កម្មករ​អូស​រទេះ​​​នៅ​ប៉ោយប៉ែត​ជា​ច្រើន​នាក់​តវ៉ា​ទាមទារ​ឱ្យ​អាជ្ញាធរ​បើក​​ច្រក​ព្រំដែន​ឡើង​វិញ

ដោយ ទីន ហ្សាការីយ៉ា
2020-09-10
Share

ក្រុម​កម្មករ​អូស​រទេះ អាជីវករ និង​ប្រជាពលរដ្ឋ​ប្រមាណ ៣០នាក់​នៅ​ក្រុង​ប៉ោយប៉ែត នៅ​ព្រឹក​ថ្ងៃ​ទី១០ កញ្ញា ប្រមូល​ផ្ដុំ​គ្នា​តវ៉ា​ស្នើ​ឱ្យ​អាជ្ញាធរ​ខ្មែរ​អន្តរាគមន៍​ទៅ​ភាគី​ថៃ សុំ​បើក​ច្រក​ទ្វារ​ព្រំដែន​អន្តរជាតិ​ប៉ោយប៉ែត​ឡើង​វិញ ដើម្បី​​ពួកគាត់​ប្រកប​របរ​រក​ប្រាក់​ចំណូល​ដោះស្រាយ​ជីវភាព​គ្រួសារ​។

ការ​តវ៉ា​នេះ​ ​ធ្វើ​ឡើង​ដោយ​សន្តិវិធី​ ដោយ​​ក្រុម​អ្នក​តវ៉ា​មាន​ពាក់​អាវ​យឺត​ស​ដៃ​ខ្លី​ ដែល​​​មាន​សរសេរ​​​ខ្លឹម​សារ​​នៅ​ខាង​មុខ​ផង​និង​ពី​ក្រោយ​ខ្នង​ផង​​ថា «អរគុណ​សន្តិភាព ​ ខ្ញុំ​សុំ​រស់​ផង» ដើម្បី​ប្រើ​ជា​សញ្ញា​សម្ដែង​មតិ​តាម​ដង​​ផ្លូវ​នៅ​ក្រុង​ប៉ោយប៉ែត។

​​​​​​​​កម្មករ​អូស​រទេះ​ម្នាក់​នៅ​ក្រុង​ប៉ោយប៉ែត​ លោក ទុំ រេន ថ្លែង​​​ថា ​មូលហេតុ​ដែល​ពួក​លោក​តវ៉ា​​ដោយសារ​​ចាប់​តាំង​ពី​អាជ្ញាធរ​កម្ពុជា​និង​ថៃ​បិទ​ច្រក​ទ្វារ​ព្រំដែន​​ប្រទេស​ទាំង​២​មក​ ​ពួក​លោក​​​បាត់បង់​ប្រាក់​ចំណូល​ទាំង​ស្រុង ហើយ​​គ្មាន​ការងារ​ធ្វើ​រក​ប្រាក់​ចំណូល​​ទិញ​ស្បៀង​អាហារ​ហូប​ចុក​​ប្រចាំ​ថ្ងៃ​​នោះ​ឡើយ​។​លោក​បញ្ជាក់​ថា ​ពាក្យ​ស្លោក​ដែល​​ពួក​លោក​ប្រើ​​​សម្ដែង​មតិ​នេះ​ ​ព្រោះ​ចង់​ឱ្យ​អាជ្ញាធរ​បាន​ដឹង​​​​​និង​ជួយ​ដោះស្រាយ​ពី​ទុក្ខ​លំបាក​របស់​ពលរដ្ឋ​នៅ​តំបន់​ព្រំដែន​កម្ពុជា​និង​ថៃ​ឱ្យ​បាន​ឆាប់៖ «ដោយសារ​ដាច់​បាយ​ដាច់​លុយ​ឱ្យ​កូន​រៀន អត់​មាន​លុយ​ឡើង​ធនាគារ​ ព្រោះ​អត់​មាន​អី​រក​។ខ្ញុំ​ចង់​ឱ្យ​គាត់​ដោះស្រាយ​ជា​មួយ​ថៃ​បើក​ច្រក​ទ្វារ​ព្រំដែន​ឡើង​វិញ​ ។​ព្រោះ​ខ្វះ​ខាត​អត់​លុយ​​អត់​កាក់​ ព្រោះ​តែ​លំបាក​ខ្លាំង​ហ្នឹង​បាន​នាំ​គ្នា​ធ្វើ​អីចឹង​ហ្នឹង​ហើយ​ ដើម្បី​ឱ្យ​​យើង​អរគុណ​សន្តិភាព​ទៅ​ ដើម្បី​ឱ្យ​រដ្ឋាភិបាល​បាន​ជួយ​អីចឹង​ទៅ»

