកលលោក អំពើឆបោកតាមអនឡាញ អាចរកចំណូលបានប្រមាណ ៧ពាន់ ៨រយលានដុល្លារ (៧,៨ ប៊ីលានដុល្លារ) ខណៈ ក្នុងតំបន់អាស៊ីអាគ្នេយ៍ អំពើឆបោកតាមអនឡាញ អាចរកបានចំណូលរាប់ពាន់លានដុល្លារ។
ពាក់ព័ន្ធបញ្ហានេះ វិទ្យុអាស៊ីសេរីមិនទាន់អាចទាក់ទង អនុប្រធានអចិន្ត្រៃយ៍នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស អ្នកស្រី ជូ ប៊ុនអេង និងស្នងការនគរបាលខេត្តព្រះសីហនុ លោក ស រដ្ឋា ដើម្បីសាកសួរអំពីរឿងនេះបានទេនៅថ្ងៃទី១៥ ខែមករា។
ប្រធានផ្នែកប្រយុទ្ធប្រឆាំងការជួញដូរមនុស្ស និងទេសន្តប្រវេសន៍ នៃអង្គការសង់ត្រាល់ (CENTRAL) លោក ឌី ថេហូយ៉ា មើលឃើញថា សមត្ថកិច្ចកម្ពុជាហាក់មិនបានខ្នះខ្នែងក្នុងប្រតិបត្តិការស្វែងរកជនរងគ្រោះ និងបង្កើនកិច្ចសហប្រតិបត្តិការល្អជាមួយអង្គការសង្គមស៊ីវិល និងអង្គការសហប្រជាជាតិដែលរកឃើញមនុស្សប្រមាណ ១សែននាក់កំពុងរងគ្រោះពីការបង្ខំឱ្យធ្វើការងារឆបោកតាមអនឡាញនៅកម្ពុជានោះទេ។ លោកពន្យល់ថា អំពើឆបោកតាមប្រព័ន្ធអនឡាញ គឺជាធាតុផ្សំមួយក្នុងទម្រង់នៃអំពើជួញដូរមនុស្សដែរ។ ប៉ុន្តែលោកថា ការឆបោកតាមប្រព័ន្ធអនឡាញនេះ អាចគ្រោះថ្នាក់ និងគួរឱ្យព្រួយបារម្ភជាងទម្រង់នៃអំពើជួញដូរមនុស្ស ដោយសារក្រុមបណ្ដាញក្រុមហ៊ុនឆបោកអាចមានមធ្យោបាយ ឬបច្ចេកវិទ្យាទំនើប និងយុទ្ធសាស្ត្រខ្ពស់ក្នុងការឆបោកមនុស្សឆ្លងដែន។
លោក ឌី ថេហូយ៉ា៖«ការជួញដូរមនុស្សតាមប្រព័ន្ធអនឡាញ ពួកនេះពូកែឆបោកតាមការទំនាក់ទំនងនាំយកមនុស្សពីឆ្លងដែនពីប្រទេសមួយទៅប្រទេសមួយ ហើយជាទូទៅរូបភាពនៃអំពើជួញដូរមនុស្សតាមអនឡាញនេះ វាជាសកម្មភាពមួយ ដែលបង្ខិតបង្ខាំង ជាទូទៅច្រើនយកមកដាក់មួយកន្តុបកន្លែងណា គឺចាក់សោ បិទរបងឱ្យនៅតែក្នុងរង្វង់ហ្នឹង។ យើងចង់ឃើញពីប្រសិទ្ធភាព ហើយបើការងារហ្នឹងត្រូវធ្វើ គឺធ្វើដោយតម្លាភាពមានន័យថា កុំចេះតែនិយាយ ហើយយើងចូលរួមជាមួយភាគីពាក់ព័ន្ធអង្គការសង្គមស៊ីវិលជាតិ អន្តរជាតិ ដែលធ្វើការលើវិស័យហ្នឹងបង្ហាញពីសកម្មភាពឱ្យច្បាស់លាស់ថា យើងពិតជាធ្វើមែន»។
លោក ឌី ថេហូយ៉ា លើកឡើងថា បើសមត្ថកិច្ចគ្មានឆន្ទៈ និងបង្កើនកិច្ចសហប្រតិបត្តិការល្អជាមួយអង្គការសង្គមស៊ីវិលជាតិ និងអន្តរជាតិ ក្នុងការប្រយុទ្ធប្រឆាំងអំពើឆបោកតាមអនឡាញ និងប្រឆាំងការជួញដូរមនុស្ស ប្រកបដោយតម្លាភាពនោះទេ នោះប្រទេសក្នុងតំបន់ និងសហគមន៍អន្តរជាតិនឹងសម្លឹងឃើញថា កម្ពុជាជាប្រទេសគ្មានសន្តិសុខ សុវត្ថិភាព។ លោកព្រមានថា ការណ៍នេះនឹងជះឥទ្ធិពលលើវិស័យសេដ្ឋកិច្ច និងការវិនិយោគនៅកម្ពុជាធ្ងន់ធ្ងរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។