ការ​តវ៉ា​នេះ​​អាជ្ញាធរ​បាន​ចាប់​យុវជន​ម្នាក់​​ គឺ​លោក ស៊ីម វណ្ណៈ​ បញ្ជូន​ទៅ​សាកសួរ​នៅ​អធិការដ្ឋាន​​នគរបាល​ក្រុង​ប៉ោយប៉ែត ប្រមាណ ៣ម៉ោង​ ដោយសារ​តែ​​យុវជន​រូប​នេះ​​​ថត​វីដេអូ​​​​​ក្រុម​អ្នក​តវ៉ា​ឡាយ​​​តាម​ហ្វេស​ប៊ុក​ នៅ​ពី​ព្រឹក​ថ្ងៃ​ទី​១០​កញ្ញា។ ប៉ុន្តែ ក្រោយ​មក ​​ប៉ូលិស​ដោះលែង​​​លោក ស៊ឹម វណ្ណៈ ​ វិញ​ ​ដោយ​ឱ្យ​លោក​ធ្វើ​កិច្ច​សន្យា បញ្ឈប់​ការ​ប្រមូល​ផ្ដុំ​គ្នា តវ៉ា​នៅ​ថ្ងៃ​ក្រោយ​ទៀត។

លោក ស៊ឹម វណ្ណៈ ប្រាប់​អាស៊ី​សេរី​ថា ​ក្នុង​ពេល​ធ្វើ​កិច្ចសន្យា​នោះ ប៉ូលិស​បាន​គំរាម​ចាប់​លោក​បញ្ជូន​ទៅ​តុលាការ​ប្រសិន​បើ​​​នាំ​គ្នា​តវ៉ា​នៅ​ថ្ងៃ​ក្រោយ​ទៀត៖ «បើ​យើង​អត់​ធ្វើ​គេ​អត់​ដោះលែង​យើង​មក​ទេ​។​វា​អយុត្តិធម៌​ណាស់​ព្រោះ​​យើង​អត់​មាន​ខុស​អី​ផង​គាត់​មក​សម្លុត​រក​វ៉ៃ​ខ្ញុំ​​ឱ្យ​ខ្ញុំ​ធ្វើ​កិច្ច​សន្យា​ជា​មួយ​ ខ្ញុំ​អត់​មាន​ខុស​ងី​ផង​ គ្រាន់​តែ​ថត​តាម​ផ្លូវ​​សាធារណៈ​គេ​ចោទ​ខ្ញុំ​ថា ញុះញង់​សង្គម​ យើង​អី​មួយ​ក៏​គេ​សម្លុត​ បើ​គេ​និយាយ​បាន​ បើ​ខ្ញុំ​និយាយ​ខុស​រហូត»

អាស៊ី​សេរី​មិន​អាច​ទាក់​ទង​អធិការ​នគរបាល​ក្រុង​ប៉ោយប៉ែត​លោក ធិន ស៊ិន​ដេត ដើម្បី​សុំ​អត្ថាធិប្បាយ​ជុំ​វិញ​បញ្ហា​បាន​ទេ​នៅ​ថ្ងៃ​ទី​១០ ​កញ្ញា ដោយ​ទូរស័ព្ទ​ចូល​ជា​ច្រើន​ដង​ពុំ​មាន​អ្នក​ទទួល។

​​អាស៊ី​សេរី​ក៏​បាន​ព្យាយាម​ទាក់ទង​​អភិបាល​ក្រុង​ប៉ោយប៉ែត​លោក​ គាត ហ៊ុល និង​ អភិបាល​ខេត្ត​បន្ទាយមានជ័យ​ លោក​ អ៊ុំ រាត្រី​ ​បន្ថែម​ទៀត​​ក៏​​នៅ​តែ​​ពុំ​មាន​ការ​ឆ្លើយ​តប។

ប៉ុន្តែ​​​​តំណាង​ក្រុម​អ្នក​តវ៉ា​ លោក​ទុំ រេន ​ ឱ្យ​ដឹង​ថា ​អភិបាល​ក្រុង​ប៉ោយប៉ែត​ លោក​ គាត ហ៊ុល​ បាន​ប្រាប់​​ពួក​លោក​​ថា ​ភាគី​ថៃ​មិន​អាច​បើក​ច្រក​ទ្វារ​ព្រំដែន​​តាម​ការ​ស្នើ​សុំ​របស់​​ក្រុម​អ្នក​តវ៉ា​នេះ​បាន​ទេ​ ដោយសារ​បារម្ភ​ខ្លាច​ឆ្លង​​ជំងឺ​កូវីដ១៩។

ក្រុម​អ្នក​តវ៉ា​បាន​រំសាយ​ត្រឡប់​ទៅ​ផ្ទះ​វិញ​ បន្ទាប់​ពី​អភិបាល​ក្រុង​ប៉ោយប៉ែត​បាន​សន្យា​នឹង​​​ចែក​ស្បៀង​ដល់​ពួកគាត់​​​​នៅ​ពេល​ខាង​មុខ។

ប្រធាន​សមាគម​ពង្រឹង​សេដ្ឋកិច្ច​ក្រៅ​ប្រព័ន្ធ​កម្ពុជា លោក ឌិន ពុទ្ធី មាន​ប្រសាសន៍​ថា ​​​​​ប្រជាពលរដ្ឋ​​តវ៉ា​​ដោយ​សន្តិវិធី​ ដើម្បី​ទាមទារ​ឱ្យ​​អាជ្ញាធរ​ដោះ​ស្រាយ​ពី​ទុក្ខ លំបាក​របស់​ពួកគាត់​ គឺ​ជា​សិទ្ធិ​សេរីភាព​សម្ដែង​មតិ​របស់​ពលរដ្ឋ​ស្រប​តាម​រដ្ឋធម្មនុញ្ញ។ លោក​ឱ្យ​ដឹង​ថា ​ពលរដ្ឋ​តវ៉ា​ ដោយសារ​អាជ្ញាធរ​​មិន​បាន​ផ្តល់​ស្បៀង​អាហារ​​ដល់​ពួកគាត់​​ម្ដង​ណា​នោះ​ទេ ​ស្រប​ពេល​ដែល​​ក្រុម​អ្នក​តវ៉ា​និង​​ប្រជាពលរដ្ឋ​ជា​ច្រើន​នាក់​ផ្សេង​ទៀត ​គ្មាន​ប្រាក់​ទិញ​អង្ករ​ច្រក​ឆ្នាំង៖ «ការ​ចែក​អំណោយ​ហ្នឹង​ចែក​ឱ្យ​វា​តម្លា​ភាព​ទាំង​អស់​គ្នា​ទៅ​ ព្រោះ​ប្រជាពលរដ្ឋ​បង់​ពន្ធ​ជូន​​រដ្ឋ​ដូច​គ្នា​ ពេល​ចែក​អំណោយ​ប្រជាពលរដ្ឋ​ត្រូវ​ទទួល​បាន​ដូច​គ្នា​ទៅ​។ លែង​វាត់​​ចែក​តែ​ខ្សែ​បក្ស​ពួក​​ឯង​ ដល់​ពេល​ប្រជាពលរដ្ឋ​មិន​បាន​ផង​ ហើយ​គ្នា​មិន​ក្ដៅ​ក្រហាយ​។ ដល់​គ្នា​ពាក់​អាវ​ទាមទារ​ឱ្យ​បើក​ច្រក​មក​គាបសង្កត់​គ្នា​​ចុះ​ទុក​​​ឱ្យ​គ្នា​ស្លាប់​ឬ​យ៉ាង​ម៉េច​។​ប្រជាពលរដ្ឋ​គាត់​អត់​ចង់​តវ៉ា​ទេ​ គាត់​ចង់​រស់​នៅ​សន្តិភាព​ ប៉ុន្តែ​សន្តិភាព​ហ្នឹង​​ឱ្យ​វា​មាន​សន្តិភាព​ផ្លូវ​កាយ​ផ្លូវ​ចិត្ត​ផង​ ។​កុំ​ឱ្យ​ផ្លូវ​កាយ​មាន​សន្តិភាព​ ប៉ុន្តែ​ចិត្ត​វា​អត់​ស្ងប់​ ដោយសារ​តែ​ក្រពះ​វា​ឃ្លាន​វា​អត់​មាន​អី​ហូប»

អាជ្ញាធរ​ថៃ​បាន​បិទ​ច្រក​ទ្វារ​ព្រំដែន​​អន្តរជាតិ​ប៉ោយប៉ែត​តាំង​ពី​ថ្ងៃ​ទី២៣ មីនា រហូត​មក​ ដើម្បី​ទប់​ស្កាត់​ការ​រាតត្បាត​​ជំងឺ​កូវីដ១៩ ហើយ​រហូត​មក​ដល់​ថ្ងៃ​ទី១០ កញ្ញា មិន​ទាន់​បើក​ច្រក​ទ្វារ​ព្រំដែន​ឡើង​វិញ​នៅ​ឡើយ​ទេ។

កាល​ពី​ថ្ងៃ​ទី១ មិថុនា អាជ្ញាធរ​ខេត្ត​បន្ទាយមានជ័យ​បាន​ដាក់​កង​កម្លាំង​រាប់​រយ​នាក់ ដើម្បី​ទប់​ស្កាត់​ពលរដ្ឋ​ដែល​មាន​គម្រោង​តវ៉ា​​នៅ​មុខ​ច្រក​ទ្វារ​អន្តជាតិ​ប៉ោយប៉ែត​ ក្នុង​បំណង​ទាមទារ​ឱ្យ​អាជ្ញាធរ​កម្ពុជា​និង​ថៃ​បើក​ច្រក​ទ្វារ​ព្រំដែន​ប្រទេស​ទាំង​២​ឡើង​វិញ ដោយសារ​តែ​ពួក​គាត់​បាត់បង់​ប្រាក់​ចំណូល​បណ្ដាល​មក​ពី​ការ​បិទ​ច្រក​ព្រំដែន​នេះ៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។